Konklizyon efikas

PETET ou’n byen fer resers e organiz sa lenformasyon pour parti prensipal ou diskour. Petet ou’n osi prepar en lentrodiksyon ki stimil lentere. Toudmenm, i annan ankor en keksoz ki neseser—en konklizyon efikas. Pa diminyen son lenportans. Sa ki ou dir dernyen i souvan ganny rapel pli lontan. Si sa konklizyon i feb, menm sa ki ganny prezante pli boner i kapab perdi son lefikasite.

Konsider legzanp swivan: Ver lafen son lavi, Zozye ti donn en diskour inoubliyab avek bann ansyen dan nasyon Izrael. Apre ki i ti’n rakont fason azir Zeova avek Izrael depi letan Abraam, eski Zozye ti senpleman repet bann pwen for dan laform en rezimen? Non. Okontrer, avek profon santiman i ti ensit lepep: “Annan lakrent pour Zeova e servi li avek lentegrite e avek laverite.” Lir pour ou menm konklizyon Zozye, rikorde dan Zozye 24:14, 15.

En lot diskour remarkab i trouve dan Akt 2:14-36, ki zapot Pyer ti fer avek en lafoul an Zerizalenm zour Lafet Lapannkot 33 N.L. Premyerman, i ti eksplike ki zot ti pe temwanny lakonplisman profesi Yoel konsernan resevwar lespri Bondye. Apre i ti montre konman sa ti relye avek bann profesi Mesyanik dan bann Psonm, ki ti predir rezireksyon Zezi Kri ek son glorifikasyon lo kote drwat Bondye. Apre, dan son konklizyon, Pyer ti klerman dir sa keksoz ki tou dimoun dan son lodyans ti bezwen fer fas avek. I ti dir: “Tou pep Izrael i devre alor konnen avek sertitid ki sa Zezi ki zot in klout lo [poto, NW], limenm ki Bondye in fer Senyer ek Mesi.” Sa bann ki ti prezan ti demande: “Frer, ki nou devre fer?” Alor Pyer ti reponn: “Sanz zot lavi e ki sakenn ant zot i ganny batize o non Zezi-Kri.” (Akt 2:37, 38) Sa zour apepre 3,000 dimoun dan son lodyans, ti aksepte laverite lo Zezi Kri, akoz zot ti’n ganny touse bokou par sa ki zot ti’n tande.

Bann Pwen pour gard antet. Sa ki ou dir dan ou konklizyon i devret direkteman relye avek tenm ou diskour. I devret swiv konman en konklizyon lozik pour ou bann pwen ki ou’n devlope dan sa diskour. Kantmenm ou kapab anvi enkli serten mo enportan ki trouve dan ou tenm, repet li direkteman i en opsyon.

Ordinerman, ler ou koze, ou lobzektif se pour ankouraz lezot pour pran serten aksyon dapre sa lenformasyon ki ou prezante. Enn bann lobzektif prensipal konklizyon se pour montre zot ki pour fer. Ler ou’n swazir ou tenm ek bann pwen prensipal, eski ou’n konsider avek swen akoz sa lenformasyon pou enportan pour ou lodyans e ki ou lobzektif ler ou prezant li? Si wi, alor ou konnen ki aksyon ki ou pou anvi zot pran. Aprezan ou bezwen eksplike kwa sa aksyon e petet konman pour akonpli li.

Anplis ki montre sa ki ou lodyans i bezwen fer, dan ou konklizyon ou devret fourni motivasyon. Sa i bezwen enkli bann rezon valab pour fer sa tel keksoz e posibleman bann benefis ki kapab arive par fer sa. Si sa dernyen fraz i ganny byen planifye e bann mo i ganny byen plase, i pou ranforsi lefikasite ou diskour antye.

Gard antet ki sa diskour pe fini. Sa ki ou dir i devret endik sa. Ou vites i devret osi apropriye. Pa koz tro vit toudilon ziska lafen e apre aret en kou angran. Lo lot kote, pa senpleman les ou volim lavwa diminyen. Ou volim lavwa i devret sifizan me pa an tro. Ou bann dernyen parol i devret endike ki ou pe ariv alafen ou ekspoze. Zot devret transmet senserite ek konviksyon ler ou prezant zot. Ler ou pe prepar ou prezantasyon, pa manke pour egzers ou konklizyon.

Ki longer konklizyon i devret ete? Sa i pa en keksoz ki ganny determinen senpleman par en serten kantite letan fiks. Sa konklizyon i pa devret trennen. Son longer apropriye i kapab ganny determinen par son lefe lo lodyans. En konklizyon senp, direk, e pozitif i toultan ganny apresye. En konklizyon enpe pli long ki enkli en ilistrasyon bref i osi kapab efikas si i ganny byen planifye. Konpar sa konklizyon bref pour liv Eklezyast an antye dan Eklezyast 12:13, 14, avek sa enn pour Sermon lo Montanny ki pourtan pli kourt, ki rikorde dan Matye 7:24-27.

Dan Predikasyon. Napa okenn landrwa kot ou pou vwar ou bezwen konklizyon plis ki dan predikasyon. Avek preparasyon ek lentere ranpli avek lanmour pour dimoun, ou kapab akonpli bokou dibyen. Bann konsey ki ganny detaye dan bann paz presedan i kapab ganny byen aplike menm ler i ganny adapte avek en konversasyon avek zis en dimoun.

En konversasyon i kapab tre bref. Sa dimoun i kapab okipe. Ou vizit i kapab dir selman pour en minit. Si i apropriye, ou kapab dir en keksoz parey: “Mon konpran ki ou okipe. Me les mwan kit avek ou en panse ankourazan: Labib i montre ki nou Kreater i annan en plan merveye—pour fer sa later en landrwa kot dimoun i kapab rezwir lavi pour touzour. Nou kapab antre dan sa Paradi, me nou bezwen aprann sa ki Bondye i ekspekte nou fer.” Oubyen ou kapab senpleman ofer pour retournen en lot moman pli konvenab.

Si sa vizit i ganny enteronpe parski sa dimoun i ankoler—menm brit—kantmenm sa, bokou dibyen i kapab ganny akonpli. Gard antet konsey ki trouve dan Matye 10:12, 13 ek Romen 12:17, 18. Ou larepons zantiy i kapab posibleman sanz son pwenn-vi lo Temwen Zeova. Sa pou en tre bon lakonplisman.

Lo lot kote, ou kapab ganny en bon konversasyon avek sa dimoun. Akoz ou pa repet sa pwen prensipal ki ou anvi sa dimoun rapel? Enkli motivasyon pour li fer serten keksoz konsernan sa.

Si ou vwar loportinite pour plis diskisyon en lot moman, donn sa dimoun serten rezon pour esper sa lot vizit avek enpasyans. Demann en kestyon—petet enn ki ganny diskite dan Comment raisonner à partir des Écritures oubyen en piblikasyon ki’n ganny prepare pour kondwir Letid Labib kot lakour. Gard antet ou bi, parey Zezi i detaye e ki ganny rikorde dan Matye 28:19, 20.

Eski ou pe termin en letid Labib kot lakour? Repet sa tenm pou ed sa etidyan rapel sa ki’n ganny diskite. Servi bann kestyon revizyon pou ede fer antre bann pwen enportan dan lespri sa etidyan, sirtou si sa revizyon pa ganny fer tro vit. En kestyon konsernan konman sa lenformasyon ki’n ganny etidye i kapab benefisye sa etidyan oubyen konman i kapab partaz sa lenformasyon avek lezot i kapab ed li konsider dan en fason pratik konman pour servi sa ki i’n aprann.—Prov. 4:7.

Rapel—ou konklizyon i enfliyans lefikasite tou sa ki ou’n diskite.