Kwen kestyon

◼ Lekel sa de piblikasyon ki nou devret servi pour etidye avek dimoun ki enterese?

Sa liv Ki Labib i dir, i sa liv prensipal pour konmans e kondwir letid Labib. Menm si i pa defann servi en lot piblikasyon, parey en trak apropriye, pour konmans en letid, osito posib i byen pour fer zefor pour al dan sa liv Ki Labib i dir. I’n annan bann rezilta remarkab kan sa liv in ganny servi o konmansman pour konmans letid Labib.

Kan sa liv Ki Labib i dir in fini ganny etidye e sa etidyan pe fer progre, sa liv Ador Bondye i devret ganny servi pour letid. (Kol. 2:7) Lo paz 2 i eksplike pour ki rezon sa liv in ganny fer: “Labib i enplor tou bann ki kontan Bondye pour ‘konpran . . . oter e profonder’ son laverite presye. (Efezyen 3:18) Sa liv in ganny prepare avek sa lobzektif. Nou espere ki i pou ed ou pour grandir spirityelman e pour pli byen ekipe pour mars dan sa semen etrwat ki anmenn ver lavi dan nouvo monn drwat Bondye.”

Si sa etidyan i kalifye pour batize avan ki i fini sa de liv, letid i devret kontinyen ziska ki sa dezyenm liv i fini. Menm si sa etidyan in batize, sa kondikter i kapab kont son letan, retourn vizit ek letid Labib. Sa proklanmater ki al avek sa kondikter e ki partisipe dan letid i osi kapab kont son letan.