Ilistrasyon tire dan bann Sitiasyon familye

BYENSIR, i enportan, ki okenn ilistrasyon ki ou servi i adapte avek sa lenformasyon ki ou pe diskite. Toutfwa, pour zot vin pli efektiv, i osi enportan ki zot adapte avek ou lodyans.

Ki mannyer kalite lodyans ki ou pe koz avek i kapab enfliyans kalite ilistrasyon ki ou servi pour koz avek en group? Ki Zezi Kri ti fer? Ki swa i ti pe koz avek bann lafoul oubyen avek son bann disip, Zezi pa ti pran son bann legzanp dan bann fason viv ki ti popiler dan bann pei an deor Izrael. Pour son lodyans sa bann tel legzanp ti pou etranz pour zot. Par egzanp, Zezi pa ti mansyonn lavi rwayal Lezip oubyen bann pratik relizye Lenn. Toudmenm, son bann ilistrasyon ti baze lo bann aktivite ki ti komen pour dimoun dan tou pei. I ti koz lo pyeste lenz, tranzaksyon biznes, perdi en keksoz presye, e asiste resepsyon maryaz. I ti konpran konman dimoun i reazir anba diferan sirkonstans, e i ti servi sa konnesans. (Mark 2:21; Lik 14:7-11; 15:8, 9; 19:15-23) Vi ki i ti diriz son predikasyon partikilyerman anver pep Izrael, bann ilistrasyon Zezi ti pli souvan fer referans avek bann lobze ek bann aktivite ki ti form parti zot lavi toulezour. Alor, i ti refer avek bann keksoz parey ki plante, lafason ki mouton i reazir avek zot berze, e servi bann lapo zannimo pour stor diven. (Mark 2:22; 4:2-9; Zan 10:1-5) I ti osi fer resorti bann legzanp istorik ki ti familye, par egzanp—kreasyon premye koup imen, Deliz dan letan Noe, destriksyon Sodonm ek Gomor, lanmor madanm Lot. (Mat. 10:15; 19:4-6; 24:37-39; Lik 17:32) Ler ou pe swazir bann ilistrasyon, eski ou konsider avek swen bann aktivite ki ou lodyans i konn byen e zot lorizin kiltirel?

Me ki ou pou fer ler ou pe koz avek zis en dimoun oubyen petet avek zis detrwa dimoun? Esey swazir en ilistrasyon ki espesyalman apropriye pour sa pti lodyans. Ler Zezi ti rann temwannyaz avek en madanm Samariten kot en pi pros avek Sikar, i ti koz lo “delo ki donn lavi,” “pa pou zanmen swaf,” e “en sours lavi eternel ki pou koul an labondans”—zot tou zot ti bann lekspresyon senbolik ki ti direkteman relye avek travay sa madanm. (Zan 4:7-15) E ler i ti koz avek bann zonm ki ti pe lav zot lasenn pwason, sa lekspresyon senbolik ki i ti swazir ti enplik biznes lapes. (Lik 5:2-11) Dan tou le de ka, i ti kapab fer referans lo plante, vi ki zot ti viv dan en landrwa kot lagrikiltir ti komen, me i ti pli efektiv pour stimil zot mazinasyon par fer referans avek zot aktivite personnel! Eski ou esey fer parey?

Zezi ti diriz latansyon lo “bann brebi perdi pep Izrael,” me tandis ki zapot Pol ti ganny anvoye pa zis pour Izrael me osi anver bann dimoun lezot nasyon. (Mat. 15:24; Akt 9:15) Eski sa ti fer en diferans dan fason ki Pol ti koze? Wi. Ler i ti pe ekrir bann Kretyen an Korent, i ti fer referans lo paryaz taye, mansyonn pratik manze dan bann tanp zidol, e refer avek laprosesyon laviktwar ki ti familye avek bann non-Zwif.—1 Kor. 8:1-10; 9:24, 25; 2 Kor. 2:14-16.

Dan ou lansennyman eski ou swazir byen bann ilistrasyon parey Zezi ek Pol ti fer? Eski ou konsider lorizin ek aktivite toulezour bann dimoun ki ekout ou? Byensir sitiasyon lemonn in sanze depi premye syek. Bokou dimoun i annan akse avek nouvel lemonn par mwayen televizyon. Laplipar-di-tan zot konn byen bann sitiasyon dan lezot pei. Alor, i definitivman itil pour servi sa bann nouvel konman ilistrasyon. Toudmenm, bann keksoz ki tous dimoun pli oprofon i enplik zot lavi personnel—zot lakaz, zot fanmiy, zot travay, manze ki zot manze, klima zot pei.

Si ou ilistrasyon i demann bokou leksplikasyon, petet ou pe koz lo en keksoz ki ou lodyans pa familye avek. En tel ilistrasyon i kapab fasilman etouf sa pwen ki ou esey fer resorti. E son rezilta se, ki sa lodyans i kapab rapel ou ilistrasyon me pa sa laverite Labib ki ou ti pe esey transmet.

Dan plas fer bann konparezon konplike, Zezi ti servi bann keksoz senp dan lavi toulezour. I ti servi bann pti keksoz pour eksplik bann gro keksoz e bann keksoz fasil pour klarifye bann keksoz difisil. Par relye bann levennman toulezour avek bann laverite spirityel, Zezi ti ed dimoun pour konpran pli fasilman bann laverite spirityel ki i ti pe ansennyen e pour zot pa oubliy sa bann laverite. Eski sa pa i en bon legzanp pour imite!