En provizyon pour bann minis Kretyen
1. Ki laranzman ki ti ganny met an mars 1938 e avek ki lobzektif?
1 An 1938, lorganizasyon Zeova ti met an mars en nouvo laranzman kot plizyer kongregasyon ti ganny envite pour asiste bann lasanble zón. Avek ki lobzektif? Informant Zanvye 1939 i reponn: “Sa bann lasanble i form parti Lorganizasyon Teokratik Zeova ki donn lenstriksyon lo ki mannyer son servis lo Rwayonm i devret deroule. Sa lenstriksyon ki ganny donnen i esansyel pour sak dimoun kapab fer son travay ki i’n ganny dezinyen byen.” Kan nou reflesir lo sa logmantasyon ki in annan dan lakantite proklanmater ki ti zis 58,000 an 1938, i kler ki lasanble zón ki aprezan nou apel lasanble rezyonal, pe atenn son lobzektif pour ed bann minis Kretyen fer sa “travay ki zot in ganny dezinyen” pour fer!
2. Ki lenformasyon ki pou ganny prezante dan nou lasanble rezyonal pour sa nouvo lannen servis?
2 Tenm pour lannen prosenn: Avek enpasyans nou pe esper lasanble rezyonal ek lankourazman ki nou pou gannyen lannen prosenn. Son tenm i ganny tire dan Zan 15:19: “Zot pa fer parti lemonn.” Ki serten diskour ki pou vreman anmenn byenfe pour bann minis Kretyen? Sanmdi nou pou tann en diskour ki annan pour tit: “Servis a plen tan i protez nou—Ki mannyer?” Nou pou osi ganny en diskour an trwa parti avek tit: “Pa les nou ganny kontaminen par . . .” “Sa bebet,” “Sa gran prostitye” ek “Bann marsan.” Dimans nou pou tann en diskour ki annan pour tit: “Kontan Zeova me pa lemonn.” Lezot diskour ki pou ganny devlope i: “Rwayonm Bondye ‘pa form parti sa lemonn,’” “Kontinyen viv ‘konman bann rezidan etranze e tanporer,’” e “Pran kouraz! Ou kapab ranport laviktwar lo lemonn.”
3. Ki byenfe nou kapab gannyen si nou asiste lasanble rezyonal?
3 Apre ki i ti’n asiste en lasanble rezyonal resanman, en ser ki ti’n ralanti dan son minister ti ekrir pour dir ki sa lasanble in fer li re egzamin son sirkonstans e fer li determinen pour “al prese e aret rod leskiz!” San dout progranm lasanble rezyonal pour sa nouvo lannen servis pou ed nou tou kontan Zeova olye kontan sa lemonn. (1 Zan 2:15-17) Fer sir ki ou la prezan e byen atantif pour ou benefisye o maksimonm avek sa provizyon ranpli avek lanmour pour bann minis Kretyen!