Benediksyon ki nou gannyen par demontre Lapresyasyon pour Lanmour Zeova—Dezyenm Parti
1 Dan premye parti sa size ki nou ti vwar mwan pase, nou ti diskit kat fason ki nou lapresyasyon pour lanmour Zeova i kapab ganny demontre dan minister. (1 Zan 4:9-11) Dan sa dezyenm parti nou pou azout senk fason pour fer sa. Kan nou partisip plennman pour ed lezot spirityelman, nou ganny beni.
2 Temwannyaz enformel: Sa i en fason efikas pour trouv dimoun ki swaf e lafen ladrwatir e pour plas bann piblikasyon ki itil avek zot. I bon pour “servi byen tou bann lokazyon” pour rann temwannyaz dan tou sirkonstans e avek nenport dimoun ki nou rankontre. (Efe. 5:16) Petet nou bezwen fer bokou zefor pour annan kouraz pour temwanny dan sa fason, me si nou apresye lanmour Bondye e nou konsyan bezwen bann dimoun, nou pou rann temwannyaz dan tou lokazyon.—2 Tim. 1:7, 8.
3 En misyonner ti ganny beni pour konmans en konversasyon avek en pasaze dan en taksi. Sa zonm ti montre lentere. Sa frer ti revizit li, e en letid Labib ti konmanse. Sa zonm ti vin dan laverite e i ti progrese ziska ki i ti vin en ansyen dan kongregasyon!
4 Ekri bann Let: Petet nou pa kapab al port-an-port akoz serten maladi fizik oubyen akoz movetan. Nou kapab ekrir let, donn en temwannyaz an bref par let avek bann dimoun ki nou konnen, bann ki’n perdi en dimoun ki zot kontan dan lanmor, oubyen bann ki pa ti kot lakour dan teritwar. Ansanm avek sa let nou kapab met en trak ki annan en mesaz Biblik atiran e ankouraz sa dimoun pour reponn si i annan okenn kestyon. Servi ou ladres personnel oubyen ladres Lasal Rwayonm; silvouple pa servi ladres biro brans Lasosyete.
5 Temwannyaz par Telefonn: Sa i en bon fason pour kontakte bann dimoun ki nou pa kapab rankontre dan aktivite port-an-port. Si nou fer li avek pridans, labonte, diskresyon, ek abilite, nou kapab ganny en bon reaksyon. Nou Minister Rwayonm Fevriye 2001, paz 5-6 i fourni bann sizesyon pratik lo konman pour ganny bann bon rezilta.
6 Kan en ser ti pe temwanny par telefonn, i ti demann en madanm si i’n reflesir seryezman lo ki lavenir i rezerve pour li ek son fanmiy. Sa madanm ti dir ki i’n reflesir. I ti devwale ki i’n izol son lekor par reste se li akoz i ti dezespere. Lefe ki i ti ganny touse par lentere senser sa ser, i ti aksepte pour rankontre sa ser kot en bazar ki ti pros avek kot i pe reste. Rezilta, se ki sa madanm ti aksepte en letid Labib san ezite!
7 Akey bann Nouvo: Si nou kontan nou prosen, nou pou vitman remark okenn nouvo ki vizit nou Lasal Rwayonm e nou pou fer li santi alez. (Rom. 15:7) Les li vwar ki i parmi bann dimoun ki senserman enterese avek son byennet spirityel. Nou lentere senser ek nou propozisyon pour en letid Labib personnel i kapab motiv li pour aksepte nou led.
8 Nou bon Kondwit: Par nou bon kondwit, nou fer loner laverite. (Tit 2:10) Kan bann ki dan lemonn i dir bann bon keksoz lo nou konman Temwen Zeova, zot anmenn loner pour nou Bondye. (1 Pyer 2:12) Sa osi i kapab ed lezot pour konmans mars lo sa semen lavi.
9 Akoz ou pa revwar sa senk fason pour montre nou lapresyasyon pour gran lanmour ki Zeova i annan pour nou, e apre aplik zot? (1 Zan 4:16) Si ou fer sa, ou pou benefisye en kantite.