Amelyor nou abilite pour prese—Fason pour reazir anver en met lakour ki byen ankoler

Akoz i enportan: Laplipar dimoun ki nou zwenn dan predikasyon i zantiy. Par kont, Zezi ti profetize ki serten dimoun pou ay nou. (Zan 17:14) Alor, i pa devret sirprann nou si nou rankontre en met lakour ki byen ankoler. Kan sa i arive, nou anvi reazir dan en fason ki fer plezir Zeova, sa enn ki nou pe reprezante. (Rom. 12:17-21; 1 Pyer 3:15, 16) Par fer sa nou pou anpes en sityasyon vin pli grav. Nou pou osi kapab rann en temwannyaz avek sa met lakour ek nenport ki, ki pe obzerve e sa pou fer zot pli pare pour ekoute ler en lot Temwen Zeova i pas kot zot.—2 Kor. 6:3.

Ki mannyer pour fer li:

Gard en latitid kalm e amikal. Sa pou ede apez sa sityasyon. Pa bezwen pran reaksyon sa met lakour tro personnel. (Ekle. 7:9) I kapab ankoler akoz son bann problenm personnel oubyen akoz ou’n vin kot li dan en move moman. Menm si i paret ki sa met lakour i agase par sa mesaz, souvan i akoz i’n ganny anbete.—2 Kor. 4:4.
Reponn an servan bann mo agreab. (Prov. 15:1) Eski ou’n lev li oubyen ou’n deranz li? Menm si nou pa eskiz nou lekor pour sa travay ki nou pe fer me nou kapab avek limilite demann leskiz si nou’n vin dan en move moman. Eski i ankoler akoz i’n tann en fo rimer lo nou? Si i leka ou kapab dir: “Mon kapab konpran akoz sa in ofans ou. Me, i paret ki sa ki ou’n tande lo nou i pa totalman vre. Eski mon kapab eksplik ou?” Eski i pa dakor avek enn nou bann krwayans, petet konsernan ekskli oubyen fason nou konsider disan? Ou kapab dir: “Mon konpran. Lezot osi i annan menm pwennvi. Eski mon kapab montre ou sa lansennyman dan Labib?”
Si sa dimoun i vreman ankoler, i pou pli bon ale san esey reponn li. Si i demande pour Temwen Zeova pa pas kot li ankor, ou kapab asir li ki nou pou fer sa ki i’n demande.

Esey sa pandan sa mwan:

Fer bann repetisyon pandan Ladorasyon Fanmir.
Apre ki ou’n kit lakaz en met lakour ki byen ankoler, diskit avek sa proklanmater ki ou pe travay avek lo ki mannyer nou ti’n kapab amelyor nou reaksyon.