Parol Bondye i annan pisans
1. Ki tenm lasanble spesyal pour lannen servis 2014?
1 Kontrerman avek bann imen enparfe, Labib i annan sa pwisans pour transform nou panse e fer nou viv en lavi ki annakor avek lavolonte Zeova. Ki kantite pwisan Parol Bondye i ete? Ki mannyer nou kapab byen servi son pwisans dan nou lavi? Ki mannyer nou kapab servi li dan en pli bon fason pour ed lezot? Nou asire ki nou pou ganny batir spirityelman avek sa bann pwen ki pou ganny egzaminen pandan progranm lasanble spesyal ki’n ganny prepare pour lannen servis 2014. Tenm sa lasanble i ganny tire dan Ebre 4:12, “Parol Bondye i annan pisans.”
2. Larepons ki kestyon nou devret ekoute?
2 Rod larepons sa bann kestyon: Letan ki ou pe ekout sa progranm, pran not larepons sa bann kestyon swivan:
• Akoz nou devret annan konfyans dan Parol Zeova? (Ps. 29:4)
• Ki mannyer nou kapab eksperyans pwisans Parol Bondye dan nou lavi? (Ps. 34:8)
• Ki mannyer ou kapab servi byen sa pwisans ki Parol Bondye i annan dan ou minister? (2 Tim. 3:16, 17)
• Ki mannyer nou kapab evite ganny anbete par pouvwar Satan? (1 Zan 5:19)
• Konman en zenn, ki mannyer ou kapab atenn bann lobzektif spirityel? (Zer. 17:7)
• Ki mannyer nou kapab vin for kan nou feb? (2 Kor. 12:10)
• Kwa ki kapab ed nou kontinyen fer sanzman, menm si nou annan bann labitid ek latitid ki’n anrasinen dan nou? (Efe. 4:23)
3. Apard ekout progranm, ki byenfe nou pou gannyen avek lasanble spesyal?
3 Pa nou pou benefisye avek sa bann lenformasyon enportan! An plis ki sa, parey lasanble rezyonal e lasanble distrik, lasanble spesyal pou donn nou loportinite pour rezouir konpanni lezot frer ek ser ki pa dan nou kongregasyon. (Ps. 133:1-3; 2 Kor. 6:11-13) Alor, fer letan pour asosye avek ou bann vye zanmi e fer bann nouvo zanmi. Si en orater viziter parey sirveyan distrik oubyen en frer ki dan Betel in ganny anvoye pour lasanble spesyal, akoz ou pa profit loportinite pour swet li ek son madanm labyenveni? Byensir, nou annan plizyer rezon pour esper avek enpasyans pour asiste sa lasanble spesyal!