Parol Bondye i itil pour ansennyen
1. Ki tenm lasanble rezyonal pour lannen servis 2014 e ki kestyon ki pou ganny reponn?
1 Nou “Gran Enstrikter,” Zeova, i sa pli bon ansenyan dan liniver antye. (Iza. 30:20, 21) Me ki mannyer Zeova i enstri nou? I’n donn nou en liv pli siperyer ki tou lezot liv, sa i son Parol Labib. Ki mannyer lansennyman sorti kot Bondye i benefisye nou fizikman, mantalman, emosyonnelman e spirityelman? Larepons sa kestyon pou ganny egzaminen pandan progranm lasanble rezyonal pour lannen servis 2014. Sa progranm i baze lo 2 Timote 3:16, ki annan pour tenm “Parol Bondye i itil pour ansennyen.”
2. Bann pwen prensipal pou fer resorti larepons ki kestyon?
2 Rod sa bann pwen prensipal: Sa bann pwen prensipal pou ganny fer resorti atraver larepons sa bann kestyon swivan:
• Ki lefe lansennyman sorti kot Bondye i annan lo nou lavi? (Iza. 48:17, 18)
• Si nou anvi sanz nou sirkonstans pour servi Zeova a plen tan, ki nou kapab asire nou pou gannyen? (Mal. 3:10)
• Ki mannyer nou devret reazir kan nou ganny bonbarde avek “tou sort lansennyman drol”? (Ebr. 13:9)
• Ki mannyer nou kapab imit lafason ki Zezi ti “ansennyen”? (Mat. 7:28, 29)
• Akoz bann ansenyan dan kongregasyon i devret ansenny zot prop lekor? (Rom. 2:21)
• Parol Bondye i itil pour fer kwa? (2 Tim. 3:16)
• Dan ki fason bann dimoun i ganny afekte ler tou bann nasyon i ganny “sekwe”? (Aga. 2:6, 7)
• Ki kantite konfyans Zeova i annan dan nou? (Efe. 5:1)
• Akoz nou devret travay dir pour reste dan lansennyman Zeova? (Lik 13:24)
3. Akoz i enportan pour nou asiste e ekout atantivman sa progranm ki’n ganny prepare a ler?
3 Zis avan Pol ti ekrir sa parol dan 2 Timote sapit 3 ki tenm lasanble rezyonal, i ti dekrir en letan difisil ki ti pou arive pandan bann dernyen zour. I ti ekrir: “Move dimoun ek bann anbeter, zot pou fer touzour plis progre dan sa ki mal, zot pou anbet lezot e zot osi zot pou ganny anbete.” (2 Tim. 3:13) Pour ki nou pa ganny anbete, pa i enportan pour nou ekout e aplik lansennyman sorti kot Bondye! Alor, annou determinen pour asiste e ekout atantivman sa progranm ki’n ganny prepare a ler.