Avril—En Letan pour Vin Zele pour Bann Bon Travay!
1 Kan en siklonn pe apros en rezyon abite, bezwen pour averti bann dimoun kont danze imedya, i vin irzan. Pli sa siklonn i vin pli pre, pli sa bann lavertisman i devret ensiste. Akoz? Parski lavi dimoun i dan risk! Petet serten dimoun pa’n antann bann lavertisman ki’n ganny fer avan. I kapab ki lezot in antann me zot in neglize pour pran aksyon. Demenm, nou’n ganny konfye en lavertisman divin pour anonse, avan ki ‘siklonn’ lakoler zis Bondye, i balye tou bann restan sa monn mesan. (Prov. 10:25) Lavi eternel pour plizyer bilyon dimoun i dan risk! Lavertisman i bezwen ganny donnen. Nou bezwen “zele pour bann bon travay.”—Tit 2:11-14.
2 Pour plizyer deseni, pep Zeova in ganny motive pour fer sezon Memoryal vin en letan pour montre en larder ekstraordiner dan minister. An prentan 1939, the Informant an angle, ki ti Nou Minister Rwayonm oparavan, ti donn sa lankourazman swivan: “Avek prentan e bon letan ki pe aprose, nou ekspekte ler pour bann proklanmater kongregasyon double dan predikasyon, e pour bann pionye en ogmantasyon remarkab. Avril i en mwan avek senk Dimans. I osi annan senk Sanmdi. Annou fer ki sak Sanmdi ek Dimans pandan Avril . . . i en letan pour temwannyaz spesyal.” Sa ti en lobzektif anbisye ki ti ganny fikse pour bann frer ek ser, 60 an pase! Sa lannen, zis parey an 1939, mwan Avril i annan senk wikenn plen. Ki ou bann plan pour sa mwan? Ki not ou’n mete lo ou kalandriye pour Avril 2000? Plàn pour kontribye en par enportan dan bann bon travay, an konpanni larestan pep Bondye, pandan sa mwan spesyal kot nou aktivite spirityel pou akselere.
3 Sa Ki Nou Swete Akonpli: Sa zour pli enportan pandan lannen 2000, i tonm sa mwan. Sa se le 19 Avril, lanniverser lanmor Zezi. Annou fer en zefor spesyal pour envit otan dimoun ki nou kapab pour Memoryal. Parey nou ti sizere mwan pase, fer en lalis tou bann ki ti a kapab asiste Memoryal e fer sir ki ou pa mank personn. Bann envite i devret enkli nenport proklanmater inaktif, bann letid Labib, bann retourn vizit, bann ki ti etidye oparavan, bann konpanyon travay, kanmarad lekol, vwazen, fanmiy, ek lezot dimoun ki ou konnen. Eski bann ki anvi asiste i annan fasilite transpor? Si non, eski ou kapab zantiman asiste zot? Pour sware Memoryal, nou tou nou pou annan sa privilez pour byen akey bann ki asiste. Apre Memoryal, nou kapab pourswiv bann konversasyon spirityel avek bann ki enterese.
4 “Zele pour bann bon travay” pandan bann zour avan e apre Memoryal, i en bon fason pour montre Zeova ki nou vreman apresye tou sa ki i’n fer pour nou. Bokou parmi nou pou kapab ogmant nou bann zefor dan aktivite evanzelizater. Si ou pe fer pionye asistan, petet ou a swete donn ou mye pour fer 50 er ou plis dan minister. (Mat. 5:37) Swiv byen pros sa progranm ki ou’n etablir okonmansman lemwan. (Ekle. 3:1; 1 Kor. 14:40) Pour larestan parmi nou, i swetab ki nou siport tou bann pionye par nou lankourazman e osi an travayan avek zot dan predikasyon. (Vwar 2 Rwa 10:15, 16.) Si nou senm avek zel pandan mwan Avril, nou kapab ekspekte en gran lazwa ek benediksyon sorti kot Zeova. (Mal. 3:10) Sa i kapab vin en mwayen pour nou progrese, pour vin pionye asistan permanan oubyen pionye ordiner. Nou swete ki sa lelan spirityel ki nou pou gannyen pandan Avril, i persiste diran bann mwan ki pou swiv kot nou pou kontinyen vin bann proklanmater regilye.
5 San dout, en gran kantite serviter Zeova, pou konmans plis letid Labib sa mwan. Eski ou ti a kontan konmans enn? Priy spesifikman pour en letid e azir an armoni avek ou lapriyer. Ou kapab annan konfyans ki Zeova pou apresye ou senp demann, pour trouv en dimoun senser pour ansennyen.—1 Zan 3:22.
6 Sa lapros swivan in vreman efikas pour konmans bann konversasyon. Konmans par sa kestyon: “Kan nou pran an konsiderasyon tou sa bann vyolans, ogmantasyon vol, e mank respe de la par bann zenn ozordi, eski ou krwar ki lenfliyans pouvwar demon ki koz sa, oubyen i en mank formasyon de la par paran?” Les sa dimoun reponn. Si i dir “pouvwar demon,” lir Revelasyon 12:9, 12, e met lanfaz lo rol ki Ledyab i zwe pour entansifye troub dan sa monn. Apre sa, ouver brosir Ekspekte dan leson 4 e demann sa dimoun si i’n deza demann son lekor kote Ledyab i sorti. Pourswiv an lizan e diskitan lo sa de premye paragraf. Si sa dimoun i krwar ki en “mank formasyon de la par paran,” i lakoz vyolans ek mank respe parmi bann zenn, lir 2 Timote 3:1-3 e fer resorti sa bann tre ki evidaman i kontribye ver sa problenm. Apre ouver brosir Ekspekte lo leson 8, lir paragraf 5 e kontinyen diskisyon. Si ou fer en randevou pour retournen, ou kapab pe ouver semen pour konmans en letid Labib regilye avek sa dimoun. Diran bann vizit ki pou swiv, demann li si i konn lezot ki ti a enterese antann sa ki i pe aprann.
7 En lot fason pour vin “zele pour bann bon travay” pandan Avril, i kan nou partisip dan diferan form predikasyon. Eski ou’n mazin pour pres lo lans oubyen dan en parking? Lo bèstòp oubyen kot erport? Oubyen eski ou ti a kontan esey temwanny par telefonn, dan semen ouswa dan landrwa komersyal? Akoz ou pa met sa bann lide an pratik sa mwan? Zeova pou ed ou pour rasanble lardyes neseser ki ou bezwen. (Akt 4:31; 1 Tesa. 2:2b) Petet ou kapab fer en randevou avek en pionye oubyen en proklanmater ki eksperyanse dan sa bann domenn dan minister.
8 Tou bann ki anvi ogmant zot partisipasyon dan sa travay temwannyaz, pa pou manke pour partisip dan temwannyaz enformel. Souvan sa ki nou bezwen fer, se angaz nou dan en konversasyon amikal. Senpleman mansyonn en size ki komen, petet an servan sa lapros ki nou’n sizere dan paragraf 6. Esey ou mye pour byen servi menm bann pti porsyon letan ki otreman ti a perdi. Nou pa zet senk sou, dis sou oubyen vennsenk sou zis akoz zot pa en roupi antye. Alor, akoz nou pa profite an servan menm senk minit, dis minit, oubyen en kar er-d-tan pour fer temwannyaz enformel?
9 En Letan pour Reflesir: Mazin sa bann pwen for ki ti ganny fer resorti lannen pase, dan dram lasanble trwa zour, “Parol Profetik Bondye.” Sa dram ki ti annan pour tit Apresye Nou Leritaz Spirityel, ti fer nou reflesir byen lo diferans ki ti annan ant Zakob ek Ezai. Ezai ti dir ki parey Zakob, i ti annan lentere dan bann keksoz spirityel me travay Ezai pa ti prouv sa. (Zen. 25:29-34) Sa pa i en gran lavertisman pour nou! Parey Zakob, annou pare pour fer bann zefor entans, menm debat, pour benediksyon Zeova. (Zen. 32:24-29) Akoz nou pa servi Avril ek tou bann mwan swivan pour renouvle nou zel e pa zanmen pran nou leritaz spirityel merveye alalezer?
10 “Gran zour Zeova i pros. I pros, e i pe bokou depese.” (Tsef. 1:14) Sa bon nouvel lo Rwayonm i bezwen ganny proklanmen. Lavi dimoun i dan risk. Nou swete ki sa mwan i enn ki ava spesyalman port benediksyon pour tou pep Zeova, pandan ki nou demontre nou tou ansanm, ki nou “zele pour bann bon travay.”
[Bwat lo paz 4]
Bann Rapel pour Memoryal
Komemorasyon Memoryal pour sa lannen i tonm Merkredi le 19 Avril. Bann ansyen i devret vey sa bann keksoz swivan:
◼ Kan ler renyon i ganny fikse, fer sir ki bann lanblenm pa pou ganny pase avan soley kouse.
◼ Tou dimoun, enkli orater, i devret ganny enformen ler egzakt ek landrwa kot Memoryal pou ganny obzerve.
◼ Dipen ek diven apropriye ti a bezwen ganny prevwar e prepare.—Vwar La Tour de Garde 15 Fevriye, 1985, paz 17.
◼ Bann lasyet, ver, e en latab konvenab ek son tapi, i bezwen ganny anmennen kot sa lasal e met an plas davans.
◼ Lasal Rwayonm oubyen lezot landrwa kot renyon pou ganny fer i devret ganny byen netwaye davans.
◼ Bann ki pou dan servis lakey ek bann ki pou pas lanblenm, i devret ganny swazir e enstri davans, konsernan zot responsabilite e bann prosedir konvenab.
◼ Bann laranzman i bezwen ganny fer pour servi bann Kretyen wen ki malad e ki pa kapab prezan sa zour.
◼ Si dapre progranm, i annan plis ki en kongregasyon ki pou servi menm lasal Rwayonm, i devret annan bon kordinasyon antre bann kongregasyon afen ki nou a kapab evite ankonbre dan larantre, lo trotwar piblik, e dan parking.