Kanpanny spesyal pour anons Memoryal!
1. Kwa ki bann proklanmater Rwayonm dan lemonn antye pou enplike ladan konmansman le 21 Mars 2009 e akoz?
1 Zedi le 9 Avril 2009, bann adorater Zeova partou dan lemonn pou rasanble pour rapel pli gran akt lanmour ki Bondye in demontre pour limanite. (Rom. 5:6-8) Avek lantouzyasm nou pe antisipe ki plizyer milyon dimoun ki enterese i zwenn avek nou sa zour pour komemor lanmor Zezi. En lenvitasyon spesyal pour asiste Memoryal pou ganny distribye dan lemonn antye konmansman le 21 Mars.
2. Ki pwen ou devret gard antet kan ou pe ofer sa lenvitasyon?
2 Bann pwen pour gard antet: Servi byen portre, kestyon ek verse ki lo sa lenvitasyon. Par egzanp, ou kapab refer avek sa portre lo kouvertir e dir: “Mon ti anvi envit ou pour komemor lanmor Zezi ansanm avek nou Zedi le 9 Avril 2009.” Apre refer avek sa tit lo sa lenvitasyon ek kestyon ki swiv. Fer sir ki ou fer sa met lakour konnen ki i kapab envit son fanmir ek okenn lezot dimoun ki i ti a kontan i vin avek li.
3. Ki mannyer ou kapab swiv lentere en dimoun apre ki ou’n ofer li en lenvitasyon dan kanpanny?
3 Si ou kongregasyon i annan en gran teritwar, bann ansyen i kapab dir ou kit en lenvitasyon kot bann dimoun ki absan. Dan wikenn, ofer bann magazin ansanm avek sa lenvitasyon. Fer li ou lobzektif pour envit ou bann retourn vizit, etidyan Labib, fanmir, kanmarad lekol, koleg travay, vwazen ek lezot dimoun ki ou konnen. Lannen pase, en ser ti envit 30 manm son fanmir e apre detanzaot i ti rapel zot lenportans sa levennman. I ti vreman kontan kan 25 ladan ti asiste e pli tar 4 parmi ti aksepte en letid Labib!
4. Ki laranzman nou devret fer la konmela e akoz?
4 Fer laranzman la konmela: Petet plizyer proklanmater pou kapab ogmant zot aktivite predikasyon pandan mwan Mars ek Avril. Si ou annan zanfan oubyen etidyan Labib ki pe fer bon progre, sa i kapab en bon lokazyon pour zot vin bann proklanmater. La i lemoman pour konmans fer laranzman pour partisip plennman dan sa kanpanny pour anons sa zour kot nou pou komemor sa de pli gran fason ki lanmour in ganny demontre.—Zan 3:16; 15:13.