En lenvitasyon direk
1. Kan ki kanpanny lenvitasyon pour lasanble i konmanse?
1 Si ou ti pe plàn pour prepar en repa spesyal pour ou fanmir oubyen zanmi, ki demann bokou zefor e ki kout ser, pa ou ti pou eksite ler ou ti pou envit zot! Pareyman, bokou travay in ganny fer pour prepar sa festen spirityel ki pou ganny donnen dan nou prosen lasanble rezyonal trwa zour. Konmansman trwa semenn avan sa lasanble, Zeova i donn nou sa privilez pour envit lezot dimoun vin asiste. Kwa ki pou ed nou distribye sa bann lenvitasyon avek lantouzyasm?
2. Kwa ki pou motiv nou pour partisip plennman dan sa kanpanny?
2 Nou pou ganny motive pour partisip plennman dan sa kanpanny si nou byen reflesir lo ki kantite nou benefisye atraver sa lenstriksyon ki Zeova i donn nou pandan nou bann lasanble. (Iza. 65:13, 14) Nou osi devret rapel ki nou kanpanny anyel i anmenn rezilta. (Vwar sa bwat “I anmenn rezilta.”) Pa tou dimoun ki nou envite ki pou vini. Selman, nenport ki kantite dimoun ki pou asiste, nou bann zefor pandan kanpanny pou anmenn louanz lo Zeova e reflekte son zenerozite.—Ps. 145:3, 7; Rev. 22:17.
3. Ki mannyer sa bann lenvitasyon pou ganny distribye?
3 Sak konsey ansyen i devret deside ki mannyer kongregasyon i kapab distribye sa bann lenvitasyon, ki enkli si zot pou kit lenvitasyon anba laport kot bann absan oubyen si zot pou ofer li dan predikasyon enformel. Dan wikenn bann magazin i devret ganny ofer ansanm avek sa lenvitasyon si i apropriye. Apre ki sa kanpanny i fini, sirman nou pou byen kontan lefet ki nou’n partisip avek lantouzyasm e ki otan dimoun posib in zwenn ansanm avek nou kot sa festen spirityel ki Zeova in donn nou!