Devlop Lenformasyon dan en Fason lozik

AVAN ki lenformasyon i kapab ganny organize dan en fason lozik, ou bezwen annan en lobzektif antet. Eski ou lobzektif se senpleman pour enform lezot konsernan en serten topik spesifik—en krwayans, en latitid, en kalite, en serten kalite kondwit, oubyen en fason viv? Eski ou ekspekte prouve oubyen dezaprouv en serten lide? Eski ou lobzektif se pour batir lapresyasyon pour serten keksoz oubyen pour motiv lezot pour azir? Ki swa ou pou prezant ou lenformasyon avek en dimoun oubyen avek en gran lodyans, pour fer li dan en fason efikas, ou bezwen pran an konsiderasyon sa ki zot deza konnen lo sa topik e ki zot latitid anver sa topik. Apre ki ou’n fer sa, prepar ou lenformasyon dan en fason ki pou ed ou akonpli ou lobzektif.

Konsernan minister Sol (Pol) an Damas, Akt 9:22, i raporte ki i ‘ti konfront bann Zwif ki ti Damas par prouve [lozikman, NW] ki Zezi ti li menm Mesi.’ Ki sa laprev lozik ti enkli? Parey i ganny endike dan rikord minister Pol enpe plitar an Antyos ek Tesalonik, premyerman, Pol ti baz son parol lo lefe ki bann Zwif ti aksepte lekritir Ebre e ki zot ti pretann pour krwar sa ki bann lekritir i dir lo Mesi. Apre, parmi sa bann Lekritir, i ti swazir serten porsyon ki annan pour fer avek lavi ek minister Mesi. I ti sit sa verse e konpar zot avek sa ki ti vreman arive an rapor avek Zezi. Finalman, i ti tir sa konklizyon evidan, ki Zezi i Kris oubyen Mesi. (Akt 13:16-41; 17:2, 3) Si ou osi ou prezant laverite ki dan Labib dan en fason lozik, i kapab annan en lefe konvenkan lo lezot.

Organiz sa Prezantasyon. Lenformasyon i kapab ganny aranze dan plizyer diferan fason ki lozik. Si ou vwar li itil, ou kapab servi diferan metod ansanm. Konsider detrwa posibilite.

Aranz par topik. Sa i enplik organiz ou lenformasyon dan bann seksyon, sakenn i kontribye anver ou lobzektif. Sa bann seksyon i kapab bann pwen prensipal ki enportan pour arive konpran ou size. Zot kapab bann largiman spesifik ki prouve oubyen dezaprouv serten keksoz. Serten pwen, kantmenm zot relye avek sa size, i kapab ganny azoute oubyen retire, depandan lo ou lodyans oubyen ou lobzektif.

Konsider en legzanp en laranzman par topik. En prezantasyon kourt konsernan non Bondye i kapab enkli (1) akoz i enportan pour konn Bondye par son non, (2) lekel non Bondye, e (3) konman nou kapab onor sa non.

Par egzamin bann piblikasyon ki “lesklav fidel e pridan” in fer pour servi dan bann letid Labib kot lakour, nou kapab aprann bokou lo laranzman par topik. (Mat. 24:45, NW) Sa bann piblikasyon i normalman kontyen plizyer size, ki kapab ed en etidyan ganny en pwenn-vi zeneral lo bann laverite debaz Labib. Bann pli gro liv i servi bann soutit pour diviz sak sapit. Sak topik i prepar sa etidyan pour sa lenformasyon ki swiv apre e kontribye anver lide zeneral sa piblikasyon.

Lakoz ek lefe. Rezonn avek en dimoun par konmans avek lakoz ziska lefe i en lot metod pour prezant lenformasyon dan en fason lozik.

Sa lapros i pou efikas ler ou pe koz avek en group oubyen serten endividi ki bezwen egzamin pli oprofon konsekans serten keksoz ki zot pe fer oubyen ki zot deside pour fer. Proverb sapit 7 i fourni en legzanp ekselan lo sa. Dan en fason vivan i dekrir konman ki en zennonm san leksperyans ki “mank leker” (lakoz) ti enplike avek en prostitye e soufer move konsekans (lefe).—Prov. 7:7.

Pour azout plis lanfaz, ou kapab konpar bann move konsekans ki ariv avek bann ki pa mars dan semen Zeova avek bon konsekans ki ariv avek bann ki ekout Zeova. Motive par lespri Zeova, Moiz ti fer en tel diferans ler i ti koz avek nasyon Izrael avan ki zot ti antre dan Later Promiz.—Det., sapit 28.

Dan serten ka, i pli meyer pour konmans ou diskisyon par idantifye en sitiasyon (lefe) e apre prezant levidans ki montre bann fakter ki kontribye pour sa sitiasyon arive (lakoz). Sa i souvan enplik en lot metod ki enkli en problenm ek son solisyon.

Problenm ek solisyon. Dan predikasyon, ler ou diskit en problenm ki konsern dimoun e montre ki i annan en solisyon satisfezan, sa i kapab ankouraz en dimoun pour ekoute. Sa problenm i kapab enn ki ou menm ou souleve oubyen serten keksoz ki lezot dimoun i dir.

En tel problenm i kapab bann fe ki dimoun i vin vye e mor, krim partou, oubyen lenzistis ki popiler. Napa nesesite pour fer en gran diskisyon pour montre ki i annan en tel problenm, akoz i evidan. Senpleman konmans avek en referans lo sa problenm, e apre prezant solisyon ki Labib i ofer.

Parkont, sa problenm i kapab konsern direkteman sa dimoun, par egzanp bann defi ki en paran tousel i fer fas avek, dekourazman pour rezon maladi grav, oubyen difikilte ki en dimoun pe eksperyanse akoz move tretman par en lot dimoun. Pour fer pli gran dibyen, ou devret premyerman vin en dimoun ki ekout byen. Labib i fourni lenformasyon itil lo tou sa bann problenm. Me i bezwen ganny servi avek disernman. Pour ki sa lot dimoun i vreman benefisye avek ou diskisyon, ou bezwen realistik. Ou bezwen fer kler sa ki ou pe diskite, ki swa i en solisyon permanan, en soulazman pour enpe letan, oubyen senpleman konman pour andire avek en sitiasyon ki pa pou sanze dan sa sistenm. Andotmo, fer sir ki ou rezonnman Biblik ki ou ofer i ase pour siport konklizyon ki ou fer. Sankwa, sa solisyon ki ou fer resorti i kapab pa paret ditou lozik pour sa lot dimoun.

Lord kronolozik. Serten lenformasyon i ganny prezante pli natirelman dapre lord kronolozik. Par egzanp, dan liv Egzod, sa Dis Fleo i ganny prezante dan lord ki zot ti arive. Dan Ebre sapit 11, zapot Pol ti fer en lalis bann zonm ek fanm ki egzanpler dan lafwa dapre lord kronolozik.

Si ou rakont bann levennman dan lepase dan lord kronolozik, sa i kapab ed ou lodyans pour konpran konman ki serten sirkonstans ti devlope. Sa i aplik pour listwar letan modern osi byen pour bann levennman dan letan Labib. Alor ou kapab pe konbin aktivite kronolozik avek en rezonnman dan stil lakoz ek lefe. Si ou deside pour detay bann levennman ki Labib i montre pou arive dan lavenir, i tre probab ki en prezantasyon kronolozik pou pli fasil pour ou lodyans swiv e rapel sa bann levennman.

Servi en lapros kronolozik pa vedir ki ou devret toultan konmans okonmansman. Dan serten ka, i kapab pli efikas pour rakont en resi ler ki ou’n ariv dan en moman enportan sa zistwar. Par egzanp, ler pe rakont en leksperyans, ou kapab swazir pour rakont en moman kot lentegrite en dimoun avek Bondye ti ganny teste. Apre ki ou’n stimil lentere avek sa porsyon dan sa resi, ou kapab rakont dan lord kronolozik bann detay ki’n anmenn ver sa sitiasyon.

Servi selman Lenformasyon ki relye avek sa Tenm. Nenport fason ki ou servi pour organiz ou lenformasyon, touzour fer atansyon pour servi zis sa bann ki relye avek sa tenm. Tenm ou ekspoze i devret annan serten lefe lo lenformasyon ki ou swazir. Konpozisyon ou lodyans i osi devret ganny konsidere. Pour en lodyans, en serten pwen i kapab esansyel, tandis ki pour en lot group i kapab pa neseser. Ou devret osi fer sir ki tou ou lenformasyon pou kontribye anver lakonplisman ou lobzektif. Sansan, kantmenm ou prezantasyon i kapab enteresan, i kapab perdi son lefikasite.

Ler pe fer resers, ou kapab trouv en kantite lenformasyon enteresan ki relye avek sa topik. Ki kantite lenformasyon ki ou devret servi? Si ou noy lodyans avek tro bokou lenformasyon, ou kapab pa akonpli ou lobzektif. Detrwa pwen prensipal ki ganny byen devlope pou ganny rapele pli fasilman olye ki en kantite lide ki ganny prezante vitman. Sa i pa vedir ki bann lenformasyon ki mwen enportan pa devret zanmen ganny enkli. Me pa les zot etouf ou lobzektif. Remarke ki kantite detay ki ti ganny mete avek swen dan Labib dan Mark 7:3, 4 ek Zan 4:1-3, 7-9.

Anmezir ki ou avanse lo en pwen pour en lot, fer atansyon pour pa fer li dan en fason san ekspekte ki ou lodyans pa vwar konman ki ou bann lide i relye ansanm. Pour ki bann lide i al dan menm direksyon dan en fason efikas, petet ou bezwen fer en konneksyon ant de lide diferan. Sa konneksyon i kapab en group mo oubyen i kapab en fraz konplet ki montre relasyon ant bann lide. Dan bokou langaz, bann mo oubyen fraz senp ki zwenn bann fraz ansanm i ganny servi pour montre relasyon ant en nouvo lide avek sa enn avan.

Par servi selman lenformasyon ki itil e aranz zot dan en lord lozik, sa pou ed ou akonpli ou lobzektif.