‘Ki Mannyer Mon Kapab . . . Si Personn pa Eksplik Mwan?’
1 Kan evanzelizater Filip ti demann sa zofisye Etyopyen si i ti konpran sa ki i ti pe lir dan Parol Bondye, sa zonm ti reponn: “Ki mannyer mon kapab konpran si personn pa eksplik mwan.” Avek plezir, Filip ti asiste li pour konpran bon nouvel konsernan Zezi, ki ti swiv par son batenm imedya. (Akt 8:26-38) Filip ti pe obeir lord Zezi pour ‘fer tou pep vin bann disip, batiz zot e ansenny zot.’—Mat. 28:19, 20.
2 Nou bezwen obeir sa lord pour fer bann disip zis parey Filip ti fer. Toutfwa, sa kalite progre spirityel rapid ki sa zofisye Etyopyen ti fer pa souvan leka parmi bann dimoun ki nou etidye Labib avek. Sa zonm, en Zwif konverti verse dan Lekritir, ti annan en leker sansib e ti selman bezwen aksepte ki Zezi ti sa Mesi promiz. I en defi si bann avek ki nou pe etidye pa familye avek Labib, si zot in ganny tronpe par bann fo lansennyman relizye, oubyen si zot akable avek bann problenm personnel. Kwa ki pou ed nou reisi anmenn bann ki etidye Labib pour dedye zot lavi e batize?
3 Determin Bezwen Spirityel sa Etidyan Labib: Sipleman Nou Minister Rwayonm Out 1998, ti diskit lo kantite letan ki nou kapab etidye avek dimoun an servan brosir Ekspekte ek liv Connaissance. I ti donn sa direktiv: “I neseser pour aziste ritm en letid dapre bann sirkonstans ek laptitid sa etidyan. . . . Nou pa anvi sakrifye konprenezon kler sa etidyan zis pour fini sa piblikasyon vitman. Sak etidyan i bezwen en fondman solid pour son nouvo lafwa dan Parol Bondye.” Alor, i saz pour pa depese pour kouver sa liv Connaissance, avek lide pour esey fini li dan sis mwan. I kapab demann bokou plis ki sis mwan pour ed serten endividi progres ziska pwen batenm. Ofiramezir ki ou kondwir letid semenn apre semenn, servi tou letan ki neseser pour ed sa etidyan konpran e aksepte sa ki i pe aprann atraver Parol Bondye. Dan serten ka, petet de ou trwa semenn i neseser pour kouver en sapit dan liv Connaissance. Sa pou permet ase letan pour lir e klarifye plizyer teks Labib ki’n ganny mansyonnen.—Rom. 12:2.
4 Toutfwa, ki ou pou fer si apre ki ou’n konplet liv Connaissance, ou vwar ki konprenezon sa etidyan i bezwen ganny devlop en pe plis oubyen ki i pa ankor ase motive pour pran pozisyon pour laverite e pour dedye son lavi avek Bondye? (1 Kor. 14:20) Ki ou kapab fer anplis pour gid li lo sa semen ki anmenn ver lavi?—Mat. 7:14.
5 Satisfer Bezwen Spirityel sa Etidyan: Si i evidan ki sa dimoun pe fer progre, menm dousman, e ki i pe devlop lapresyasyon pour sa ki i pe aprann, alor kontinyen letid Labib dan en dezyenm liv apre ki brosir Ekspekte ek liv Connaissance in ganny konplete. Petet sa pa neseser dan tou ka, me kan i annan en bezwen, kontinyen letid dan liv Paix véritable, liv Unis dans le culte, oubyen liv Parole de Dieu. Preski tou proklanmater i posed bann kopi personnel sa bann liv pour servi si kongregasyon napa en rezerv. Liv Parole de Dieu i sel liv ki kapab ganny rekomande avek lasosyete. Antouka, brosir Ekspekte ek liv Connaissance i bezwen ganny etidye an premye. Letid Labib, retourn vizit ek letan ki ganny servi pour kontinyen sa letid i devret ganny konte e raporte, menm si sa etidyan i batize avan ki sa dezyenm liv i ganny konplete.
6 Eski sa i vedir ki bann ki’n batize resaman me ki’n etidye selman en liv i devret aprezan resevwar nouvo led pour etidye en dezyenm liv? Pa neseserman. Toutfwa, i kapab ki serten in vin inaktif oubyen zot pa’n progrese dan laverite e zot kapab santi ki zot bezwen led personnel pour pli byen aplik laverite dan zot lavi. Avan repran letid avek en proklanmater batize, ou devret vwar sirveyan servis lo sa size. Sepandan, si ou konn serten ki ti etidye liv Connaissance dan lepase me ki pa’n zanmen progres ziska dedikasyon ek batenm, petet ou ti a swete pran linisyativ pour vwar si zot ti a kontan rekonmans zot Letid Labib.
7 Donn en latansyon pros e personnel avek sak personn enterese ki nou etidye avek, i en mark lanmour Kretyen. Nou lobzektif se pour ed sa etidyan ganny en pli bon konpreansyon lo laverite Parol Bondye. Apre i kapab pran en pozisyon defini e byen enformen pour laverite, dedye son lavi pour Zeova e senboliz li par batenm delo.—Ps. 40:8; Efe. 3:17-19.
8 Eski ou rapel ki ti arive apre ki sa zofisye Etyopyen ti batize? “I ti kontinyen son semen avek lazwa” konman en nouvo disip Zezi Kri. (Akt 8:39, 40) Fotespere nou, ensi bann ki nou’n reisi gide lo semen laverite, i trouv gran lazwa an servan Zeova Bondye—la konmela e pour touzour!