Eski ou pou konmans en letid Labib pandan mwan Oktob?
1. Ki nou pou ofer pandan mwan Oktob?
1 Pandan mwan Oktob, nou pou ofer Latour Veyer ek Awake! Pour nou kapab swiv lentere bann dimoun, nou ganny ankouraze pour ofer sa trak Eski ou ti a kontan konn laverite? e fer zefor pour konmans en letid Labib. Ki mannyer nou kapab fer sa ler nou fer retourn vizit?
2. Ki mannyer nou kapab servi sa trak Konn laverite pour konmans en letid Labib ler nou pe retourn kot en dimoun ki’n aksepte magazin?
2 Konman pour servi sa trak: Nou kapab dir: “Sa bann magazin ki mon ti kit avek ou i ankouraz nenport dimoun pour etidye Labib. [Donn sa met lakour sa trak Konn laverite e montre li sa bann kestyon lo premye paz.] La i serten kestyon enteresan. Labib i donn en larepons satisfezan pour sak sa bann kestyon. Eski ou’n deza demann ou lekor okenn sa bann kestyon?” Apre ki met lakour in reponn, servi sa trak pour reponn enn son kestyon e lir enn sa bann verse Labib ki’n ganny site. Apre eksplik li ki sa i zis en legzanp sa ki Labib i ansennyen e donn li en liv Ki Labib i dir. Nou kapab diskit sa bann premye paragraf dan sa sapit ki i swazir dan konteni sa liv. Sinon, nou kapab kontiny sa diskisyon par vir lo sa sapit kot i annan plis lenformasyon konsernan sa size ki nou ti pe diskit lo la dan sa trak. La serten referans ki nou kapab servi:
● Eski Bondye i vreman enterese avek nou? (p. 9-11, par. 6-10)
● Eski lager ek soufrans pou fini en zour? (p. 12, par. 12-13)
● Ki arive avek nou ler nou mor? (p. 59-60, par. 7-8)
● Eski i annan lespwar pour bann ki’n mor? (p. 71, par. 13-15)
● Ki mannyer mon devret priye pour Bondye ekout mwan? (p. 166-167, par. 5-8)
● Ki mannyer mon kapab trouv boner dan lavi? (p. 9, par. 4-5)
3. Ki mannyer nou kapab servi diferan lapros depandan lo sirkonstans?
3 Byensir, si sirkonstans pa permet pour nou konmans e montre li ki mannyer en letid dan liv Ki Labib i dir i deroule lo premye retourn vizit, nou kapab touzour fer laranzman pour retournen e kontiny nou diskisyon. Depandan lo kantite lentere ki sa dimoun i demontre, nou kapab menm deside pour diskit plis ki en kestyon dan sa trak lo plizyer vizit avan entrodwir sa liv. Annou byen servi sa trak pandan mwan Oktob pour konmans en letid Labib e ed bann dimoun ki annan en leker senser “konn laverite.”—Zan 8:31, 32.