“Mon tenir ferm! Mon tenir ferm! Mon tenir ferm!”
1 Sa bann parol sa Kretyen fidel ki ti sirviv Olokos i fer rezonnen determinasyon sa plizyer milye Temwen—bann ki vivan e ki’n mor—ki ti rezoli dan zot krwayans malgre kriyote Nazi. (Efe. 6:11, 13) Zistwar eksitan konsernan zot kouraz ek laviktwar i ganny rakonte dan sa video ki tous leker, La fermeté des Témoins de Jéhovah face à la persécution nazie. Tou dimoun dan kongregasyon i ganny demande pour get sa video e partaz zot lenpresyon ek santiman avek lezot.
2 Les sa bann kestyon revey ou panse: (1) Pour ki rezon ki bann Temwen Zeova ti pran en determinasyon ferm kont Nazi? (2a) Ki bann pwenn-vi opoze ki ti egziste konsernan en salitasyon, e akoz? (2b) Konman ki sa ti afekte bann fanmiy Temwen? (3) Ki kantite Temwen ki ti ganny anvoye dan bann kan konsantrasyon, konman zot ti ganny idantifye dan kan, e konman Gestapo ti tret zot? (4) Ki pri ki nou bann frer pa ti pare pour peye pour liberte? (5a) Kan e konman ki bann Temwen Zeova ti koz fransman kont bann atrosite gouvernman Hitler? (5b) Konman Hitler ti reazir? (6) Konman ki solidarite pep Zeova ti kapab sov zot lavi ek lavi lezot, fizikman e spirityelman? (7) Ki sa kantik Rwayonm ki ti ganny ekrir dan en kan konsantrasyon? (8) Ki legzanp bann zonm, fanm, ek zenn fidel ki’n enfliyans ou pour gard ou lentegrite avek Zeova, nenport kwa ki kapab arive avek nou? (Vwar osi Annuaire 1999 paz 144-7.) (9) Konman en Temwen Zeova, konman ki sa video i fer ou santi konsernan pa form parti lemonn?
3 Legzanp pozitif bann Temwen Zeova ki’n ganny prezante dan sa video Fermeté i kapab ed bann zenn, menm sa bann ki pa Temwen, pour nobou fer fas avek bann problenm parey prezidis, lenfliyans kanmarad, e konman fer bann desizyon personnel. Si ou en zenn ki pe al lekol segonder oubyen nivo pli o, eski ou kapab donn ou bann ansennyan loportinite pour servi sa video dan laklas? Petet ou kapab ofer zot enn sa video e dekrir li konman en pti resi istorik ki piblik pa ankor byen konnen oubyen konman en dokimanter ki annan en leson moral.
4 Sa video Fermeté i en zouti ekselan pour demontre konman lansennyman divin i donn lafors spirityel pour fer plezir Bondye par reste ferm pour sa ki byen. (1 Kor. 16:13) Partaz li avek tou sa bann ki annan en lentere pour laverite.