INKAˈNEYASAJNA 01

¿Tepa janwo kanoyeˈaˈm na Biblia?

Edición impresa

Kas ˈloj ti aniˈyasaˈni apeˈe jana siˈwasankiye, seki niwa sijliakˈaliyis, seki napo ti ˈyajleˈn, seki puwa jlomas ti naˈam sitieyiji. Seki sijliakˈalis poˈ ti lajkˈi pa ka iˈwina, oka ke iˈwina pa sikijmaye, oka ke inilaˈnajan ka iˈwina pet napo saˈam ijia ka inkasajaˈn. ˈLoj napo iˈnioˈl itiantˈieje ti janak Biblia isiul apeˈe siunie iyo ka ˈnajane seki ja naka jlam iniuyeje jlomaskˈi. ¿Aˈam jitijnisie ja nak Biblia ka noyeje siunapo intantˈieje?

1. ¿Tempuwa isiul apeˈe jana Biblia?

Siniaˈ Jlamtis isiul apeˈe niwa jlam ijiate ti isis: ¿tepi iyo tˈipi japa inˈwasankiye?, ¿yotˈiyiˈn ti nak awaki ajnatˈe?, ¿yotˈiyiˈn ti jijliakˈali poˈ napo iyo na ˈes?, ¿tepi iyo ti ˈyalata napo iˈnioˈl?, ¿yotˈiyiˈn ti poˈ niwa inwak jlamˈne poˈ napo iyo ka inkama? seki ¿tepa janwo tˈe na ajnat? Siniaˈ Jlamtis iyotajankˈiye ti ka ˈweˈen niwak páginas ti ja inkiul apeˈe siuˈnie jiwota ka ˈnajane seki ˈloj napo ˈinioˈl ti inkaseˈn ti iˈwinis seki jlam ijiate ti isis naka.

2. ¿Tepi iyo ti iniuyetsˈeˈm na Biblia nakayi ti ja inkˈajni jlomaskˈi?

Na Biblia kastsˈeyasane niwa isis. Niwak kastsˈeyasane napo saˈam ijia tepa janwo ka inkˈajni pet. Seki kiak iyo ti kas kˈijliani o ti kas sewo apeˈe niwa sijliakˈaliyis. Biblia ja kastsˈeyasane ti japoye ni inkijmaye ti isis seki ti ja kastsˈeni. Aˈam ti ja ˈnajane siuˈnie jiniˈneyasane apeˈe niwaka tajle na Biblia. Jantantˈikˈijiˈn apeˈe ti “Wikieˈeyi niwa Siniaˈ jlamtis [pajlat siuniwa ijwiˈil na Biblia] [...] ˈes ka tiwoki inkaˈneyasajnayejaˈ” (2 Timoteo 3:16).

Ja ˈesieyi pet ka wojyiˈn jana Biblia niwa versículos ja ˈyejnap siuˈnie iyo naka. Nak impˈesinik ja ke akˈiuyet jiˈwete jana Biblia, janoyeˈaˈm kantantˈikˈijiˈn.

JA AMIT ISIAˈM PET

Ja ˈweˈen tepi iyo ti iniuyeje napo iˈnioˈl na Biblia, seki tepa janiwone pet ka intelieja ka ˈyeˈen na Biblia seki yotˈiyiˈn ti jlam ja ˈesie ti japoye naka janoyeˈaˈm ti jantantˈikˈijiˈn apeˈe.

3. Siniaˈ Jlamtis iˈwinkiˈn na ˈnayi ti ˈes

Siniaˈ Jlamtis iyoˈate na kates ti jlaˈal poˈ seki ijietsˈi na siˈniayi. Ja simaja pet ka yejnaˈyin na ˈnayi ti ˈes seki ja kastsˈajane apeˈe tepa janwo siupuwa jlomas naˈam sitieyiji.

ˈYena na Salmo 119:105 seki amtiyekˈijiˈn apeˈe:

¿Tepa jitienkiujnieye iyoˈne apeˈe jana Biblia siupa ˈyiteˈe tˈipi nak Salmo?
¿Tepi jiwo aˈam apeˈe jana Biblia?

Poˈ na iˈnioˈ tiskiujnin ti inujiˈkiuski na tewuk ti majleyeyi ka ajnaja; ˈyajlinitiaˈm jana jika kates.

4. Siniaˈ Jlamtis isiul apeˈe siuˈnie awotajankˈiye ka kastsˈajane

Ijwienjli jana asejnia ti iwiˈin siuniwa iyota ka ˈnajane ti pajkˈi tˈipi apeˈe jana Biblia. ˈYena na VIDEO seki amtiyekˈijiˈn apeˈe:

VIDEO: Ka aleyi ka wojyiˈn na ijiatkˈi (1:49)

¿Tempa iyota ka ˈnajane siojona asejnia?
¿Tempa iniuyeje jana asejnia ti janiˈneyasane na Biblia?

Siniaˈ Jlamtis iyota ka niˈyasˈani pet. ˈYena na Mateo 7:7 seki amtiyekˈijiˈn apeˈe:

¿Aˈam jitienkiuˈn pet ka ˈnakaye na Biblia ti ja inkiul apeˈe niwa jiwota ka ˈnajane? ¿Tempuwa niwaka?

5. Janteliaja pet ka ˈyena na Biblia

ˈLoj napo iˈnioˈl ti iˈyenis na Biblia seki ti kiak iniwonisi iniuyeje pet. ˈYena na VIDEO seki amtiyekˈijiˈn apeˈe:

VIDEO: Iˈyeˈen na Biblia (2:05)

¿Tepi iyo napo jwemik seki napo jlosie ti iˈyenis niwa impˈesijnaˈ?
¿Tepi iniwonisi ti ikajli ti iˈyenis na Biblia?

Siniaˈ Jlamtis kastsˈeyasane ti ja tsˈukin kiyeˈe siupuwa jlomas ja naˈam. ˈYena na Romanos 15:4 seki amtiyekˈijiˈn apeˈe:

¿Inteliaja ta ka ˈnajane siupuwa jlomas ti ja naˈam sitieyiji seki ja kama pet?

6. Ja kastantˈikˈijiˈn apeˈe na Biblia ti poˈ na iniuyetsˈeˈm

Siuti aˈyeˈen na Biblia ti kasjwanjli seki poˈ napo iniuyeje ti kiak iniwonisi. ˈYena na Hechos 8:26-31 seki amtiyekˈijiˈn apeˈe:

¿Tempa ja sitianaˈ ti kastsˈajanataja apeˈe na Biblia? (ˈYena niwa versículos 30 seki 31).

Jipelis: 1. Felipe inkaˈneyasajna jiwo ˈyiyasane pa iˈnioˈ Etiopía jlele na Siniaˈ Jlamtis. 2.Siojona ijwienjli ijwiˈil na Jiowa ˈyiyasane na Siniaˈ Jlamtis apeˈe jana asejnia sekyiˈi napo jilis. — Siupa iˈnioˈ Etiopía jlele isitiaˈn tˈipi ti ka teˈyasanajaˈ na Siniaˈ Jlamtis ti ka intantˈikˈijiˈn niwaka. Nakayi ˈloj napo iˈnioˈl kiak iyo ti isitiaˈn pet.

POˈ NAPO IˈNIOˈL TI IYONE ˈATE: “Jeˈ ateme ka iniˈneyasane na Siniaˈ Jlamtis”.

¿Tepi jiwo pet aˈam? ¿Yotˈiyiˈn?

¿TEMPA ˈNAJANE APEˈE SIUNIE JIˈYEˈEN?

Siniaˈ Jlamtis iniuyetsˈeˈm jlomaskˈi, seki isiul apeˈe siuˈnie awota ka kastsˈajane, seki kastsˈeyasane ti ja tsˈukin kiyeˈe siupuwa jlomas ti naˈam seki ti kas kˈijliani, akajmak pet.