Nou bann magazin in ganny fer pour atir tou kalite dimoun
1. Ki mannyer lesklav fidel e pridan i imit legzanp zapot Pol?
1 Zis parey zapot Pol ti adapte lafason ki i ti prezant sa bon nouvel pour li kapab sov “tou dimoun,” lesklav fidel e pridan i servi bann magazin pour atir tou dimoun sorti dan diferan lanvironnman ek krwayans. (1 Kor. 9:22, 23) Pour nou kapab servi byen Latour Veyer ek Awake! nou bezwen gard antet sa bann dimoun ki lir sa bann magazin.
2. Awake! i ganny fer pour atir lekel?
2 Awake!: Sa magazin i ganny fer pour atir bann dimoun ki parey sa bann “Atenyen” ki zapot Pol ti koz avek. (Akt 17:22) Sa bann zonm pa ti grandi dan en fanmir Kretyen e menm zot pa ti konpran byen Labib. Pareyman, Awake! i ganny fer pour atir bann dimoun ki pa tro konpran byen oubyen napa ditou konnesans lo Labib. Petet zot pa konn okenn lansennyman Kretyen, zot pa realize ki dan Labib i annan bann valer pratik oubyen pour en serten rezon, zot napa konfyans dan larelizyon. Bi prensipal magazin Awake! se pour konvenk son lekter ki sa vre Bondye i egziste. I osi pour ed son lekter batir lafwa dan Labib e ed sa lekter konpran ki Temwen Zeova i diferan avek lezot group larelizyon.
3. Sa de edisyon Latour Veyer i ganny fer pour atir lekel?
3 Latour Veyer: Bann dimoun ki lir edisyon piblik sa magazin i bann ki annan serten respe pour Bondye ek Labib. Zot ti annan en pe konnesans lo Labib me pa ti konpran byen son lansennyman. Zot parey sa bann dimoun ki ti annan en serten lakrent pour Bondye ki Pol ti refer avek konman bann ki “ador Bondye.” (Akt 13:14-16) Edisyon letid Latour Veyer i ganny fer prensipalman pour Temwen Zeova. Pol ti prezimen ki bann ki ti lir son bann let ti familye avek Lekritir e ti annan konnesans egzakt lo laverite. (1 Kor. 1:1, 2) Pareyman, bann lartik dan edisyon letid i ganny ekrir pour bann ki pe asiste renyon ek bann ki familye avek bann term ek lansennyman ki Temwen Zeova i servi.
4. Akoz nou devret vin familye avek bann magazin ki nou servi dan predikasyon?
4 Menm si normalman nou ofer Awake! ek Latour Veyer ansanm, ordinerman nou koz zis lo enn. Alors, fer li ou lobzektif pour vin familye avek sak sa bann magazin. Dan sa ka, ou pou pli byen kapab servi zot pour atir nenport dimoun ki ou zwenn.