En Video ki eksplik en Devlopman enportan dan Domenn medikal
Bann profesyonnel dan sistenm lasante ek legal pe donn plis latansyon bann pwennvi moral ek drwa bann pasyan. Sa in promot bann nouvo tretman ek metod ki bann Temwen Zeova i kapab benefisye. (Akt 15:28, 29) Se sa ki sa video Transfusion-Alternative Health Care—Meeting Patient Needs and Rights i konsantre lo la. Get sa video, e apre revwar sa ki ou’n aprann.—Not: Vi ki sa video i annan bann senn kot pe fer loperasyon, bann paran i devret servi bon zizman ler zot pe get sa video avek zot zanfan.
(1) Akoz serten dokter pe egzaminen si zot devret kontinyen servi transfizyon disan parey oparavan? (2) Donn trwa legzanp bann loperasyon konplike ki kapab ganny fer san transfizyon disan. (3) Ki kantite dokter ek sirizyen atraver lemonn ki’n montre ki zot pare pour tret bann pasyan san servi disan? Akoz zot pare pour fer sa? (4) Ki bann dernyen letid in montre konsernan servi disan? (5) Ki danze transfizyon disan i kapab anmennen pour lasante en dimoun? (6) Ki konklizyon serten eksper in tonm lo la konsernan byenfe lezot tretman ki kapab ganny servi dan plas transfizyon disan? (7) Kwa ki fer dimoun ganny lannemi? Ziska ki degre imen i kapab siport lannemi san annan bann move lefe? Kwa ki kapab ganny fer pour anpes sa? (8) Ki mannyer en pasyan i kapab prodwir plis globil rouz? (9) Ki metod ki ganny servi pour limit lakantite disan ki perdi pandan loperasyon? (10) Eski lezot tretman ki ranplas transfizyon disan i efikas pour bann zanfan oubyen pour bann dimoun ki zot lavi i an danze? (11) Ki bann dokter i bezwen pran an konsiderasyon avek zot pasyan? (12) Akoz i enportan ki byen boner bann Kretyen i swazir ki kalite tretman ki pa kontyen disan ki zot pare pour aksepte? Ki mannyer nou kapab fer sa?
En dimoun i fer son prop desizyon dapre son konsyans baze lo Labib si i pou aksepte okenn tretman dan sa video. Eski ou’n deside ki lezot tretman ki ranplas transfizyon disan ou pare pour aksepte e osi pour ou zanfan? Ou bann fanmiy ki pa Temwen i devret ganny byen enformen lo ou desizyon ek rezon akoz ou’n fer li.—Vwar “Kestyon Lekter” dan Latour Veyer le 15 Zen, 2004, ek le 15 Oktob, 2000 (Angle/Franse).