Amelyor nou abilite pour prese—Pres dan teritwar biznes

Akoz i enportan: Vi ki bokou dimoun i pas bokou letan dan travay, souvan i pli fasil pour pres mesaz Rwayonm avek zot kot zot travay. Pres dan teritwar biznes i kapab gou e prodiktif akoz napa absan e bann travayer i tant pour pli poli akoz zot vwar nou konman bann dimoun ki kapab vin zot kliyan. Bann proklanmater i bezwen servi bon zizman e annan en latitid egzanpler dan zot labiyman ek laparans pour vin pli efikas dan sa form predikasyon. (2 Kor. 6:3) I pou sa rezon ki sirveyan servis i devret vey byen ki kantite fwa teritwar biznes i ganny kouver e lekel ki fer li.

Ki mannyer pour fer li:

Prepar en prezantasyon bref. Si nou pran tro bokou letan sa travayer, nou kapab pa ganny loportinite pour koz avek li ankor.
Swazir pour fer ou vizit en letan kot zot pa tro bizi, petet dan bomaten ler zot fek ouver.
Esey koz avek sa dimoun ki ansarz avan. Azir dan en fason amikal e zantiy. Ou kapab dir: “Nou pe vizit dimoun dan zot landrwa travay akoz i difisil pour trouv zot dan lakour.” Fer en prezantasyon bref e ofer li en trak, magazin, oubyen en nenport piblikasyon. Pour pa donn lenpresyon ki nou pe vin vann nanryen, ordinerman i pli bon pour pa koz lo kontribisyon amwen ki nou ganny demande ki mannyer nou travay i ganny finanse.
Si sa dimoun ki ansarz i paret zantiy, demann li permisyon pour koz en pti kou avek lezot travayer. Kot serten landrwa, i pli byen pour demande si nou kapab kit nou bann piblikasyon dan sa landrwa kot travayer i pran zot brek.
Servi bon zizman e pare pour adapte. Par egzanp, si en travayer pe koz avek en kliyan oubyen i okipe, espere ki i lib avan ki ou apros li.

Esey sa pandan sa mwan:

Pandan ou prosen Ladorasyon Fanmir, fer en pti repetisyon sa prezantasyon ki ou kapab servi si ou pres dan teritwar biznes.