Fer Sir Ki Ou Retournen!
1 “Sa wi, nou’n ganny en bon konversasyon! Mon bezwen mazinen pour fer en retourn vizit ek sa dimoun.” Eski ou’n deza dir sa bann parol, apre pour oubliye kote sa dimoun i reste? Si i leka; alor ou konnen ki sel fason pour fer sir ki ou retournen, se met an ekrir.
2 Met Tou An Ekrir: Pandan ki en konversasyon i ankor fre dan ou lespri, pran en moman pour ekrir tou lenformasyon apropriye lo sa vizit. Not non sa dimoun e koman ou pou kapab rekonnet li. Ekrir son ladres, me pa zis devinen—verifye pour fer sir ki sa i korek. Not sa size ki ou’n koz lo la, bann verse Labib ki ou’n lir, e piblikasyon ki ou’n plas avek sa dimoun.
3 Si ou’n kit sa dimoun avek en kestyon pour reponn prosenn vizit, not sa kestyon. Eski ou’n aprann en keksoz lo sa dimoun, son fanmiy oubyen son larelizyon? Si i leka, pran not. Alor ler ou fer ou retourn vizit e ou mansyonn sa lenformasyon, i pou demontre ou lentere personnel pour sa dimoun. Finalman, enkli dat ek ler ou premye vizit e osi kan ou ti dir ou pou retournen. An prenan bann not egzakt, ou pou kapab byen rapel e sertennman ou pou kapab tenir ou promes pour retournen.—1 Tim. 1:12.
4 Enn fwa ki ou’n fini note, met ou not ansanm avek larestan ou lekipman predikasyon—sak, Labib, liv Comment Raisonner ek lezot piblikasyon—pour ki i pou fasil fer referans avek. I pli meyer pour not bann absan lo en lot fey separe avek bann not retourn vizit. Byensir, kanmenm ou byen pran not pour ou bann retourn vizit, sa ki pli enportan se ki ou fer sir ou retournen!
5 Mazin sa Dimoun: Ler ou pe prepare pour predikasyon, revwar ou bann not retourn vizit. Mazin sak endividi e ki lapros ti ava pli meyer servi ler ou fer sa retourn vizit. Mazinen koman ou pou devlop lentere sa dimoun pour konmans en letid Labib. Ler ou byen prepare koumsa, i pou kapab ogmant ou prodiktivite koman en proklanmater sa bon nouvel e osi ou lazwa personnel.—Prov. 21:5a.
6 Alor, prosenn fwa ki ou trouv en zorey ki pare pour ekoute, pa krwar ki ou pou fasilman rapel sa vizit. Plito, met an ekrir, revwar ou bann not, kontinyen mazin sa dimoun, e apre fer sir ki ou retournen!