Ki mannyer ou kapab onor Zeova ler ou pe pwente?

1-2. Ki mannyer serten ki pe pwente i santi?

LER de Kretyen selibater pe aprann konn kanmarad, sa i en letan ki eksitan e ki gou pour zot. Si ou pe pwente nou asire ki ou anvi ki keksoz i pas byen e pour en kantite dimoun ki pe pwente, i sanmenm sa ki arive. En ser ki apel Tsiona ki reste Letyopi i dir: “Ler mwan ek mon msye ti pe pwente, sa ti enn bann moman pli zwaye dan mon lavi. Nou ti koz lo bann keksoz serye me nou ti osi riye. Mon ti vreman kontan ler mon ti realize ki mon ti’n trouv en dimoun ki mon kontan e ki kontan mwan.”

² De lot kote en frer ki apel Alessio ki reste Pei Ba, i dir: “Mon ti vreman kontan pour aprann konn mon madanm ler nou ti pe pwente, me nou ti osi rankontre bann difikilte.” Dan sa lartik nou pou vwar serten difikilte ki de dimoun ki pe pwente i kapab rankontre e serten prensip Labib ki kapab ed zot pour fer bann desizyon ki saz. Nou pou osi vwar ki mannyer bann frer ek ser i kapab siport bann ki pe pwente.

AKOZ DE SELIBATER I KAPAB DESIDE POUR PWENTE?

3. Akoz de Kretyen selibater i pwente? (Proverb 20:25)

³ Menm si sa letan kot de Kretyen pe pwente i kapab gou, zot osi bezwen realize ki sa i en letap serye ki kapab anmenn ver maryaz. Zour zot maryaz, en koup i fer en ve devan Zeova, pour zot kontan e respekte kanmarad osi lontan ki zot vivan. Avan ki nou fer okenn ve, nou devret reflesir byen lo sa ki sa ve i enplike. (Lir Proverb 20:25.) Sa i enportan sirtou ler ou pe fer en ve maryaz. Ler de dimoun pe pwente, sa i ed zot pour aprann konn kanmarad e pour fer en bon desizyon. I annan ki deside pour marye me i annan ki deside pour aret pwente. Si de dimoun i aret pwente, sa pa vedir ki zot in fer en keksoz mal. Anfet, lobzektif e rezon akoz de dimoun i pwente i pour zot kapab fer en desizyon konsernan si zot pou marye oubyen non. Alor si zot deside pour aret pwente, zot in atenn sa lobzektif setadir zot in aprann konn kanmarad e sa in ed zot pour fer en bon desizyon.

4. Akoz nou devret konpran rezon akoz de dimoun i pwente?

⁴ I enportan pour bann Kretyen selibater konpran rezon akoz de dimoun i konmans pwente. Ler zot konpran sa, zot pa pou pwente avek en dimoun ki zot pa anvi marye avek. Me pa zis bann selibater ki bezwen konpran rezon akoz de dimoun i konmans pwente. Nou tou nou bezwen konpran sa. Par egzanp, i annan serten ki krwar ki si de dimoun i konmans pwente zot bezwen marye. Ki lefe sa kalite latitid i kapab annan lo bann selibater? En ser selibater ki apel Melissa ki reste Leta-z-ini i dir: “I annan en kantite presyon lo bann selibater ki pe pwente. Sa i fer ki serten i kontinyen pwente menm si keksoz pa pe mars byen. Lezot selibater i evit bann sityasyon ki kapab donn lezot lenpresyon ki zot pe pwente. Tousala i kapab met bann selibater anba presyon.”

APRANN KONN KANMARAD BYEN

5-6. Ki de selibater ki pe pwente i bezwen konnen lo kanmarad pandan ki zot pe pwente? (1 Pyer 3:4)

⁵ Si ou pe pwente, kwa ki pou ed ou deside si ou pou marye avek sa dimoun oubyen non? Zot bezwen aprann konn kanmarad byen. I tre probab ki ou ti deza konn serten keksoz lo sa dimoun avan ki ou ti konmans pwente avek li. Me aprezan, ou annan sa loportinite pour aprann konn ‘sa ki sa dimoun i ete anndan dan son leker.’ (Lir 1 Pyer 3:4.) Sa i vedir ki ou kapab aprann plis konsernan son lanmitye avek Zeova, son personnalite ek son fason panse. Avek letan, ou devret kapab reponn bann kestyon parey sa bann kestyon swivan: ‘Eski sa dimoun pou en bon konzwen pour mwan?’ (Prov. 31:26, 27, 30; Efe. 5:33; 1 Tim. 5:8) ‘Eski mon kapab donn li sa lanmour ek latansyon ki i bezwen e eski li i kapab donn mwan sa lanmour ek latansyon ki mwan mon bezwen? Eski i pou fasil pour mwan viv ek son bann defo?’b (Rom. 3:23) Anmezir zot aprann konn kanmarad, rapel ki sa ki pli enportan i pa si zot parey me i lefet ki zot pare pour adapte avek kanmarad.

⁶ Ki lezot keksoz ou devret konnen lo sa dimoun pandan ki zot pe pwente? Avan ki ou konmans annan bann santiman for pour sa dimoun, i ti pou byen ki zot koz lo bann keksoz enportan par egzanp lo bann lobzektif ki sa dimoun i annan. Me eski ou devret koz lo bann keksoz personnel par egzanp problenm lasante, problenm larzan ouswa bann move keksoz ki’n arive avek ou dan lepase ki’n annan en lefe lo ou fason panse, santiman ouswa konportman? Ou pa bezwen koz lo tou keksoz ler zot fek konmans pwente. (Konpar Zan 16:12.) Si ou santi ki i tro boner pour reponn serten kestyon personnel, les sa dimoun konnen. Me avek letan, ou pou bezwen koz onnetman lo sa bann topik parski sa dimoun pou bezwen konn sa bann lenformasyon pour li kapab fer en bon desizyon.

7. Ki mannyer de selibater ki pe pwente i kapab aprann konn kanmarad? (Vwar sa bwat “Ler ou pe pwente avek en dimoun ki reste lwen.”) (Vwar portre.)

⁷ Ki mannyer ou kapab konnen ki mannyer sa dimoun i vreman ete? Ou kapab fer sa par demann bann kestyon e ekout kanmarad atantivman. Zot tou le de zot bezwen eksprim zot santiman e donn bann larepons ki onnet. (Prov. 20:5; Zak 1:19) Petet zot kapab fer bann keksoz ki pou donn zot loportinite pour zot koze. Par egzanp zot kapab pran en repa ansanm, al marse dan bann landrwa piblik ansanm e fer predikasyon. Zot osi kapab aprann konn kanmarad ler zot pas letan avek zanmi ek fanmir. Osi ou kapab plàn bann aktivite ki pou ed ou vwar ki mannyer sa dimoun i konport li dan diferan sirkonstans e avek diferan dimoun. Annou vwar sa ki en frer ki apel Aschwin ki reste Pei Ba ti esey fer ler i ti pe pwente avek Alicia. I dir: “Nou ti rod bann aktivite ki pou ed nou aprann konn kanmarad pli byen. Parfwa sa ti bann senp keksoz par egzanp, prepar en repa ansanm oubyen fer louvraz ansanm. Pandan sa bann aktivite, nou ti vwar bann defo kanmarad e nou bann bon kalite.”

8. Ki byenfe de dimoun ki pe pwente i kapab gannyen ler zot etidye ansanm?

⁸ Zot osi kapab aprann konn kanmarad par etidye bann topik dan Labib ansanm. Si zot marye, zot pou bezwen fer ladorasyon fanmir pour ki Bondye i zwe en rol enportan dan zot maryaz. (Ekle. 4:12) Alor akoz zot pa fer letan pandan ki zot pe pwente pour etidye ansanm? Byensir de dimoun ki pe pwente pa ankor vin en fanmir alor sa frer pa sef sa ser. Kantmenm sa, ler zot regilyerman etidye ansanm, ou pou kapab aprann konsernan sa lanmitye ki sa lot dimoun i annan avek Zeova. Max ek Laysa, en koup ki reste Leta-z-ini ti vwar en lot byenfe ki zot gannyen ler zot etidye ansanm. Max i dir: “Ler nou ti fek konmans pwente, nou ti etidye bann piblikasyon ki koz lo pwente, maryaz ek lavi fanmir. Sa bann piblikasyon ti fer li pli fasil pour nou koz lo bann keksoz enportan ki ti pou difisil pour koz lo la.”

LEZOT KEKSOZ KI OU DEVRET REFLESIR LO LA

9. Ki keksoz ki de dimoun ki pe pwente i devret pran an kont ler zot pe deside lekel ki zot pou dir zot pe pwente?

⁹ Avek lekel ki ou devret dir ki ou pe pwente? Sa de dimoun ki pe pwente ki pou desid sa. Ler ou fek konmans pwente, petet ou kapab deside pour pa dir bokou dimoun. (Prov. 17:27) Sa pou fer ki ou pou evit en kantite kestyon e ou pou evit bann presyon ki ou kapab gannyen pour fer en desizyon. De lot kote, si ou pa dir personn, sa i kapab fer zot izol zot lekor pour ki lezot pa konnen ki zot pe pwente. Me i pou danzere pour zot tousel zis zot de. Alor i ti pou saz pour omwen dir bann frer ek ser ki kapab donn zot bon konsey e ed zot dan lezot fason. (Prov. 15:22) Par egzanp, ou kapab dir serten manm ou fanmir, bann zanmi ki matir oubyen bann ansyen dan kongregasyon.

10. Ki de dimoun ki pe pwente i kapab fer pour fer sir ki zot konportman i onor Zeova? (Proverb 22:3)

¹⁰ Ki mannyer ou kapab onor Zeova ler ou pe pwente? Anmezir zot santiman i vin pli for, zot pou pli atire ver kanmarad. Kwa ki pou ed ou evite fer okenn keksoz ki pa fer Zeova plezir? (1 Kor. 6:18) Evite annan bann konversasyon imoral, pa pas letan zis zot de tousel e pa bwar tro bokou. (Efe. 5:3) Bann keksoz koumsa i kapab fer bann dezir seksyel vin pli for e fer li pli difisil pour fer sa ki byen. I ti pou saz si zot regilyerman koz lo ki mannyer zot kapab demontre respe pour kanmarad e swiv bann standar Zeova pandan ki zot pe pwente. (Lir Proverb 22:3.) Remark sa ki ti ed Dawit ek Almaz ki reste Etyopi. Zot dir: “Nou ti pas letan avek kanmarad dan bann landrwa kot i ti annan bokou dimoun oubyen avek lezot zanmi. Nou pa ti zanmen nou tousel dan en loto oubyen dan en lakaz. Sa ti fer ki nou ti evit bann sityasyon kot nou ti kapab ganny tante pour fer sa ki mal.”

11. Ki keksoz de dimoun ki pe pwente i devret reflesir lo la ler zot pe deside si zot pou demontre lafeksyon anver kanmarad?

¹¹ Eski de dimoun ki pe pwente i devret demontre lafeksyon pour kanmarad? Anmezir ki zot lanmour pour kanmarad i vin pli for, petet zot pou deside pour montre zot lafeksyon pour kanmarad. Me si ou dezir seksyel i for, i pou difisil pour ou fer en desizyon ki saz konsernan sa dimoun. (Sal. 1:2; 2:6) Osi, ler ou demontre lafeksyon, i kapab fasil pour perdi kontrol lo ou lekor e fer en keksoz ki pa fer Zeova plezir. (Prov. 6:27) Alor, depi o konmansman ler zot fek konmans pwente, koz lo bann standar Zeova e sa ki zot pou fer e pa fer ler zot pe demontre lafeksyon.c (1 Tesa. 4:3-7) Ler zot pe koze ansanm, koz lo bann kestyon parey: ‘Ki mannyer bann dimoun dan sa landrwa kot nou reste pou reazir ler nou demontre lafeksyon anver kanmarad? Eski ler nou demontre lafeksyon anver kanmarad, sa pou fer nou bann dezir vin pli for?’

12. Ki de dimoun ki pe pwente i devret pran kont ler zot rankontre problenm e ler zot pa tonm dakor?

¹² Ki zot pou fer si zot rankontre problenm oubyen zot pa tonm dakor lo en keksoz? Si tanzantan zot pa tonm dakor, eski sa i vedir ki zot relasyon pa pe marse? Pa neseserman. Tou koup pa tonm dakor parfwa. Dan en maryaz ki for, i annan de dimoun ki pare pour travay ansanm menm si zot pa tonm dakor lo en keksoz. Alor, lafason ki zot rezourd bann problenm la konmela i kapab montre si zot maryaz pou reisi oubyen non. Ler zot pe koze ansanm, koz lo bann kestyon parey: ‘Eski nou kapab diskit lo bann problenm dan en fason kalm e avek respe? Eski nou pare pour admet ki nou annan nou bann defo e nou fer zefor pour amelyore? Eski nou vitman pare pour sede, demann leskiz e pardonnen?’ (Efe. 4:31, 32) Me si pandan ki zot pe pwente zot toultan pa tonm dakor, i tre probab ki keksoz pa pou amelyore apre ki zot in marye. Si ou realize ki sa dimoun pa pou en bon konzwen pour ou, i ti pou byen pour zot tou le de si zot aret pwente.d

13. Kwa ki kapab ed de dimoun ki pe pwente pour deside ki kantite letan zot pou pwente?

¹³ Ki kantite letan zot devret pwente? Ler nou pa pran ase letan pour reflesir avan nou fer en desizyon, souvandfwa keksoz pa mars byen. (Prov. 21:5) Alor, zot devret pran ase letan pour pwente pour zot kapab konn kanmarad pli byen. Me zot pa devret pwente pour en kantite letan si i pa neseser. Labib i osi dir: “Ler en dimoun pe esper en keksoz arive me i pa arive, sa i fer son leker malad.” (Prov. 13:12) Anmezir ki zot pas letan ansanm, i kapab vin pli difisil pour zot reziste sa tantasyon pour fer sèks. (1 Kor. 7:9) Olye konsantre lo sa kantite letan ki zot pe pwente, ou kapab demann ou lekor: ‘Eski i annan lezot keksoz ki mon bezwen konnen lo sa dimoun pour mwan kapab fer en desizyon?’

KI MANNYER LEZOT I KAPAB SIPORT DE DIMOUN KI PE PWENTE?

14. Ki mannyer lezot i kapab ankouraz e ed de dimoun ki pe pwente? (Vwar portre.)

¹⁴ Eski ou konn de dimoun ki pe pwente? Ki mannyer ou kapab ed zot? Nou kapab envit zot pour pran en repa avek nou, pour ladorasyon fanmir oubyen pour en moman detant. (Rom. 12:13) Dan sa bann moman koumsa, zot pou kapab aprann konn kanmarad pli byen. Nou kapab ed zot dan lezot fason. Pour zot pa zis zot de tousel, petet nou kapab al avek zot bann landrwa, vwayaz avek zot dan transpor oubyen envit zot kot nou lakour. (Gal. 6:10) Alicia, ki’n ganny mansyonnen pli boner i koz lo sa ki bann frer ek ser ti fer ki li ek Aschwin ti apresye. I dir: “Nou vreman kontan ki serten frer ek ser ti dir ki nou kapab vin kot zot si nou bezwen en landrwa kot nou pa tousel pour nou pas letan ansanm.” Si de dimoun ki pe pwente i demann ou pour pas letan avek zot pour zot pa tousel, vwar sa konman en privilez parski ou pe ed ou bann zanmi. Fer atansyon ki ou pa kit sa de dimoun tousel. Me ou osi bezwen konpran kan ki ou bezwen les zot koz an prive.—Fili. 2:4.

15. Ki lezot keksoz bann zanmi i kapab fer pour ed de dimoun ki pe pwente? (Proverb 12:18)

¹⁵ Nou kapab osi ankouraz bann ki pe pwente par sa ki nou dir e sa ki nou pa dir. Parfwa nou zis bezwen annan kontrol lo nou lekor e pa dir nanryen. (Lir Proverb 12:18.) Par egzanp, i kapab ki nou vreman anvi dir lezot ki de dimoun in konmans pwente. Me i kapab ki sa de dimoun i anvi dir lezot zot menm. Nou pa devret donn nouvel sa de dimoun oubyen kritik zot lo bann keksoz personnel. (Prov. 20:19; Rom. 14:10; 1 Tesa. 4:11) Osi, nou pa devret dir bann keksoz ouswa demann kestyon ki kapab fer sa de dimoun santi ki zot devret marye oubyen ki zot pou marye. Elise ek son msye i dir: “Nou ti anbarase ler lezot ti demann nou konsernan bann plan pour nou maryaz menm si nou, nou pa ti ankor koz lo la.”

16. Ki mannyer nou devret reazir si de dimoun ki pe pwente i aret pwente?

¹⁶ Ki mannyer nou devret reazir si de dimoun i aret pwente? Nou devret evite demann bann kestyon ki tro personnel oubyen blanm enn ant sa de dimoun. (1 Pyer 4:15) En ser ki apel Lea i dir: “Mon ti tande ki lezot ti pe donn zot lopinyon lo rezon akoz zot krwar nou de en frer ti’n aret pwente. Sa ti bles mon santiman en kantite.” Parey nou’n vwar pli boner, si de dimoun ki pe pwente i deside pour aret pwente, nou pa devret krwar ki zot in fer en move desizyon. Normalman, ler de dimoun i aret pwente sa i vedir ki zot in atenn zot lobzektif setadir, zot in arive fer en bon desizyon. Kantmenm sa, sa desizyon i kapab fer zot sagren e apre sa zot kapab santi zot tousel. Alor nou kapab rod fason pour ed e ankouraz zot.—Prov. 17:17.

17. Ki de dimoun ki pe pwente i devret kontinyen fer?

¹⁷ Parey nou’n vwar dan sa lartik, ler de dimoun pe pwente, zot kapab rankontre problenm. Me i osi en moman zwaye. Jessica i dir: “Onnetman, pwente i enplik en kantite keksoz ki demann bokou zefor. Me mon kontan ki nou ti servi nou letan ek lenerzi pour aprann konn kanmarad byen.” Si ou pe pwente, kontinyen fer zefor pour aprann konn kanmarad byen. Si zot fer sa, zot tou le de zot pou kapab fer en desizyon ki saz.