Kanpanny pour anons Memoryal pou konmans le 17 Mars
1. Ki kanpanny ki pou konmanse le 17 Mars?
1 Memoryal i ganny fer tou le lannen pour anons lanmor Zezi. (1 Kor. 11:26) Alor, nou anvi ki lezot i asiste avek nou e vin ekout sa diskour konsernan sa zoli kado ki Zeova in donn nou, sa sakrifis ranson. (Zan 3:16) Sa lannen, kanpanny lenvitasyon pour Memoryal pou konmans Sanmdi le 17 Mars. Eski ou enpasyan pour partisip plennman dan sa kanpanny lenvitasyon?
2. Ki nou kapab dir pour prezant sa lenvitasyon?
2 Sa ki nou kapab dir: I pou pli bon si nou gard nou prezantasyon bref. Petet nou kapab dir: “Bonzour. Nou’n anmenn sa lenvitasyon pour ou fanmir pour en levennman enportan ki pou ganny fer dan lemonn antye, Zedi le 5 Avril. I pou annan en diskour baze lo Labib ki pou eksplik sa ki lanmor Zezi in akonplir e ki Zezi pe fer la konmela. Lo sa lenvitasyon i annan dat ek landrwa kot i pou ganny fer ki pli pros avek ou.” Kan pe distribye sa bann lenvitasyon dan wikenn, nou devret osi ofer bann magazin kan i apropriye.
3. Ki mannyer nou kapab envit otan dimoun posib?
3 Envit otan dimoun posib: Nou lobzektif se pour envit otan dimoun posib. Alor, fer sir ki ou envit ou bann etidyan Labib, retourn vizit, fanmir, koleg travay, kanmarad lekol, vwazen ek lezot dimoun ki ou konnen. Bann ansyen dan ou kongregasyon pou dir ou ki mannyer ou kapab kouver ou teritwar. Sa kanpanny ki nou fer tou le lannen pour envit dimoun Memoryal i anmenn rezilta. Kan en madanm ti antre dan en landrwa kot Memoryal ti pe ganny fer lannen pase, en frer ti ofer pour ed li trouv sa proklanmater ki ti envit li. Me sa madanm ti dir ki i pa konn personn e ki i ti’n ganny sa lenvitasyon avek en dimoun ki ti pe pas portanport pli boner sa zour.
4. Ki rezon nou annan pour partisip dan sa kanpanny avek bokou devouman?
4 Petet en dimoun dan lasistans kot Memoryal pou la akoz ou’n kit en lenvitasyon avek li. Me ki swa en dimoun i asiste Memoryal oubyen non lefet ki ou pou’n fer bokou zefor pour kit en lenvitasyon avek li, sa pou rann en temwannyaz dan li menm. Sa lenvitasyon ki ou pou donnen pou anonse ki la konmela Zezi i en Lerwa. Ou partisipasyon byen devoue pou montre tou bann ki vwar ou, enkli bann dimoun dan teritwar, bann proklanmater e pli enportan Zeova, ki ou vreman apresye sa ranson konman en kado.—Kol. 3:15.