Progranm Lafanmiy—Letid Fanmiy
1 Pli gro kado ki ou konman en paran Kretyen ou kapab donn ou zanfan se ou lanmour pour Zeova. Ou kapab fer sa “ler ou pe asize dan ou lakaz” pour etidye Labib an fanmiy sak semenn. (Det. 6:5-7) Ki swa ou msye oubyen madanm pa Temwen, ou reste dan en lakour kot ou fanmiy pa dan menm larelizyon, oubyen ou en paran tousel, ou kapab ed ou zanfan vin pros avek ou e avek Zeova par fer en letid fanmiy regilye.
2 Konmans Letid Fanmiy: Premye pa ki ou bezwen pran se pran sa labitid pour etidye konman en fanmiy. Si ou pa asire kan pour fer sa letid, akoz ou pa diskit sa avek ou fanmiy? (Prov. 15:22) Si ou annan bann pli pti zanfan, ou kapab swazir pour fer plizyer pti sesyon letid toudilon lasemenn. Arive konnen ki progranm ki adapte pli byen avek ou lakour. Etablir en ler spesifik pour letid lo ou progranm lafanmiy, e determinen pour swiv li.
3 Ki ou kapab etidye? Serten i prepar leson ki pou ganny egzaminen dan Letid Liv Kongregasyon oubyen dan Letid Latour Veyer. Lezot i etidye bann lenformasyon ki’n ganny prepare sirtou pour bann zenn. Papa en zenn garson ek en fiy ti dir: “En keksoz ki fer nou letid vin aktivite pli gou dan lasemenn pour nou zanfan i ki nou zwe rol bann senn dan Mon Liv Zistwar Labib. Sa gran lefe ek konprenezon ki zot gannyen i bokou pli enportan ki lakantite paragraf ki nou kouver.”
4 Etidye sak Semenn: Letid fanmiy i devret ganny fer regilyerman e i devret vin en keksoz ki tou manm fanmiy i kontan e anvi fer. Serten sanzman dan zour ek ler i kapab ganny fer pour tret bann sitiasyon ki ariv san ekspekte. I kapab osi annan moman ki zot bezwen fer en sanzman dan size ki pe ganny trete. Me okenn sanzman neseser pa devret koz en gran lenteripsyon dan en letid fanmiy ki’n ganny progranmen e etablir. Dan en lakour, en fiy ti dir: “Si ler letid pou ganny sanze, Papa i toultan met sa nouvo ler lo laport frizider pour ki nou tou nou konnen kan letid pou fer.” Pa nou apresye bann tel zefor ki ganny fer pour gard en letid fanmiy regilye! Anmezir ki ou kontinyen elve ou zanfan “dan en ledikasyon ek lenstriksyon Senyer,” ou demontre ou lanmour pour ou zanfan e pour nou Papa ki dan lesyel.—Efe. 6:4.