Bann leksperyans

◼ Lostrali: John, en zonm byen edike ti abitye al legliz ler i ti zanfan, me aprezan i pa krwar dan Bondye. En pionye ti donn li sa brosir Was Life Created? e lo en lot vizit sa brosir Origin of Life. Sa pionye ti kontinyen devlop son lentere par anmenn bann nouvo magazin ek bann lartik baze lo kreasyon ek profesi Labib. Kan i ti vwar ki John ti’n pare, i ti ofer li sa liv The Bible​—God’s Word or Man’s? Apre ki i ti’n lir sa liv John ti konmans krwar ki i posib ki Bondye i egziste. Apre, sa pionye ti montre li paragraf 8 lo paz 20 ek paragraf 13-16 lo paz 23-24 dan liv Ki Labib i dir? Sa bann verse ki ti’n ganny site dan sa bann lenformasyon ti sitan enpresyonn John ki i ti dir: “Petet mon bezwen rekonsider Labib.”

◼ Meksiko: En zonm ti dir avek en proklanmater ki i pa krwar ki Labib in ganny enspire par Bondye. Sa proklanmater ti ofer pour montre li laprev ki Labib in ganny enspire. Apre plizyer diskisyon, sa ki i ti pe aprann dan Labib ti konmans sanz son fason panse. I ti vreman emosyonnen ler i ti aprann bann standar Bondye. I ti dir avek sa proklanmater: “O konmansman ler nou ti lir Labib, i ti paret ki son konsey ti parey sa ki dan nenport liv e i ti napa okenn lefe lo mwan. Me aprezan kan nou lir Labib, espesyalman son konsey lo moralite, mon leker i fermal.”

◼ Leta-z-ini: Ler zot ti pe fer Temwannyaz spesyal an piblik dan en gran lavil, en koup ti zwenn en madanm ki sorti Taywann ki ti krwar dan Bondye me ti santi ki Labib i pour bann Eropeen ek Ameriken. I ti vin kot zot latab piblikasyon akoz i ti santi ki son lavi ti napa en bi menm si i ti annan en lavi konfortab. I ti swete ki Labib ti pou kapab ed li. Sa koup ti konmans letid avek li dan liv Ki Labib i dir? ek sa brosir Lasting Peace and Happiness​—How to Find Them. Dan plas etidye sapit 2 dan liv, zot ti fer en diskisyon lo sa brosir dan sa seksyon ki annan pour tit “A Guidebook for the Blessing of All Mankind.” Apre ki zot ti’n egzamin sa sis premye paragraf dan sa seksyon, sa madanm ti etonnen pour vwar ki Labib i en liv ki inik konpare avek lezot liv relizye. Apre ki zot ti’n egzamin bann profesi dan Labib ki’n ganny akonpli i ti dir: “Napa en lot liv ki egzakt parey Labib!”

◼ Zapon: Menm si en met lakour ti dir avek en proklanmater ki i pa krwar dan Bondye sa proklanmater ti kontinyen fer bann vizit bref kot li pour montre li bann lartik dan Awake! ki annan pour tit “Was it Designed?” Avek letan, sa zonm ti sanz son pwennvi e konmans admet ki petet i annan en Kreater. Konmela i krwar ki i annan en Bondye e i pe etidye dan sa brosir Bon nouvel sorti kot Bondye!

◼ Kanada: Ler en madanm ti pe kit son lakaz pour al kot son loto en ser ti ofer li bann nouvo magazin. Pli tar, kan sa ser ti retournen, sa madanm ti dir li ki i pa enterese e i definitivman pa krwar dan Bondye. Sa ser pa ti dekouraze e i ti determinen pour anmenn sa brosir A Satisfying Life​—How to Attain It pour li. Kan sa ser ti zwenn sa madanm kot li i ti dir li ki menm si i pa krwar dan Bondye, i pa’n aret mazin li, akoz i ti konnen ki i ti en paran tousel. I ti montre sa madanm paragraf 6 lo paz 4 dan sa brosir ki koz lo kote pour trouv bon konsey. Apre sa i ti ankouraz li pour lir bann sizesyon dan leson 2 konsernan elve zanfan. Sa madanm ti byen kontan pour aksepte sa brosir.