Retourn vwar tou Dimoun ki’n montre en serten Lentere
1 En kantite parmi nou i dan laverite ozordi akoz en dimoun ti remark lentere ki nou ti montre pour sa mesaz Rwayonm. Avek pasyans sa dimoun ti revin vwar nou, petet plizyer fwa, pour devlop sa lentere. Pareyman nou devret fer zefor pour retourn vwar bann ki’n montre en serten lentere. Vreman, retourn vizit i form parti sa travay pour ‘fer bann disip.’—Mat. 28:19, 20.
2 Remark Lentere: Menm si en dimoun pa aksepte magazin, lekspresyon lo son figir, son ton lavwa, oubyen bann mo ki i servi i kapab montre lentere ki i annan pour sa mesaz Rwayonm. Lo sa baz nou kapab fer en retourn vizit. Pandan senk semenn en frer ti retourn vwar en dimoun san plas okenn magazin. Lo son sizyenm vizit, sa dimoun ti aksepte magazin e finalman en letid Labib ti konmanse.
3 Si ou remark okenn lentere, deswit revizit sa dimoun petet detrwa zour plitar. Pa donn loportinite “Dyab” pour retir sa ki’n ganny senmen dan leker sa dimoun. (Mat. 13:19) Si ou’n fer laranzman pour retourn vwar sa dimoun dan en letan spesifik fer sir pour gard ou parol.—Mat. 5:37.
4 Temwannyaz dan Semen: Eski ou pe fer zefor pour devlop lentere bann ki ou’n zwenn ler ou pe rann temwannyaz dan semen oubyen pe fer temwannyaz enformel? Alafen ou konversasyon, ou kapab dir: “Mon’n apresye nou konversasyon. Kote mon kapab zwenn ou pour nou kapab koz ankor?” Kan i apropriye, serten proklanmater i kapab swazir pour kit zot nimero telefonn avek sa dimoun enterese oubyen demande pour esanz zot nimero avek kanmarad. Si dimoun i vwar ou dan menm landrwa ler ou fer temwannyaz lo semen e ki ou regilye, sa pou fer zot pa ezite donn zot ladres oubyen nimero telefonn. Kantmenm zot refize donn lenformasyon ki mannyer pour kontakte zot, ou kapab kontinyen swiv zot lentere ler ou zwenn zot prosenn fwa lo semen.
5 Ler nou vwar nou bann plant ki nou’n byen aroze e kiltive fleri, sa i fer nou zwaye. Pareyman, nou kapab ganny bokou lazwa si nou retourn vwar e ed bann dimoun pour progrese spirityelman. (1 Kor. 3:6) Fer li ou lobzektif pour revizit bann ki montre en serten lentere.