Eski ou kontribye pour fer en Rapor egzakt?
1 Bokou resi Labib i enkli bann sif spesifik, ki ede pour transmet en portre vivan sa ki ti arive. Par egzanp, Gideonn ti konkerir kan Madyann avek zis 300 zonm. (Ziz 7:7) Lanz Zeova ti touy 185,000 larme Asiryen. (2 Rwa. 19:35) Zour Lapannkot lannen 33 N.L., apepre 3,000 dimoun ti batize. Toudswit apre, lakantite krwayan ti vin 5,000. (Akt 2:41; 4:4) Atraver sa bann resi Labib, i evidan ki bann serviter Bondye dan lepase ti fer en kantite zefor pour fer en rikord konplet e ki egzakt.
2 Denozour, lorganizasyon Zeova i demann nou pour raport nou aktivite predikasyon sak mwan. Ler nou korpere fidelman avek sa laranzman, sa i kontribye pour byen sirvey travay predikasyon. Rapor i kapab montre si en serten laspe minister i bezwen latansyon oubyen si i annan bezwen pour plis zouvriye dan en serten landrwa. Dan kongregasyon, rapor predikasyon i ed bann ansyen idantifye bann ki annan potansyel pour agrandi zot minister e osi bann ki kapab bezwen lasistans. Rapor lo progre travay predikasyon Rwayonm i ankouraz lasosyasyon frer Kretyen an antye. Eski ou pe fer ou par pour kontribye pour fer en rapor egzakt?
3 Ou Responsabilite: Eski alafen lemwan ou vwar li difisil pour rapel sa ki ou’n fer dan minister? Si i leka, akoz ou pa raport ou aktivite sak fwa ou partisip dan predikasyon? Serten proklanmater i servi en kalandriye ouswa en dayri. Lezot i anmenn en fey rapor predikasyon vid avek zot. Alafen lemwan, pa tarde pour donn ou rapor avek ou sirveyan letid liv. Ouswa, ou kapab met ou rapor dan bwat rapor dan Lasal Rwayonm. Si ou oubliye pour met ou rapor, kontakte ou sirveyan letid liv vitman olye ki esper li apros ou. Kan ou raport ou aktivite konsyansyezman, sa i montre ki ou annan respe pour laranzman Zeova. I osi montre ki ou annan konsiderasyon pour bann frer ki’n ganny dezinyen pour kolekte e fer antre bann rapor.—Lik 16:10.
4 Rol Sirveyan Letid Liv: Etan en berze vizilan e kontan ede, sa sirveyan letid liv i pran en lentere dan aktivite son group diran lemwan. (Prov. 27:23) I konnen, si sak proklanmater pe partisip dan predikasyon regilyerman, pe prodwir rezilta e osi si i pe fer li avek lazwa. I deswit ofer lasistans si i vwar ki serten pa’n prese pandan en mwan antye. Laplipar-di-tan sa bann proklanmater i bezwen zis en mo lankourazman, en sizesyon pratik, oubyen en lenvitasyon pour akonpanny li dan predikasyon.
5 Alafen lemwan, sirveyan letid liv i fer sir ki tou dimoun dan group in akonpli zot devwar pour raport zot aktivite, pour ki sekreter i kapab anvoy en rapor kongregasyon egzakt kot biro brans ver le 6 son mwan swivan. Anmezir ki lafen dimwan i aprose, i kapab itil ki sa sirveyan letid liv i fer son group rapel pour met zot rapor. I kapab osi fer disponib bann fey rapor dan landrwa kot letid liv i deroule. Si i annan ki kontan bliye pour raport zot aktivite, sa sirveyan i kapab rapel zot e osi donn zot lankourazman apropriye.
6 Met nou rapor predikasyon aler i kontribye pour fer en rapor ki demontre egzakteman sa ki’n ganny akonpli dan minister. Eski ou pou ede pour fer sa par raport ou aktivite aler sak mwan?