Kondwir bann Letid Labib ki progrese devan Laport e par Telefonn
1. Pour ki bi nou kondwir bann letid Labib?
1 Pa i en lazwa pour konmans en letid Labib! Me pour trouv en dimoun ki enterese pour etidye i zis konmansman. Bi sa letid se pour ed sa dimoun vin en vre disip Kris. (Mat. 28:19, 20) Kwa ki kapab ed nou akonpli sa lobzektif?
2. Kisisa letid devan laport e lo telefonn, e akoz zot efikas?
2 Bann Dimoun okipe: Ozordi dimoun i deplizanpli okipe. Dan serten landrwa, en pti gin dimoun i pare pour etidye pour enn er-d-tan. Pour kapab ed zot, nou ti ganny ankouraze pour konmans e kondwir bann letid Labib devan laport oubyen lo telefonn. Premye kou, sa bann letid i kapab bref e ennde verse Labib i kapab ganny diskite par servi enn oubyen de paragraf dan en liv, parey Ki Labib i dir. Nou felisit bann proklanmater ki pe kondwir bann letid devan laport oubyen lo telefonn!
3. Akoz nou devret fer zefor pour ogmant lakantite letan nou pase lo en letid devan laport?
3 Me eski nou satisfe pour toultan kondwir en letid Labib devan laport? Non. Menm si nou pa koz tro bokou devan laport ler nou’n fek konmans en letid, Nou Minister Rwayonm Me 1990, paz 8, i dir: “Enn fwa sa letid in ganny etablir e lentere sa dimoun in devlope, nou kapab pas plis letan lo sa letid.” Sa i tre enportan. Annou pran en legzanp. En zanfan ki pa’n manze detrwa zour i kapab lo konmansman manz pti gin par pti gin ziska ki i reganny son lapeti. Me nou pa kapab ekspekte li annan bokou lafors e grandi normal si i ti ganny en pti gin manze pour en gran kantite letan. Pareyman, en dimoun ki pe etidye Labib i bezwen ganny en letid pli formel e regilye pour li kapab vin en serviter Bondye ki matir.—Ebr. 5:13, 14.
4. Ki byenfe i annan ler en letid i ganny fer dan en lakour?
4 Letid Labib dan en Lakour: I pou pli byen pour kondwir en letid dan en landrwa prive. I kapab dan en lakour oubyen dan lezot landrwa apropriye. Sa pou ed sa etidyan aprann pli fasilman e pour pli byen konpran Parol Bondye. (Mat. 13:23) I pou osi ed sa ansennyan pour adapte sa lenformasyon avek bezwen sa etidyan. Deplis ler letid i ganny fer pour plis letan, sa pou ede egzamin Parol Bondye pli oprofon e dan en fason ki pou fortifye lafwa.—Rom. 10:17.
5. Ki mannyer ou kapab fer en letid devan laport vin en letid dan en lakour?
5 Ki mannyer ou kapab fer en letid devan laport vin en letid dan en lakour? Apre enn de letid bref, akoz ou pa ofer pour fer letid pli long dan en serten kantite letan spesifik? Oubyen ou kapab demann sa dimoun, “Eski ou pou annan letan ozordi si nou asize e diskit sa ansanm?” oubyen “Ki kantite letan ou ti pou kontan pase pour diskit sa size ozordi?” Si ou pa reisi dan ou zefor, ou devret kontinyen avek ou letid devan laport. Dan en lot moman ou kapab sey ankor.
6. Avek ki lobzektif nou devret akonpli nou minister, e konman sa bann sizesyon dan sa lartik i kapab ed nou pour atenn sa lobzektif?
6 Anmezir ki nou kontinyen rod bann dimoun senser, annou pa bliye ki nou bi se pour konmans e kondwir bann letid Labib. Nou lobzektif se pour ed bann dimoun ki annan leker senser pour vin bann serviter Zeova ki’n dedye e batize. Fotespere ki i beni nou zefor anmezir ki nou akonpli nou minister avek sa lobzektif antet.—2 Tim. 4:5.