Distribisyon lenvitasyon Memoryal pou konmans le 2 Avril
1. Kan ki nou pou distribye lenvitasyon Memoryal sa lannen e akoz sa kanpanny i vreman enportan?
1 Depi le 2 Avril ziska 17 Avril, nou pou distribye lenvitasyon pour sa levennman pli enportan dan lannen. Sa i Memoryal lanmor Kris. I’n annan bokou dimoun dan lepase ki’n aksepte sa lenvitasyon pandan sa kanpanny ki ganny fer tou le lannen. Par egzanp, zour Memoryal, en madanm ti telefonn biro brans e dir: “Mon fek ariv kot mwan e mon’n trouv sa lenvitasyon anba laport. Mon anvi ale me mon pa asire ki ler i pou fer.” Sa frer ti eksplik li kote i pou trouv sa lenformasyon lo sa lenvitasyon. Avan i fini koze, sa madanm ti promet: “Mon pou asiste zot levennman tanto!”
2. Ki nou kapab dir pour prezant sa lenvitasyon?
2 Ki mannyer nou pou fer sa: Vi ki nou napa bokou letan pour kouver teritwar antye, i pou pli bon si nou gard nou konversasyon bref. Nou kapab dir: “Bonzour. Nou ti a kontan envit ou ek ou fanmir pour en levennman enportan ki pou ganny fer dan lemonn antye, Dimans le 17 Avril. [Donn en lenvitasyon sa met lakour.] Sa dat i lanniverser lanmor Zezi. I pou annan en diskour baze lo Labib ki pou eksplike ki mannyer nou kapab benefisye atraver sakrifis Kris. Lo sa lenvitasyon i annan dat ek landrwa kot i pou ganny fer ki pli pros avek ou.”
3. Ki mannyer nou kapab envit otan dimoun posib?
3 Si ou kongregasyon i annan en gran teritwar, i posib ki bann ansyen pou demann ou pour met lenvitasyon anba laport kot bann lakour kot napa personn e pous li byen anndan. Pa oubliye pour envit ou bann retourn vizit, fanmir, koleg travay, zanmi lekol ek lezot dimoun ki ou konnen. Kan ou partisip dan sa kanpanny dan wikenn, ofer bann magazin osi kan i apropriye. Eski ou kapab fer pionye asistan pandan mwan Avril e partisip pli plennman dan sa kanpanny ki byen gou?
4. Akoz nou anvi bann dimoun senser i asiste Memoryal?
4 Pa i pou en gran temwannyaz pour bann ki vin asiste! Zot pou aprann lafason ki Zeova in demontre son gran lanmour par fourni nou avek sakrifis Zezi konman en ranson. (Zan 3:16) Zot pou aprann ki mannyer Rwayonm Bondye pou anmenn byenfe pour imen. (Iza. 65:21-23) Zot pou osi ganny envite pour apros en manm servis lakey pour demann en letid Labib kot zot pou kapab aprann plis. Annou fer li en size dan nou lapriyer ki bann dimoun senser i aksepte sa lenvitasyon e asiste Memoryal ansanm avek nou!