Eski ou pe servi Fey Lenvitasyon?

En zour en pti garson 11 zan ti vwar en fey lenvitasyon ki ti pe anons en diskour piblik lo lanfer. Plitar i ti eksplike: “Sa ti enteres mwan en kantite, akoz i paret ki mon ti toultan pe fer sa ki mal, e alor mon ti trakas en kantite lo al dan lanfer ler mon mor.” I ti al ekout sa diskour. Apepre enn an plitar, apre detrwa sesyon letid Labib, i ti batize. Sa ti konmansman karyer Karl Klein konman en Kretyen, ki plitar ti servi konman en manm Konsey Direkter Temwen Zeova pour plizyer lannen. Tousala ti konmans avek en fey lenvitasyon.

Ozordi bann fey lenvitasyon i ankor en bon zouti pour donn temwannyaz. Bokou proklanmater i vwar ki ler zot donn en dimoun en fey lenvitasyon i en bon fason pour entrodwir zot lekor e konmans konversasyon. Bann paran i kapab enplik zot zanfan dan predikasyon par fer zot ofer en fey lenvitasyon devan laport. Bann proklanmater ki donn temwannyaz par let i kapab fer dimoun konn bann renyon par enkli en fey lenvitasyon. Byensir, bann fey lenvitasyon i en bon fason pour envit bann etidyan Labib ek lezot dimoun ki enterese pour asiste nou bann renyon.

I annan en deskripsyon bref sak renyon lo devan sa lenvitasyon. Vi ki ladres Lasal Rwayonm ek bann ler renyon pa lo la, ou pou bezwen enform sa dimoun. I annan lespas kot ou kapab ekrir oubyen stanpe. Eski ou pe byen servi bann fey lenvitasyon dan ou predikasyon?