Ki mannyer pour servi liv “Lanmour Bondye” pour kondwir letid Labib
1. Ki lobzektif sa liv “Lanmour Bondye”?
1 Pa nou ti vreman kontan ler nou ti resevwar sa nouvo liv “Reste dan lanmour Bondye” dan nou Lasanble Distrik “Lespri sen i gid nou”! Parey i ti ganny anonse, sa liv pa’n ganny prepare pour ansenny laverite debaz me i’n ganny prepare pour ed nou konn e kontan standar Zeova an rapor avek kondwit. Nou pa pou ofer sa liv dan predikasyon portanport.
2. Ki mannyer sa liv pou ganny servi e avek lekel?
2 Sa liv pou ganny servi konman sa dezyenm liv pour etidye avek bann etidyan Labib apre ki zot in konplet sa liv Ki Labib i dir. Gard antet ki progre spirityel sak dimoun i diferan. Sak letid i devret ganny kondwir lo en lespas letan oubyen vites ki apropriye pour sa etidyan. Fer sir ki i byen konpran sa lenformasyon ki ganny egzaminen. Dan lamazorite ka, sa liv pa devret ganny servi pour konmans letid Labib avek bann dimoun ki petet in deza etidye plizyer liv dan lepase me pa pe asiste bann renyon e ki i evidan ki zot pa enterese pour konform zot lavi avek sa laverite dan Labib ki zot in aprann.
3. Ki nou devret fer si nou pe deza kondwir en letid dan liv Ador Bondye?
3 Si ou pe kondwir en letid dan liv Ador Bondye, e ou’n ariv dan bann dernyen sapit, ou kapab deside pour konplet sa liv e ankouraz sa etidyan pour lir sa liv “Lanmour Bondye” personnelman. Sinon, i pou pli bon aret sa letid dan liv Ador Bondye e konmans sa letid dan sa nouvo liv. Parey avek liv Ki Labib i dir, ou kapab deside si i neseser pour diskit bann size dan lezot lenformasyon.
4. Ki nou devret fer si nou etidyan i batize avan ki i konplet sa liv Ki Labib i dir ek liv “Lanmour Bondye”?
4 Si en etidyan i batize avan ki i konplet tou le de liv, sa letid i devret kontinyen ziska ler i fini etidye sa liv “Lanmour Bondye.” Menm si sa etidyan in batize, ou kapab raport ou ler, sa retourn vizit ek letid Labib. En proklanmater ki akonpanny ou e partisipe dan sa letid i kapab osi kont son ler.
5. Ki mannyer sa liv “Lanmour Bondye” i kapab ganny servi pour ed en proklanmater ki pour en pe letan pa’n partisip dan travay predikasyon?
5 Si ou ganny dezinyen par en ansyen ki dan Komite Servis Kongregasyon pour kondwir en letid Labib avek en proklanmater ki’n vin inaktif dan predikasyon, ou kapab ganny demande pour egzamin bann sapit spesifik dan liv “Lanmour Bondye.” Dan sa ka, sa letid pa devret ganny kondwir pour en kantite letan. Pa sa nouvo liv i en bon provizyon ki’n ganny prepare pour ed nou reste “dan lanmour Bondye”!—Zid 21.