En kanpanny ki anmenn bon rezilta

Trwa semenn avan lasanble, bann kongregasyon pou ankor enn fwa partisip dan en kanpanny pour envit bann ki enterese dan teritwar pour asiste lasanble. I annan bann bon rezon pour fer sa kanpanny tou le-z-an. Bann ki aksepte sa lenvitasyon e vin lasanble i souvan enpresyonnen par bann diskour baze lo Labib, bann volonter ki byen organize, nou bon kondwit e sa linite ki annan antre nou. (Ps. 110:3; 133:1; Iza. 65:13, 14) Me eski nou kanpanny i anmenn rezilta, espesyalman dan bann landrwa kot bann ki enterese i bezwen vwayaz bann gran zistans pour asiste lasanble?

Apre lasanble distrik 2011, biro brans ti ganny en let sorti kot en madanm ki ti’n vwar en lenvitasyon anba son laport. I ti abitye kasyet kan bann Temwen Zeova ti tap son laport. I ti ekrir: “Mon ti annan en zoli lakaz, en bon msye, e mon ti krwar ki mon ti annan tou keksoz ki ti pou fer mwan ere. Malerezman, mon pa ti ere e mon lavi ti napa en bi. Alors, mon ti deside dray 320 kilomet pour asiste progranm lasanble Sanmdi.” I ti telman kontan sa lasanble ki i ti telefonn son msye pour dir li ki i pe pas lannwit laba pour asiste progranm Dimans tou. “Mon ti ekout tou bann diskour, mon ti zwenn bokou Temwen Zeova e mon ti deside ki tou sa la pa ti pou fini lanmenm.” Apre ki i ti’n retourn kot li, i ti konmans etidye e kat mwan plitar i ti vin en proklanmater non batize. “Mon telman kontan ki mon ti vwar sa lenvitasyon anba mon laport akoz aprezan mon lavi i annan en bi!”

Serten ki ganny sa lenvitasyon pou vini. Alors, annou partisip avek devouman dan sa kanpanny enportan. Bann lenvitasyon ki reste i devret ganny anmennen kot lasal lasanble. Nou pou kapab servi zot pour envit bann dimoun dan en fason enformel pandan sa trwa zour lasanble.

[Bwat lo paz 5]

Konman pour ofer sa lenvitasyon?

Pour nou kapab kouver nou teritwar an antye, nou bezwen gard nou konversasyon bref. Petet nou kapab dir: “Bonzour. Nou pe partisip dan en kanpanny mondyal pour distribye sa lenvitasyon. Sa i ou kopi. Ou pou vwar plis lenformasyon lo sa lenvitasyon.” Ofer sa lenvitasyon avek lantouzyasm. Kan ou pe partisip dan kanpanny pandan wikenn, ofer bann magazin kan i apropriye.