En gran Zefor pou ganny fer globalman
pour anons Lasanble Distrik, “Swiv Kris!”
Ankor enn fwa bann Proklanmater pou distribye en
Lenvitasyon spesyal
1 Lannen pase sa kanpanny mondyal pour anons Lasanble Distrik “Delivrans i pros!” ti annan en gran lefe lo bann dimoun ki ti montre lentere. Bann ki ti aksepte sa lenvitasyon spesyal e ki ti vini pour premye fwa ti eksperyans en festen spirityel an abondans avek bann Temwen Zeova. (Iza. 65:13) Zot ti pas en bon moman kan zot ti asosye avek nou bann frer ek ser ki annan lanmour e ki ini. (Ps. 133:1) Pour ki nou kapab ed otan dimoun posib pour asiste sa Lasanble Distrik “Swiv Kris!,” nou pou bezwen ankor enn fwa pran par dan sa travay pour distribye bann lenvitasyon dan lemonn antye.
2 Rezilta Lannen pase: Baze lo bann rapor ki nou ti gannyen atraver lemonn, nou ti reisi ganny bann bon rezilta par anons Lasanble Distrik “Delivrans i pros!” Nou ti ganny bon piblisite dan en kantite landrwa. Par egzanp, en zournal ti pibliy en lartik ki ti annan sis kolonn konsernan sa kanpanny, kot i dir: “Pour kapab zwenn tou dimoun avan lasanble bann Temwen pe fer bann zefor anplis dan vwazinaz par travay plis ki labitid, mars pli gran zistans, e kit zot konversasyon kourt.” Distribisyon sa bann lenvitasyon ki ti’n byen ganny organize ti enteres en medya dan en lot lavil, e sa ti fer zot fer en raportaz an detay lo sa kanpanny. Omwen trwa zournalis ti donn en bon rapor lo nou aktivite predikasyon avan lasanble. En zournalis ti ekri detrwa gran lartik ki ti kouver plis ki de paz dan en zournal ki ganny pibliye tou le Dimans. I ti donn detay lo nou bann krwayans, nou lasosyasyon frer ek ser, distribisyon bann lenvitasyon, ek lasanble. Ler en proklanmater ti pe prezant sa lenvitasyon kot en lakaz, sa met lakour ti enteronp li e dir, “Wi. Mon’n fek pe lir konsernan sa dan zournal!” En lot met lakour avek leksitasyon ti dir: “Mon’n fek pe lir konsernan zot, e deza zot la! Eski sa i mon lenvitasyon?” Apre i ti azoute, “Sa i vreman en bon keksoz pour bann Temwen Zeova fer.”
3 En kantite dimoun ki ti enterese ti vin lasanble avek zot lenvitasyon dan zot lanmen. Serten ti vin dan zot transpor sorti dan bann lavil byen lwen pour asiste bann sesyon lasanble. Nou zefor pour envit lezot ti kontribye pour lasistans ogmante. Par egzanp dan en pei lasistans pour sa lasanble “Delivrans i pros!” ti ogmante par 27 poursan konpare avek son lannen avan.
4 Konman kouver Teritwar: Zot kapab konmans distribye bann lenvitasyon trwa semenn avan lasanble i konmanse. Zot devret fer tou zefor posib pour kouver teritwar kongregasyon antye. Bann kongregasyon ki annan en gran teritwar, bann proklanmater i kapab servi bon zizman ler zot kit bann lenvitasyon kot bann absan dan en fason diskre dernyen semenn avan lasanble. Bann kongregasyon i devret fer bokou zefor pour distribye tou bann lenvitasyon e pour kouver otan teritwar ki zot kapab. Bann pionye dan kongregasyon i kapab servi bann lenvitasyon ki’n reste.
5 Ki ou pour dir: Ou kapab dir: “Nou pe partisip dan en kanpanny mondyal pour distribye sa lenvitasyon pour en levennman spesyal ki pe vini. La en kopi pour ou. Ou pou trouv lezot detay dan sa lenvitasyon.” Si nou gard nou prezantasyon kourt sa pou permet nou donn otan lenvitasyon. Byensir, si met lakour i demann kestyon, pran letan pour reponn son bann kestyon. Si en dimoun i montre lentere, mark son non e retourn kot sa dimoun osito posib.
6 Pa i tre enportan ki nou fer bokou zefor pour swiv Kris! (Zan 3:36) Nou lasanble distrik ki pe vini pou ed tou dimoun ki asiste pour fer sanmenm. Nou kapab asire ki en gran temwannyaz pou ganny donnen ankor enn fwa atraver sa gran zefor ki pou ganny fer pour anons sa Lasanble Distrik “Swiv Kris!” Alors, avek devouman annou envit kantite dimoun ki nou kapab pour asiste lasanble. Fotespere ki Zeova i beni ou zefor pandan ki ou partisip dan sa kanpanny mondyal.