Bann Zouti ki Edike, Motive, e Fortifye
1 Zot pwisan pour edik dimoun konsernan Labib ek bann Temwen Zeova. Zot in motiv bokou pour pran en pozisyon ferm pour laverite. Zot in fortifye lafwa ek lapresyasyon pep voue Bondye. Lekel zot? Se bann video prodwir par lorganizasyon Zeova. Eski ou’n vwar zot tou? Ki kantite letan i annan depi ki ou’n regard zot? Eski ou servi zot dan ou minister? Lansman onzyenm video, Our Whole Association of Brothers, ti ganny anonse dan lasanble distrik. Eski ou’n rekomann li? Konman ki ou kapab benefisye plis ankor avek sa bann zouti manifik?
2 Lartik “Étudions régulièrement la Parole de Dieu en famille” dan La Tour de Garde le 1 Zilyet, 1999, ti fer rekomandasyon pour “rezerv en letan pour regard en porsyon en video edikatif Lasosyete . . . e apre diskit lo la.” An armoni avek sa bon konsey, en video diferan pou ganny prezante dan Renyon Servis tou le de mwan. Nou ankouraz tou dimoun dan kongregasyon pour get sa video avan ki nou diskit lo la dan Renyon Servis.
3 Sa mwan nou konmans avek premye video ki nou ti prodwi, Les Témoins de Jéhovah: un nom, une organisation. Regarde e ekout larepons pour sa bann kestyon:
◼ Pour kwa bann Temwen Zeova i pli renonmen?
◼ Tou sa ki ganny fer dan Betel i relye avek ki verse Labib?
◼ Ki lasenn dan Labib ou ti vwar pe ganny met an senn, tir portre, e penn pour servi dan bann piblikasyon?
◼ Kwa ki’n enpresyonn ou lo fason ki nou piblikasyon i ganny prepare?
◼ Depi 1920 ziska 1990, ki kantite piblikasyon ki’n ganny enprimen par Lasosyete?
◼ Lekel parmi pep Bondye ki spesyalman devret aspir pour kalifye pour servis Betel?—Prov. 20:29.
◼ Dan ki bann fason ki lafanmiy Betel i montre en legzanp ekselan pour tou Temwen Zeova?
◼ Kwa ki’n enpresyonn ou konsernan travay ki pe fer dan Betel pour tous pli bokou dimoun posib avek sa bon nouvel?
◼ Ki mannyer sa travay mondyal i ganny finanse?
◼ Ki aktivite ki nou kapab donn tou nou sipor e avek ki leta lespri?—Zan 4:35; Akt 1:8.
◼ Konman ou santi konsernan sa lorganizasyon par deryer nou non?
◼ Konman ou kapab servi sa video dan minister?
An Desanm nou pou revwar video La Bible—Un livre historique et prophétique.