Lenpak bann Video ki donn en Temwannyaz
1 “Nou pti garson in konmans regard sa video avan ki i ti konmans marse. I’n regard sa video en kantite fwa. I vreman merveye pour annan bann zouti ki enkilke lanmour pour Zeova dan nou zanfan!” Ki video ki sa paran Kretyen pe dekrir? Sa enn ki annan pour tit Noé: il marchait avec Dieu. En manman ki pa en Temwen ki son garson in vwar sa video Noé kot en lot dimoun ti anvoy en donasyon 500 roupi kot biro brans e i ti demande si nou napa okenn lezot video pour zanfan. Bann video ki lorganizasyon Zeova i prodwir i annan en gran lefe lo bann zenn e osi byen ki bann vye.
2 Dan Fanmiy: Apre ki en fanmiy Temwen ti’n fini regard sa video La fermeté des Témoins de Jéhovah face à la persécution nazie, sa manman ti dir: “Tou lazournen mon’n reflesir lo konman Zeova in permet bann dimoun ordiner fer fas avek bann keksoz ekstraordiner. Kan mon mazin sa, i rapel mwan konman mon bann problenm i pa sitan enportan. Regard sa video avek nou zanfan in ed zot pour vwar pli klerman sa nesesite pour depan lo Zeova. Plitar kan nou ti diskit sa video avek zot, nou’n ed nou bann fiy pour pli byen ekipe pour fer fas avek okenn presyon ek persekisyon ki zot rankontre.”
3 Kot Lekol: Konman en parti son rapor en zenn Temwen ti kapab montre en parti sa video La fermeté des Témoins de Jéhovah face à la persécution nazie avek son laklas. Oparavan, sa ansennyan ti dir ki i pa kontan bann Temwen. Apre ki i ti get sa video, i ti dir: “Sa in konpletman sanz mon pwenn-vi lo Temwen Zeova. Mon promet ki la prosenn fwa ki zot vizit mwan, mon pou ekout zot e konmans etidye Labib avek zot.” Kwa ki ti fer li sanz son lenpresyon lo nou? I ti dir ki se akoz nou “vre lanmour ek lwayote.”
4 Dan Predikasyon: En ser ti rankontre en madanm ki ti ezite pour aksepte bann piblikasyon, menm si i ti annan kestyon lo nou ek nou krwayans. Sa ser ti retournen avek sa video Les Témoins de Jéhovah: un nom, une organisation e i ti zwe pour sa madanm ek son msye. Zot tou le de zot ti vreman enpresyonnen e aksepte pour etidye Labib. An rezilta sa bon temwannyaz ki zot ti gannyen, zot ti konmans konform zot lavi avek lavolonte Bondye.
5 Eski ou pe byen servi nou bann video afen ki zot annan bann bon lefe?