JESÚSDʼEBEMATA JUANBA BʼɄDʼA
Cristora Bedʼeata Beubari Bape bʼadʼa
1 Jẽdebara bʼasia Bedʼeata, maʉ̃ Bedʼeara Daizeze ũme bʼasia, Bedʼeara Daizeze basia.
2 Izhira jẽde wedʼauba Daizeze ũme bʼasia.
3 Izhikʼareuba Daizezebara ne jõma osia, izhikʼareuba obʉrʉ ẽãrã miã kʼãrẽsidʼa o ẽbasia.
4 Izhira dazhi bʼʉ kʼarra, mawũã dazhi bʼʉ kʼarrata Daizezedʼebema kʼawuabiga bʼʉba zhãrãĩta ʉ̃nata bʼʉa.
5 Izhira ʉ̃nata pãrĩguadʼe ʉ̃na bʼʉa, izhira pãrĩguabara kia ẽã.
6 Iabʼa bʼasia Daizezeba zokʼadʼata, maʉ̃ Juan Burukʼoemiã abazhidʼa. 7 Maʉ̃ zesia ʉ̃nanebemata jarakʼaita, aramaʉ̃ne jõmaʉ̃ba ĩjãnamarẽã izhidʼeba. 8 Juan ʉ̃nata bʼa ẽbasia, awuarabʉrʉ bʼasia ʉ̃nanebemata jarakʼaita.
9 Wãrĩnu ʉ̃nabara Daizezedʼebema kʼawuabiga bʼʉba zhãrã jõma ʉ̃nabi bʼʉra zeita bʼasia naʉ̃ ẽjũãẽna.
10 Maʉ̃ ʉ̃narã naʉ̃ ẽjũãne bʼasia, ẽjũãrã Daizezebara izhikʼareuba osia, mawũãmina ẽjũãne bʼebara ũdukʼawadʼa ẽbasia.
11 Izhidʼerãma zesia, mawũãmina izhidʼerãbara bia edadʼa ẽbasia.
12 Mawũãmina izhita bia edadʼapeadʼara, izhidʼebemata ĩjãnapeadʼara Daizeze warrarãta duanebisia.
13 Mawũã Daizeze warrarãta duanebi ẽbasia beubari bʼeba todʼadʼeba, awuarabʉrʉ zhi warrarãta duanebisia Daizezeba.
14 Bedʼeara Beubari Bape dazhirãne edʼa bʼasia, kʉãgʼaba bira bʼʉba kʼawuabiga bʼasia Daizezedʼebema wãrãta. Daibara ũdusidʼa izhira zhi zromata, zhi Warra abʼa bʼʉta zhi zroma basia zhi Zezedʼeba.
15 Juanbara izhidʼebemata mawũãsia: Naʉ̃ jarabʉrʉta mʉãrã mawũãsia: Mʉ tẽã urura mʉ audre zhi zroma mʉ nawedʼa bʼadʼaba.
16 Izhi bʼʉdʼebema biaba dazhirã jõma bia erunʉmʉã, aramaʉ̃ne bia erunʉma tau ẽã.
17 Daizezebara izhi ũrãgʼara diasia Moisédʼeba, mawũãmina izha zhãrã kʉãgʼa bʼʉra izhidʼebemata wãrĩnurã dajada nʉmesia Jesucristodʼeba.
18 Daizezera miõba ũdukʼa, mawũãmina zhi Warra abʼa bʼʉta zhi Zeze ũme bʼʉba dazhirãã kʼawuabisia sãwũã bʼʉta.
Jesúsdʼebemata jaradʼa Juan Burukʼoemiãba
(Mateo 3:11-12; Marcos 1:7-8; Lucas 3:15-17)
19 Jesúsdʼebemata Juanba jarasidʼera, nokʼorã judíorãba Jerusalénneba sacerdoterãta levitarã bawara zokʼasidʼa widʼi mawũãnamarẽã: ¿Bʉra kʼaipe?
20 Mawũãnaĩ merã ẽã jarabʉrʉta mawũãsia: Mʉ ẽã zhãrã Ẽdrʉbiira.
21 Mawũãĩ widʼi mawũãsidʼa: ¿Mobera bʉra kʼaipe? ¿Bʉra Elíakʼa?
Mawũãnaĩ mawũãsia: Mʉrã maʉ̃ ẽã.
Mawũãĩ mawũãsidʼa: ¿Mobera bʉra Daizezeba bedʼeata jarabibarita zeita bʼadʼakʼa?
Mawũãnaĩ panaʉ̃ mawũãsia: Mʉrã maʉ̃ ẽã.
22 Mawũãĩ mawũãsidʼa: ¿Mobera bʉra kʼaipe? Dai zokʼadʼapeadʼarãã daibara jaradʼaibara bʉra kʼaita. ¿Bʉdʼebema bʉara daia kʼãrẽta jaraipe?
23 Mawũãnaĩ Juanbara mawũãsia:
Mʉrã iabʼa nemi jĩgua bedʼeaidʼebemata drua drudrua tabʼʉ maẽ mawũãĩnebema: Bia ẽãrã ãmabʉdaba jipa obʉdakʼaudua Nokʼo zei ota.* Mawũãĩnebema Daizezeba bedʼeata jarabibariba Isaíaba jaradʼa kĩrãkʼa.
24 Juanma zokʼakuadʼapeadʼara fariseorãnebema basia. 25 Maʉ̃rãbara widʼi mawũãsidʼa: ¿Bʉara kʼai bedʼeadʼeba zhãrã buru kʼoe bʼʉ, zhãrã Ẽdrʉbiita bʉ ẽbʉrʉ, miã Elía ẽbʉrʉ, miã Daizezeba bedʼeata jarabibari ẽbʉrʉ?
26 Mawũãnaĩ Juanbara panaʉ̃ mawũãsia: Mʉãrã zhãrã buru kʼoe bʼʉa baniãba. Mawũãmina iabʼa marãne edʼa bʼʉa marãba ũdukʼawadʼa ẽãta. 27 Maʉ̃ mʉ tẽã urua, izhira mʉ audre zhi zroma, nezokʼaba obari kĩrãkʼara mʉãrã ẽnaĩne bʼʉ ẽã izha jẽrũne jʉ̃ bʼʉra.
28 Maʉ̃ Betania pʉwʉrʉdʼe mawũã berabʼarisia, do Jordán kĩrãrẽ Juanba zhãrã buru kʼoekua nʉmana maẽ.
Jesúra Oveja zake Daizezedʼea
29 Nrũẽma Juanbara Jesús izhima uruta ũdupe mawũãsia: Akaudua, kʼãʉ̃ta Oveja zake Daizezedʼea, naʉ̃bara kʼazhirua ne ẽã oya ẽjũãne zhãrã bʼeta. 30 Naʉ̃ta jarabʉrʉta mʉãrã mawũãsia: Mʉ tẽã urura mʉ audre zhi zroma mʉ nawedʼa bʼadʼaba. 31 Jesús kʼaira mʉãrã kʼawua ẽbasia, mawũãmina Israel bʼeba ũdukʼawadʼamarẽã mʉãrã zhãrãta buru kʼoe zebʉrʉa baniãba.
32 Juanbara dewara mawũãsia: Jawurebia Daizezedʼeta mʉã ũdusia ʉ̃treba pusirã kĩrãkʼa uruta, maʉ̃ bʼarisia Jesú ʉ̃rʉ̃. 33 Jesús kʼaira mʉãrã kʼawua ẽbasia, mawũãmina baniãba zhãrã buru kʼoemarẽã Daizezeba mʉta zokʼadʼabara mʉãã mawũãsia: Iabʼaʉ ʉ̃rʉ̃ Jawurebia uruta bʉa ũdubʉrʉdʼera izhi ʉ̃rʉ̃ bʼariya, maʉ̃bara Jawurebiata diaya Daizezedʼeta. 34 Mawũã jaradʼata mʉãrã izhira ũdubʉrʉa, mawũẽ mʉãrã jarabʉrʉa naʉ̃ Daizeze Warrata.
Jesúsba naara jʉrʉkuadʼa
(Mateo 4:18-22; Marcos 1:16-20; Lucas 5:2-11)
35 Nrũẽma Juan wakusa mama bʼasia izha jʉrʉkuadʼata ũme bawara. 36 Maʉ̃ne Jesústa mama taita ũdui mawũãsia: ¡Akaudua, naʉ̃ta Oveja zake Daizezedʼea! 37 Juanba jʉrʉkuadʼata ũmebara mawũãbʉrʉta ũrĩnape Jesús kʼaidʼu wãsidʼa. 38 Maʉ̃ne Jesúsbara jẽrũya akʉbʉrʉdʼe kʼaidʼu taidʼata ũdui mawũãsia: ¿Marã kʼãrẽta jʉrʉ panʉ?
Mawũãĩ ãzhara mawũãsidʼa: Rabí, bʉra ¿sãma bʼʉ? Rabí bedʼeabara jara krĩña bʼʉa Miã Ũrãgʼabarita.
39 Mawũãnaĩ mawũãsia: Akʉdʼe zeudua.
Mawũãĩ wãnape sãma bʼʉta akʉsidʼa, mobe maʉ̃ ewadera izhi ũme panesia kewara a las cuatro basi baera. 40 Andrés basia, Simón Pedro mebeara, ũmenebema abʼa Andrés basia Juanba jarabʉrʉta ũrĩnape wãnapeadʼara Jesús kʼaidʼu. 41 Andrésbara naara zhi mebea Simónta jʉrʉ wãpe ũdui mawũãsia: Daibara ũdusidʼa zhãrã Ẽdrʉbira.
42 Aramaʉ̃ne wesia Jesúsma. Jesúsbara ũdui mawũãsia: Bʉra Simón Jonás warra, bʉ trʉ̃rã Cefa baya. Maʉ̃ trʉ̃bara jara krĩña bʼʉa Pedrota o Peñata.
Jesúsba jʉrʉdʼa Felipeta Natanaelta
43 Nrũẽma Jesús Galilea druaedʼa wãĩta babʉrʉdʼera, Felipeta ũdupe mawũãsia: Mʉ kʼaidʼu bʼadua.
44 Felipera Betsaidadʼebema basia, dewara maʉ̃ pʉwʉrʉdʼebema basia Andrésta Pedrota. 45 Felipebara Natanael jʉrʉ wãpe ũdui mawũãsia: Daibara ũdusidʼa jari Moiséba ũrãgʼadʼe bʼʉdʼara, jari Daizezeba bedʼeata jarabibarirãba jara bʼʉdʼapeadʼara. Izhira Jesúa, José warra Nazaredʼebema.
46 Mawũãĩ Natanaelbara mawũãsia: ¿Nazaredʼebara biara ʉ̃tʉ zeita bʼʉka?
Mawũãĩ Felipebara mawũãsia: Zerua akʉdʼe.
47 Jesúsbara Natanael izhi kʼaita zebʉrʉta ũdui mawũãsia: Akaudua, naʉ̃ wãrĩnu israelitarãã, zhãrã izhara sewa ẽã.
48 Mawũãĩ Natanaelbara mawũãsia: ¿Bʉara mʉnebema sãwũã kʼawua bʼʉ?
Mawũãĩ Jesúsbara panaʉ̃ mawũãsia: Felipeba bʉ trʉ̃ĩ nawedʼa bʉra higuera bakuru edre bʼʉta mʉã bʉra ũdusia.
49 Mawũãĩ Natanaelbara mawũãsia: Miã Ũrãgʼabari, bʉra Daizeze Warra, bʉra Israel duanu Rey.
50 Mawũãĩ Jesúsbara mawũãsia: ¿Mʉrã maʉ̃ta bʉara ĩjãbʉrʉka mʉã bʉra higuera bakuru edre bʼʉta ũdusia abʉrʉdʼeba? Maʉ̃ kʼãñabara bʉara kʼãrẽ audre waibʼʉata bio ũduya.
51 Mawũãpe mawũãsia: Mʉã wãrĩnu marãã jaraya, idʼidʼeba marãbara ũdudʼaya bãjã ewa nʉmʉta, ũdudʼaya ángelerã Daizezedʼeta wãrĩze bʼeta udʼubʼae bʼeta mʉ Beubari Bape bʼʉma.
Iabʼa juwua jidadʼa Caná pʉwʉrʉdʼe
2 Ewari ũbeadʼe iabʼa juwua jidabʉrʉdʼe fiesta osidʼa Caná pʉwʉrʉdʼe, maʉ̃ pʉwʉrʉra Galilea druadʼebema. Mama bʼasia Jesús papata. 2 Mawũã iabʼa juwua jidabʉrʉdʼera trʉ̃sidʼa Jesústa izha jʉrʉkuadʼa bawara. 3 Maʉ̃ne vino jõbʉrʉdʼe zhi papaba Jesúa mawũãsia: Ya vino ne ẽã duaĩna.
4 Mawũãĩ Jesúsbara mawũãsia: ¿Papa, dazhira maʉ̃ne nʉmʉ ẽãta bʉara kʼãrẽã maʉ̃ta mʉãã jarabʉrʉ? Mʉã kʼãrẽ oira wadʼi araba ẽã.
5 Zhi papabara vino jedʼekabadarãã mawũãsia: Izha jarabʉrʉra jõma oudua.
6 Mama zokʼo seis bʼasia mongʼara omata baniã tʉbadata, Daizeze kĩrãbita bia bʼeaita judíorãbara ne sʉgʉira baniã maʉ̃ zokʼodʼeba jue bazhidʼa. Maʉ̃ zokʼodʼera abʼa abʼaʉdʼe baniã balde diez ara bʼasia. 7 Jesúsbara vino jedʼekabadarãã mawũãsia: Zokʼo za nʉmeta baniãba biraudua.
Mawũãĩ birakuasidʼa. 8 Mawũẽ Jesúsbara mawũãsia: Kʼõbebʉrʉ wĩka jue edadʼape vino jedʼekabi nʉmʉma edeudua.
Mawũãĩ edesidʼa. 9 Mawũẽ vino jedʼekabi nʉmʉbara baniãta vino babʉrʉra do akʉsia sãmaʉ̃ba ʉ̃tʉ zebʉrʉta kʼawua ẽãta, baniãta ãzha juesidʼa baera vino jedʼekabadabʉrʉ kʼawua kʼopanasia, aramaʉ̃ne vino jedʼekabi nʉmʉbara juwua jida nʉmʉta trʉ̃pe, 10 mawũãsia: Jõmaʉ̃ba naara vino zhi biata dedʼekabada, mawũẽ bio dobʉdadʼera vino zhi bia ẽãta dedʼekabada. Mawũãmina bʉara vino zhi biara wuagʼasia tẽã dedʼekaita.
11 Maʉ̃ ũdudʼakʼata naarabemata obʉrʉra Jesúsbara osia Caná pʉwʉrʉdʼe Galilea druadʼe, aramaʉ̃ne ũdubigasia izhira zhi zromata, mawũẽ izha jʉrʉkuadʼabara wuaabʉrʉ ĩjãsidʼa izhidʼebemata. 12 Maʉ̃ tẽã Capernaúm pʉwʉrʉedʼa wãsidʼa izhita, zhi papata, zhi mebẽrãta, izha jʉrʉkuadʼata. Mobe mama bʼeasia ewari kʼakutua.
Jesúsba miti ẽã odʼa Daizeze deta
(Mateo 21:12-13; Marcos 11:15-18; Lucas 19:45-46)
13 Ewari araa zebodʼo basia Egiptodʼeba ẽzoadʼata krĩcha judíorãba fiesta obadata, mawũẽ Jesús wãrĩzesia Jerusalén pʉwʉrʉedʼa. 14 Maʉ̃ne Daizeze dedʼa ewara maẽ ũdukuasia Daizezeita babueidʼebemata nendo bʼeta pakʼata, ovejata, palomata, plata kʼãbiabadasidʼa ũdusia mama jewedʼa bʼeta. 15 Mawũẽ lasota bio baratʉ edape Daizeze dedʼa ewara maẽbara jõma ãĩ jʉrekuasia ãzhi oveja bawara, ãzhi pakʼa bawara, monedara kuekuasia plata kʼãbiabadadʼera, burekuasia mesara. 16 Mobe paloma nendobadaa mawũãsia: Ãĩ edeudua naʉ̃ namaʉ̃bara, mʉ Zeze deta kʼãwũã orãũdua ne nendobada deta.
17 Mobebʉrʉ izha jʉrʉkuadʼabara bude basidʼa maʉ̃ẽnabemata zhi bʼʉmata mawũã bʼʉta: Mʉã bʉ dera kʼãbãẽã jiwa bʼʉa. 18 Maʉ̃nerã judíorãba mawũãsidʼa: ¿Sãwũãta daia kʼawuabirua Daizezeba kʼãwũã obi nʉmʉbʉrʉ?
19 Mawũãnaĩ Jesúsbara panaʉ̃ mawũãsia: Naʉ̃ Daizeze dera ãrĩũdua, mʉã ewari ũbeadʼe wakusa pãrãña.
20 Mawũãĩ judíorãbara mawũãsidʼa: Naʉ̃ Daizeze dera cuarenta y seis añone pãrãsidʼa, ¿maʉ̃ta bʉara ewari ũbeadʼe pãrãĩka?
21 Mawũã Daizeze deta jarabʉrʉra Jesúsbara jarasia izhi kʼakuata. 22 Maʉ̃neba beudʼata piradrʉbʉrʉdʼera izha jʉrʉkuadʼabara bude basidʼa maʉ̃ta jaradʼata, mawũẽ ĩjãsidʼa maʉ̃ẽnabemata zhi bʼʉmata, aramaʉ̃ne ĩjãsidʼa bedʼeata Jesúsba jaradʼara.
Jesúsbara kʼaua zhãrãnebema jõma
23 Jesús Jerusalénne bʼʉta, Egiptodʼeba ẽzoadʼata krĩcha fiesta obadadʼe bʼʉdʼe, izhidʼebemata bioba ĩjãsidʼa ũdudʼakʼata bio onʉmʉta ũdubʉdaba. 24 Mawũãmina Jesúsbara kʼawuasia ãzhara wãrĩnu ĩjãbʉda ẽãta, zhãrãnebema jõma kʼau baera. 25 Aramaʉ̃ne zhãrãnebema jaradʼaira nesidʼa ẽbasia, aramaʉ̃ne izhara kʼau basia sodʼera zhãrã sãwũã bʼeta.
Jesúsma zedʼa Nicodemo
3 Fariseorãnebemata bʼasia Nicodemo abadata, nokʼota bʼasia judíorãnebemata. 2 Maʉ̃ta diamase Jesúsma zepe mawũãsia: Miã Ũrãgʼabari, daibara kʼawua panʉã bʉra Daizezeba zokʼadʼata miã ũrãgʼamarẽã, ũdudʼakʼata bʉa kʼãwũã obʼʉra miõba obʼe ẽã Daizezeta izhi ũme bʼʉ ẽbʉrʉ.
3 Mawũãĩ Jesúsbara panaʉ̃ mawũãsia: Mʉã wãrĩnu bʉaa jaraya, iabʼa wakusa tobʉrʉ ẽãrã Daizezeta Nokʼodʼebema ẽã.
4 Mawũãĩ Nicodemobara mawũãsia: ¿Dazhira zõrãta sãwũã wakusa toipe? ¿Mobera wakusa zhi papa bʼitaedʼa wã bʼeika wakusa toita?
5 Mawũãĩ Jesúsbara panaʉ̃ mawũãsia: Mʉã wãrĩnu bʉaa jaraya, iabʼa baniãneba Jawurebiadʼeba tobʉrʉ ẽãrã edʼa wã bʼe ẽã Daizezeta Nokʼo maẽrã. 6 Beubaridʼeba tobʉrʉra zharadʼebema. Mawũãmina Jawurebiadʼeba tobʉrʉra Jawurebiadʼebema. 7 Kʼawua ẽã krĩcharãrũã mʉã jarabʉrʉ kʼarea zhãrã wakusa todʼai barata. 8 Pʉ̃ãdrʉra pʉ̃ãdrʉbaria izha krĩña maẽba, zhi ugara bʉara ũrĩbaria, mawũãmina bʉara kʼawua ẽã sãmaʉ̃ba uruta miã sãmaã wãta. Aramaʉ̃ kĩrãkʼa sãwũãta kʼawua ẽmina dajada awuara bʼebaria Jawurebiadʼeba tobʉrʉra.
9 Mawũãĩ Nicodemobara mawũãsia: ¿Maʉ̃ mawũãrã sãwũãpe?
10 Mawũãĩ Jesúsbara panaʉ̃ mawũãsia: ¿Bʉra Israel bʼeta ũrãgʼabarita maʉ̃ sãwũãta kʼawua ẽka? 11 Mʉã wãrĩnu bʉaa jaraya, daibara kʼãrẽ kʼawua bʼeta jarabada, kʼãrẽ ũdudʼata jarabada, mawũãmina marãbara ĩjãna ẽã daiba jara bʼera. 12 Ne udʼabemata mʉã marãã jarabʉrʉta ĩjãna ẽbʉrʉ, ¿sãwũã ĩjãnaĩpe mʉã marãã jarara ne ʉ̃trebemata? 13 Maʉ̃ kʼawuaira miõta ʉ̃tre wãrĩzekʼa, awuarabʉrʉ ʉ̃treba zedʼaba kʼawua bʼʉta mʉ Beubari Bape bʼʉba kʼawua bʼʉa ne ʉ̃trebemarã. 14 Drua drudrua tabʼʉ maẽ Moiséba dãma ʉ̃tʉ jirabʼʉdʼa kĩrãkʼa, mʉ Beubari Bape bʼʉra ʉ̃tʉ jirabʼʉdʼaya. 15 Aramaʉ̃ne mʉnebemata ĩjãbʉrʉra adua ẽbamarẽã, awuarabʉrʉ erubʼamarẽã Daizeze ũme bʼai jõ ẽãta.
Daizezebara kʉãgʼa ẽjũãne bʼera
16 Daizezebara ẽjũãne bʼera kʼãbãẽã kʉãgʼaba diasia zhi Warra abʼa bʼʉta, izhidʼebemata ĩjãbʉrʉra adua ẽbamarẽã, awuarabʉrʉ erubʼamarẽã Daizeze ũme bʼai jõ ẽãta. 17 Daizezebara zhi Warra naʉ̃ ẽjũãẽna zokʼa ẽbasia aduabimarẽã ẽjũãne bʼeta, awuarabʉrʉ zokʼasia ẽjũãne bʼera ẽdrʉdʼamarẽã izhidʼeba. 18 Izhidʼebemata ĩjãbʉrʉra adua ẽã, mawũãmina zhi ĩjã ẽãrã aduaya, ĩjã ẽãba Daizeze Warra abʼa bʼʉdʼebemata. 19 Kʼãrẽneba aduaita mʉã jaraya: Ʉ̃nata bʼʉra zesia ẽjũãne bʼema, mawũãmina zhãrãbara pãrĩguata audre kʉãgʼasidʼa ʉ̃na kʼãñabara, bia ẽãta obʼeba. 20 Bia ẽãta obʼebara ʉ̃nata bʼʉra krĩñana ẽã, aramaʉ̃ne ʉ̃nata bʼʉma zedʼa ẽã, ãzha obʼeta kʼawuadʼa ẽbamarẽã. 21 Mawũãmina Daizezedʼebema wãrãta aribʼae bʼʉra ze bʼʉa ʉ̃nata bʼʉma, aramaʉ̃ne kʼawuadʼamarẽã izhara obʼʉta Daizezedʼebemata.
Juanba jaradʼa Jesúsdʼebemata
22 Maʉ̃ tẽã Jesús zesia izha jʉrʉkuadʼa bawara Judea druaedʼa, ãzhi bawara mama bʼasia zhãrã buru kʼoekua. 23 Juanbidʼa zhãrã buru kʼoekua nʉmasia Enón pʉwʉrʉdʼe Salin kʼaita, mama tadrʉ bʼasi baera dota kʼãbãẽã. Mawũẽ zhãrã zepe buru kʼoe nʉmeãsia. 24 Maʉ̃nerã wadʼi cárceldʼe bʼʉdʼa ẽbasia Juan.
25 Maʉ̃ne Juanba jʉrʉkuadʼata judíorã ʉ̃kʉrʉ bawara kʼaikʼaiasidʼa Daizeze kĩrãbita bia bʼeaita ne sʉgʉ badadʼebema kʼarea. 26 Maʉ̃rãta Juanma zedʼape mawũãsidʼa: Miã Ũrãgʼabari, Jordán kĩrãrẽ bʉ ũme kʼobʼadʼadʼebemata bʉa daia jaradʼabara zhãrã buru kʼoekua nʉmʉã, mawũẽ jõma izhima ze nʉmʉã.
27 Mawũãnaĩ Juanbara panaʉ̃ mawũãsia: Miõba mawũã jʉre nʉma bʼe ẽã Daizezeba dia ẽbʉrʉ. 28 Mʉã jaradʼara marãbara kʼawua bʼeta mʉãrã mawũãsia: Mʉ ẽã zhãrã Ẽdrʉbira, awuarabʉrʉ izhi zeita jarakʼamarẽã mʉrã izhi na zokʼadʼapeadʼa. 29 Juwua jidaidʼera wũẽrã zhũmakĩrãba erunʉmʉã, izhi ũme zhi biata kʼaita bʼʉra izhi nemita ũrĩ bʼʉba kʼãbãẽã sobia bʼidʼabaria. Jesúsdʼebema ũrĩ bʼʉba aramaʉ̃ kĩrãkʼa mʉrã kʼãbãẽã sobia bʼʉa. 30 Jesúra wuaabʉrʉ zhi zromata bʼeya, mawũãmina mʉrã zhi zroma ẽãta bʼeya.
Ʉ̃treba zedʼadʼebema
31 Jesús ʉ̃treba zebʉrʉra jõmaʉ̃ audre zhi zroma, druadʼebemata bʼʉra druadʼebemata bʼʉba ne druadʼebemata jara bedʼea bʼʉa, mawũãmina ʉ̃treba zebʉrʉra jõmaʉ̃ audre zhi zroma. 32 Mawũẽ ʉ̃tre izha ũdudʼata izha ũrĩnata jara bʼʉa, mawũãmina miõba ĩjãna ẽã izha jara bʼʉra. 33 Izha jara bʼʉta iabʼaʉba ĩjãrã maʉ̃ĩtara Daizezera wãrĩnu bedʼea bʼʉa. 34 Daizezeba zokʼadʼabara Daizeze bedʼeata jara bʼʉa Daizezeba Jawurebiata diadʼaba. 35 Zhi Zezebara zhi Warra kʉãgʼa, mawũẽ ne jõma chãbʼarisia izhi juwuadʼe.
36 Zhi Warradʼebemata ĩjã bʼʉbara erubʼʉa Daizeze ũme bʼai jõ ẽãta, mawũãmina zhi Warradʼebemata ĩjã ẽãbara erubʼa ẽã Daizeze ũme bʼai jõ ẽãrã, awuarabʉrʉ Daizezeba kĩrũbiba pua kʼawua oya.
Jesús bedʼeadʼa wũẽrã Samariadʼebemaa
4 Nokʼo Jesúsbara kʼawuasia fariseorãbara ũrĩsidʼata zhãrãba mawũãbʉdata: Jesúsbara zhãrã audre jʉre buru kʼoekua nʉmʉã Juan kʼãñabara. 2 Mawũãsidʼa Jesúsbara zhãrã buru kʼoekua nʉmʉ ẽãta, awuarabʉrʉ zhãrã buru kʼoe duanasia izha jʉrʉkuadʼabʉrʉ. 3 Fariseorã bĩ ẽã bʼeta kʼawuape Judea druadʼebara wãbʉrʉta, wakusa wãsia Galilea druaedʼa. 4 Maʉ̃nerã berabʼariita bara basia Samaria druadʼe. 5 Aramaʉ̃ne zesia pʉwʉrʉ Samaria druadʼebemata Sicar abadaidʼu, mama kʼaita bʼasia Jacobo bʼadʼaba druata diadʼata zhi warra Joséa. 6 Mama bʼasia poso Jacobodʼeta. Mawũẽ Jesúra odʼe mapoea zebʉrʉba jewedʼasia poso kʼaita. Maʉ̃nerã nʉmasia ʉ̃matipa badea.
7 Maʉ̃ne wũẽrãta Samariadʼebemata zesia baniã juedʼe, mawũẽ Jesúsbara mawũãsia: Baniã mʉã doita diadua. 8 Maʉ̃ẽna izha jʉrʉkuadʼara pʉwʉrʉedʼa wãsidʼa kʼãrẽ kʼoita edadʼe.
9 Mawũãĩ wũẽrã Samariadʼebemabara mawũãsia: ¿Bʉra judíota sãwũã baniã doita mʉãã widʼibʉrʉ, maʉ̃ne mʉrã wũẽrã Samariadʼebemata bʼʉ ẽka? Mawũãsia judíorã Samariadʼebema bawara zhi biata duanu ẽbaera.
10 Mawũãĩ Jesúsbara panaʉ̃ mawũãsia: Daizezeba dia bʼʉdʼebemata sãwũãta bʉa kʼawuara, kʼaiba baniã mʉã doita diadua abʉrʉta bʉa kʼawuara, bʉara baniã widʼikʼausia, mobedʼeba mʉãrã diakʼausia baniã dazhi bʼabi bʼʉta.
11 Mawũãĩ wũẽrãbara mawũãsia: Nokʼó, bʉara kʼãrẽba jueira ne ẽã, maʉ̃ne posora eidʼua. ¿Mawũẽ bʉara sãmabemata erubʼʉ baniã dazhi bʼabi bʼʉra? 12 ¿Mobera bʉra audre zhi zromakʼa zõrã dazhirãta Jacobo kʼãñabara? Naʉ̃ posora izhara daiita ãmaẽsia, naʉ̃ta do bazhidʼa izha, zhi warrarãba, izhi pakʼarãba.
13 Mawũãĩ Jesúsbara panaʉ̃ mawũãsia: Naʉ̃ baniãta dobʉrʉra wakusa obisiaya. 14 Mawũãmina baniã mʉã diabʉrʉta dobʉrʉra obisiakʼa baya, awuarabʉrʉ baniã mʉã diabʉrʉra izhidʼe drʉ nʉmaña Daizeze ũme bʼai jõ ẽãta.
15 Mawũãĩ wũẽrãbara mawũãsia: Nokʼó, mʉãã diadua maʉ̃ baniãta, mʉ obisia ẽbaita, miã nama juedʼe ze ẽbaita.
16 Mawũãĩ Jesúsbara mawũãsia: Bʉzhi kĩmata trʉ̃ne wãrũã, mobe zeudua naĩnu.
17 Mawũãĩ wũẽrãbara panaʉ̃ mawũãsia: Mʉrã kĩma ne ẽã.
Mawũãĩ Jesúsbara mawũãsia: Bʉara bia jarabʉrʉa bʉra kĩma ne ẽã abʉrʉbara. 18 Bʉara kĩma edama juesoma bʼʉa, idʼi erubʼʉsidʼa bʉ kĩma ẽã, mawũẽ bʉa mawũã jarabʉrʉra wãrĩnuã.
19 Mawũãĩ wũẽrãbara mawũãsia: Nokʼó, mʉma bʉra Daizezeba bedʼeata jarabibaria. 20 Dai zhibarirãbara Daizezera ibia jara bʼeasia naʉ̃ kʼatumane, maʉ̃ne marãbara jara bʼea Daizezera Jerusalénnebʉrʉ ibia jaradʼai barata.
21 Mawũãĩ Jesúsbara mawũãsia: Mʉã za jaraita ĩjãrũã, ewarita zeya, maʉ̃nerã marãbara naʉ̃ kʼatumane miã Jerusalénne ibia jaradʼa ẽã Daizezera. 22 Marãbara Daizezera ibia jara bʼeta izhidʼebema sãwũãta kʼawuadʼa ẽã, daibara Daizezera ibia jara bʼea izhidʼebema sãwũãta kʼawua bʼeta, zhãrã Ẽdrʉbigaira uruba judíorãneba. 23 Mawũãmina ewarita zeya, maʉ̃ ewarira ya arabasia, mawũẽ Daizeze wãrĩnu ibia jara bʼebara Jawurebiadʼeba wãrĩnu ibia jaradʼaya, Daizezebara krĩña bʼʉa izhira mawũã ibia jaradʼaita. 24 Daizezera Jawurea, mawũẽ izhita ibia jara bʼebara Jawurebiadʼeba wãrĩnu ibia jaradʼaidʼe bʼʉa.
25 Mawũãĩ wũẽrãbara mawũãsia: Mʉã kʼawua bʼʉa zhãrã Ẽdrʉbiira zeita, izhi zebʉrʉdʼera daia bia jarakʼaya ne jõma.
26 Mawũãĩ Jesúsbara mawũãsia: Mʉta izhia, mʉãta bʉ ũme bedʼea kʼobʼʉa.
27 Maʉ̃ne izha jʉrʉkuadʼara zesidʼa, mawũẽ bia akʉdruasidʼa wũẽrã ũme bedʼea kʼobʼʉba, mawũãmina miõba widʼidʼa ẽbasia kʼãrẽta widʼi bʼʉra, o maʉ̃ wũẽrã ũme kʼãrẽ ʉ̃rʉ̃ bedʼea kʼobʼʉra. 28 Wũẽrãbara zokʼo izhidʼera ãmaẽpe wãsia pʉwʉrʉedʼa, mobe zhãrã bʼea mawũãsia: 29 Ũmakĩrãta akʉdʼe zeudua, jõma jarabʉrʉa mʉã kʼãrẽ odʼata. ¿Kʼãgʉra zhãrã Ẽdrʉbii ẽka?
30 Mawũãĩ pʉwʉrʉdʼebara wãsidʼa, aramaʉ̃ne zesidʼa Jesúsma.
31 Maʉ̃ẽna izha jʉrʉkuadʼabara ibiadʼe jara mawũãsidʼa: Miã Ũrãgʼabari, nekʼorua.
32 Mawũãnaĩ izhara mawũãsia: Mʉãrã zhikota kʼoita erubʼʉa marãba kʼawuadʼa ẽãta.
33 Mawũãĩ izha jʉrʉkuadʼabara ãzhirãĩnu mawũãsidʼa: ¿Iabʼaʉba zhikota wesi ẽka?
34 Maʉ̃ne Jesúsbara mawũãsia: Mʉ zhikora mʉãrã mʉ zokʼadʼaba krĩñata oibara, aramaʉ̃ne izha kʼãrẽ obi nʉmʉkʼãrĩta jõbiibara. 35 ¿Ne udʼapeadʼata bʼʉaira marãbara jedʼekʼo kĩmarẽ wãẽã nʉmʉã abada ẽka? Mawũãmina mʉã marãã jaraya: Ne bʼʉaita akʉdʼai kĩrãkʼa akaudua druadʼe zhãrã bʼeta, ya mʉnebemata ĩjãĩta nʉmeã. 36 Ne bʼʉa nʉmʉbara ne jida bʼʉa, aramaʉ̃ kĩrãkʼa nʉmʉbara jara bʼʉa mʉnebemata ĩjãnamarẽã Daizeze ũme bʼai jõ ẽãnebemata, mawũẽ ne ubarita ne bʼʉabari ũme sobiabada kĩrãkʼa bʼʉa. 37 Maʉ̃ẽnabemata jarabadara wãrĩnuta mawũã bʼʉa: Abʼara zhi ubaria, waya dewarabemata zhi bʼʉabaria. 38 Aramaʉ̃ kĩrãkʼa mʉã marã zokʼasia awʉrʉrãba jaradʼapeadʼa maẽ marãneba ĩjãnamarẽã, aramaʉ̃ne awʉrʉrãba jaradʼapeadʼa maẽ marãneba ĩjã tupudʼea.
39 Samaria bidʼarã maʉ̃ pʉwʉrʉdʼe bʼebara bioba Jesúsdʼebema ĩjãsidʼa, maʉ̃ẽnabema wũẽrãba mawũãsia: Kʼãʉ̃bara mʉãã jarasia mʉã kʼãrẽ odʼata jõma. 40 Maʉ̃neba Samaria bidʼarã Jesúsma zedʼape zuburia bedʼeasidʼa ãzhi bawara bʼemarẽã, mawũẽ mama bʼesia ewari ũme. 41 Aramaʉ̃ne ãmaña bioba ĩjãsidʼa bedʼeata izha jarabʉrʉta ũrĩbʉdaba. 42 Maʉ̃nerã wũẽrãã mawũãsidʼa: Daibara ĩjã kʼopanʉ ẽã bari bʉa jarabʉrʉdʼeba, awuarabʉrʉ izhi bedʼeara jipa daiba ũrĩbʉda, mawũẽ kʼawuabʉda naʉ̃ wãrĩnu ẽjũãne zhãrã bʼeta Ẽdrʉbiita.
Jesúsba bʼebidʼa nokʼo warrata
43 Mawũã ewari ũme bʼape Samaria druadʼebara Jesús wãsia Galilea druaedʼa. 44 Izhi Jesúsba jaradʼa kĩrãkʼa Daizezeba bedʼeata jarabibarira izhi druadʼebʉrʉ bia edadʼa ẽã. 45 Galilea druaedʼa zebʉrʉdʼera Galilea bidʼarãbara bia edasidʼa, maʉ̃ẽnabema ãzhara ũdusidʼa Jerusalénne kʼãrẽ odʼata jõma, Egiptodʼeba ẽzoadʼata krĩcha fiesta odʼapeadʼa maẽ mawũã ũdusidʼa, ãzhisidʼa wãsi baera maʉ̃ fiestaidʼura.
46 Jesús wakusa zesia Caná pʉwʉrʉedʼa, maʉ̃ pʉwʉrʉra Galilea druadʼebema, mama baniãta vino babidʼa basia. Maʉ̃ne Capernaúm pʉwʉrʉdʼe bʼasia reyba nokʼota bʼʉkʼãrĩta, maʉ̃ warrata kʼaya nʉmasia. 47 Maʉ̃ne izha ũrĩsia Jesús zebʉrʉta Judea druadʼeba Galilea druaedʼa, mawũẽ izhima zepe zuburia bedʼeasia zhi warrata bʼebidʼe wãmarẽã beubodʼota. 48 Mawũẽ Jesúsbara mawũãsia: Ũdudʼakʼata mʉã obʉrʉta ũdubʉda ẽãrã marãbara mʉnebema ĩjãna ẽã.
49 Mawũãĩ reyba nokʼota bʼʉkʼãrĩbara mawũãsia: Nokʼó, zerua mʉ warra beui nawedʼa.
50 Mawũãĩ Jesúsbara mawũãsia: Dedʼaa wãrũã, bʉ warrara bʼidʼa.
Maʉ̃bara ĩjãsia Jesúsba mawũãbʉrʉra, mawũẽ wãsia. 51 Odʼe wãne izhi nezokʼarãba kĩrãzhu zedʼape mawũãsidʼa: Bʉ warrara bʼidʼa.
52 Mawũãnaĩ izhara widʼisia kʼãrẽ ʉ̃madaudʼe arigu basita. Mawũẽ mawũãsidʼa: Nuwuedʼa ʉ̃madau pʉrra a la una kenabʼarisia kʉwamiãbara.
53 Mawũẽ zhi zezebara kʼawuasia maʉ̃ ʉ̃madaudʼe Jesúsba bʉ warrara bʼidʼa adʼata. Mawũẽ izhara Jesúsdʼebema ĩjãbʉrʉba ĩjãsidʼa zhi kĩmaba zhi warrarãba. 54 Jesúsbara maʉ̃ta ũdudʼakʼata zhi ũmeta osia, Judea druadʼeba Galilea druaedʼa wãpe.
Kʼakua pira ẽã bʼadʼa Betesdadʼe
5 Maʉ̃ tẽã judíorãbara fiesta osidʼa, mawũẽ Jesús wãrĩzesia Jerusalén pʉwʉrʉedʼa. 2 Jerusalénne edʼa wãbarita puerta ovejarãneã abada kʼaita bʼʉa posota, maʉ̃ta hebreo bedʼeadʼera Betesda abada, mamarã juesoma bʼʉa de zaketa. 3 Maʉ̃za kʼayarãta bio nʉmasia, daʉbʼerrea bʼeta, wã bʼe ẽã bʼeta, kʼakua pira ẽã kʼaya bʼeta nʉmasia, maʉ̃rãbara jʉ̃ã bʼeasia poso õbʼʉta pirayeedʼa. 4 Maʉ̃ẽnabema edʼaudʼe ángelta zepe maʉ̃ poso õbʼʉta pirabi bʼasia, mawũẽ pirabʉrʉdʼe naara doedʼa õbʼebʉrʉta bʼe bʼasia ne bariduba kʼaya bʼʉta. 5 Maʉ̃ne ũmakĩrãta mama bʼasia treinta y ocho año bata kʼaya bʼʉta. 6 Maʉ̃ tabʼʉta Jesúsba ũdubʉrʉdʼera, mawũã bʼʉta ewari dããrã bata kʼawuape mawũãsia: ¿Bʉra bʼe krĩña bʼʉka?
7 Mawũãĩ kʼayabara panaʉ̃ mawũãsia: Nokʼó, mʉrã bʼe krĩña bʼʉa, mawũãmina poso pirabʉrʉdʼera mʉrã kʼaiba doedʼa õbʼʉdʼaita ne ẽã, mawũẽ mʉ wãbʉrʉedʼa awʉrʉta edʼa wã bʼʉa mʉ nawedʼa.
8 Mawũãĩ Jesúsbara mawũãsia: Piradrʉrua, bʉzhi ertõ jiraedape tebarua.
9 Audre ẽãne maʉ̃ bʼesia, mawũẽ izhi ertõ jiraedape tebadʼewasia. Ẽnaʉ̃bada ewari basia maʉ̃ ewadera.
10 Mawũẽ judíorãbara mawũã bʼebʉrʉa mawũãsidʼa: Idʼira ẽnaʉ̃bada ewaria, mawũẽ bʉzhi ertõ anʉma bʼe ẽã.
11 Mawũãnaĩ izhara panaʉ̃ mawũãsia: Mʉta bʼebidʼabara ertõ jiraedape tebarua asia.
12 Mawũãĩ widʼi mawũãsidʼa: ¿Kʼaiba bʉaa mawũã bʉzhi ertõ jiraedape tebarua asi?
13 Mawũãbʉdadʼera zhi bʼedʼabara kʼawua ẽbasia kʼaita, Jesús nebasi baera mama zhãrã kʼabana nʉmanane edʼa. 14 Tẽã Jesúsbara ũdupe mawũãsia: Bʉra bʼesia, mawũẽ wueta kʼazhiruata orãrũã audre zuburia ẽbaita.
15 Maʉ̃ wãpe judíorãã jarasia izhira Jesúsba bʼebidʼata. 16 Maʉ̃ kʼarea judíorã Jesús kʼaidʼu jirpanesia beadʼaita, maʉ̃ta onʉmaẽrã ẽnaʉ̃bada ewade. 17 Mawũẽ Jesúsbara mawũãsia: Mʉ Zezera ewariza kʼãrẽ obʼʉa, mawũẽ mʉsidʼa kʼãrẽ onʉmʉã.
18 Mawũãbʉrʉ kʼarea judíorãbara wuaabʉrʉ bea krĩñasidʼa, ãzhima aramaʉ̃nerã bari ewari ẽnaʉ̃badadʼebemata aribʼae ẽã nʉma ẽbasia, awuarabʉrʉ Daizezesidʼa zhi Zezeta jarasia, ãzhima aramaʉ̃nerã Daizeze ũme abʼarikadʼe nʉmasia.
Zhi Zezeba obʼʉta obʼʉa zhi Warrabara
19 Maʉ̃ kʼarea Jesúsbara mawũãsia: Mʉã wãrĩnu marãã jaraya: Mʉ zhi Warrabara mʉzhikusaubara miã kʼãrẽta obʼe ẽã, awuarabʉrʉ mʉ Zezeba obʉrʉta ũdubʉrʉta obʼʉa, aramaʉ̃ne jõma mʉ Zezeba obʼʉra mʉ zhi Warrabidʼa obʼʉa. 20 Mʉ Zezebara zhi Warra mʉrã kʉãgʼaba jõma ũdubi bʼʉa izha obʼʉra, mawũẽ kʼãrẽ ãmaña audre waibʼʉata bio ũdubiya, mawũẽ marãbara bia akʉdrua jirpaneña. 21 Mʉ Zezebara beukuadʼara piradrʉbipe zokʼai bʼʉbari kĩrãkʼa, mʉ zhi Warrabidʼa mawũã okrĩñabʉrʉrãta zokʼai bʼʉbaria. 22 Mʉ Zezebara miõta kʼawua o ẽã, awuarabʉrʉ zhãrã kʼawua oidʼebema jõma diasia mʉta zhi Warraa. 23 Mawũãtrʉ jõmaʉ̃ba mʉ zhi Warrata wawiadʼaya mʉ Zeze wawia panʉ kĩrãkʼa. Mʉ zhi Warrata wawia ẽãbara wawia ẽã mʉ Zeze mʉ zokʼadʼata.
24 Mʉã wãrĩnu marãã jaraya: Iabʼaʉba mʉ bedʼeata ũrĩ bʼʉba mʉ zokʼadʼadʼebemata ĩjã bʼʉra erubʼʉa Daizeze ũme bʼai jõ ẽãta, mawũẽ Daizezebara pua kʼawua o ẽbaya, awuarabʉrʉ aduaita bʼadʼata zhi berabʼarima baya Daizeze ũme bʼai jõ ẽãma. 25 Mʉã wãrĩnu marãã jaraya: Ewarita zeya, maʉ̃ ewarira ya arabasia, mawũẽ aduaita bʼebara ũrĩnaña mʉ Daizeze Warra nemita, mʉ bedʼeata ũrĩbʉdara Daizeze ũme bʼai jõ ẽã bʼeaya. 26 Mʉ Zezebara erubʼʉa izhi ũme bʼai jõ ẽãta, mawũẽ mʉ zhi Warraabidʼa diasia erubʼamarẽã izhi ũme bʼai jõ ẽãta. 27 Dewara zhãrã kʼawua oi zareata diasia mʉrã Beubari Bape bʼʉba. 28 Mʉã maʉ̃ta jarabʉrʉ kʼarea kʼawua ẽã krĩcharãũdua, ewarita zeya, maʉ̃ ewadera beudʼapeadʼata jou nʉmebara ũrĩnaña mʉ nemirã. 29 Mawũẽ biata odʼapeadʼara piradrʉdʼaya Daizeze ũme bʼai jõ ẽã bʼaita, mawũãmina bia ẽãta odʼapeadʼara piradrʉdʼaya aduaita.
Jara bʼea Jesúra zhãrã Ẽdrʉbita
30 Mʉãrã mʉzhikusaubara kʼãrẽ o ẽã. Awuarabʉrʉ sãwũãta mʉ Zezeba mʉãã jarabʉrʉta ũrĩpe mʉãrã zhãrã kʼawua obaria, aramaʉ̃ne obaria sãwũã oi bʼʉdʼe, mawũẽ mʉãrã onʉmʉ ẽã mʉã krĩñata, awuarabʉrʉ onʉmʉã mʉ Zeze mʉ zokʼadʼaba krĩñata. 31 Mʉnebemata mʉã jarara mʉnebema zhãrãma wãrĩnu ẽã. 32 Mawũãmina mʉ Zezeba mʉnebemata jara bʼʉa, mʉã kʼawua bʼʉa mawũã mʉnebemata jara bʼʉra wãrĩnuã. 33 Mʉnebemata widʼidʼamarẽã marãbara zhãrãta zokʼasidʼa Juan Burukʼoemiãma, mawũẽ izhara jarasia mʉnebema wãrãta. 34 Mawũãmina mʉãrã zhãrãba mʉnebema mawũã jaraita nesidʼa nʉmʉ ẽã, awuarabʉrʉ mʉãrã Juanba jaradʼata jarabʉrʉa marãta ẽdrʉdʼamarẽã. 35 Juanbara mʉnebema kʼawuabiga nʉmʉba pãrĩguadʼe ĩbĩrã ʉ̃nabari kĩrãkʼa bʼasia, aramaʉ̃ne marã ewari kʼakutua sobiasidʼa izhi ʉ̃nane. 36 Mawũãmina mʉã erubʼʉa mʉnebema audre bia jara bʼʉta Juanba jaradʼa kʼãñabara, kʼãrẽ aribʼaeita mʉ Zezeba mʉãã diadʼata mʉã obʼʉba mʉnebemata jara bʼʉa mʉrã mʉ Zezeba zokʼadʼata. 37 Mʉ Zeze mʉ zokʼadʼabidʼa mʉnebemata jara bʼʉa. Marãbara ũrĩnakʼa izhi nemirã, miã ũdudʼakʼa izhira. 38 Miã izhi bedʼeara eruduanu ẽã marã sodʼera, mʉta izha zokʼadʼara marãbara ĩjãna ẽãba. 39 Daizeze bedʼeata zhi bʼʉmarã marãbara kĩrãkuita estudia bʼea, mazhima maʉ̃neba erubʼeba Daizeze ũme bʼai jõ ẽãta, mawũã zhi bʼʉmabara jara bʼʉa mʉnebemata. 40 Maʉ̃ne marã mʉma ze krĩñana ẽã aramaʉ̃ne erubʼeaira Daizeze ũme bʼai jõ ẽãta.
41 Mʉãrã zhãrãba mʉta bia jaradʼamarẽã nʉmʉ ẽã. 42 Maʉ̃ẽnabema mʉã marã ũdukʼawua bʼʉa, marãbara Daizezera kʉãgʼadʼa ẽã. 43 Mʉrã zesia mʉ Zezedʼeba, maʉ̃ta marãbara mʉrã bia edadʼa ẽã, awʉrʉta izhikusaudʼeba zera maʉ̃ marãbara bia edadʼaya. 44 ¿Marãbara mʉnebema sãwũã ĩjãnaĩpe kʼãwũã mazhirãĩnubʉrʉ zhiya bia jara bʼera? Kʼãwũãrã Daizeze abʼa bʼʉba bia jaramarẽã duanu ẽã. 45 Krĩcharãũdua kĩrãbita mʉã marã jikuaita mʉ Zezea, mawũãmina kʼaiba marã jikuaira bʼʉta Moiséa, maʉ̃ne marãbara izhita krĩcha bʼea. 46 Moiséba bʼʉdʼata marãba ĩjã bʼebʉrʉ mʉnebemata ĩjãkʼausidʼa, izhara mʉnebemata bʼʉdʼaba. 47 Mawũãmina izha bʼʉdʼata ĩjãna ẽãrã, ¿sãwũã ĩjãnaĩpe mʉ bedʼeara?
Nekʼobigadʼa cinco mil
(Mateo 14:13-21; Marcos 6:30-44; Lucas 9:10-17)
6 Maʉ̃ tẽã Jesús kĩrãrã wãsia Galilea dota jedʼea õbʼʉdʼe, maʉ̃ dora abʼaʉta Tiberia abada. 2 Kʼabanata izhi kʼaidʼu wãsidʼa ũdudʼakʼata ũdu bʼeta bʼebiga nʉmʉba kʼayarãta. 3 Mawũẽ Jesús wãrĩzesia kʼatuma zakeidʼu, mobe mama jewedʼasia izha jʉrʉkuadʼa bawara. 4 Maʉ̃nerã ewari araa zebodʼo basia Egiptodʼeba ẽzoadʼata krĩcha fiesta obadata judíorãba. 5 Jesúsba akʉbʉrʉdʼera ũdusia kʼabanata izhi kʼaidʼu bʼeta, mawũẽ Felipea mawũãsia: ¿Zhiko sãma edadʼaipe naʉ̃rãta nekʼodʼamarẽãrã?
6 Mawũã widʼisia sãwũã panaʉ̃ĩ kʼawuaita, izhara kʼawua bʼʉta kʼãrẽ oira. 7 Mawũãĩ Felipebara panaʉ̃ mawũãsia: Ewari dociento trajadʼaba denario docientoba pan edabʉrʉsidʼa arabʼae ẽã naʉ̃rãta abʼa abʼakʼa wĩkabidʼa nekʼobigaira.
8 Izha jʉrʉkuadʼaba abʼaʉba, Andrés Pedro mebeaba mawũãsia: 9 Kũrãta za bʼʉba pan juesoma erubʼʉta cebada omata erubʼʉa, bʼedasidʼa ũme erubʼʉa, mawũãmina ¿naʉ̃ sãwũãĩpe bioitara?
10 Mawũãĩ Jesúsbara mawũãsia: Zhãrãta jewedʼabigaudua.
Mamarã bio nʉmasia poajãrãta, aramaʉ̃ne cinco mil jewedʼasidʼa zhũmakĩrãrãta. 11 Mobebʉrʉ Jesúsbara maʉ̃ pan jiraedape Daizezea zhibia jipe bʼʉekuape diasia izha jʉrʉkuadʼaa, mawũẽ izha jʉrʉkuadʼabara jedʼekasidʼa jewedʼa kʼobʼea, bʼedasidʼa abʼarika osia ãzha kʼobʉdadʼe kʼodʼamarẽã. 12 Jãwũã duanebʉdadʼe izha jʉrʉkuadʼaa mawũãsia: Adʼubabʉdata zhi bʼʉgʉzoamata jʉrepeudua, miã kʼãrẽta adua ẽbamarẽã.
13 Mawũãĩ jʉrepesidʼa, aramaʉ̃ne zhi bʼʉgʉzoamaba jamara doce birasidʼa, pan juesomata cebada omata adʼubadʼapeadʼata zhi kʼodʼapeadʼaba. 14 Mawũẽ zhãrãbara ũdudʼakʼata Jesúsba mawũã obʉrʉta ũdudʼai mawũãsidʼa: Naʉ̃ wãrĩnu Daizezeba bedʼeata jarabibarita zeita bʼadʼa naʉ̃ ẽjũãẽna.
15 Maʉ̃nerã Jesúsbara kʼawuasia izhira zareadʼe edeita kʼopanʉta rey babidʼaita, mawũẽ wakusa kʼatumaẽna wãsia izhi dobʼa.
Jesús tebadʼa do ʉ̃rʉ̃
(Mateo 14:22-27; Marcos 6:45-52)
16 Keubʉrʉdʼera Jesúsba jʉrʉkuadʼara zesidʼa do jedʼea õbʼʉidʼu. 17 Mobe jãbadʼe bʼarikuape do jedʼea õbʼʉdʼe kĩrãrã wãsidʼa Capernaúm pʉwʉrʉedʼa. Maʉ̃nerã ya paisosoa nʉmʉne Jesús wadʼi ze ẽbasia ãzhima. 18 Maʉ̃ne do jedʼea õbʼʉra bomatʉ bʉsadʼewasia zarea pʉ̃ãdrʉ nʉmʉba. 19 Wigui wãnata cinco o seis kilómetro babʉrʉdʼe Jesús do ʉ̃rʉ̃ taita ũdubʉdadʼera orra tebasia jãbata, mawũẽ perasidʼa. 20 Maʉ̃ne izhara mawũãsia: Mʉta taia, perarãũdua.
21 Mawũãĩ ãzhara sobia jãbadʼe edasidʼa, aramaʉ̃ne dããrã ẽãne jũẽkuasia drua ãzhi wãma.
Zhãrãba jʉrʉdʼapeadʼa Jesús
22 Do jedʼea õbʼʉ kĩrãrẽ zhãrã duanenabara nrũẽmane kʼawuasidʼa mama jãba abʼabai bʼadʼata, izha jʉrʉkuadʼa bawara Jesús maʉ̃ jãbadʼera bʼari ẽbasia, awuarabʉrʉ maʉ̃rã wãsidʼa ãzhi dobʼa. 23 Maʉ̃ne jãba awʉrʉta Tiberia pʉwʉrʉdʼeba zesidʼa, Jesúsba Daizezea zhibia jipe pan kʼodʼapeadʼa kʼaita. 24 Aramaʉ̃ne zhãrãbara kʼawuasidʼa Jesús mama ne ẽãta, miã izha jʉrʉkuadʼasidʼa ne ẽãta, mawũẽ maʉ̃ jãbadʼe bʼarikuape wãsidʼa Capernaúm pʉwʉrʉedʼa Jesús jʉrʉdʼe.
Jesúra panta Daizeze ũme bʼai jõ ẽãnebema
25 Aramaʉ̃ne do jedʼea õbʼʉ kĩrãrẽ ũdudʼape mawũãsidʼa: Miã Ũrãgʼabari, ¿bʉra sõmbewedʼa naĩnu zesi?
26 Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya, marãbara mʉrã jʉrʉ duanu ẽã sãwũãta kʼawuasidʼa baera mʉã odʼata ũdudʼakʼata, awuarabʉrʉ mʉrã jʉrʉ duanuã panta jãwũã kʼosidʼa baera. 27 Kʼãrẽ obʉdata bari zhiko jõbari kʼarea orãũdua, awuarabʉrʉ kʼãrẽ oudua pan jõkʼa kʼarea, Daizeze ũme bʼai jõ ẽã kʼarea, mʉ Beubari Bape bʼʉba maʉ̃ pan marãã diaya, mʉrã maʉ̃ kʼarea bʼʉsia mʉ Zhibari mʉ Zezeba.
28 Mawũãĩ mawũãsidʼa: ¿Daibara kʼãrẽta odʼaibarape kʼãrẽ Daizezedʼeta odʼaira?
29 Mawũãnaĩ Jesúsbara panaʉ̃ mawũãsia: Marãba kʼãrẽ Daizezedʼeta odʼaira, ĩjãũdua mʉ izha zokʼadʼata.
30 Mawũãĩ mawũãsidʼa: ¿Bʉara kʼãrẽta ũdudʼakʼata oipe daiba maʉ̃ta ũdudʼape bʉdʼebemata ĩjãnaĩrã? ¿Bʉara kʼãrẽta oipe? 31 Dai zhibarirã bʼeadʼabara pan maná abadata kʼosidʼa drua drudrua tabʼʉ maẽ, maʉ̃ẽnabemata zhi bʼʉmata mawũã bʼʉa: Pan ʉ̃trebemata dedʼekasia kʼodʼamarẽã.
32 Mawũãnaĩ Jesúsbara mawũãsia: Mʉã wãrĩnu marãã jaraya: Maʉ̃ pan ʉ̃trebema Moiséba dedʼeka ẽbasia, awuarabʉrʉ dedʼekasia mʉ Zezeba. Aramaʉ̃ne mʉ Zezebara dedʼeka bʼʉa wãrĩnu pan ʉ̃trebemata. 33 Pan Daizezedʼea mʉta ʉ̃treba zedʼata, mʉãrã Daizeze ũme bʼai jõ ẽãta dia bʼʉa ẽjũãne zhãrã bʼea.
34 Mawũãĩ mawũãsidʼa: Nokʼó, daia ewariza diadua maʉ̃ panta.
35 Mawũãnaĩ Jesúsbara mawũãsia: Mʉta panta Daizeze ũme bʼai jõ ẽãnebema, mʉma zebʉrʉra maʉ̃nebemanerã jarrakʼa baya, mʉnebemata ĩjãbʉrʉra aramaʉ̃ne obisiakʼa baya. 36 Mawũãmina mʉã marãã jaradʼa kĩrãkʼa, marãbara mʉrã ũdu bʼemina mʉnebema ĩjãna ẽã. 37 Mʉ Zezeba mʉãã diabʉrʉra jõma mʉma zedʼaya, mʉma zebʉrʉra mʉãrã ãĩ jʉreta ẽã. 38 Mʉrã ʉ̃trebara ze ẽbasia mʉã krĩñata oita, awuarabʉrʉ zesia mʉ Zeze mʉ zokʼadʼaba krĩñata oita. 39 Mʉ Zeze mʉ zokʼadʼabara krĩña bʼʉa jõma izha mʉãã diabʉrʉra mʉrẽ miõta adua ẽbaita, awuarabʉrʉ krĩña bʼʉa maʉ̃rãta beudʼapeadʼara mʉã piradrʉbigaita ewari nʉmʉta jõbʉrʉdʼera. 40 Mʉ Zeze mʉ zokʼadʼabara krĩña bʼʉa zhi Warra mʉta krĩcha bʼebara, mʉnebemata ĩjã bʼebara jõmaʉ̃ba erubʼeamarẽã Daizeze ũme bʼai jõ ẽãta. Aramaʉ̃nerã maʉ̃rãta beudʼapeadʼara mʉã piradrʉbigaya ewari nʉmʉta jõbʉrʉdʼera.
41 Judíorãbara Jesús bĩ ẽã jarasidʼa: Mʉrã pan ʉ̃treba zedʼa, abʉrʉba. 42 Maʉ̃nerã mawũãsidʼa: ¿Naʉ̃ Jesúra José warra ẽka? Zhi Zezera, zhi papara dazhirãbara ũdukʼawua bʼea. ¿Maʉ̃ta sãwũã naʉ̃bara izhira ʉ̃treba zedʼa abʉrʉ?
43 Mawũãnaĩ Jesúsbara panaʉ̃ mawũãsia: Bĩ ẽã bedʼearãũdua. 44 Miõta mʉma ze bʼe ẽã mʉ Zeze mʉ zokʼadʼaba webʉrʉ ẽbʉrʉ. Izha webʉrʉtrʉ beudʼata mʉãrã piradrʉbiya ewari nʉmʉta jõbʉrʉdʼera. 45 Daizezeba bedʼeata jarabibarirãba jaradʼapeadʼata zhi bʼʉmata mawũã bʼʉa: Daizezeba jõma ũrãgʼaya. Aramaʉ̃nerã mʉ Zeze bedʼeata ũrĩnape izhidʼebemata kʼawabʉdara jõma mʉma zedʼaya. 46 Mʉã maʉ̃ta jarabʉrʉ ẽã iabʼaʉba mʉ Zezeta ũdudʼaba, awuarabʉrʉ mʉta Daizeze maẽba zedʼabʉrʉ mʉãbʉrʉ ũdubaria mʉ Zezera. 47 Mʉã wãrĩnu marãã jaraya: Mʉnebemata ĩjã bʼʉbara erubʼʉa Daizeze ũme bʼai jõ ẽãta. 48 Mʉrã panta Daizeze ũme bʼai jõ ẽãnebema. 49 Marã zhibarirã bʼeadʼaba drua drudrua tabʼʉ maẽ maná kʼo bʼeadʼara bari zhiko basia, mawũẽ kʼo bʼeasimina beukuasia. 50 Mʉrã pan ʉ̃treba zedʼa, pan mʉta kʼobʉrʉra adua ẽã. 51 Mʉrã panta Daizeze ũme bʼai jõ ẽãta ʉ̃treba zesia, iabʼaʉba pan mʉta kʼobʉrʉra Daizeze ũme bʼai jõ ẽã bʼaya. Pan mʉã diabʉrʉra mʉ zharata diaya. Maʉ̃ mʉãrã Daizeze ũme bʼai jõ ẽãta diaya ẽjũãne zhãrã bʼea.
52 Mawũãĩ judíorã ãzhirãĩnu bĩ ẽã mawũãsidʼa: ¿Naʉ̃bara sãwũã mawũã dazhirãã kʼobigaipe izhi zharata?
53 Mawũãnaĩ Jesúsbara mawũãsia: Mʉã wãrĩnu marãã jaraya: Mʉ Beubari Bape bʼʉ zharata kʼodʼa ẽbʉrʉ, mʉ wata dodʼa ẽbʉrʉ erubʼea ẽã Daizeze ũme bʼai jõ ẽãrã. 54 Mʉ zharata kʼo bʼʉbara mʉ wata do bʼʉbara erubʼʉa Daizeze ũme bʼai jõ ẽãrã, mawũẽ beudʼata mʉã piradrʉbiya ewari nʉmʉta jõbʉrʉdʼera. 55 Mʉ zhara wãrĩnu zhikoa, mʉ wara wãrĩnu doyidʼebema. 56 Mʉ zharata kʼo bʼʉra mʉ wata do bʼʉra mʉne bʼʉa, mʉrã izhidʼe bʼʉa. 57 Mʉ Zeze mʉ zokʼadʼata bʼʉ kĩrãkʼa, mʉrã bʼʉa mʉ Zezedʼeba, aramaʉ̃ kĩrãkʼa mʉta kʼo bʼʉra bʼaya mʉneba. 58 Mʉta panta ʉ̃treba zedʼa. Marã zhibarirã bʼeadʼaba maná kʼodʼapeadʼa kĩrãkʼa bʼʉ ẽã, mawũã kʼosidʼamina beukuasia. Pan mʉta kʼobʉrʉra Daizeze ũme bʼai jõ ẽã bʼaya.
59 Jesúsbara Capernaúm pʉwʉrʉdʼe maʉ̃ta jarasia miã ũrãgʼa nʉmʉba de zhi jʉrebada maẽ.
Bedʼeata Daizeze ũme bʼai jõ ẽãnebema
60 Maʉ̃ta ũrĩnape izhi pẽwã bʼebara bioba mawũãsidʼa: Maʉ̃ bedʼeara zarea. ¿Mawũẽ kʼaiba ũrĩ bʼeipe?
61 Jesúsbara kʼawuasia izhi pẽwã bʼe mawũã bĩ ẽã bedʼea kʼobʼera, mawũẽ mawũãsia: ¿Maʉ̃ bedʼeabara marã bĩ ẽãbʉdakʼa? 62 ¿Mobera sãwũãnaĩpe mʉ Beubari Bape bʼʉta ʉ̃taa wãbʉrʉta ũdudʼara naara mʉ bʼadʼama? 63 Jawurebiabʉrʉ dia bʼʉa Daizeze ũme bʼai jõ ẽãta, zharabara dia ẽã. Bedʼeata mʉã marãã jara bʼʉra Jawurebiadʼebemata Daizeze ũme bʼai jõ ẽãnebema. 64 Mawũãmina marã ʉ̃kʉrʉbara ĩjãna ẽã. Jesúsbara mawũã jarasia jẽde wedʼauba kʼawua bʼasi baera kʼairãba ĩjãna ẽãta, aramaʉ̃ne kʼawua bʼasia izhira kʼaiba chãbʼariita.
65 Maʉ̃nerã mawũãsia: Maʉ̃neba mʉã marãã jarasia miõta mʉma ze ẽãta mʉ Zezeba diabʉrʉ ẽãrã.
66 Mamaʉ̃ba ʉ̃taara izhi pẽwã bʼebara bioba izhira kenabʼarisidʼa, mawũẽ ya izhi bawara erjirana ẽbasia. 67 Mawũẽ Jesúsbara izha jʉrʉkuadʼata docea mawũãsia: ¿Marãsidʼa wã krĩña panʉka?
68 Mawũãĩ Simón Pedroba panaʉ̃ mawũãsia: Nokʼó, ¿daira kʼaima wãĩpe? Bʉabʉrʉ bedʼeata erubʼʉa Daizeze ũme bʼai jõ ẽãta. 69 Maʉ̃ daibara ĩjã bʼea, aramaʉ̃ne daiba kʼawua bʼedʼera bʉra zhãrã Ẽdrʉbita Daizeze zokʼai bʼʉ Warra.
70 Mawũãĩ Jesúsbara mawũãsia: Mʉã marã doce jʉrʉkuasia, mawũãmina marãnebema abʼa ãtõmiãba erunʉmʉã.
71 Mawũã jarabʉrʉbara Juda Iscarioteta jarasia Simón warrata, izhira maʉ̃ba chãbʼarii baera mawũã jarasia, maʉ̃ docedʼebema basia.
Jesús mebẽrãba izhidʼebema ĩjã ẽã bʼeadʼa
7 Maʉ̃ tẽã Jesús pʉrrʉasia Galilea druadʼe, Judea druadʼera pʉrrʉa krĩña ẽbasia judíorãba beaita jirpanʉba. 2 Kʼaita bata nʉmasia fiesta judíorãne de pãne duanebadata. 3 Mawũẽ zhi mebẽrãbara Jesúa mawũãsidʼa: Namaʉ̃bara wãrũã Judea druaedʼa, maĩnu bʉ pẽwã bʼebidʼa ũdudʼamarẽã bʉa obʼʉta. 4 Iabʼaʉba izhita ũdukʼawabiga krĩña bʼʉbara kʼãrẽ chupea o ẽã. Mawũẽ bʉara kʼãwũã kʼãrẽ onʉmaẽrã jõmaʉ̃ daidʼu kʼãrẽ odua.
5 Mawũãsidʼa miã zhi mebẽrãbidʼa izhidʼebema ĩjãna ẽãba. 6 Mawũãnaĩ Jesúsbara mawũãsia: Mʉrã wadʼi wãĩne bʼʉ ẽã, mawũãmina marã baridu ʉ̃madaudʼe wã bʼeya. 7 Naʉ̃ ẽjũãne bʼebara marã ũduama ẽã, mawũãmina mʉrã ũduama bʼea mʉã jara bʼʉba ãzha obʼera bia ẽãta. 8 Marã wãrĩzeudua fiestaidʼu, mʉrã wadʼi wãrĩze ẽã maʉ̃ fiestaidʼura, mʉ wãĩ ewarira wadʼi araba ẽã.
9 Maʉ̃ta jarakʼape bʼesia Galileadʼe.
Jesús fiestadʼe bʼadʼa de pãne duanu maẽ
10 Zhi mebẽrã wãrĩzekuadʼa tẽãne izhisidʼa wãrĩzesia fiestaidʼu, mawũãmina jõmaʉ̃ daidʼu wã ẽbasia, awuarabʉrʉ wãsia chupea. 11 Maʉ̃ne judíorãbara fiestadʼe jʉrʉ bʼeta mawũã duanasia: ¿Kʼãʉ̃ sãma bʼʉba?
12 Kʼabanane edʼara izhi ʉ̃rʉ̃rã biodʼe bedʼea jirpanʉta ʉ̃kʉrʉbara biata bʼʉa aduanasia. Waya ʉ̃kʉrʉbara mawũã duanasia: Mawũã ẽã, awuarabʉrʉ zhãrãta sewa bʼʉa. 13 Mawũãmina izhi ʉ̃rʉ̃rã miõta dajada bedʼeadʼa ẽbasia judíorã wawiaba.
14 Fiestara ẽsadra babʉrʉdʼera, Jesús Daizeze deidʼu wãrĩzepe ewara maẽ miã ũrãgʼasia. 15 Mawũẽ judíorãbara bia akʉdrua mawũãsidʼa: ¿Naʉ̃bara sãwũã kʼawua bʼʉ miã ũrãgʼaidʼebema estudia ẽbadʼata?
16 Maʉ̃ne Jesúsbara mawũãsia: Ũrãgʼata mʉã jara bʼʉra mʉrẽ ẽã, awuarabʉrʉ Daizeze mʉ zokʼadʼadʼea. 17 Daizezeba krĩñata okrĩña bʼʉbara kʼawuaya ũrãgʼara Daizezedʼeta, o kʼawuaya mʉrã bedʼea bʼʉta mʉzhikusauba. 18 Izhikusauba bedʼea bʼʉbara izhitrʉ bia jaradʼamarẽã bʼʉa, mawũãmina mʉãrã Daizeze mʉ zokʼadʼata bia jaradʼamarẽã bʼʉa, mawũẽ wãrĩnuta jara bʼʉa, aramaʉ̃ne mʉãrã sewata jara ẽã. 19 ¿Moisébara ũrãgʼara marãã diasi ẽka? Maʉ̃ta marãbara miõba aribʼaedʼa ẽã. ¿Maʉ̃ba mʉrã bea krĩña duanu ẽka?
20 Mawũãĩ kʼabanabara panaʉ̃ mawũãsidʼa: Bʉra jaiba mawũã krĩchabi bʼʉa, ¿bʉra kʼaiba bea krĩña nʉmʉ?
21 Mawũãnaĩ Jesúsbara panaʉ̃ mawũãsia: Ẽnaʉ̃bada ewade mʉã ne abʼa obʉrʉba marã jõma kʼawua ẽã krĩcha kʼobʼea. 22 Mawũẽ mʉã jaraya, Moisébara marãã jarasia warra zakera kʼakua eta kʼõnamarẽã, mawũã oira Moisédʼeba ze ẽbasia, awuarabʉrʉ marã zhibarirã bʼeadʼadʼeba zesia, aramaʉ̃ne marãbara ẽnaʉ̃bada ewadebidʼa warra zakera kʼakua eta kʼõbada. 23 Mawũã ẽnaʉ̃bada ewadebidʼa warra zakera kʼakua eta kʼõbada Daizezeba ũrãgʼa Moiséa diadʼata aribʼaedʼai kʼarea, ¿maʉ̃ta marã mʉ bawara kĩrũ duanuka ẽnaʉ̃bada ewade mʉã jipa bʼebibʉrʉba zhãrãta? 24 Zhãrãba kʼãrẽ obʉrʉta ũdudʼape bĩ ẽã bedʼearãũdua, awuarabʉrʉ kʼãrẽ obʉrʉta bigara kĩrãẽpa biga audua.
¿Naʉ̃ka zhãrã Ẽdrʉbiira?
25 Jerusalénne bʼebara ʉ̃kʉrʉba mawũã duanasia: ¿Naʉ̃ ẽka beadʼaita jʉrʉ bʼera? 26 Akaudua, jõmaʉ̃ daidʼu bedʼea nʉmʉta kʼãrẽ jaradʼa ẽã. ¿Nokʼorãbara wãrĩnu krĩcha duanu ẽka naʉ̃ zhãrã Ẽdrʉbiita? 27 Mawũãmina dazhirãbara kʼawua bʼea naʉ̃ sãmabemata, maʉ̃ne zhãrã Ẽdrʉbiita zebʉrʉdʼera miõba kʼawua ẽbaya sãmabemata.
28 Mobebʉrʉ Jesúsbara Daizeze dedʼa ewara maẽ miã ũrãgʼa nʉmʉba nemi jĩgua mawũãsia: Marãbara mʉrã ũdukʼawua bʼeta kʼawua bʼea sãmabemata. Mawũãmina mʉrã mʉzhikusauba ze ẽbasia, awuarabʉrʉ mʉrã zokʼasia Daizeze wãrĩnu bʼʉba, izhidʼebema marãbara kʼawua duanu ẽã. 29 Mawũãmina mʉãrã kʼawua bʼʉa mʉrã zesi baera izhi maẽba, mʉrã izha zokʼasia.
30 Mawũãbʉrʉ kʼarea Jesús jida krĩñasidʼa, mawũãmina miõba jida ẽbasia wadʼi araba ẽãba izhi ewarita. 31 Kʼabanabara bioba izhidʼebemata ĩjãnape mawũã duanasia: Zhãrã Ẽdrʉbiita zebʉrʉdʼera, ¿ũdudʼakʼara audre oibʉka naʉ̃ba obʼʉ kʼãñabara?
Fariseorãba Jesús jida krĩñanapeadʼa
32 Fariseorãbara ũrĩsidʼa zhãrã Jesú ʉ̃rʉ̃ mawũã bedʼea jirpanʉta, mawũẽ sacerdoterã nokʼorãbara, fariseorã bawarauba Daizeze de akʉbadata zokʼasidʼa jidadʼamarẽã. 33 Mawũẽ Jesúsbara mawũãsia: Mʉrã wadʼi ewari kʼakutua marã bawara bʼape wãña mʉ zokʼadʼama. 34 Marãbara mʉrã jʉrʉdʼaya, mawũãmina mʉrã ũdudʼa ẽbaya, aramaʉ̃ne mʉ bʼaima marã wã bʼedʼa ẽã.
35 Mawũãĩ judíorãbara ãzhirãĩnu mawũãsidʼa: ¿Naʉ̃ sãmaã wãĩba dazhirãba mawũã ũdudʼa ẽbaira? ¿Judíorã druaza griegorãne edʼa bʼema wãĩbʉka, aramaʉ̃ne griegorã ũrãgʼaita? 36 Izhara kʼãrẽta jara krĩñaba mawũãbʉrʉ: Marãbara mʉrã jʉrʉdʼaya, mawũãmina mʉrã ũdudʼa ẽbaya, aramaʉ̃ne mʉ bʼaima marã wã bʼedʼa ẽã.
Dota Daizeze ũme bʼai jõ ẽãnebema
37 Fiesta jõbʉrʉ ewarita zhi zroma ewade, Jesús edau nʉmepe nemi jĩgua mawũãsia:
Iabʼa obisia bʼʉbʉrʉ mʉma zerua, aramaʉ̃ne baniã dorua. 38 Mʉnebemata ĩjã bʼʉdʼebara Daizeze bedʼeata zhi bʼʉmane jara bʼʉ kĩrãkʼa izhi sodʼeba zhãrãma dota drʉya Daizeze ũme bʼai jõ ẽãta.
39 Mawũã dota jarabʉrʉra jarasia izhidʼebemata ĩjãbʉdabara Jawurebiata jidadʼaita, maʉ̃nerã wadʼi ze ẽbasia Jawurebiara, wadʼi Jesús ʉ̃taa wã ẽãba.
Krĩcha abʼarika zedʼa ẽbadʼapeadʼa
40 Kʼabanata ʉ̃kʉrʉbara maʉ̃ bedʼeata ũrĩnape mawũãsidʼa: Naʉ̃ wãrĩnu Daizezeba bedʼeata jarabibaria. 41 Waya ʉ̃kʉrʉbara mawũãsidʼa: Naʉ̃ zhãrã Ẽdrʉbia. Mawũãmina ʉ̃kʉrʉbara mawũãsidʼa: ¿Galileadʼebara ʉ̃tʉ zeita bʼʉka zhãrã Ẽdrʉbiira? 42 ¿Maʉ̃ẽnabemata zhi bʼʉmanerã jara bʼʉ ẽka rey Davidʼeba ʉ̃tʉ zeita, aramaʉ̃nerã David Belén pʉwʉrʉdʼebemata bʼadʼa maẽba ʉ̃tʉ zei ẽka zhãrã Ẽdrʉbiira? 43 Aramaʉ̃ne zhãrã krĩcha abʼarika zedʼa ẽbasia Jesúsdʼebemanerã. 44 Ãzhara ʉ̃kʉrʉbara jida krĩñasidʼa, mawũãmina miõba jidadʼa ẽbasia.
¡Miõta bi-ia bedʼea ẽã Jesús kĩrãkʼara!
45 Daizeze deta akʉbadara wakusa zesidʼa sacerdoterã nokʼorãma, fariseorãma, mawũẽ maʉ̃rãbara mawũãsidʼa: ¿Sãwũẽ Jesús wedʼa ẽpe?
46 Mawũãnaĩ Daizeze deta akʉbadabara panaʉ̃ mawũãsidʼa: ¡Miõta bi-ia bedʼea ẽã kʼãʉ̃ kĩrãkʼara!
47 Mawũãnaĩ fariseorãbara panaʉ̃ mawũãsidʼa: ¿Marãsidʼa kʼãʉ̃ã zhi sewabi nʉmeka? 48 ¿Kʼãʉ̃nebema ĩjã duanuka nokʼorãbara, o fariseorãbara? 49 Kʼãʉ̃nebema ĩjã bʼebara Moisé ũrãgʼara kʼawua ẽã bʼea, mawũẽ Daizezebara kʼawua okuaya.
50 Mawũãnaĩ Nicodemo Jesúsma diamase zedʼabara ãzhidʼebemaba mawũãsia: 51 ¿Ũrãgʼa dazhirãnebara jara bʼʉ ẽka dazhirãbara zhãrã kʼawua obʼedʼa ẽãta naara izhi bedʼeata ũrĩbʉda ẽbʉrʉ kʼawuaita kʼãrẽ odʼata?
52 Mawũãĩ panaʉ̃ mawũãsidʼa: ¿Bʉsidʼa Galileadʼebemakʼa? Daizeze bedʼeata bia estudiadua, mawũãrã kʼawuaya Galileadʼebara piradrʉkʼata Daizezeba bedʼeata jarabibarira.
53 Maʉ̃ tẽã wãsidʼa ãzhi deza.
Wũẽrãba kĩma ẽãta erukʼãĩna
8 Waya Jesúra wãsia Olivo kʼatumaĩnu. 2 Nrũẽma diapedʼa wakusa Daizeze dedʼa ewara maẽ zebʉrʉdʼera zhãrã jõma zesidʼa izhima. Mawũẽ jewedʼape maʉ̃rãta ũrãgʼasia. 3 Maʉ̃ne ũrãgʼa Moisédʼe jarabadaba fariseorã bawarauba wũẽrãta izhima wesidʼa kĩma ẽãta erukʼãĩ nʉmʉta burudʼape, mobe miõ ẽsadra kʼobʼʉdʼape, 4 mawũãsidʼa: Miã Ũrãgʼabari, naʉ̃ wũẽrã kĩma ẽãta erukʼãĩ nʉmʉta burusidʼa. 5 Ũrãgʼadʼera Moisébara daia jarasia wũẽrã kʼãwũã bʼera mongʼaraba tabʼari beadʼamarẽã. ¿Mawũẽ bʉara kʼasia aipe?
6 Maʉ̃ta jarasidʼa wãẽãbidʼape nokʼoa jidʼai kʼarea. Mawũãmina Jesús ju kʼobʼepe egorodʼe ne bʼʉsia juwua jĩwĩniba. 7 Maʉ̃ne ãzhara pi widʼi barabʼʉba jipa kʼobʼepe mawũãsia: Marãnebema kʼazhirua ne ẽãba maʉ̃ba naara mongʼaraba tabʼarirua kʼãʉ̃ wũẽrã.
8 Mawũãpe wakusa ju kʼobʼepe ari ne bʼʉ nʉmesia egorodʼe. 9 Mawũãmina ãzhara maʉ̃ta ũrĩnape kʼazhirua bara bʼeta kʼawua bʼeba abʼa abʼaʉdʼe ãĩ wãsidʼa, naara ãĩ wãsidʼa zõrãrãta, maʉ̃are kũrãrãta. Aramaʉ̃ne Jesús dobʼa kʼobʼesia, wũẽrãsidʼa kʼobʼesia miõ ẽsadra kʼobʼedʼata. 10 Mawũẽ Jesús jipa kʼobʼebʉrʉdʼe miõ ũdu ẽãne wũẽrãtrʉ ũdui mawũãsia: ¿Wũẽrã, bʉta ji kʼopanana sãma kʼopanʉ? ¿Bʉra miõba bea ẽka?
11 Mawũãĩ wũẽrãbara mawũãsia: Nokʼó, mʉrã miõba bea ẽã.
Mobebʉrʉ Jesúsbara mawũãsia: Bʉra miã mʉãbidʼa bea ẽã, mawũẽ wãrũã, mobe wueta kʼazhiruata orãrũã.
Jesúra ʉ̃nata bʼʉa ẽjũãne bʼerãĩta
12 Wakusa Jesúsbara zhãrã kʼobʼea mawũãsia: Mʉrã ʉ̃nata bʼʉa ẽjũãne bʼerãĩta, mʉta pẽwã bʼʉra pãrĩguadʼe nimiba ẽã, awuarabʉrʉ ʉ̃nata erubʼaya Daizeze ũme bʼai jõ ẽãta.
13 Mawũãĩ fariseorãbara mawũãsidʼa: Bʉara bʉzhidʼebemata jara bʼʉa, mawũẽ bʉa jara bʼʉra kʼãrẽ ẽã.
14 Mawũãnaĩ Jesúsbara panaʉ̃ mawũãsia: Mʉãrã mʉzhidʼebemata jara bʼʉmina mʉã jara bʼʉra wãrĩnuã, mʉã kʼawua bʼʉba mʉ sãmaʉ̃ba zedʼata, mʉ sãmaã wãĩta. Mawũãmina marãbara kʼawuadʼa ẽã mʉ sãmaʉ̃ba zedʼata miã sãmaã wãĩta. 15 Marãbara mʉrã jara bʼea beubarita bedʼea bʼedʼe, mawũãmina mʉã zhãrã mawũãrã jara ẽã. 16 Mʉã zhãrãnebemata jarara mʉãrã wãrĩnuta jaraya mʉrã abʼa nʉmʉ ẽbaera, awuarabʉrʉ daira panʉã mʉta mʉ Zeze mʉ zokʼadʼata. 17 Marã ũrãgʼadʼera bʼʉ tabʼʉa zhãrã ũmeba bedʼeata jarabʉdara wãrĩnuta. 18 Aramaʉ̃ kĩrãkʼa mʉãrã mʉnebemata jara bʼʉa, mʉ Zeze mʉ zokʼadʼabidʼa jara bʼʉa mʉnebemata.
19 Mawũãĩ ãzhara mawũãsidʼa:
¿Sãma bʼʉ bʉ Zezera? Mawũãnaĩ Jesúsbara panaʉ̃ mawũãsia: Marãbara mʉrã ũdukʼawua duanu ẽã, miã mʉ Zezesidʼa ũdukʼawua duanu ẽã, mʉta ũdukʼawua bʼebʉrʉ mʉ Zezesidʼa ũdukʼawua bʼea.
20 Jesúsbara maʉ̃ bedʼeata jarasia ofrenda bʼʉbada maẽ Daizeze dedʼa ewara maẽ miã ũrãgʼa nʉmʉba. Maʉ̃nerã miõba jidadʼa ẽbasia wadʼi araba ẽãba izhi ewarita.
Mʉ wãĩma marã wã bʼedʼa ẽã
21 Jesúsbara wakusa mawũãsia: Mʉta wãbʉrʉdʼera marãbara mʉrã jʉrʉdʼaya, mawũãmina marã mazhi kʼazhiruadʼe beukuaya, mawũẽ mʉ wãĩma marã wã bʼedʼa ẽã.
22 Mawũãĩ judíorãbara mawũãsidʼa: ¿Mobera izhikusa zhi beaika, sãwũã mawũã mʉ wãĩma marã wã bʼedʼa ẽã abʉrʉ?
23 Maʉ̃ne Jesúsbara mawũãsia: Marã udʼabema, mʉrã ʉ̃trebema, marã naʉ̃ ẽjũãnebema, mʉrã naʉ̃ ẽjũãnebema ẽã. 24 Maʉ̃ba mʉã marãã jarabʉrʉa marã mazhi kʼazhiruadʼe beukuaita, Mʉrã Mʉta ĩjãna ẽbʉrʉ mazhi kʼazhiruadʼe beukuaya.
25 Mawũãĩ mawũãsidʼa: ¿Bʉra kʼaipe?
Mawũãnaĩ Jesúsbara mawũãsia: Mʉnebema jẽde wedʼauba mʉã marãã zhi jarama. 26 Mʉãrã marãnebema ne bio jara kʼawua oya, mʉ zokʼadʼabara wãrĩnuta jara bʼʉa, mawũẽ mʉãrã izha jarabʉrʉta ũrĩbʉrʉta jara bʼʉa ẽjũãne bʼea.
27 Mawũãbʉrʉdʼera ãzhara kʼawuadʼa ẽbasia zhi Zezeta jarabʉrʉra.
28 Mawũẽ Jesúsbara mawũãsia: Mʉ Beubari Bape bʼʉta marãba cruzdʼe jirabʼʉdʼai marãbara kʼawuadʼaya Mʉrã Mʉta, aramaʉ̃ne kʼawuadʼaya mʉã miã kʼãrẽta o ẽãta mʉzhikusaubara, awuarabʉrʉ mʉrã mʉ Zezeba jaradiadʼadʼe bedʼea bʼʉa. 29 Mʉ zokʼadʼara mʉ ũme bʼʉa, aramaʉ̃ne mʉ Zezebara mʉrã dobʼa kenabʼari ẽã, mʉãrã ewariza obʼʉba izha krĩñata.
30 Jesúsba maʉ̃ta jarabʉrʉba bioba ĩjãsidʼa izhidʼebemata.
Wãrãbara ẽdrʉbigaya
31 Mobebʉrʉ Jesúsbara judíorã izhidʼebema ĩjãbʉdaa mawũãsia: Marãba mʉ bedʼeata aribʼae bʼebʉrʉ wãrĩnu mʉta pẽwã bʼea. 32 Mawũãrã kʼawuadʼaya Daizezedʼebema wãrãta, wãrãbara ẽdrʉbigaya.
33 Mawũãĩ panaʉ̃ mawũãsidʼa: Daira Abrahamneba uruta bʼea, mawũẽ daira nezokʼata duanu ẽã. ¿Sãwũã maʉ̃ta bʉara ẽdrʉdʼaya abʉrʉ?
34 Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya: Kʼazhiruata obʼera kʼazhirua nezokʼata bʼea. 35 Nezokʼara zhidekʉ maẽ jipa dedʼabema ẽã, mawũãmina zhi warrara jipa dedʼabema. 36 Mawũẽ mʉta Daizeze Warraba ẽdrʉbigara, wãrĩnu ẽdrʉdʼaya. 37 Mʉãrã kʼawua bʼʉa marã Abrahamneba uruta, mawũãmina marãbara mʉrã bea krĩña bʼea, mʉ bedʼeara ĩjãna ẽãba marãbara. 38 Mʉãrã jara bʼʉa mʉ Zezeba ũdubidʼata, waya marãbara obʼea mazhi zezeba ũrĩbidʼata.
Marã mazhi zeze ãtõmiãneã
39 Mawũãĩ panaʉ̃ mawũãsidʼa: Dai zezea Abrahamta.
Mawũãnaĩ Jesúsbara mawũãsia: Marãta Abraham warrarãbʉrʉ, Abrahamba odʼata okʼausidʼa. 40 Mawũãmina marãbara mʉrã bea krĩña bʼea, maʉ̃ne mʉãrã wãrãta jarakʼa bʼʉa Daizezedʼeba ũrĩnata. Marã kĩrãkʼa maʉ̃ kʼaudʼa bʼa ẽbasia Abraham. 41 Marãbara obʼea mazhi zezeba obʼʉta.
Mawũãĩ mawũãsidʼa: Daira wũẽrã jõmaĩnu bʼʉba todʼata duanu ẽã. Daibara zeze abʼa erubʼea, izhira Daizezea.
42 Mawũãnaĩ Jesúsbara mawũãsia: Marã zezeta Daizeze basibʉrʉ, marãbara mʉrã kʉãgʼa kʼausidʼa. Mʉrã Daizeze maẽba zedʼaba mʉzhikusaudʼeba ze ẽbasia, awuarabʉrʉ mʉrã izha zokʼasia. 43 ¿Marãbara kʼãrẽneba sãwũãta kʼawuadʼa ẽpe mʉã jara bʼʉra? Kʼawua ẽã bʼea mʉ bedʼeara ũrĩ krĩña ẽã bʼeba. 44 Marã mazhi zeze ãtõmiãneã, mawũẽ mazhi zezeba krĩñata okrĩña bʼea. Jẽde wedʼauba izhira miã beamiãta bʼʉa, wãrãnebemane bʼʉ ẽãba wãrãta jarakʼa. Sewata jara bedʼeabʉrʉdʼera izhi bʼʉdʼe bedʼea bʼʉa. Aramaʉ̃ne sewa nebʉrʉmiãba sewadʼebema zezea. 45 Mawũãmina mʉãrã wãrãta jara bʼʉta ĩjãna ẽã. 46 ¿Marãnebemabara mʉrã kʼaiba kʼazhiruata osia aipe? Mʉã wãrãta jara bʼʉbʉrʉ, ¿marãbara kʼãrẽã ĩjãna ẽpe? 47 Daizezedʼeta bʼʉbara Daizeze bedʼeata ũrĩ bʼʉa, mawũãmina marãbara ũrĩna ẽã Daizezedʼeta duanu ẽãba.
Abraham nawedʼa bʼʉa zhãrã Ẽdrʉbira
48 Mawũãĩ judíorãbara panaʉ̃ mawũãsidʼa: ¿Kʼãʉ̃neba bia daibara bʉra Samaria bidʼata jara panʉta bʉra jaiba erunʉmʉ ẽka?
49 Mawũãnaĩ Jesúsbara panaʉ̃ mawũãsia: Mʉrã jaiba erunʉmʉ ẽã. Awuarabʉrʉ mʉãrã wawia bʼʉa mʉ Zezeta, maʉ̃ne marãbara mʉrã wawiadʼa ẽã. 50 Mʉãrã mʉta bia jaradʼamarẽã bʼʉ ẽã, mʉ Zezebʉrʉ mʉrã bia jaradʼamarẽã bʼʉa, mawũã bia jaradʼa ẽbʉrʉ izhabʉrʉ kʼawua oya. 51 Mʉã wãrĩnu marãã jaraya: Mʉ bedʼeata aribʼae bʼʉra beukʼa baya.
52 Mawũãĩ judíorãbara mawũãsidʼa: Ya daibara kʼawuabʉda bʉra jaiba erunʉmʉã. Abraham beusia, Daizezeba bedʼeata jarabibarirãsidʼa beukuasia, maʉ̃ne bʉara mawũãbʉrʉa: Mʉ bedʼeata aribʼae bʼʉra beukʼa baya. 53 ¿Mobera bʉra zhi zromakʼa dai zeze Abraham kʼãñabara? Izhira beusia, Daizezeba bedʼeata jarabibarirãsidʼa beukuasia. ¿Mawũẽ bʉra kʼaipe mawũã bedʼea nʉmaĩrã?
54 Mawũãnaĩ Jesúsbara panaʉ̃ mawũãsia: Mʉta mʉzhikusa bia jara nʉmaĩbʉrʉ, mawũã mʉzhita bia jara nʉmʉrã kʼãrẽ ẽã. Mawũãmina mʉrã mʉ Zezeba bia jara bʼʉa, izhira marãbara Daizezea abʼea. 55 Mawũãmina marãbara izhira ũdukʼawua duanu ẽã, maʉ̃ne mʉãrã ũdukʼawua bʼʉa, mʉã ũdukʼawua bʼʉ ẽã ara, sewa nebʉrʉmiã baya marã kĩrãkʼa, mawũãmina mʉãrã ũdukʼawua bʼʉa, mawũẽ mʉãrã izhi bedʼeara aribʼae bʼʉa. 56 Marã zeze Abraham sobiasia mʉ zebʉrʉ ewarita ũdui baera, aramaʉ̃ne ũdusia, mawũẽ sobiasia.
57 Mawũãĩ judíorãbara mawũãsidʼa: Bʉra cincuenta añobidʼa ne ẽãta, ¿bʉa ũdusika Abrahamta?
58 Mawũãnaĩ Jesúsbara mawũãsia: Mʉã wãrĩnu marãã jaraya: Abraham nawedʼa mʉrã bʼʉa.
59 Mawũãĩ mongʼarata jirakua edasidʼa tabʼari beadʼaita, mawũãmina Jesús merũpe ãĩ wãsia Daizeze dedʼa ewara maẽbara. Aramaʉ̃ne ãzhi ẽsadra berabʼari wãsia.
Jesúsba ne ũdubidʼa daʉbʼerrea todʼata
9 Jesús wãbʉrʉdʼera ũdusia ũmakĩrã daʉbʼerrea todʼata. 2 Mawũẽ izha jʉrʉkuadʼabara widʼi mawũãsidʼa: Miã Ũrãgʼabari, ¿kʼazhiruara kʼaiba osi, naʉ̃ba o zhibarirãba osidʼakʼa kʼãwũã daʉbʼerrea toira?
3 Mawũãnaĩ Jesúsbara panaʉ̃ mawũãsia: Izha kʼazhiruata odʼadʼeba kʼãwũã bʼʉ ẽã, miã zhibarirãba kʼazhiruata odʼapeadʼadʼeba kʼãwũã bʼʉ ẽã, awuarabʉrʉ kʼãwũã tosia Daizezeba kʼãrẽ obʼei bʼʉta dajada nʉmemarẽã naʉ̃neba. 4 Mʉ zokʼadʼaba obi nʉmʉrã mʉãrã oibara wadʼi ãsapedʼa nʉmʉ kĩrãkʼa nʉmʉwedʼa. Ewarita zeya diamase dogʼo kĩrãkʼa miõba Daizezedʼebema obʼe ẽãta. 5 Mʉta naʉ̃ ẽjũãne bʼʉwedʼara mʉta ʉ̃nata bʼʉa ẽjũãne bʼerãĩta.
6 Maʉ̃ta jarape egorodʼe idʼosia, aramaʉ̃ne egorora idʼoba susua ope maʉ̃ egoro susuaba pãrĩkua kʼobʼʉsia daʉbʼerrea bʼʉ dabʉta. 7 Mobe mawũãsia: Sʉgʉdʼe wãrũã Siloé posoidʼu. Maʉ̃ trʉ̃bara jara krĩña bʼʉa Zokʼabuedʼata.
Mawũãĩ wãpe sʉgʉsia, mawũẽ jẽrũya zebʉrʉdʼera ne ũdu zesia. 8 Mawũẽ arakʼaita bʼebara naara daʉbʼerrea bʼʉta akʉ bʼeadʼabara mawũãsidʼa: ¿Naʉ̃ ẽka jewedʼape nebari widʼi bʼadʼara?
9 Ʉ̃kʉrʉbara mawũãsidʼa: Kʼãʉ̃ izhia. Waya awʉrʉrãbara mawũãsidʼa: Izhi kĩrãkʼa bʼʉa. Maʉ̃ne izhara mawũãsia: Mʉrã izhia.
10 Mawũãĩ mawũãsidʼa: ¿Bʉra sãwũã ne ũdu bʼidʼa?
11 Mawũãnaĩ izhara panaʉ̃ mawũãsia: Jesús abadaba egorota idʼoba susua ope mʉ dabʉta pãrĩkua kʼobʼʉpe mawũãsia: Siloé posoidʼu wãpe sʉgʉdua. Mawũãĩ mʉrã wãpe sʉgʉsia, aramaʉ̃ne mʉrã ne ũdusia.
12 Mawũãĩ mawũãsidʼa: ¿Maʉ̃ sãma bʼʉ?
Mawũãnaĩ izhara mawũãsia: Mʉãrã kʼawua ẽã.
Fariseorãba widʼidʼapeadʼa daʉbʼerrea bʼʉta bʼedʼaa
13 Fariseorã kĩrãbita edesidʼa daʉbʼerrea bʼadʼara. 14 Ẽnaʉ̃bada ewari basia Jesúsba egorota idʼoba susua ope ne ũdubisidʼera. 15 Mawũẽ fariseorãbidʼa widʼisidʼa sãwũã ne ũdu bʼidʼata. Mawũẽ izhara mawũãsia: Egorota idʼoba susua ope mʉ dabʉta pãrĩkua kʼobʼʉsia, maʉ̃ta mʉã sʉgʉbʉrʉdʼera mʉrã ne ũdusia.
16 Mawũãĩ fariseorã ʉ̃kʉrʉbara mawũãsidʼa: Kʼãʉ̃ Daizezedʼeba nʉmʉ ẽã, mawũẽ aribʼae ẽã ẽnaʉ̃bada ewarira.
Waya awʉrʉrãbara mawũãsidʼa: ¿Kʼazhirua omiãbara sãwũã mawũã ũdudʼakʼata oipe?
Ãzhira aramaʉ̃ne krĩcha abʼarika ze ẽbasia. 17 Mawũẽ daʉbʼerrea bʼadʼaa wakusa mawũãsidʼa: ¿Bʉara kʼasia aipe bʉ daʉbʼerrea bʼʉta ne ũdubidʼadʼebema?
Mawũãnaĩ izhara mawũãsia: Mʉma kʼãʉ̃ Daizezeba bedʼeata jarabibaria.
18 Judíorãbara ĩjãna ẽbasia izhira daʉbʼerrea bʼadʼata ne ũdu bʼidʼara, mawũẽ zhibarirãta trʉ̃sidʼa. 19 Mobe widʼi mawũãsidʼa: ¿Marã naʉ̃ zhibarirãta panʉka, naʉ̃ka marãba jara panʉrã daʉbʼerrea todʼata? ¿Sãwũã kʼãwũã ne ũdu bʼidʼa?
20 Mawũãnaĩ zhibarirãbara panaʉ̃ mawũãsidʼa: Daibara kʼawua panʉã daira naʉ̃ zhibarirãta, naʉ̃ daʉbʼerrea tosia. 21 Mawũãmina sãwũã kʼãwũã ne ũdu bʼidʼara daibara kʼawuadʼa ẽã, miã daʉbʼerrea bʼʉta kʼaiba kʼãwũã ne ũdubi bʼidʼapʉra daibara kʼawuadʼa ẽã. Ya zõrã baera izhaa widʼiudua, ari izha nebʉrʉya.
22 Zhibarirãbara mawũãsidʼa judíorãta wawia panʉba, maʉ̃ẽnabemata judíorã ya krĩcha abʼarika zekuasia Jesús zhãrã Ẽdrʉbia abʉrʉra de zhi jʉrebada maẽ edʼa wãbidʼa ẽbaita. 23 Maʉ̃ kʼarea zhibarirãbara mawũãsidʼa: Ya zõrã baera izhaa widʼiudua.
24 Mawũẽ daʉbʼerrea bʼadʼara wakusa trʉ̃nape mawũãsidʼa: Daizeze kĩrãbita daia wãrãta jaradua. Daibara kʼawua bʼea kʼãʉ̃ kʼazhirua omiãta.
25 Mawũãnaĩ izhara panaʉ̃ mawũãsia: Kʼazhirua omiãbʉrʉ mʉãrã kʼawua ẽã. Awuarabʉrʉ mʉã kʼawua bʼʉra mʉrã daʉbʼerrea bʼadʼata ne ũdu bʼidʼa.
26 Mawũãĩ wakusa mawũãsidʼa: ¿Bʉra sãwũã osi? ¿Bʉra sãwũã ne ũdubi bʼidʼapʉ?
27 Mawũãnaĩ izhara panaʉ̃ mawũãsia: Mʉãrã ya marãã jarasia, mawũãmina marãbara ũrĩna ẽã. ¿Kʼãrẽã wakusa ũrĩ krĩña panʉ? ¿Marãbidʼa pẽwã krĩña panʉka?
28 Mawũãĩ ikʼazhirua jaradʼape mawũãsidʼa: Bʉabʉrʉ pẽwã bʼidʼa, mawũãmina daibara pẽwã bʼea Moiséta. 29 Daibara kʼawua bʼea Daizezera bedʼeasita Moiséa, mawũãmina kʼãʉ̃ẽnabema daibara kʼawuadʼa ẽã sãmaʉ̃ba ʉ̃tʉ zedʼara.
30 Mawũãnaĩ maʉ̃bara panaʉ̃ mawũãsia: Sakua mawũã marãbara sãmaʉ̃ba ʉ̃tʉ zedʼata kʼawuadʼa ẽpe, maʉ̃ne mʉrã ne ũdubi bʼidʼapʉa. 31 Kʼawua bʼea Daizezebara ũrĩ ẽãta kʼazhirua omiãrã bedʼeara, mawũãmina iabʼaʉba Daizezeta wawia bʼʉra, aramaʉ̃ne izha krĩñata obʼʉra, maʉ̃ bedʼeara ũrĩ bʼʉa. 32 Ũrĩnakʼa iabʼaʉba ne ũdubisia abʉdara iabʼa daʉbʼerrea todʼata. 33 Naʉ̃ta Daizezedʼeba ze ẽbasibʉrʉ miã kʼãrẽta obʼe ẽbakʼausia.
34 Mawũãĩ panaʉ̃ mawũãsidʼa: Bʉra jipadʼe kʼazhiruadʼe tosia. ¿Maʉ̃ta bʉabʉrʉ ũrãgʼaika daita?
Mawũãnape jarasidʼa de zhi jʉrebada maẽ wueta edʼa wã ẽbamarẽã.
Daizezedʼebema ũdu bʼedʼe bʼebara ũdudʼa ẽã
35 Jesúsbara ũrĩsia aramaʉ̃ne ãĩ kenabʼaribʉdata, mawũẽ ũdui mawũãsia: ¿Bʉara ĩjã bʼʉka Daizeze Warradʼebema?
36 Mawũãĩ izhara panaʉ̃ mawũãsia: ¿Nokʼó, maʉ̃ kʼaipe mʉã ĩjãĩta izhidʼebemata?
37 Mawũãĩ Jesúsbara mawũãsia: Maʉ̃ bʉara ũdu kʼobʼʉta mʉ bʉ ũme bedʼea kʼobʼʉta izhia.
38 Mawũãĩ izhara mawũãsia: Nokʼó, bʉdʼebema mʉãrã ĩjãbʉrʉa. Mawũãpe ibia jarasia.
39 Jesúsbara mawũãsia: Zhãrã kʼawua oi kʼarea mʉrã zesia naʉ̃ ẽjũãẽna. Aramaʉ̃ne Daizezedʼebema ũdu ẽã bʼebara ũdudʼamarẽã, waya ũdu bʼedʼe bʼebara ũdu ẽã bʼeamarẽã.
40 Fariseorãnebema ʉ̃kʉrʉ izhi bawara kʼopanʉba maʉ̃ta ũrĩbʉdadʼera mawũãsidʼa: ¿Mobera daisidʼa daʉbʼerrea duanuka?
41 Mawũãnaĩ Jesúsbara panaʉ̃ mawũãsia: Daizezedʼebemata ũdu ẽã bʼebʉrʉ kʼazhirua ne ẽã bʼeakʼausia. Mawũãmina ũdu bʼea abʼeba marãne kʼazhiruara ari nʉmʉã.
Ne jaradʼa ovejarã akʉbaridʼeba
10 Jesúsbara mawũãsia:
Mʉã wãrĩnu marãã jaraya: Ovejarãne kʼorrata nʉmʉ maẽ puertadʼe edʼa wãbʉrʉ ẽãrã, awuarabʉrʉ jãpe wãrĩze edʼa wãbʉrʉra nezrʉgamiã. 2 Mawũãmina puertadʼe edʼa wãbʉrʉra ovejarã akʉbaria. 3 Puerta jʉ̃ã bʼʉbara maʉ̃ edʼa wãmarẽã ewabaria, ovejarãbara izhi nemirã ũrĩkʼawua bʼea, izhi ovejarã trʉ̃ jara ãĩ jʉre edebaria. 4 Aramaʉ̃ne izhi ovejarã jõma ãĩ zebigape ãzhi naa wãbaria, mawũẽ ovejarã izhi kʼaidʼu wãbada izhi nemita ũrĩkʼawua bʼeba. 5 Mawũãmina ũdudʼakʼara pẽwãna ẽã, awuarabʉrʉ maʉ̃ kʼareara merũ wãẽba panʉã ũdudʼakʼa nemirã ũrĩnakʼaba.
6 Jesúsbara mawũã ne jarakʼasia, mawũãmina ãzhara kʼawuadʼa ẽbasia kʼãrẽta jara krĩñabʉrʉra.
Jesúra bigaua izhidʼerã akʉira
7 Mawũẽ Jesúsbara wakusa mawũãsia: Mʉã wãrĩnu marãã jaraya: Mʉta puerta ovejarãneã. 8 Jõma mʉ nawedʼa zedʼapeadʼara nezrʉgamiãta bʼea, mawũẽ ãzhi bedʼeara ũrĩna ẽbasia mʉrẽta bʼebara. 9 Mʉta puerta. Mʉneba edʼa wãbʉrʉra ẽdrʉya. Aramaʉ̃ne adu-a bʼaya mʉã bia erunʉmʉba. 10 Nezrʉgamiã zebaria nezrʉgaita, zhãrã beaita, zhãrã jõbiita. Mawũãmina mʉrã zesia Daizeze ũme bʼai jõ ẽãta adʼuba erubʼeamarẽã.
11 Mʉrã bigaua ovejarã akʉira. Ovejarã akʉita bigaura beubaria ovejarã kʼarea. 12 Mawũãmina pagʼa bʼʉkʼãrĩnata ovejarã akʉbari ẽãbara ovejarã izhidʼe ẽbaera usa pã zebʉrʉta ũdubʉrʉdʼera ovejarã ãmaẽkua wãẽba wãbaria, mawũẽ usa pãbara ovejarã kʼa jãrãzoabibaria. 13 Pagʼa bʼʉkʼãrĩnarã mawũã wãẽba wãbaria, plata kʼarea nʉmʉ baera sopua ẽã ovejarã kʼarea.
14 Mʉrã ovejarã akʉira bigaudʼeba ũdukʼawua bʼʉa mʉ ovejarã, mʉrẽta bʼebidʼa mʉrã ũdukʼawua bʼea. 15 Aramaʉ̃ kĩrãkʼa mʉ Zezebara mʉrã ũdukʼawua bʼʉa, mʉ Zezera mʉãbidʼa ũdukʼawua bʼʉa. Mʉrã beuya ovejarã kʼarea. 16 Mʉã dewara erubʼʉa ovejarã naʉ̃ kʼorradʼebema ẽãta. Maʉ̃rãsidʼa mʉãrã wei baraba maʉ̃rãbara mʉ bedʼeara ũrĩnaña. Aramaʉ̃ne ãba duaneña, ãzhi akʉbarira abʼa bʼaya. 17 Mʉ Zezebara mʉrã kʉãgʼa mʉrã beui baera wakusa piradrʉita. 18 Mʉrã miõba beadʼa ẽã, awuarabʉrʉ mʉrã mʉzhi biaba beuya. Mʉãrã erubʼʉa beui zareara, mʉãrã erubʼʉa wakusa piradrʉi zareara. Maʉ̃ta omarẽã jarasia mʉ Zezeba.
19 Judíorã wakusa krĩcha abʼarika zedʼa ẽbasia maʉ̃ bedʼeaba. 20 Ãzhirãnebema biobara mawũãsidʼa: Jaiba erunʉmʉba kĩrãne bʼʉ ẽã. ¿Maʉ̃ba izhi bedʼeara kʼãrẽã ũrĩnaĩpe?
21 Waya awʉrʉrãbara mawũãsidʼa:
Mawũãrã bedʼea ẽã jaiba erunʉmʉrã. ¿Jaibara ne ũdubiga bʼeika daʉbʼerrea bʼera?
Judíorãbara Jesús seribidʼa ẽbasia
22 Jerusalénne fiesta obʉdata Daizeze dedʼebemata osidʼa. Maʉ̃nerã kũrãsã ewari basia. 23 Daizeze dedʼa ewara maẽ Jesús tebasia Salomón abada maẽ. 24 Maʉ̃ne judíorãba bʉredrʉdʼape mawũãsidʼa: ¿Bʉara daira sõmbeedʼa bʉdʼebema bia kʼawuabiga ẽã erunʉmaĩpe? Bʉta zhãrã Ẽdrʉbibʉrʉ daia jipa jaradua.
25 Mawũãnaĩ Jesúsbara panaʉ̃ mawũãsia: Mʉrã maʉ̃ta mʉã marãã jarasimina marãbara ĩjãna ẽã. Mʉ Zezedʼeba mʉã kʼãrẽ onʉmʉba jipa kʼawuabi bʼʉa mʉrã maʉ̃ta. 26 Mawũãmina marãbara ĩjãna ẽã mʉrẽnebemata duanu ẽbaera mʉã marãã jaradʼa kĩrãkʼa. 27 Mʉ ovejarãbara mʉ bedʼeara ũrĩ bʼea, mʉãrã ãzhira ũdukʼawua bʼʉa, mʉrã aramaʉ̃ne pẽwã bʼea. 28 Mʉãrã dedʼekaya Daizeze ũme bʼai jõ ẽãta, mawũẽ aduadʼa ẽã, miõba jãrĩkua ẽã mʉ juwuadʼebara. 29 Mʉ Zezera ãzhita mʉãã diadʼara jõmaʉ̃ audre zhi zroma, mawũẽ miõba jãrĩkua ẽã mʉ Zeze juwuadʼebara. 30 Mʉrã mʉ Zeze ũme abʼaʉta panʉã.
31 Mawũãbʉrʉ kʼarea judíorãbara wakusa mongʼarata jirakua edasidʼa tabʼari beadʼaita. 32 Mawũẽ Jesúsbara mawũãsia: Mʉãrã mʉ Zezedʼeba biata bio onʉmʉta marãã ũdubiga nʉmʉã. ¿Mawũẽ maʉ̃rãnebema sãʉ̃ kʼarea mʉrã mongʼaraba tabʼaridʼaipe?
33 Mawũãĩ judíorãbara panaʉ̃ mawũãsidʼa: Bʉa biata obʼʉ kʼarea mongʼaraba tabʼaridʼaita kʼopanʉ ẽã, awuarabʉrʉ tabʼaridʼaya Daizezema mitia bedʼea bʼʉdʼeba, aramaʉ̃ne bʉra beubari bʼʉta Daizezea abʼʉa.
34 Mawũãnaĩ Jesúsbara panaʉ̃ mawũãsia: ¿Marã ũrãgʼata bʼʉ tabʼʉdʼera Daizezebara mawũãsi ẽka: Mʉã zhi jarama marã dai zezerãta? 35 Mawũã dai zezerãta jarasia izha bedʼeata jarakʼadʼata, maʉ̃ta zhi bʼʉmarã mawũã ẽã abʼedʼa ẽã. 36 ¿Maʉ̃ne mʉrã mʉ Zezeba jʉrʉpe naʉ̃ ẽjũãẽna zokʼadʼata, marãbara bʉra Daizezema mitia bedʼeabʉrʉa abʉda ẽka, bari mʉã jarabʉrʉdʼeba mʉrã Daizeze Warrata? 37 Mʉ Zezeba obʼʉta mʉã o ẽbʉrʉ, mʉã jara nʉmʉrã ĩjãrãũdua. 38 Mawũãmina mʉã onʉmʉbʉrʉ, mʉã jara nʉmʉta ĩjãna ẽãsidʼa, maʉ̃ mʉã onʉmʉta ĩjãũdua, aramaʉ̃ne kʼawuadʼaya mʉ Zezera mʉne bʼʉta, mʉrã mʉ Zezedʼe bʼʉta.
39 Mawũãbʉrʉ kʼarea wakusa jida krĩñasidʼa, mawũãmina Jesús ẽdrʉsia ãzhi juwuadʼebara.
40 Mobe wakusa wãsia Jordán do kĩrãrẽ, naara Juanba zhãrã buru kʼoe bʼadʼaidʼu, mobe bʼesia mama. 41 Maʉ̃nerã bio izhima ze nʉmʉbara mawũã duanasia: Ũdudʼakʼara Juanbara o ẽbasia, mawũãmina naʉ̃ Jesúsdʼebemata Juanba jaradʼara jõma wãrĩnu basia.
42 Aramaʉ̃ne Jesúsdʼebema mama bioba ĩjãsidʼa.
Lázaro beudʼa
11 Lázaro abadata kʼaya nʉmʉta Betania pʉwʉrʉdʼebema basia, zhi nawekʼaurãsidʼa Maríata, Marta ũme maʉ̃ pʉwʉrʉdʼebema basia. 2 Maʉ̃ Maríara Lázaro kʼaya nʉmʉ nawekʼaubara tẽãne kerata Jesús jẽrũne ʉ̃rʉ̃ weape izhi budʼaba põãsã jaresia. 3 Zhi nawekʼaurãbara bedʼeata jarabuesidʼa Jesúa mawũãnamarẽã: Nokʼó, bʉa kʉãgʼara kʼaya nʉmʉã.
4 Jesúsbara maʉ̃ta ũrĩpe mawũãsia: Maʉ̃ mawũã kʼaya nʉmʉrã bari beuidʼebema ẽã, awuarabʉrʉ Daizeze zhi zromata kʼawuadʼaidʼebema, mʉ Daizeze Warrata zhi zromata kʼawuadʼaidʼebema.
5 Martara, Maríara, Lázarora Jesúsbara kʉãgʼa basia. 6 Lázaro kʼaya nʉmʉta ũrĩbʉrʉdʼera wadʼi ewari ũme bʼesia izhi bʼadʼa maẽ. 7 Mobe maʉ̃ tẽã izha jʉrʉkuadʼaa mawũãsia: Wakusa wãdrʉ Judea druaedʼa.
8 Mawũãĩ izha jʉrʉkuadʼabara mawũãsidʼa: Miã Ũrãgʼabari, dããrã ba ẽã judíorãba bʉra mongʼaraba tabʼaridʼai badʼapeadʼara. ¿Maʉ̃ta wakusa maĩnu wãĩka?
9 Mawũãnaĩ Jesúsbara panaʉ̃ mawũãsia:
¿Ewarira doce hora ʉ̃na nʉmʉ ẽka? Ewaridʼe nimirã tenedrʉ ẽã ẽjũã ʉ̃nata ũdu bʼʉba. 10 Mawũãmina diamase nimirã tenedrʉya ʉ̃na nʉmʉ ẽãba.
11 Mawũãpe mawũãsia: Dazhirã bawara zhibiara Lázaro kʼãĩ nʉmʉã, mawũãmina mʉrã wãña ʉ̃rʉ̃mane.
12 Mawũãĩ izha jʉrʉkuadʼabara mawũãsidʼa: Nokʼó, mawũã kʼãĩ nʉmʉbʉrʉ bʼeya.
13 Mawũã jarabʉrʉbara Jesúsbara jara krĩñasia Lázaro beusita, mawũãmina ãzhara krĩchasidʼa jarabʉrʉta ẽnaʉ̃ kʼãĩ nʉmʉta. 14 Mawũẽ Jesúsbara jipa jara mawũãsia: Lázaro beusia. 15 Mʉrã marã kʼarea sobia bʼʉta mama bʼa ẽbadʼaba marãbara mʉnebema audre ĩjãnaña, mawũẽ wãnaña izhima.
16 Mobebʉrʉ Tomás Memerã abadabara dewaraurã Jesúsba jʉrʉkuadʼaa mawũãsia: Dazhirãsidʼa wãnaña izhi bawara beudʼe.
Jesúsbara beudʼara piradrʉbiya
17 Jesús zebʉrʉdʼera Lázaro wuagʼadʼapeadʼara ya ewari kĩmarẽ nʉmasia. 18 Betania pʉwʉrʉra bʼasia Jerusalén kʼaita, zhi wawarata bʼasia kilómetro ũbea. 19 Judíorã bio zesidʼa Martama, Maríama, aramaʉ̃ne kʼopayadʼaita ãzhi mebeata beusi baera. 20 Martabara Jesús uruta ũrĩbʉrʉdʼera kĩrãzhu wãsia, mawũãmina Maríara bʼesia dedʼa. 21 Martabara Jesúa mawũãsia: Nokʼó, bʉta nama bʼasibʉrʉ mʉ nawewaura beu ẽbakʼausia. 22 Mawũãmina mʉãrã kʼawua bʼʉa jõma bʉa Daizezea widʼibʉrʉra izhara aribʼaeya.
23 Mawũãĩ Jesúsbara mawũãsia: Bʉ nawewaura beudʼata piradrʉya.
24 Mawũãĩ Martabara mawũãsia: Mʉãrã kʼawua bʼʉa beudʼata piradrʉita beudʼapeadʼata piradrʉbʉdadʼe ewari jõbʉrʉdʼe.
25 Mawũãĩ Jesúsbara mawũãsia: Beudʼara mʉã piradrʉbipe Daizeze ũme bʼai jõ ẽã bʼabiya. Mʉnebemata ĩjã bʼʉra beubʉrʉsidʼa zokʼai bʼaya. 26 Zokʼai bʼeba mʉnebemata ĩjã bʼera jipa beu ẽã. ¿Maʉ̃ bʉara ĩjãĩka?
27 Mawũãĩ izhara mawũãsia: Ããjã Nokʼó, mʉãrã ĩjã bʼʉa bʉra zhãrã Ẽdrʉbita Daizeze Warrata zesia naʉ̃ ẽjũãẽna.
Jesús jẽgadʼa Lázaro wuagʼadʼapeadʼa maẽ
28 Mawũãpe Martabara zhi mebea María trʉ̃ne wãpe chupea mawũãsia: Miã Ũrãgʼabarira nama bʼʉa, bʉta trʉ̃ kʼobʼʉa.
29 Maríabara maʉ̃ta ũrĩpe ĩñabasia piradrʉpe zesia Jesúsma. 30 Jesús wadʼi pʉwʉrʉdʼe edʼa ze ẽbasia, awuarabʉrʉ bʼasia Martaba ũdudʼa maẽ. 31 Dedʼa judíorã María kʼopaya bʼebara María ĩñabasia piradrʉpe wãbʉrʉta ũdudʼai, kʼaidʼu wãbʉdata mawũãsidʼa: Zhi mebea wuagʼadʼapeadʼaidʼu jẽgadʼe wã.
32 María Jesús kʼobʼʉ maẽ zebʉrʉdʼe ũdui, izhi jẽrũ kʼaita sãkʼokʼodʼe kʼobʼepe mawũãsia: Nokʼó, bʉta nama bʼasibʉrʉ mʉ nawewaura beu ẽbakʼausia.
33 Jesúsbara María jẽga bʼʉta ũdubʉrʉdʼe, judíorã izhi kʼopaya bʼesidʼa jẽga kʼobʼeta ũdui kʼãbãẽã sopuasia. 34 Mawũẽ mawũãsia: ¿Sãma wuagʼasidʼa?
Mawũãĩ mawũãsidʼa: Nokʼó, akʉdʼe zerua.
35 Jesús jẽgasia. 36 Mawũẽ judíorãbara mawũãsidʼa: Akaudua sãwũã kʉãgʼa basita.
37 Maʉ̃rã ʉ̃kʉrʉbara mawũãsidʼa: ¿Naʉ̃bara daʉbʼerrea bʼʉta ne ũdubidʼara, Lázarosidʼa beubi ẽbaidʼe bʼasi ẽka?
Beudʼata piradrʉdʼa Lázaro
38 Jesús wakusa kʼãbãẽã sopua zesia Lázaro wuagʼadʼapeadʼa maẽ. Mama zobʼeata nʉmʉta mongʼara zromaba tapa nʉmasia. 39 Mawũẽ Jesúsbara mawũãsia: Mongʼara ãĩ edaudua.
Maʉ̃ne Marta zhi beudʼa nawekʼaubara mawũãsia: Nokʼó, ya ʉ̃siasia ewari kĩmarẽ basi baera.
40 Mawũãĩ Jesúsbara mawũãsia: ¿Mʉã bʉaa jarasi ẽka bʉa mʉnebemata ĩjãrã ũduita zarea Daizezedʼera?
41 Mobebʉrʉ beudʼata bʼʉdʼapeadʼa maẽbara mongʼara ãĩ edasidʼa. Mawũẽ Jesúsbara ʉ̃taa akʉ mawũãsia: Zeze, mʉã bʉaa zhibia jiya mʉã widʼidʼara bʉa ũrĩbʉrʉba. 42 Mʉãrã kʼawua bʼʉa bʉara mʉ bedʼeara baridua ũrĩ bʼʉta, mawũãmina mʉrã mawũã bedʼeabʉrʉa kʼabanata za kʼobʼe kʼarea, aramaʉ̃ne ĩjãnamarẽã mʉrã bʉa zokʼadʼata.
43 Mawũãpe nemi jĩgua mawũãsia: ¡Lázaro ãĩ zerua!
44 Mawũãĩ beudʼara ãĩ zesia, juwuata jẽrũta bʉra chubʼasia wuaba, kĩrãsidʼa bʉra chubʼasia pañueloba.
Mawũẽ Jesúsbara mawũãsia: Ẽnaʉ̃dua tebamarẽã.
Krĩcha jʉrʉdʼapeadʼa beadʼaita Jesús
(Mateo 26:1-5; Marcos 14:1-2; Lucas 22:1-2)
45 Mobebʉrʉ judíorã bio María kʼopayadʼaita zedʼapeadʼabara Jesúsba mawũã obʉrʉta ũdudʼape ĩjãsidʼa izhidʼebemata. 46 Mawũãmina maʉ̃rãnebema ʉ̃kʉrʉra fariseorãma wãpe jarasidʼa Jesúsba mawũã obʉrʉta. 47 Mawũẽ sacerdoterã nokʼorãbara, fariseorãbara, nokʼorã wagʼaurãta ãba jʉredʼape mawũãsidʼa: ¿Kʼãrẽta odʼaipe? Jesúsbara bio onʉmʉã ũdudʼakʼata. 48 Kʼãwũã idaribidʼara izhidʼebemata jõmaʉ̃ba ĩjãnaña, kʼãwũãrã Roma bidʼarãta zedʼape Daizeze de dazhirãnerã ãrĩnaña, dazhirãsidʼa beakuadʼaya.
49 Mawũãnaĩ ãzhirãnebema abʼa Caifás maʉ̃ añone sacerdote wagʼauta bʼʉba mawũãsia: Marãbara miã kʼãrẽta kʼawuadʼa ẽã. 50 Miã marãbara kʼawuadʼa ẽã ũmakĩrã abʼa jõmaʉ̃bari beuita audre bigata, Roma bidʼarãba judíorã jõma beadʼai kʼãñabara.
51 Mawũãbʉrʉra izhikusauba mawũã ẽbasia, awuarabʉrʉ maʉ̃ añone izhita sacerdote wagʼauta bʼʉ baera Daizezedʼeba mawũãsia Jesús beuita judíorã jõmaʉ̃bari. 52 Bari judíorãbari beuita ẽã, awuarabʉrʉ beuita Daizeze warrarã abʼa nʉmʉĩta druaza bʼeta. 53 Aramaʉ̃ne maʉ̃ ewadeba krĩchasidʼa Jesús beadʼaita.
54 Maʉ̃ kʼarea judíorãne edʼara Jesús ya dajada nimiba ẽbasia, awuarabʉrʉ mamaʉ̃bara wãsia drua drudrua tabʼʉ kʼaita, pʉwʉrʉta Efraín abadaidʼu wãsia, mobe mama bʼesia izha jʉrʉkuadʼa bawara.
55 Kʼaita bata nʉmasia Egiptodʼeba ẽzoadʼata krĩcha fiesta obadata judíorãba, mawũẽ fiesta nawedʼa bio wãrĩzesidʼa Jerusalén pʉwʉrʉedʼa, Daizeze kĩrãbita nene ẽã kʼobʼaidʼebemata odʼai kʼarea. 56 Zhãrãbara Jesús jʉrʉ bʼeta Daizeze dedʼa ewara maẽ ãzhirãĩnu mawũãsidʼa: ¿Marãma sãwũãpe? ¿Fiesta badʼera zeibʉka?
57 Sacerdoterã nokʼorãbara, fariseorãbara jarasidʼa iabʼaʉba sãma bʼʉta kʼawuara jaramarẽã jidadʼaita.
Jesús jẽrũne kerata weadʼapeadʼa
(Mateo 26:6-13; Marcos 14:3-9)
12 Egiptodʼeba ẽzoadʼata krĩcha fiesta obadata ewari seis wãẽã nʉmʉne, Jesús Betania pʉwʉrʉedʼa zesia Lázaro bʼʉ maẽ, maʉ̃ beudʼata izha piradrʉbidʼa basia. 2 Mama Jesúita zhiko osidʼa, Martaba ne jedʼekasia, Lázaro jewedʼa kʼobʼasia zhãrã Jesús bawara nekʼo duanune edʼa. 3 Maríabara kera nardo izhiawa kiruta botelladʼe nʉmʉta ne ʉ̃tʉta jiraedape weasia Jesús jẽrũne, mobe izhi budʼaba põãsã jaresia, aramaʉ̃ne dera jõma tũã nʉmesia keraba. 4 Maʉ̃ne Jesúsba jʉrʉkuadʼata abʼa Juda Iscariote Simón warraba Jesús chãbʼariita bʼʉba mawũãsia: 5 ¿Naʉ̃ kera kʼãrẽã nendo ẽbasi, ewari treciento trajadʼabari nendoidʼe bʼasi ẽka denario trecientobari, mobe platara diaidʼe bʼasi ẽka zuburia bʼea?
6 Judabara mawũã ẽbasia zuburia bʼeta krĩcha bʼʉba, awuarabʉrʉ mawũãsia nezrʉgamiãta bʼʉ baera. Zũbita izha erubʼʉba zrʉga bʼasia ãzhi jõmaʉ̃ĩta plata edʼa kenabʼari panʉnebemata. 7 Mawũẽ Jesúsbara mawũãsia: Idaribirua, Maríabara mʉ wuagʼa bʼʉdʼai ewariita wuagʼa erubʼasia naʉ̃ kerara. 8 Zuburia bʼera marã bawara ewariza bʼeaya, mawũãmina mʉrã marã bawara ewariza bʼa ẽã.
Krĩcha jʉrʉdʼapeadʼa beadʼaita Lázaro
9 Judíorãbara kʼabanaba kʼawuasidʼa Jesús Betania pʉwʉrʉdʼe bʼʉta, mawũẽ maĩnu zesidʼa, bari Jesús akʉdʼe zedʼa ẽbasia, awuarabʉrʉ Lázarosidʼa akʉdʼe zesidʼa, beudʼata Jesúsba piradrʉbidʼata. 10 Mawũẽ sacerdoterã nokʼorãbara krĩchasidʼa beadʼaita Lázarosidʼa. 11 Maʉ̃ẽnabema Lázarodʼeba judíorã bioba ãzhira kenabʼarisidʼa, mobe ĩjãsidʼa Jesúsdʼebemata.
Jesús edʼa wãna Jerusalénne
(Mateo 21:1-11; Marcos 11:1-11; Lucas 19:28-40)
12 Jerusalén pʉwʉrʉedʼa kʼabanata fiesta badʼe zedʼapeadʼabara nrũẽmane ũrĩsidʼa Jesúsidʼa uruta. 13 Mawũẽ pãrãrã kiduata tʉdʼape kĩrãzhu wãsidʼa, maʉ̃nerã nemi jĩgua mawũãsidʼa:
¡Daizezera ibia jaradʼaya!
¡Ibia jaradʼaya Daizezedʼeba zebʉrʉra, izhira Rey Israel bʼedʼea!*
14 Jesúsbara burro kũrãta ũdupe ʉ̃rʉ̃ bʼarisia, maʉ̃ẽnabemata zhi bʼʉmata mawũã bʼʉa:
15 Perarãũdua marã Jerusalénne bʼera, marã Reyra urua, burro kũrãne ʉ̃rʉ̃ bʼari urua.*
16 Izha jʉrʉkuadʼabara maʉ̃ naarara sãwũãrã kʼawuadʼa ẽbasia, mawũãmina Jesús ʉ̃taa wãna tẽãne bude basidʼa maʉ̃ izhi ʉ̃rʉ̃bemata bʼʉ tabʼedʼe odʼapeadʼata. 17 Zhãrã Jesús bawara kʼobʼeadʼabara awʉrʉa nebʉrʉsidʼa Lázaro trʉ̃bʉrʉdʼera beudʼata piradrʉbidʼata. 18 Maʉ̃ kʼarea zhãrãbara Jesús kĩrãzhu zesidʼa, ũrĩsidʼa baera izha odʼata maʉ̃ ũdudʼakʼata. 19 Mawũãmina fariseorãbara ãzhirãĩnu mawũãsidʼa: Marãba akʉ bʼe kĩrãkʼara dazhirãbara miã kʼãrẽta obʼedʼa ẽã. Akaudua sãwũã jõmaʉ̃ba pẽwã duaĩnata.
Griegorã ʉ̃kʉrʉba jʉrʉdʼapeadʼa Jesús
20 Ʉ̃kʉrʉ griegorãta duanasia Jerusalén pʉwʉrʉedʼa wãrĩzekuadʼara Daizeze ibia jaradʼaita fiestadʼe. 21 Maʉ̃rãbara Felipeta orrasidʼa, Felipera Betsaida pʉwʉrʉdʼebema basia, maʉ̃ pʉwʉrʉra Galilea druadʼebema, mawũã orradʼape zuburia bedʼea mawũãsidʼa: Daibara ũdu krĩña panʉã Jesústa.
22 Felipera wãpe jarasia Andrea, aramaʉ̃ne Andrésba Felipe ũmeba jarasidʼa Jesúa. 23 Mawũẽ Jesúsbara panaʉ̃ mawũãsia: Ewarira arabasia mʉ Beubari Bape bʼʉra beudʼata piradrʉpe ʉ̃taa wãĩta. 24 Mʉã wãrĩnu marãã jaraya, trigo ta egorodʼe ubudata pãwãrãĩta beu ẽbʉrʉ abʼabai bʼaya, mawũãmina pãwãrãĩta beura, waripe bio zauya. 25 Bʼa krĩñaba mʉ kʼarea beu ẽãrã aduaya, mawũãmina naʉ̃ ẽjũãne bʼa krĩña ẽkĩrãkʼa mʉ kʼarea beubʉrʉra Daizeze ũme bʼai jõ ẽã bʼaya. 26 Iabʼaʉba mʉ bedʼeata aribʼae nʉmʉbara mʉta pẽwãdua, mawũãrã mʉ bʼʉ maẽ bʼaya mʉ bedʼeata aribʼae bʼʉra. Iabʼaʉba mʉ bedʼeata aribʼae bʼʉra mʉ Zezebara bia edaya.
Jesúsba jaradʼa izhi beuita
27 Mʉrã sopua kʼobʼʉa. ¿Mʉãrã kʼasia aipe? ¿Zeze mʉrã kʼarebarua, mʉrã zuburiabirãrũã aika? Mawũãmina mʉrã zesia maʉ̃ kʼarea. 28 Mawũẽ mʉãrã mawũãña: Zeze, bʉra zhi zromata ũdukʼawabigarua.
Maʉ̃ne Daizeze ʉ̃treba bedʼeabʉrʉta mawũãsia: Mʉrã zhi zromata ũdukʼawabiga bʼʉta mʉãrã wakusa ũdukʼawabigaya. 29 Kʼabanata mama kʼobʼebara maʉ̃ bedʼeata ũrĩbʉdadʼera jarasidʼa bata. Waya awʉrʉrãbara mawũãsidʼa: Ángelta Jesúa bedʼeabʉrʉa.
30 Mawũãnaĩ Jesúsbara mawũãsia: Mawũã bedʼeabʉrʉra mʉĩtabema ẽã, awuarabʉrʉ marãĩtabema. 31 Arababʉrʉa Daizezebara kʼawua okuaita naʉ̃ ẽjũãne bʼera, arababʉrʉa ãtõmiã naʉ̃ ẽjũãne nokʼota bʼʉra Daizezebara ãĩ jʉretaita. 32 Mʉta druadʼe cruzdʼe jirabʼʉdʼai mʉãrã jõmaʉ̃ã ĩjãbigaya mʉnebemata.
33 Mawũã jarabʉrʉbara Jesúsbara jara krĩñasia sãwũã beuita. 34 Zhãrãbara mawũãsidʼa: Daiba ũrĩbadara ũrãgʼadʼera jara bʼʉa zhãrã Ẽdrʉbira beukʼata. ¿Maʉ̃ta bʉara sãwũã Beubari Bape bʼʉra cruzdʼe jirabʼʉdʼaya abʉrʉ? ¿Mobera kʼaipe maʉ̃ Beubari Bape bʼʉra?
35 Mawũãnaĩ Jesúsbara mawũãsia: Wadʼi ewari kʼakutua mʉta ʉ̃nata marãne edʼa bʼʉa. Mʉ ũme nimibaudua wadʼi eruduanuwedʼa mʉta ʉ̃nata, mawũãrã marãĩtara keubʉrʉ kĩrãkʼa toto ẽbaya, pãrĩguadʼe nimibara kʼawua ẽã sãmaã wãrã. 36 Ʉ̃nata eruduanuwedʼa ĩjãũdua ʉ̃nanebemata, aramaʉ̃ne bʼeaita ʉ̃na warrarãta.
Jesúsbara maʉ̃ta jarape wãpe merũsia zhãrã kʼarea.
Ĩjã ẽã nʉmeãna judíorãbara
37 Jesúsbara ũdudʼakʼata ãzhi kĩrãbita okuasiidʼu ĩjãna ẽbasia izhidʼebema. 38 Aramaʉ̃ne arimaẽ berabʼarisia Daizezeba bedʼeata jarabibariba Isaíaba mawũãnata:
Nokʼó, ¿kʼaiba ĩjãbʉrʉ bedʼeata dazha jarabʉdara? ¿Kʼaiba kʼawuabʉrʉ bʉra zhi zromata?*
39 Maʉ̃neba ĩjã bʼedʼa ẽbasia, maʉ̃ẽnabemata Isaíabara dewara mawũãsia:
40 Daizezebara mawũãsia: Ĩjãna ẽãba mʉãrã ãnatʉsia ãzhi dabʉra, zarea duanusia ãzhi sora, aramaʉ̃nerã ũdudʼa ẽã dabʉbara, sãwũãta kʼawuadʼa ẽã sobara, miã kʼazhiruara ãmape mʉ pẽwãna ẽã mʉã ẽdrʉbigaira.* 41 Isaíabara maʉ̃ta jarasia kʼãĩmokʼaradʼe kĩrãkʼa ũdudʼaba Jesús zhi zromata bʼaita, mawũẽ jarasia izhidʼebemata.
42 Isaíaba mawũã jarasimina judíorãta nokʼorãbara bioba ĩjãsidʼa Jesúsdʼebema. Mawũãmina ĩjã bʼea adʼa ẽbasia wawia bʼeba fariseorãta, aramaʉ̃ne edʼa wãbi ẽã nʉmʉna ẽbamarẽã de zhi jʉrebada maẽ. 43 Aramaʉ̃ne zhãrãba bia jaraita krĩña bʼeasia Daizezea bia jarabidʼai kʼãñabara.
Jesús bedʼeaba kʼawua oya zhãrã bʼera
44 Jesúsbara nemi jĩgua mawũãsia: Mʉnebemata ĩjã bʼʉra bari mʉnebemata ĩjã bʼʉ ẽã, awuarabʉrʉ ĩjã bʼʉa mʉ zokʼadʼadʼebemata. 45 Mʉta ũdu bʼʉbara ũdu bʼʉa mʉ zokʼadʼata. 46 Mʉta ʉ̃nata zesia naʉ̃ ẽjũãẽna, mʉnebema ĩjãbʉdara pãrĩguadʼe bʼea ẽbamarẽã. 47 Mʉ bedʼeata ũrĩpe aribʼae ẽãrã mʉãrã kʼawua o ẽã, mʉrã zhãrã kʼawua oita ze ẽbasi baera naʉ̃ ẽjũãẽna, awuarabʉrʉ mʉrã zesia zhãrã ẽdrʉbigaita ẽjũãne bʼeta. 48 Mʉta seribi ẽãba mʉ bedʼeata ĩjã ẽãbara erubʼʉa kʼaiba pua kʼawua oira, bedʼeata mʉã jara nʉmʉba maʉ̃neba Daizezeba kʼawua oya ewari jõbʉrʉdʼe. 49 Mʉrã bedʼea nʉmʉ ẽã mʉzhikusauba, awuarabʉrʉ mʉ Zeze mʉ zokʼadʼaba jarasia kʼãrẽ jarai bʼʉra sãwũã jaraita. 50 Mʉãrã kʼawua bʼʉa izha mʉãã jarabi nʉmʉrã izhi ũme bʼai jõ ẽãnebema. Mawũẽ mʉã jara nʉmʉrã jara nʉmʉã mʉ Zezeba mʉãã jaradʼadʼe.
Jesúsba jẽrũ sʉgʉkuadʼa izha jʉrʉkuadʼata
13 Egiptodʼeba ẽzoadʼata krĩcha fiesta obada nawedʼa, Jesúsbara kʼawua bʼasia ewari arabata naʉ̃ ẽjũãnebara zhi Zezema wãĩta, izhi pẽwã bʼeta naʉ̃ ẽjũãne bʼera kʉãgʼaba kʉãgʼasia druadʼe bʼʉ ewarita jõbʉrʉidʼu. 2 Dauja zhiko kʼobʉdadʼera ãtõmiãbara Simón warra Juda Iscariotera sodʼera ya krĩchabisia Jesús chãbʼaribiita. 3 Jesúsbara kʼawua bʼasia zhi Zezebara ne jõma izhaa chãbʼaridʼata, kʼawua bʼasia izhira Daizeze maẽba zedʼadʼeba Daizezema wãĩta. 4 Maʉ̃ba nekʼo kʼobʼedʼe Jesús piradrʉpe wua ãnebʼari bʼʉta wẽãpe toallata jiraedape tãjʉ̃ kʼobʼʉsia kʉrrʉdʼe. 5 Mobebʉrʉ poncheradʼe baniãta weape izha jʉrʉkuadʼata jẽrũ sʉgʉkua põãsã jaresia toalla kʉrrʉdʼe tãjʉ̃naba. 6 Aramaʉ̃ne Pedroidʼu babʉrʉdʼera maʉ̃bara mawũãsia: ¿Nokʼó, bʉa sʉgʉika mʉ jẽrũta?
7 Mawũãĩ Jesúsbara panaʉ̃ mawũãsia: Mʉã obʉrʉra kʼãwũãwedʼara bʉara sãwũãta kʼawua ẽã, mawũãmina tẽãne kʼawuaya.
8 Mawũãĩ Pedrobara mawũãsia: Bʉara sʉgʉ ẽã mʉ jẽrũrã.
Mawũãĩ Jesúsbara panaʉ̃ mawũãsia: Mʉã bʉ jẽrũta sʉgʉ ẽbʉrʉ, bʉra mʉnebema ẽã.
9 Mawũãĩ Simón Pedrobara mawũãsia: Mobera Nokʼó, bari mʉ jẽrũta ẽã, awuarabʉrʉ mʉrã sʉgʉ bʼʉdua juwuata buruta.
10 Mawũãĩ Jesúsbara mawũãsia: Kuidʼara jaigu ẽãba jẽrũtrʉ sʉgʉidʼe bʼʉa jõma nene ẽãba. Marã jaigu ẽã bʼea, mawũãmina jõma ẽã.
11 Jesúsbara kʼawua bʼasia izhira kʼaiba chãbʼariita, maʉ̃ba mawũãsia: Marã jõma nene ẽã duanu ẽã.
12 Mawũã jẽrũ sʉgʉkuape wakusa izhi wuata ãnebʼaripe wakusa jewedʼasia mesa maẽ, mobe mawũãsia: ¿Marãbara sãwũãta kʼawuabʉdakʼa mʉã marã kʼãwũã obʉrʉdʼebema? 13 Marãbara mʉrã jara bʼea Miã Ũrãgʼabarita, Nokʼota, mawũã jaradʼaira biga mʉrã maʉ̃ baera. 14 Mʉta Nokʼota Miã Ũrãgʼabarita bʼʉba marã jẽrũta sʉgʉbʉrʉba, marãsidʼa abʼarika jẽrũ sʉgʉdʼaibara zhiya. 15 Mʉãrã marã kʼãwũã obʉrʉa marãbidʼa abʼarika odʼamarẽã. 16 Mʉã wãrĩnu marãã jaraya: Nezokʼara audre zhi zroma ẽã izhi nokʼo kʼãñabara, miã zokʼabuebʉdara audre zhi zroma ẽã izhi zokʼabuebʉrʉ kʼãñabara. 17 Maʉ̃ta sãwũãta kʼawuadʼara Daizezebara sobia bʼeabiya aribʼaedʼara.
18 Mʉãrã marã jõma jara kʼobʼʉ ẽã, mʉãrã kʼawua bʼʉa kʼairãta jʉrʉkuadʼata. Mawũãmina arimaẽ berabʼarii barata zhi bʼʉmata mawũã bʼʉa: Mʉ ũme nekʼo bʼʉra mʉ ʉ̃rʉ̃ baya. 19 Mʉãrã maʉ̃ta nawedʼa marãã jarabʉrʉa, mawũã berabʼaribʉrʉdʼera ĩjãnamarẽã Mʉrã Mʉta. 20 Mʉã wãrĩnu marãã jaraya: Mʉã zokʼabʉrʉta bia edabʉrʉra mʉta bia edabʉrʉa, mʉ Zeze mʉ zokʼadʼata bia edabʉrʉa.
Jesúsba jaradʼa izhi chãbʼariita Judaba
(Mateo 26:20-25; Marcos 14:17-21; Lucas 22:21-23)
21 Jesúsbara maʉ̃ta jarape kʼãbãẽã sopua mawũãsia: Mʉã wãrĩnu marãã jaraya, marãnebema abʼaʉba mʉrã chãbʼariya.
22 Mawũãĩ izha jʉrʉkuadʼara ãzhirãĩnu zhiya akʉsidʼa kʼaita jara kʼobʼʉta kʼawuadʼa ẽãba. 23 Izha jʉrʉkuadʼata abʼa Jesúsba kʉãgʼata kʼobʼasia Jesús kʼaita. 24 Mawũẽ Pedrobara maʉ̃ã juwuaba jarasia widʼimarẽã kʼaita jara kʼobʼʉta. 25 Mawũẽ maʉ̃bara Jesústa audre kʼaita orrape mawũãsia: Nokʼó, ¿bʉ mawũã oira kʼaipe?
26 Mawũãĩ Jesúsbara panaʉ̃ mawũãsia: Mʉã panta sõmberape diataya, maʉ̃ta izhia. Mawũãpe pan sõmberape Juda Iscariotea diasia Simón warraa. 27 Maʉ̃ta kʼobʉrʉdʼera ãtõmiã edʼa izhidʼe wãsia. Mawũẽ Jesúsbara mawũãsia: Bʉzha oira ĩñabasia odua.
28 Mawũãmina nekʼo duanubara miõba kʼawuadʼa ẽbasia kʼãrẽã mawũãbʉrʉra. 29 Ʉ̃kʉrʉbara krĩchasidʼa Judabara zũbi plata atauta erubʼʉba Jesúsbara mawũãsita: Edarua dazhirãba fiestadʼe nesidʼara, o mawũãsi ẽbʉrʉ jarasita kʼãrẽ diamarẽã zuburia bʼea. 30 Judabara pan kʼope aramaʉ̃ta wãsia. Maʉ̃nerã ya diamase nʉmasia.
Aribʼaeita zhiwidʼia
31 Juda wãbʉrʉdʼera Jesúsbara mawũãsia: Kʼõbebʉrʉ Daizezebara zhi zromata ũdukʼawabigaya mʉ Beubari Bape bʼʉra, izhi Daizezesidʼa zhi zromata ũdukʼawabigaya mʉneba. 32 Daizezeba izhira zhi zromata mʉneba ũdukʼawabigabʉrʉdʼera, Daizezebara abʼarika ũdukʼawabigaya mʉrã zhi zromata, dããrã ẽãne mawũã oya. 33 Warrarã, mʉrã marã bawara kʼobʼaya aritiaedʼa. Marãbara mʉrã jʉrʉdʼaya, mawũãmina judíorãã mʉã jaradʼa kĩrãkʼa mʉã marãã jaraya: Mʉ wãĩma marã wã bʼedʼa ẽã. 34 Aribʼaeita zhiwidʼita mʉã marãã jaraya: Zhiya kʉãgʼaudua, mʉã marãta kʉãgʼa bʼʉ kĩrãkʼa. 35 Mawũãtrʉ jõmaʉ̃ba kʼawuadʼaya marã mʉ pẽwã bʼeta, zhiya kʉãgʼa bʼebʉrʉ.
Jesúsba jaradʼa Pedroba ũdukʼa aita
(Mateo 26:31-35; Marcos 14:27-31; Lucas 22:31-34)
36 Pedrobara Jesúa mawũãsia: Nokʼó, ¿bʉra sãmaã wãĩpe?
Mawũãĩ Jesúsbara panaʉ̃ mawũãsia: Mʉ wãĩma kʼãwũãwedʼara bʉra mʉ kʼaidʼura wã bʼe ẽã, mawũãmina mʉ kʼaidʼu zeya tẽã.
37 Mawũãĩ Pedrobara mawũãsia: Nokʼó, ¿mʉrã kʼãrẽneba kʼãwũãwedʼara bʉ kʼaidʼu wã bʼe ẽpe? Mʉrã bʉ kʼarea beuya.
38 Mawũãĩ Jesúsbara panaʉ̃ mawũãsia: ¿Bʉta beuika mʉ kʼarea? Mʉã wãrĩnu bʉaa jaraya: Gallora beru ẽã bʉa mʉta ũdukʼata jarama ũbea jara ẽwedʼara.
Jesústa oa wãĩta Daizezema
14 Sopuarãũdua. Ĩjãũdua Daizezedʼebemata, ĩjãũdua mʉnebemasidʼa. 2 Mʉ Zeze dedʼara sãma bʼaira bio bʼʉa, mawũã bʼʉ ẽbʉrʉ mʉã marãã jarakʼausia. Mawũẽ mʉrã wãña sãma bʼaita aribʼaedʼe marãĩta. 3 Mʉrã mawũã wãpe sãma bʼaita aribʼaepe mʉrã wakusa zeya marã mʉzhi bawara jʉre edeita, aramaʉ̃ne mʉ bʼʉ maẽ marãsidʼa bʼeamarẽã. 4 Marãbara kʼawua bʼea mʉ sãmaã wãĩrã, kʼawua bʼea ora.
5 Mawũãĩ Tomásba mawũãsia: Nokʼó, daibara kʼawuadʼa ẽã bʉ sãmaã wãĩrã, ¿mawũẽ daibara sãwũã kʼawuadʼaipe ora?
6 Mawũãĩ Jesúsbara mawũãsia: Mʉta oa, mʉta wãrã, mʉta bʼai jõ ẽãnebema. Mawũẽ miõta mʉ Zezema jũẽ ẽã, awuarabʉrʉ jũẽña mʉneba. 7 Marãba mʉta ũdukʼawua bʼeasibʉrʉ, mʉ Zezesidʼa ũdukʼawua bʼeakʼausia, nane wedʼauba ũdukʼawadʼaya ũdu bʼeba.
8 Mawũãĩ Felipeba mawũãsia: Nokʼó, daia ũdubigarua bʉ Zezeta, daira bari maʉ̃baa.
9 Mawũãĩ Jesúsbara mawũãsia: ¿Mʉrã marã bawara bʼʉta ewari bio bata, bʉa mʉrã ũdukʼawa ẽka Felipe? Mʉta ũdu bʼʉbara mʉ Zezeta ũdu bʼʉa, ¿maʉ̃ta bʉara sãwũã mawũãbʉrʉ: Daia ũdubigarua bʉ Zezeta? 10 ¿Bʉara ĩjã ẽka mʉrã mʉ Zezedʼe bʼʉta, mʉ Zezera mʉne bʼʉta? Mʉã bedʼeata marãã jara nʉmʉrã mʉzhikusauba jara nʉmʉ ẽã, awuarabʉrʉ mʉ Zeze mʉne bʼʉba mʉneba kʼãrẽ onʉmʉã. 11 Ĩjãrũã mʉrã mʉ Zezedʼe bʼʉta, mʉ Zezera mʉne bʼʉta. Maʉ̃ta ĩjã ẽbʉrʉ, ĩjãrũã mʉã kʼãrẽ onʉmʉneba.
12 Mʉã wãrĩnu marãã jaraya:
Mʉnebemata ĩjã bʼʉbara mʉã kʼãrẽ onʉmʉta izhabidʼa oya. Kʼãrẽ audre oya mʉta wãĩ baera mʉ Zezema. 13 Jõma kʼãrẽ mʉ Zezea widʼibʉdata mʉneba widʼibʉdara mʉã aribʼaeya, aramaʉ̃ne mʉ Zezeta zhi zromata ũdukʼawadʼamarẽã mʉ zhi Warradʼeba. 14 Mʉãã kʼãrẽta widʼidʼara mʉãrã aribʼaeya.
Jesúsba zokʼaita jaradʼa Jawurebiata
15 Mʉta kʉãgʼa bʼebʉrʉ aribʼaeudua mʉã jara bʼʉta. 16 Mawũãrã mʉta zuburia bedʼeaya mʉ Zezea, mobedʼeba marãã diaya awʉrʉ marã Kʼarebata, aramaʉ̃ne marã bawara bʼamarẽã ewariza. 17 Jawurebiara wãrãnebemata bʼʉa, mʉnebema ẽãta ẽjũãne bʼebara izhira jidadʼaidʼe bʼʉ ẽã ũdudʼa ẽbaera, miã ũdukʼawadʼa ẽbaera. Mawũãmina marãbara ũdukʼawua bʼea marã bawara bʼʉ baera, aramaʉ̃ne marãne bʼaya.
18 Mʉã marã dobʼa ãmaẽkua ẽã jẽrãmarãta bʼe kĩrãkʼa, mʉrã marãma zeya. 19 Mʉnebema ẽãta ẽjũãne bʼebara dããrã ẽãne mʉrã wueta ũdudʼa ẽã. Mawũãmina marãbara mʉrã ũdudʼaya. Mʉta bʼʉba marãsidʼa bʼeaya. 20 Mawũã ũdubʉda ewadera marãbara kʼawuadʼaya mʉrã mʉ Zezedʼe bʼʉta, marãta mʉne bʼeta, mʉta marãne bʼʉta. 21 Mʉã jara bʼʉta aribʼae bʼʉbara mʉrã kʉãgʼa bʼʉa. Mʉta kʉãgʼa bʼʉra mʉ Zezeba kʉãgʼa baya, mʉãbidʼa kʉãgʼa baya, mobe mʉnebemata kʼawuabi nʉmaña.
22 Mawũãĩ Juda awʉrʉba Iscariote ẽãba mawũãsia: Nokʼó, ¿bʉara sãwũã daiaabʉrʉ bʉdʼebemata kʼawuabi nʉmaĩne kʼawuabi nʉma ẽpe bʉdʼebema ẽãta bʼeara ẽjũãne?
23 Mawũãĩ Jesúsbara panaʉ̃ mawũãsia: Mʉta kʉãgʼa bʼʉbara mʉ bedʼeata aribʼaeya, mobedʼeba mʉ Zezebara kʉãgʼa baya, aramaʉ̃ne daira izhima zedʼape izhi bawara panaña. 24 Mʉta kʉãgʼa ẽãbara mʉ bedʼeara aribʼae ẽã. Mʉã jara nʉmʉ bedʼeata ũrĩ bʼera mʉrẽ ẽã, awuarabʉrʉ mʉ Zeze mʉ zokʼadʼadʼea.
25 Mʉã maʉ̃ jõma marãã jarabʉrʉa marã bawara bʼʉwedʼa. 26 Mawũãmina marã Kʼarebata Jawurebiata mʉ Zezeba mʉbari zokʼaibara maʉ̃bara marãã ne jõma jaradedʼekaya, bude babigaya jõma mʉã marãã jaradʼata.
27 Adu-a bʼaidʼebemata mʉã marãĩta ãmaẽña, adu-a bʼaidʼebemata mʉrẽta mʉã marãã diaya. Maʉ̃ mʉãrã dedʼeka ẽã ẽjũãne bʼeba aritiaedʼa diabada kĩrãkʼa. Mawũẽ sopuarãũdua, miã perarãũdua. 28 Marãbara ũrĩsidʼa mʉã marãã mawũãnata: Mʉrã wãpe marãma zeya. Mʉta kʉãgʼa bʼebʉrʉ marã sobiadʼaidʼe bʼʉa mʉã jarasi baera mʉrã mʉ Zezema wãĩta, mʉ Zezera zhi zromaneba mʉ audre. 29 Mʉã maʉ̃ta marãã jarabʉrʉa mawũã berabʼarii nawedʼa, mawũã berabʼaribʉrʉdʼera ĩjãnamarẽã. 30 Ya mʉrã marã bawara bio bedʼea ẽã ãtõmiãta uru baera naʉ̃ ẽjũãne nokʼota, izhira zarea ne ẽã mʉ ʉ̃rʉ̃rã. 31 Mawũãmina mʉãrã mʉ Zezera kʉãgʼata ẽjũãne bʼeba kʼawuadʼamarẽã, mʉãrã mʉ Zezeba jaradʼa kĩrãkʼa onʉmʉã. Pirabʼariudua, wãdrʉ namaʉ̃bara.
Jesús wãrĩnu uva kʼarra
15 Mʉrã wãrĩnu uva kʼarra, waya mʉ Zezera zhi akʉbaria. 2 Jʉ̃kʼara mʉ kʼarradʼebema zhi zau ẽãrã izha tiaweya. Mawũãmina zhi zaubʉdara zhi tae seri ẽãtrʉ kʼõkua araa oya audre zaumarẽã. 3 Aramaʉ̃ kĩrãkʼa marã ya zhi araa omata bʼea, bedʼeata mʉã marãã jara nʉmʉba. 4 Mʉ ũme bʼeaudua, mobedʼeba mʉrã marãne bʼʉa. Uva jʉ̃kʼara izhikusara zau ẽã zhi kʼarra maẽba nʉmʉ ẽbʉrʉ, aramaʉ̃ kĩrãkʼa marãbara Daizezeba krĩñarã obʼedʼa ẽã mʉ ũme duanu ẽbʉrʉ.
5 Mʉrã uva kʼarra, waya marãta zhi jʉ̃kʼara. Mʉ ũme bʼʉra mʉrã izhidʼe bʼʉba maʉ̃bara Daizezeba krĩñata bio oya. Mʉ ũme duanu ẽbʉrʉ miã kʼãrẽta obʼedʼa ẽã. 6 Mʉ ũme bʼʉ ẽãrã ãĩ bʼʉdʼaya uva jʉ̃kʼara zau ẽã kĩrãkʼa. Bagui jʉrepe tebʉdʼe pepekuabada, mawũẽ eradrʉbaria. 7 Mʉ ũme bʼebʉrʉ, mʉ bedʼeata aribʼae bʼebʉrʉ widʼiudua jõma mazha krĩñata, mʉã marãã diaya. 8 Mʉ Zezera zhi zromata nʉmabidʼaya izha krĩñata bio obʼeba, aramaʉ̃ne mʉã jʉrʉkuadʼata bʼeaya. 9 Mʉ Zezeba mʉ kʉãgʼa kĩrãkʼa, mʉãbidʼa marã kʉãgʼa, mawũẽ mʉã kʉãgʼata bʼeaudua. 10 Mʉã jara bʼʉta aribʼae bʼebʉrʉ mʉã kʉãgʼata bʼeaya, aramaʉ̃ kĩrãkʼa mʉãrã mʉ Zezeba jara bʼʉta jõma aribʼae bʼʉa, mawũẽ mʉrã izha kʉãgʼa.
11 Mʉã maʉ̃ta marãã jarabʉrʉa marã mʉ kĩrãkʼa jipadʼe sobia bʼeamarẽã.
12 Mʉã jaraya kʼãrẽ aribʼaeita: Zhiya zhi kʉãgʼaudua marãta mʉã kʉãgʼa kĩrãkʼa. 13 Kʉãgʼata kʼãbãẽã erubʼʉbara izhi bebuta diaya izhi bawara zhibiarãbari. 14 Marã mʉ bawara zhibiata bʼea mʉã jara bʼʉta aribʼaedʼara. 15 Mʉã ya marã mʉ nezokʼarã a ẽã, nezokʼabara kʼawua ẽbaera izhi nokʼoba kʼãrẽ obʼʉra. Awuarabʉrʉ mʉãrã mʉ bawara zhibiarã abʼʉa, mʉ Zezedʼeba kʼãrẽ jõma mʉã ũrĩnarã mʉã marãã kʼawuabiga bʼʉba. 16 Mʉta marãba jʉrʉdʼa ẽbasia, awuarabʉrʉ mʉã marãta jʉrʉkuasia, aramaʉ̃ne mʉã marã duanusia wãnape mʉ Zezeba krĩñata obʼeamarẽã, jipa maʉ̃trʉ obʼeamarẽã. Mawũãrã jõma kʼãrẽ mʉ Zezea mʉneba widʼibʉdara izhara marãã diaya. 17 Mʉã marãã jaraya: Zhiya zhi kʉãgʼaudua.
Mʉnebema ẽãbara marã juradea
18 Mʉnebema ẽãta ẽjũãne bʼeba marãta juradebʉrʉ, kʼawuaudua mʉta juradʼapeadʼata marã nawedʼa. 19 Marãta mʉnebema ẽãta ẽjũãne bʼebʉrʉ, mʉnebema ẽãta ẽjũãne bʼebara kʉãgʼa kʼausidʼa ãzhirãrã. Mawũãmina marã mʉnebema ẽãta ẽjũãne duanu ẽã, awuarabʉrʉ mʉã marã jʉrʉkuasia mʉnebema ẽãta ẽjũãne bʼeta. Maʉ̃ba mʉnebema ẽãta ẽjũãne bʼebara marã juradea. 20 Bedʼeata bude baudua mʉã marãã mawũãnata: Nezokʼara audre zhi zroma ẽã izhi nokʼo kʼãñabara. Mʉ zuburia oita pẽwã bʼedʼebara, marãsidʼa zuburia oita pẽwãnaña. Mʉ bedʼeata aribʼae bʼedʼebara, marã bedʼeasidʼa aribʼaedʼaya. 21 Marã mʉ kʼarea mawũã zuburia odʼaya, ũdukʼawadʼa ẽãba mʉ zokʼadʼata.
22 Mʉta zepe zhãrãta ũrãgʼa ẽbasibʉrʉ kʼazhirua ne ẽã bʼeakʼausia, mawũãmina ũrĩkʼawua nʉmeba kʼazhirua ne ẽã bʼea abʼedʼa ẽã. 23 Mʉta jura bʼʉbara mʉ Zezesidʼa jura bʼʉa. 24 Mʉã ãzhidʼe edʼa awʉrʉba okʼata osi ẽbʉrʉ kʼazhirua ne ẽã bʼeakʼausia, mawũãmina akʉ bʼeta juradea mʉta, mʉ Zezeta. 25 Aramaʉ̃ne arimaẽ berabʼari nʉmʉã bedʼeata zhi bʼʉmata ãzhi ũrãgʼadʼe mawũã bʼʉta: Mʉrã kʼãrẽã juradʼai ne ẽãne juradea.
26 Mawũãmina Kʼarebata zebʉrʉdʼera, mʉã maʉ̃ marãma mʉ Zezedʼeba zokʼabʉrʉra Jawurebia wãrãnebema, izhira zeya mʉ Zeze maẽba, izha jaraya mʉnebemata. 27 Marãbidʼa mʉnebemata jaradʼaya, mʉ bawara bʼeadʼaba jẽde wedʼauba.
16 Mʉãrã maʉ̃ta marãã jarabʉrʉa kenabʼaridʼa ẽbamarẽã mʉnebema ĩjã bʼeta. 2 De zhi jʉrebadata nʉme maẽ marã edʼa wãbidʼa ẽbaya, ewarita zeya bariduba marã beabʉrʉdʼera krĩchaita Daizezeba krĩñata obʉrʉta. 3 Maʉ̃ta odʼaya ũdukʼawadʼa ẽãba mʉ Zezeta miã mʉta. 4 Mʉãrã maʉ̃ta marãã jarabʉrʉa maʉ̃ ewarita zebʉrʉdʼera marãba bude badʼamarẽã ya mʉãrã marãã zhi jaramata.
Jawurebiaba obʼʉdʼebema
Maʉ̃ mʉãrã jẽdeubara marãã jara ẽbasia, mʉrã bʼʉ baera marã bawara. 5 Mawũãmina kʼõbebʉrʉ mʉrã wãña mʉ zokʼadʼama, maʉ̃ta marãnebemabara miõba widʼi mawũã ẽã: ¿Bʉra sãmaã wãĩpe? 6 Awuarabʉrʉ mʉã maʉ̃ta marãã jarabʉrʉ kʼarea marã kʼãbãẽã sopua kʼobʼea. 7 Mawũãmina wãrĩnu mʉã marãã jaraya: Marãĩtara biga mʉrã wãĩta, mʉta wã ẽbʉrʉ Kʼarebara marãma ze ẽã, mawũãmina mʉta wãrã mʉã marãma zokʼaya 8 Izhi zebʉrʉdʼera ẽjũãne bʼea kʼawuabigaya kʼazhiruadʼe bʼeta, waya mʉrã bedʼea ne ẽã bʼʉta, kʼawuabigaya zhãrã Daizezebara kʼawua oita. 9 Kʼawuabigaya kʼazhirua bara bʼeta ĩjãna ẽãba mʉnebemata. 10 Kʼawuabigaya mʉrã bedʼea ne ẽã bʼʉta mʉrã wãĩ baera mʉ Zezema, aramaʉ̃ne marãbara mʉrã wueta ũdudʼa ẽbaya. 11 Kʼawuabigaya zhãrã Daizezebara kʼawua oita, izhara ãtõmiã naʉ̃ ẽjũãne nokʼora ya kʼawua osi baera.
12 Mʉãrã wadʼi ne bio erubʼʉa marãã jaraita, mawũãmina aritiara marãbara sãwũãta kʼawuadʼa ẽbaya. 13 Mawũãmina Jawurebia wãrãnebemata zebʉrʉdʼera, marã erunʉmaña Daizezedʼebema wãrãne. Izhara jara ẽbaya izhikusaudʼebemata, awuarabʉrʉ jõma jaraya mʉneba ũrĩbʉrʉta, aramaʉ̃ne jõma marãã kʼawuabiya kʼãrẽ berabʼariita. 14 Jawurebiabara kʼawuabigaya mʉrã zhi zromata, mʉ bedʼeata ũrĩpe marãã kʼawuabigaya. 15 Jõma mʉ Zezeba erubʼʉra mʉrẽã. Maʉ̃ba mʉãrã jarabʉrʉa Jawurebiabara mʉ bedʼeata ũrĩpe marãã kʼawuabigaita.
Sopuara sobia baya
16 Dããrã ẽãne marãbara mʉrã ũdudʼa ẽbaya, mawũãmina dããrã ẽãne mʉrã wakusa ũdudʼaya mʉrã wãĩ baera mʉ Zezema.
17 Mawũãĩ izha jʉrʉkuadʼata ʉ̃kʉrʉbara ãzhirãĩnu mawũãsidʼa: ¿Kʼãrẽta mawũã dazhirãã mawũãbʉrʉ: Dããrã ẽãne marãbara mʉrã ũdudʼa ẽbaya, mawũãmina dããrã ẽãne wakusa ũdudʼaya mʉrã wãĩ baera mʉ Zezema?
18 ¿Kʼãrẽta jara krĩñabʉrʉ mawũã dããrã ẽãne abʉrʉbara? Sãwũãta kʼawuadʼa ẽã izha jarabʉrʉra.
19 Jesúsbara kʼawuasia widʼi krĩña kʼobʼeta, mawũẽ mawũãsia: ¿Marãbara mazhirãĩnu widʼi kʼobʼe ẽka mʉã mawũãnata: Dããrã ẽãne marãbara mʉrã ũdudʼa ẽbaya, mawũãmina dããrã ẽãne mʉrã wakusa ũdudʼaya? 20 Mʉã wãrĩnu marãã jaraya, marã jẽgadʼaya, sopuadʼaya, waya mʉnebema ẽãta ẽjũãne bʼera sobiadʼaya. Mawũãmina marã sopuadʼaimina marã sopuara sobia baya. 21 Wũẽrã toira puabaria toi ewarita arababʉrʉba. Mawũãmina wũãwũã tobʉrʉdʼera pua kʼobʼadʼara sobiaba kĩrãduabaria wũãwũãta tobʉrʉba naʉ̃ ẽjũãne. 22 Aramaʉ̃ kĩrãkʼa marãsidʼa kʼãwũãwedʼara sopua bʼea. Mawũãmina mʉã marã wakusa ũdubʉrʉba sobiadʼaya, mobebaira miõba jãrĩ ẽã marã sobiara. 23 Maʉ̃ ewadera marãbara mʉãã widʼidʼa ẽã miã kʼãrẽta. Mʉã wãrĩnu marãã jaraya, jõma kʼãrẽ mʉ Zezea mʉneba widʼibʉdara izha marãã diaya. 24 Wadʼi marãbara mʉnebara kʼãrẽ widʼidʼa ẽã. Kʼãrẽ widʼiudua, mobedʼeba jidadʼaya, aramaʉ̃ne marã jipadʼe sobia bʼeaya.
Mʉã edre bʼaebisia zareata ẽjũãnebema
25 Maʉ̃ mʉãrã ne jarakʼa jarabʉrʉa. Ewarita zeya mʉã jarabʉrʉra ne jarakʼa jara ẽãta, awuarabʉrʉ marãã jipa jaraya mʉ Zezedʼebemata. 26 Maʉ̃ ewadera marãbara mʉneba kʼãrẽ widʼidʼaya. Maʉ̃bara mʉãrã jara kʼobʼʉ ẽã mʉta mʉ Zezea zuburia bedʼeaita marãbari. 27 Mʉ Zezebara marã kʉãgʼa bʼʉa marãba mʉta kʉãgʼa bʼe baera, aramaʉ̃ne ĩjã bʼea mʉrã zesita Daizeze maẽba. 28 Mʉrã mʉ Zeze maẽba zesia naʉ̃ ẽjũãẽna, mʉãrã naʉ̃ ẽjũãrã ãmaẽña, mʉrã wakusa wãña mʉ Zezema.
29 Mawũãĩ izha jʉrʉkuadʼabara mawũãsidʼa: Idʼibʉrʉ bʉa jarabʉrʉra jipa jara kʼobʼʉa, ne jarakʼa jara ẽã. 30 Idʼibʉrʉ daibara kʼawuabʉda bʉara ne jõma kʼawua bʼʉta, mawũẽ miõba kʼãrẽ widʼidʼaira nesidʼa ẽã, kʼãʉ̃ba daibara ĩjã bʼea bʉra zesita Daizeze maẽba.
31 Mawũãnaĩ Jesúsbara panaʉ̃ mawũãsia: ¿Idʼibʉrʉ ĩjãbʉdakʼa? 32 Ewarita arabaidʼebema ya arabasia, mawũẽ marã abʼa abʼakʼa wãẽbadʼaya mazhi wãbʉrʉma, aramaʉ̃ne mʉrã ãmaẽnaña dobʼa. Mawũãmina mʉrã dobʼa bʼʉ ẽã mʉ Zezeta bʼʉba mʉ ũme. 33 Mʉã maʉ̃ta marãã jarabʉrʉa mʉneba adu-a bʼeamarẽã. Naʉ̃ ẽjũãnerã marã zuburiaya, mawũãmina wãnigua bʼeaudua, mʉã edre bʼaebisia ãtõmiã zareata ẽjũãne nʉmʉrã.
Jesús zhiwidʼidʼa izha jʉrʉkuadʼabari
17 Jesúsbara maʉ̃ta jarape ʉ̃taa akʉ zhiwidʼi mawũãsia:Zeze, ewarira arabasia, mawũẽ kʼawuabigarua mʉ bʉ Warra zhi zromata, aramaʉ̃ne mʉ bʉ Warrabidʼa kʼawuabigaya bʉra zhi zromata. 2 Zhãrã jõmaʉ̃ ʉ̃rʉ̃ bʉara mʉãã zareata diasia, aramaʉ̃ne bʉ ũme bʼai jõ ẽãta diamarẽã bʉa mʉãã diadʼata jõmaʉ̃ã. 3 Bʼai jõ ẽãrã, bʉta ũdukʼawadʼaidʼe bʼʉa Daizezera abʼabai bʼʉta wãrĩnuta, ũdukʼawadʼaidʼe bʼʉa mʉta Jesucristota bʉa zokʼadʼata.
4 Mʉãrã bʉra zhi zromata kʼawuabiga nʉmʉã naʉ̃ druadʼe, aramaʉ̃ne mʉãrã jõbibʉrʉa kʼãrẽ omarẽã bʉa mʉãã diadʼata. 5 Kʼõbebʉrʉ Zeze, mʉrã bʉ kʼaita zhi zromata bʼʉdua, bʉ ũme zhi zromata bʼadʼa kĩrãkʼa ẽjũã nʉmeĩ nawedʼa.
6 Ẽjũãne bʼeta bʉa mʉãã diadʼata bʼea mʉãrã bʉdʼebema kʼawuabiga nʉmʉã, ãzhira bʉre basia, maʉ̃ta bʉa mʉãã dedʼekasia, ãzhara aribʼae bʼea bʉ bedʼeara. 7 Idʼibʉrʉ kʼawuabʉda jõma kʼãrẽ bʉa mʉãã diadʼara bʉ maẽba zedʼata. 8 Bedʼeata bʉa mʉãã diadʼara mʉãrã jarakʼasia, maʉ̃ ãzhara ĩjãsidʼa. Aramaʉ̃ne kʼawuasidʼa mʉrã wãrĩnu bʉ maẽba zedʼata, aramaʉ̃ne ĩjã bʼea mʉrã bʉa zokʼadʼata.
9 Mʉrã ãzhibari bʉaa zuburia bedʼeaya. Mʉnebema ẽãta ẽjũãne bʼebari mawũã zuburia bedʼea ẽã, awuarabʉrʉ bʉa mʉãã diadʼata bʼebari zuburia bedʼeaya bʉreta bʼeba. 10 Mʉrẽta bʼera bʉrea, bʉreta bʼera mʉrẽã. Aramaʉ̃ne mʉrã zhi zromata dajada nʉmʉã ãzhidʼeba.
11 Mʉrã ya naʉ̃ ẽjũãne bʼa ẽã. Mawũãmina ãzhira naʉ̃ ẽjũãne bʼeaya, maʉ̃ne mʉrã bʉma wãña. Zeze bʉra biata bʼʉa, bʉa mʉãã diadʼata bʼera bʉzhi zareaba akʉ jʉre edarua, aramaʉ̃ne abʼa bʼeamarẽã dazhi abʼaʉ kĩrãkʼa. 12 Naʉ̃ ẽjũãne ãzhi bawara bʼasidʼera mʉãrã bʉ zareadʼeba akʉ jʉresia. Bʉa mʉãã diadʼata bʼera mʉãrã akʉ jʉresia, aramaʉ̃ne ãzhidʼebema miõta adua ẽbasia, awuarabʉrʉ zhi aduaitrʉ aduaya. Aramaʉ̃ne maʉ̃ta zhi bʼʉmata arimaẽ berabʼariya.
13 Kʼõbebʉrʉ mʉrã bʉma wãña. Mawũẽ mʉãrã maʉ̃ta jarabʉrʉa wadʼi naʉ̃ ẽjũãne bʼʉwedʼa, aramaʉ̃ne ãzhisidʼa mʉ kĩrãkʼa jipadʼe sobia bʼeamarẽã. 14 Mʉãrã bʉ bedʼeara jarakʼasia, mawũẽ mʉnebema ẽãta ẽjũãne bʼebara juradea, naʉ̃ ẽjũãnebemata duanu ẽãba mʉta naʉ̃ ẽjũãnebema ẽkĩrãkʼa. 15 Mʉãrã widʼi ẽã bʉa naʉ̃ ẽjũãneba ãĩ jʉre edemarẽã, awuarabʉrʉ widʼi bʼʉa kʼarebamarẽã ãtõmiã bia ẽã juwuadʼeba. 16 Ãzhira naʉ̃ ẽjũãnebema ẽã mʉta naʉ̃ ẽjũãnebema ẽkĩrãkʼa. 17 Wãrãneba bʉita bʼeabirua, bʉ bedʼeata wãrã. 18 Bʉa mʉta ẽjũãne bʼema zokʼadʼa kĩrãkʼa, mʉãbidʼa zokʼakuabʉrʉa ẽjũãne bʼema. 19 Ãzhi kʼarea bʉita bʼidʼa ari mʉzhita, ãzhisidʼa bʉita bʼeamarẽã bʉ bedʼeata wãrãneba.
20 Mʉrã bari naʉ̃rã kʼarea bʉaa zuburia bedʼea kʼobʼʉ ẽã, awuarabʉrʉ zuburia bedʼeabʉrʉa mʉnebemata ĩjãnaĩ kʼareabidʼa ãzhi bedʼeadʼeba. 21 Aramaʉ̃nerã jõma abʼa bʼeaya. Zeze, mawũãrã bʉta mʉne bʼʉ kĩrãkʼa, mʉta bʉdʼe bʼʉ kĩrãkʼa, ãzhisidʼa dazhi ũme abʼa bʼeaya. Aramaʉ̃ne ẽjũãne bʼebara ĩjãnamarẽã mʉrã bʉa zokʼadʼata. 22 Mʉãrã zhi zromata bʼʉkuasia bʉa mʉta zhi zromata bʼʉdʼa kĩrãkʼa, aramaʉ̃ne abʼa bʼeamarẽã dazhi abʼa panʉ kĩrãkʼa. 23 Mʉta ãzhidʼe bʼʉa, bʉta mʉne bʼʉa, aramaʉ̃ne jipadʼe ãba bʼea. Kʼãwũãrã ẽjũãne bʼebara kʼawuadʼaya mʉrã bʉa zokʼadʼata, kʼawuadʼaya mʉnebemata bʼera bʉara kʉãgʼata mʉta kʉãgʼa kĩrãkʼa.
24 Zeze, bʉa mʉãã diadʼata bʼera mʉãrã krĩña bʼʉa mʉta bʼʉ maẽ ãzhisidʼa mʉ bawara bʼeaita, aramaʉ̃ne ãzha ũdudʼamarẽã bʉa mʉrã zhi zromata bʼʉdʼata, bʉa mʉrã kʉãgʼa ẽjũã oi nawedʼa. 25 Zeze, bʉra biata bʼʉa, ẽjũãne bʼebara bʉra ũdukʼawadʼa ẽã, mawũãmina mʉã bʉra ũdukʼawua bʼʉa, naʉ̃rã mʉnebemata bʼebara kʼawuasidʼa mʉrã bʉa zokʼadʼata. 26 Mʉãrã bʉdʼebema kʼawuabigadʼata ãmaña kʼawuabigaya. Aramaʉ̃ne bʉa mʉta kʉãgʼa kĩrãkʼa ãzhirãĩnu zhiya kʉãgʼa bʼeamarẽã, aramaʉ̃ne mʉrã ãzhidʼe bʼaya.
Jesús jidadʼapeadʼa
(Mateo 26:47-56; Marcos 14:43-50; Lucas 22:47-53)
18 Jesús mawũã zhiwidʼipe izha jʉrʉkuadʼa bawara wãsia do zake Cedrón kĩrãrẽ. Mama ne uta bʼʉ maẽ edʼa wãsia izha jʉrʉkuadʼa bawara. 2 Juda Jesús chãbʼariita bʼʉbara kʼawua bʼasia mawũã ne uta bʼʉ maẽrã, Jesús mama ãba zema bio basi baera izha jʉrʉkuadʼa bawara. 3 Mawũẽ Judabara jʉre edesia soldaorãta, Daizeze de akʉbadata, maʉ̃rã zokʼasidʼa sacerdoterã nokʼorãba, fariseorãba, aramaʉ̃ne mama erbuesia ĩbĩrãẽna, kuchoedʼa. 4 Mawũẽ Jesúsbara izhi sãwũã berabʼariita kʼawua kʼobʼʉba ãzhi orrape mawũãsia: ¿Kʼaita jʉrʉ panʉ?
5 Mawũãĩ panaʉ̃ mawũãsidʼa: Jʉrʉ panʉã Jesús Nazaredʼebemata.
Mawũãnaĩ Jesúsbara mawũãsia: Mʉta izhia.
Ãzhi bawara kʼobʼasia Judasidʼa Jesús chãbʼariita. 6 Mawũã Mʉta izhia abʉrʉdʼera, ãbudea bʼaekuasidʼa egorodʼe. 7 Jesúsbara wakusa widʼi mawũãsia: ¿Kʼaita jʉrʉ panʉ?
Mawũãĩ mawũãsidʼa: Jʉrʉ panʉã Jesús Nazaredʼebemata.
8 Mawũãnaĩ Jesúsbara panaʉ̃ mawũãsia: Mʉã marãã jarabʉrʉa mʉta izhita. Mawũẽ mʉta jʉrʉ panʉbʉrʉ idu wãbiudua mʉã jʉrʉkuadʼa za kʼopanʉta.
9 Aramaʉ̃ne arimaẽ berabʼarisia izha mawũãnata: Zeze, bʉa mʉãã diadʼata bʼera adua ẽã miõta. 10 Maʉ̃ne Simón Pedroba kucho abʼʉta ẽpe tusia sacerdote wagʼau nezokʼata, mawũẽ ʉrawesia kʉwʉrʉ juwua araarebemata. Nezokʼara Malco abazhidʼa. 11 Jesúsbara Pedroa mawũãsia: Bʉzhi kuchora edʼa pẽũdua. Mʉ Zezeba mʉrã zuburiabiya nʉmʉba, ¿mʉrã zuburiaidʼe bʼʉ ẽka?
Jesús edesidʼa sacerdote wagʼau kĩrãbita
(Mateo 26:57-58; Marcos 14:53-54; Lucas 22:54)
12 Mobebʉrʉ soldaorãbara ãzhi nokʼo bawarauba Daizeze de akʉbadata judíorãne bawarauba Jesús jidadʼape jʉ̃sidʼa. 13 Mobebʉrʉ naara edesidʼa Anás bʼʉma Caifás zãwũrẽ baera. Caifás sacerdote wagʼauta bʼasia maʉ̃ añone. 14 Maʉ̃ Caifásba judíorãã jarasia ũmakĩrã abʼa beuita bigata jõmaʉ̃bari.
Pedro chubʼedʼa Anás drogʼoadʼe
(Mateo 26:69-70; Marcos 14:66-68; Lucas 22:55-57)
15 Jesús kʼaidʼu wãsidʼa Simón Pedrota dewarabema Jesúsba jʉrʉdʼata. Maʉ̃ Jesúsba jʉrʉdʼara ũdukʼawua bʼasia sacerdote wagʼauba, maʉ̃ta Jesú ũme edʼa wãsia sacerdote wagʼau drogʼoadʼe. 16 Mawũãmina Pedrora drogʼoadʼe ãĩ bʼesia puerta maẽ. Mawũẽ Jesúsba jʉrʉdʼara sacerdote wagʼauba ũdukʼawua bʼʉta wũẽrã puerta akʉbari ũme bedʼeape edʼa wãbisia Pedrora. 17 Mawũẽ wũẽrã puerta akʉbaribara Pedroa mawũãsia: ¿Bʉsidʼa kʼãʉ̃ba jʉrʉkuadʼadʼebema ẽka?
Mawũãĩ izhara mawũãsia: Mʉrã izhi ẽã.
18 Maʉ̃ne nezokʼarãta Daizeze de akʉbada bawara edau nʉmeãsia tebʉta puadʼape. Kũrãsãba tebʉ kʼã nʉmeãsia. Ãzhi bawara Pedrosidʼa edau nʉmasia tebʉ kʼã.
Anásba widʼidʼa Jesúa
(Mateo 26:59-66; Marcos 14:55-64; Lucas 22:66-71)
19 Sacerdote wagʼaubara Jesúa widʼisia izha jʉrʉkuadʼadʼebemata izhi ũrãgʼadʼebemata. 20 Mawũẽ Jesúsbara panaʉ̃ mawũãsia: Mʉrã dajada bedʼea bʼasia zhãrã jõmaʉ̃ daidʼu. Mʉrã baridua miã ũrãgʼa bʼasia de zhi jʉrebada maẽ, Daizeze dedʼa ewara maẽ, judíorã jõma zhi jʉrebada maẽ, mʉãrã aramaʉ̃ne kʼãrẽ chupea jara bʼa ẽbasia. 21 ¿Kʼãrẽã mʉãã widʼibʉrʉ? Mʉ bedʼeata ũrĩnapeadʼaa widʼidua mʉã kʼãrẽta jarakʼa bʼadʼata. Ãzha kʼawua bʼea mʉã kʼãrẽta jaradʼata.
22 Jesúsba mawũãĩ Daizeze de akʉbadadʼebemata abʼa mama kʼobʼʉba kĩrãma tachipe mawũãsia: ¿Bʉara mawũã panaʉ̃bʉrʉka sacerdote wagʼau bedʼeara?
23 Mawũãĩ Jesúsbara panaʉ̃ mawũãsia: Mʉta ãña bedʼea tabebʉrʉ jaradua kʼãrẽne ãña bedʼea tabeta. Mawũãmina mʉta bia bedʼea tabebʉrʉ, ¿mʉrã kʼãrẽã tachibʉrʉ?
24 Mobebʉrʉ Anás sacerdote wagʼauta bʼadʼabara jʉ̃ diabuesia Caifás sacerdote wagʼauma.
Pedroba ũdukʼa adʼa Jesús
(Mateo 26:71-75; Marcos 14:69-72; Lucas 22:58-62)
25 Pedrora edau nʉmasia tebʉ kʼã. Maʉ̃ne mawũãsidʼa: ¿Bʉra Jesúsba jʉrʉkuadʼadʼebema ẽka?
Mawũãnaĩ izhara merãbʉrʉta mawũãsia: Mʉrã izhi ẽã.
26 Maʉ̃ne sacerdote wagʼau nezokʼata abʼa Pedroba kʉwʉrʉ ʉrawedʼa mebẽrãba Pedroa mawũãsia: ¿Mʉã bʉra Jesú ũme ũdusi ẽka ne uta bʼʉ maẽ?
27 Mawũãĩ Pedrobara wakusa merãsia. Maʉ̃ daucha berusia gallora.
Jesús ededʼapeadʼa Pilato kĩrãbita
(Mateo 27:1-2; 11-31; Marcos 15:1-20; Lucas 23:1-5; 13-25)
28 Caifás de maẽbara Jesús edesidʼa nokʼo dedʼa soldaorã tabʼʉidʼu. Maʉ̃nerã diapedʼa nʉmasia. Judíorã Jesús ededʼapeadʼara maʉ̃ dedʼara edʼa wãna ẽbasia. Ãzhima aramaʉ̃nerã Daizeze kĩrãbita mitia ẽãba kʼo bʼeidʼe bʼasia Egiptodʼeba ẽzoadʼata krĩcha kʼobadara. 29 Mawũẽ Pilato ãzhima zepe mawũãsia: ¿Naʉ̃ kʼãrẽã ji kʼopanʉ?
30 Mawũãĩ panaʉ̃ mawũãsidʼa: Naʉ̃ta bia ẽãta obari ẽbʉrʉ daibara bʉaa chãbʼaridʼa ẽbakʼausia.
31 Mawũãnaĩ Pilatobara mawũãsia: Mazhabʉrʉ ededʼape kʼawua oudua mazhi ũrãgʼaba jara bʼʉdʼe.
Mawũãĩ judíorãbara mawũãsidʼa: Marã Roma bidʼarãbara daia idu beabidʼa ẽã miõta.
32 Aramaʉ̃ne arimaẽ berabʼarisia Jesúsba jaradʼata izhi sãwũã beuita.
33 Pilato wakusa edʼa wãsia izhita nokʼota bʼʉ dedʼa, mobe Jesús trʉ̃pe mawũãsia: ¿Bʉra Rey judíorãneka?
34 Mawũãĩ Jesúsbara panaʉ̃ mawũãsia: ¿Bʉzhikusauba mawũãbʉrʉka o mʉnebema awʉrʉba bʉaa mawũãsidʼa?
35 Mawũãĩ Pilatobara panaʉ̃ mawũãsia: ¿Mobera mʉrã judíokʼa? Bʉzhirãta bʼeba, sacerdoterã nokʼorãba bʉra mʉãã chãbʼarisidʼa. ¿Bʉara kʼãrẽta osi?
36 Mawũãĩ Jesúsbara panaʉ̃ mawũãsia: Mʉrã naʉ̃ ẽjũãne Reyta bʼaidʼebema ẽã. Mʉta naʉ̃ ẽjũãne Reyta bʼaidʼebemabʉrʉ mʉta aribʼae bʼera zhõkʼausidʼa mʉta chãbʼaridʼa ẽbamarẽã judíorãã. Mawũãmina mʉrã nama Reyta bʼaidʼebema ẽã.
37 Mawũãĩ Pilatobara mawũãsia: ¿Mobera bʉra Reyka?
Mawũãĩ Jesúsbara panaʉ̃ mawũãsia: Ara bʉzha jarabʉrʉa mʉrã Reyta. Mʉrã maʉ̃ kʼarea tobʉdata naʉ̃ ẽjũãẽna zesia wãrãta jaraita. Wãrãnebemata bʼebara ũrĩ bʼea mʉ bedʼeara.
38 Mawũãĩ Pilatobara mawũãsia: ¿Kʼãrẽpe wãrã?
Mawũãpe wakusa wãsia judíorãma, mobe mawũãsia: Mʉma naʉ̃ bedʼea ne ẽã. 39 Mawũãmina marã zhi kʼawama cárceldʼeba mʉã abʼa ẽdrʉbi bʼʉta Egiptodʼeba ẽzoadʼata krĩcha fiesta obada ewade. ¿Mawũẽ marãbara krĩñadeka mʉã ẽnaĩta Rey judíorãneta?
40 Mawũãĩ jõmaʉ̃ba nemi jĩgua mawũãsidʼa: ¡Kʼãʉ̃ta ẽnarãrũã! Awuarabʉrʉ ẽnadua Barrabáta. Maʉ̃ Barrabára nezrʉgamiã basia.
19 Mobebʉrʉ Pilatobara Jesús ubigasia. 2 Soldaorãbara corona jʉ̃kʼara ʉrʉta pʉrrasidʼa, mobe burudʼe joatrʉsidʼa. Mobe ãnebʼaribisidʼa wua granateta. 3 Mobe mawũãsidʼa: ¡Kʉa, judíorã Rey! Mobe tachi jirpanesia kĩrãma.
4 Pilato wakusa ãĩ zepe mawũãsia: Akaudua, mʉãrã wakusa ãĩ webʉrʉa kʼawuadʼamarẽã mʉma naʉ̃ bedʼea ne ẽãta.
5 Jesús ãĩ webʉdadʼera corona jʉ̃kʼara ʉrʉta burudʼe joatrʉ nʉmasia, ãnebʼari bʼasia wua granateta. Maʉ̃ne Pilatobara mawũãsia: ¡Naʉ̃ za bʼidʼa!
6 Jesús ũdubʉdadʼera sacerdoterã nokʼorãbara, Daizeze de akʉbadabara nemi jĩgua mawũãsidʼa: ¡Cruzdʼe kʼachibirua! ¡Cruzdʼe kʼachibirua!
Mawũãnaĩ Pilatobara mawũãsia: Mazhabʉrʉ cruzdʼe kʼachiudua. Mʉma naʉ̃ bedʼea ne ẽã.
7 Mawũãĩ judíorãbara panaʉ̃ mawũãsidʼa: Daibara erubʼea ũrãgʼata, mawũẽ dai ũrãgʼaba jara bʼʉdʼera beuibara izhikusa Daizeze Warradʼe bʼʉdʼeba.
8 Mawũãbʉdata Pilatoba ũrĩbʉrʉdʼera audre perasia. 9 Mawũẽ izhita nokʼota bʼʉ dedʼa wakusa edʼa wãsia, mobe Jesúa mawũãsia: ¿Bʉra sãmabema?
Mawũãmina Jesúsbara panaʉ̃ ẽbasia. 10 Mawũẽ Pilatobara mawũãsia: ¿Bʉra mʉãã bedʼea ẽka? ¿Bʉara kʼawua ẽka mʉ zarea bʼʉra bʉ cruzdʼe kʼachi beabiita o bʉ ẽnetaita?
11 Mawũãĩ Jesúsbara panaʉ̃ mawũãsia: Bʉa mʉrã kʼãrẽ sãwũã ẽbakʼausia ʉ̃treba kʼãwũã idaribi ẽbasibʉrʉ. Mawũẽ mʉta bʉ juwuadʼe chãbʼaridʼatrʉ bʉ audre kʼazhirua barasia.
12 Mawũãĩ Pilatobara Jesús ẽna krĩñasia. Mawũãmina judíorãbara nemi jĩgua mawũãsidʼa: Bʉa naʉ̃ta ẽnarã, César bawara bʉra zhibia ẽã. Iabʼa izhitrʉ reydʼe bʼʉra César rey wagʼau bawara zhi jura.
13 Pilatobara maʉ̃ta ũrĩpe Jesús ãĩ edepe zhãrã kʼawua obari maẽ jewedʼasia dejã mongʼara douga odʼa abada maẽ, hebreo bedʼeadʼera Gábata abada. 14 Maʉ̃nerã aribʼae jirpanasia Egiptodʼeba ẽzoadʼata krĩcha fiesta obadadʼebemata, maʉ̃nerã ʉ̃matipa nʉmasia. Maʉ̃ne Pilatobara judíorãã mawũãsia: ¡Za bʼidʼa mazhi Rey!
15 Mawũãĩ nemi jĩgua mawũãsidʼa: ¡Beabirua! ¡Beabirua! ¡Cruzdʼe kʼachibirua!
Mawũãnaĩ Pilatobara mawũãsia: ¿Marã Reyra mʉã cruzdʼe kʼachibiidʼe bʼʉka?
Mawũãĩ sacerdoterã nokʼorãbara panaʉ̃ mawũãsidʼa: Daibara rey ãmaña eruduanu ẽã rey César awuarara.
16 Aramaʉ̃ne Pilatobara Jesús ãzhaa chãbʼaribʉrʉta soldaorãã chãbʼarisia cruzdʼe kʼachi beadʼamarẽã. Mawũẽ Jesús edesidʼa.
Cruzdʼe kʼachi beudʼa Jesús
(Mateo 27:32-44; Marcos 15:21-32; Lucas 23:26-43)
17 Jesúsbara izhi cruz ataupe wãsia Buru Bʼʉwʉrʉ abadaidʼu, hebreo bedʼeadʼera Gólgota abada. 18 Mama cruzdʼe kʼachisidʼa, izhi bawara awʉrʉta ũme kʼachi jirapanʉsidʼa abʼa juwua araare abʼa juwua ãkʼaare, Jesús jirabʼʉsidʼa ẽsadra. 19 Kʼãrẽã beadʼaita Pilatobara bʼʉpe cruzdʼe jirabʼidʼapʉta mawũã bʼasia: JESÚS NAZAREDʼEBEMA REY JUDÍORÃNEÃ. 20 Judíorã bioba maʉ̃ta lesidʼa Jesús cruzdʼe kʼachidʼapeadʼara pʉwʉrʉ kʼaita baera. Maʉ̃ bedʼeara bʼʉ jirabʼasia hebreo bedʼeadʼe, griego bedʼeadʼe, latin bedʼeadʼe. 21 Sacerdoterã nokʼorãta judíorãbara Pilatoa mawũãsidʼa: Mawũã bʼʉrãrũã: Rey judíorãneã arãrũã, awuarabʉrʉ mawũãdua: Naʉ̃bara mawũãsia: Mʉrã Rey judíorãneã.
22 Mawũãnaĩ Pilatobara panaʉ̃ mawũãsia: Mʉã bʼʉsibʉrʉ mʉã bʼʉsia.
23 Soldaorãbara Jesús cruzdʼe kʼachidʼape izha jʉ̃ bʼadʼara jirakua edadʼape kĩmarẽta abʼaʉdʼe drasidʼa soldaoza. Wua ãnebʼari jʉ̃ bʼadʼasidʼa jidasidʼa, maʉ̃ wuara kĩrã tẽũ kʼasudʼapeadʼa ẽbasia, awuarabʉrʉ jipa abʼa kʼadʼapeadʼa basia ʉ̃tʉba edʼaa. 24 Mawũẽ ãzhirãĩnu mawũãsidʼa: Naʉ̃ kʼõãna ẽã, awuarabʉrʉ kʼaidʼe baita kʼawuadʼaidʼebemata odʼaya.
Aramaʉ̃ne arimaẽ berabʼarisia zhi bʼʉmata mawũã bʼʉta:
Mʉã jʉ̃ bʼadʼara ãzhirãĩnu drasidʼa sãwũã dradʼaidʼebemata odʼape.*
Mawũã jara bʼʉdʼe osidʼa soldaorãbara. 25 Jesús cruzdʼe jirabʼʉ kʼaita panasia zhi papata, wũẽrã zhi papa mebeata, María Cleofas kĩmata, María Magdalenata. 26 Jesúsba zhi papata ũdubʉrʉdʼe izha jʉrʉdʼata izha audre kʉãgʼata mama kʼobʼʉdʼe zhi papaa mawũãsia: Papa, kʼãʉ̃ bʉ waua.
27 Mobebʉrʉ maʉ̃ izha jʉrʉdʼaa mawũãsia: Kʼãʉ̃ bʉ papaa. Maʉ̃ ewadeba izha jʉrʉdʼabara zhi papa kĩrãkʼa erubʼasia izhi dedʼa.
28 Mawũãpe Jesúsbara izha oita bʼadʼara jõma aribʼaeta kʼawuape maʉ̃ zhi bʼʉmata arimaẽ berabʼarimarẽã mawũãsia: Mʉrã obisia kʼobʼʉa.
29 Maʉ̃ne zokʼota mama nʉmasia uva bʼa oregueaba bira nʉmʉta. Mawũẽ maʉ̃ oregueadʼe sõmbera edasidʼa esponjata, mobe hisopo bakurudʼe tãjʉ̃nape Jesúsma tʉsidʼa yedʼa. 30 Jesúsbara maʉ̃ oregueara dope mawũãsia: Mʉã oita bʼadʼara jõma aribʼaea.
Mawũãpe buru jabʼari izhi jawure Daizezea chãbʼari beusia.
Jesús orrota miãsuba sudʼapeadʼa
31 Maʉ̃ ewadera aribʼae jirpanʉta Egiptodʼeba ẽzoadʼata krĩcha fiesta obadata odʼaidʼera nrũẽmarã ẽnaʉ̃bada ewari basia. Mawũẽ judíorãma biga ẽbasia zhãrã ari cruzdʼe jizoa nʉmaĩrã ẽnaʉ̃bada ewade. Maʉ̃nerã ewari ẽnaʉ̃badara ne bia basia. Mawũẽ Pilatoa jarasidʼa cruzdʼe jizoa nʉmʉrã jẽrũ bʼʉekuabipe mamaʉ̃bara ãĩ jirakuabimarẽã. 32 Mawũẽ soldaorã zedʼape abʼa naara jẽrũ bʼʉekuasidʼa, dewarabemasidʼa jẽrũ bʼʉekuasidʼa, mawũã okuasidʼa Jesús bawara cruzdʼe kʼachidʼapeadʼara. 33 Mawũãmina Jesús maẽ zebʉdadʼera ya beusi baera jẽrũ bʼʉekuadʼa ẽbasia. 34 Mawũãmina soldaorãnebema abʼaʉba miãsuba orroma susia, mawũẽ aramaʉ̃ta drʉsia wata, baniãta. 35 Maʉ̃ta zhi ũdudʼaba jara bʼʉa, maʉ̃ jara bʼʉra wãrĩnuã. Izhara kʼawua bʼʉa wãrãta jara bʼʉta marãbidʼa ĩjãnamarẽã. 36 Mawũã berabʼarisia maʉ̃ zhi bʼʉmata mawũã bʼʉta: Bʼʉekuadʼa ẽbaya izhi bʼʉwʉrʉra. 37 Dewara zhi bʼʉmata mawũã bʼʉa: Akʉdʼaya sudʼapeadʼara.
Jesús wuagʼadʼapeadʼa
(Mateo 27:57-61; Marcos 15:42-47; Lucas 23:50-56)
38 Maʉ̃ tẽã José Arimatea pʉwʉrʉdʼebemata judíorã wawiaba Jesús chupea pẽwã bʼʉta Pilatoa zuburia bedʼeasia idu edebimarẽã Jesús kʼakuata, mawũẽ Pilatobara idaribisia. Mawũẽ zepe edesia Jesús kʼakuara. 39 Nicodemosidʼa zesia naara diamase Jesúsma zedʼata, mirra kerata, áloe keraedʼa poera wesia, maʉ̃ bʼasia treinta kilo. 40 Aramaʉ̃ne Jesús kʼakuara jiraedadʼape keraedʼa burubʼaba burasidʼa. Mawũã osidʼa judíorãba wuagʼa kʼawa bʼedʼe. 41 Jesús cruzdʼe kʼachidʼapeadʼa kʼaita bʼasia ne uta, mawũã ne uta bʼʉ maẽ bʼasia peña zobʼeata zhiwidʼita. Mamarã beuwãrã wadʼi bʼʉdʼa ẽbasia miõta. 42 Egiptodʼeba ẽzoadʼata krĩcha judíorãba fiesta odʼaita aribʼae jirpanʉ baera mawũã beuwãrã wuagʼaita arakʼaita nʉmʉ maẽ edʼa tabʼʉsidʼa Jesúra.
Jesús beudʼata piradrʉdʼa
(Mateo 28:1-10; Marcos 16:1-8; Lucas 24:1-12)
20 Semana ewarita nabemata domingodʼe María Magdalena diapedʼa wadʼi pãrĩgua nʉmʉne wãsia Jesús wuagʼadʼapeadʼaidʼu. Maʉ̃nerã peña zobʼeata tapa kʼobʼadʼara mongʼara ãña ʉratʉ kʼobʼʉta ũdusia. 2 Mawũẽ wãẽba wãsia Simón Pedroma, dewarabema Jesúsba jʉrʉdʼata Jesúsba kʉãgʼama, mobe mawũãsia: Izhi wuagʼadʼapeadʼa maẽbara edesidʼa Nokʼora, kʼawuadʼa ẽã sãma tabʼʉsidʼara.
3 Mawũãĩ Pedrora dewarabema Jesúsba jʉrʉdʼa ũme wãsidʼa Jesús wuagʼadʼapeadʼaidʼu. 4 Ũmewedʼa wãẽba wãsidʼa, mawũãmina dewarabema Jesúsba jʉrʉdʼara audre wãẽba wãsia Pedro kʼãñabara, mawũẽ naara jũẽsia Jesús wuagʼadʼapeadʼaidʼu. 5 Bʼarrupe edʼa akʉbʉrʉdʼera burubʼata ũdusia, mawũãmina edʼa wã ẽbasia. 6 Tẽã zesia Simón Pedrora izhi kʼaidʼu, mobe peña zobʼeadʼe edʼa wãbʉrʉdʼera ũdusia burubʼa kʼobʼʉta mama. 7 Wua Jesús buruta buradʼapeadʼasidʼa ũdubʉrʉdʼera burubʼa bawara kʼobʼa ẽbasia, awuarabʉrʉ ãĩ buratʉ kʼobʼasia. 8 Mobebʉrʉ edʼa wãsia dewarabema Jesúsba jʉrʉdʼasidʼa, izhira naara zesia peña zobʼeata nʉmʉĩnu. Mawũã berabʼaribʉrʉta ũdui ĩjãsia Jesús piradrʉdʼata. 9 Maʉ̃ẽnabema wadʼi sãwũãta kʼawuadʼa ẽãrã zhi bʼʉmata, Jesús mawũã beudʼata piradrʉi bara basia. 10 Mobebʉrʉ Jesúsba jʉrʉkuadʼara wãsidʼa ãzhi panʉma.
Jesús zhi ũdubidʼa María Magdalenaa
11 Mawũãmina María jẽga bʼasia peña zobʼeata nʉmʉ kʼaita. Mawũã jẽga bʼʉdʼe bʼarrusia edʼa akʉi kʼarea. 12 Maʉ̃ne ũdusia ángelerã ũme wua torro jʉ̃ panʉta. Abʼa buru bude, abʼa jẽrũ bʼadaudʼe jewedʼa kʼopanasia Jesús kʼakua tabʼʉdʼapeadʼa maẽ. 13 Maʉ̃rãbara mawũãsidʼa: Wũẽrã, ¿bʉra kʼãrẽã jẽga bʼʉ?
Mawũãnaĩ mawũãsia: Mʉ Nokʼota edesidʼa, mʉã kʼawua ẽã sãma tabʼʉsidʼara.
14 Mawũãpe pʉrʉwabʉrʉdʼera ũdusia Jesús mama kʼobʼʉta, mawũãmina kʼawua ẽbasia Jesústa kʼobʼʉta. 15 Maʉ̃ne Jesúsbara mawũãsia: Wũẽrã, ¿bʉra kʼãrẽã jẽga bʼʉ? ¿Kʼaita jʉrʉ bʼʉ?
Mawũãĩ izhara ne uta akʉbarita krĩchape mawũãsia: Jesús kʼakuata bʉa edesibʉrʉ mʉãã jaradua sãma tabʼʉsita, mobedʼeba mʉã edeya.
16 Mawũãĩ Jesúsbara mawũãsia: ¡María!
Mawũãĩ pʉrʉwape izhara mawũãsia: ¡Raboni! Maʉ̃bara jara krĩña bʼʉa Miã Ũrãgʼabarita.
17 Maʉ̃ne Jesúsbara mawũãsia: Mʉta jiru nʉmerãrũã, mʉrã wadʼi wãrĩze ẽã mʉ Zezema, mawũẽ mʉ mebẽrãma wãpe jaradua: Mʉrã wãrĩzeita mʉ Zezema, marã Zezema, mʉ Zhibarima, marã Zhibarima.
18 Mawũãĩ María Magdalena wãsia Jesúsba jʉrʉkuadʼaa jaraita Nokʼo Jesús izha ũdudʼata. Aramaʉ̃ne jarakʼasia Jesúsba jaradʼata.
Jesús zhi ũdubidʼa izha jʉrʉkuadʼaa
(Mateo 28:16-20; Marcos 16:14-18; Lucas 24:36-49)
19 Keubʉrʉdʼe maʉ̃ abʼaʉ ewadera semana ewartia nabemata domingodʼera Jesúsba jʉrʉkuadʼara zhi jʉre ãzhi duanu maẽ puerta serrape duanasia. Judíorã wawiaba mawũã duanune Jesús zepe ãzhi ẽsadra edau nʉmepe mawũãsia: ¡Kʉa, marã adu-a bʼeaudua!
20 Mawũãpe ũdubigasia izhi juwuata, izhi orrota. Izha jʉrʉkuadʼara sobiasidʼa Nokʼota ũdubʉdaba. 21 Mawũẽ Jesúsbara wakusa mawũãsia: ¡Kʉa, marã adu-a bʼeaudua! Mʉ Zezeba mʉta zokʼadʼa kĩrãkʼa mʉãbidʼa marãta zokʼaya.
22 Mawũãpe ãzhima jãrãpuape mawũãsia: Jidaudua Jawurebiata. 23 Zhãrã kʼazhirua odʼata marãba Jawurebiadʼeba bedʼea ne ẽã edabʉdara maʉ̃ Daizezebara bedʼea ne ẽã bʼʉya. Mawũãmina marãba Jawurebiadʼeba bedʼea ne ẽã edabʉda ẽãrã maʉ̃ Daizezebidʼa bedʼea ne ẽã bʼʉ ẽã.
Tomásbara ĩjã ẽã nʉmape ĩjãna
24 Tomás Jesúsba doce jʉrʉkuadʼadʼebemata Memerã abadara ãzhi bawara ne ẽbasia Jesús zesidʼera. 25 Mawũẽ dewarabemarã Jesúsba jʉrʉkuadʼabara mawũãsidʼa: Nokʼora daibara ũdusidʼa.
Mawũãnaĩ mawũãsia: Izhi juwua clavoba kʼachidʼapeadʼata mʉã ũdupe mʉ juwua jĩwĩnita edʼa pẽũ ẽbʉrʉ, mʉ juwuata izhi orrodʼe pẽũ ẽbʉrʉ, beudʼata piradrʉdʼara mʉãrã ĩjã ẽã.
26 Ewari ocho babʉrʉdʼe Jesúsba jʉrʉkuadʼara wakusa edʼa zhi jʉre bʼedʼera Tomás ãzhi bawara bʼasia. Maʉ̃ne puerta serra nʉmʉne Jesús zepe ẽsadra edau nʉmepe mawũãsia: ¡Kʉa, marã adu-a bʼeaudua!
27 Mobe Tomás kʼobʼʉa mawũãsia: Nama pẽũdua bʉ juwua jĩwĩnita, akʉdua mʉ juwuata, bʉ juwuara pẽũdua mʉ orrodʼe. Mobe ĩjã ẽã nʉmarãrũã, awuarabʉrʉ ĩjãrũã.
28 Mawũãĩ Tomásbara panaʉ̃ mawũãsia: ¡Bʉra mʉ Nokʼoa, mʉ Zhibaria!
29 Mawũãĩ Jesúsbara mawũãsia: Mʉta ũdubʉrʉ baera Tomás bʉara ĩjãbʉrʉa. Sobiadʼaidʼe bʼʉa ũdu ẽãta ĩjãbʉdara.
Kʼãrẽã bʼʉdʼapeadʼa naʉ̃ libro
30 Jesúsbara dewara ũdudʼakʼata bio osia izha jʉrʉkuadʼa daidʼu, maʉ̃ zhi bʼʉma ẽã naʉ̃ librodʼera. 31 Mawũãmina naʉ̃ bʼʉsidʼa ĩjãnamarẽã Jesúra zhãrã Ẽdrʉbita Daizeze Warrata. Maʉ̃ta ĩjãbʉdaba izhikʼareuba erubʼeamarẽã Daizeze ũme bʼai jõ ẽãta.
Jesús zhi ũdubidʼa izha jʉrʉkuadʼata sietea
21 Maʉ̃ tẽã izha jʉrʉkuadʼaa Jesús wakusa zhi ũdubisia do jedʼea õbʼʉta Tiberia abada doya. Maʉ̃nerã kʼãwũã berabʼarisia: 2 Ãba duanasia Simón Pedrota, Tomás Memerã abadata, Natanael Caná pʉwʉrʉdʼebemata, maʉ̃ pʉwʉrʉra Galilea druadʼebema, dewara Zebedeo warrarãta, dewara ũme Jesúsba jʉrʉkuadʼata. 3 Maʉ̃ne Simón Pedrobara mawũãsia: Mʉrã wãña bʼeda beadʼe.
Mawũãĩ jarirãbara mawũãsidʼa: Daisidʼa wãnaña bʉ bawara.
Aramaʉ̃ne wãnape jãbadʼe bʼarisidʼa, maʉ̃ diamasera bʼeda beadʼa ẽbasia miã kʼãrẽta.
4 Ʉ̃nadrʉ bʉsidʼe Jesús zhi ũdubisia ibudʼe, mawũãmina izha jʉrʉkuadʼabara kʼawuadʼa ẽbasia Jesústa kʼobʼʉta. 5 Maʉ̃ne Jesúsbara mawũãsia: Warrarã, ¿jidasidʼakʼa bʼeda kʼoira?
Mawũãĩ panaʉ̃ mawũãsidʼa: Jidadʼa ẽã.
6 Mawũãnaĩ mawũãsia: Atarraya jãbadʼeba juwua araare bʼaribueudua mawũãrã jidadʼaya. Mawũãĩ bʼaribuesidʼa, mawũẽ jirabʼari bʼedʼa ẽbasia bʼeda bioba. 7 Maʉ̃ne izha jʉrʉdʼata Jesúsba kʉãgʼaba Pedroa mawũãsia: ¡Kʼãʉ̃ Nokʼoa!
Simón Pedroba mawũã Nokʼota ũrĩbʉrʉdʼera, wua ãnebʼari jʉ̃ bʼʉta wẽãnata jʉ̃pe doidʼu tẽũsia. 8 Dewaraurã izha jʉrʉkuadʼara jãbadʼe zesidʼa ibuidʼu, erbʼari wesidʼa atarraya bʼedaedʼa. Druadʼebara wawara kʼopana ẽbasia, awuarabʉrʉ kʼopanasia cien metro.
9 Drua wãbʉdadʼera ũdusidʼa tebʉ purea nʉmʉta, bʼeda ba nʉmʉta, pan kʼobʼʉta. 10 Maʉ̃ne Jesúsbara mawũãsia: Weudua bʼeda aritia jidabʉdata.
11 Mawũãĩ Simón Pedrora jãbadʼe edʼa wãpe atarraya drua webʉrʉta bʼeda zromarãba bira wesia, bʼedara bʼasia ciento cincuenta y tres. Mawũã biomina atarraya tʉdʼʉzoa ẽbasia. 12 Mobebʉrʉ Jesúsbara mawũãsia: Zeudua, nekʼoudua. Izha jʉrʉkuadʼabara miõba bʉra kʼaipe adʼa ẽbasia kʼawuasidʼa baera Nokʼota. 13 Aramaʉ̃ne Jesúsbara pan jiraedape dedʼekasia bʼedasidʼa dedʼekasia. 14 Maʉ̃ta zhi ũbea basia izha jʉrʉkuadʼaa Jesús zhi ũdubi nʉmʉta beudʼata piradrʉpe.
Jʉredua mʉ pẽwã bʼeta
15 Nekʼodʼa tẽã Jesúsbara Simón Pedroa mawũãsia: Simón Jonás warra, ¿bʉa mʉrã audre kʉãgʼakʼa naʉ̃rãne kʼãñabara?
Mawũãĩ panaʉ̃ mawũãsia: Ããjã Nokʼó, bʉa kʼawua bʼʉa mʉã bʉra kʉãgʼata.
Mawũãĩ mawũãsia: Jʉredua mʉ pẽwã bʼeta.
16 Jarama ũmeta wakusa mawũãsia: Simón Jonás warra, ¿bʉa mʉrã kʉãgʼakʼa?
Mawũãĩ Pedrobara panaʉ̃ mawũãsia: Ããjã Nokʼó, bʉa kʼawua bʼʉa mʉã bʉra kʉãgʼata.
Mawũãĩ mawũãsia: Jʉredua mʉ pẽwã bʼeta.
17 Jarama ũbeata mawũãsia: Simón Jonás warra, ¿bʉa mʉrã kʉãgʼakʼa?
Pedrora sopuasia mawũã jarama ũbea, ¿bʉa mʉrã kʉãgʼakʼa abʉrʉba? Mawũẽ mawũãsia: Nokʼó bʉara jõma kʼawua bʼʉa. Bʉa kʼawua bʼʉa mʉã bʉra kʉãgʼata.
Mawũãĩ Jesúsbara mawũãsia: Jʉredua mʉ pẽwã bʼeta. 18 Mʉã wãrĩnu bʉaa jaraya: Bʉ kũrãta bʼasidʼera zhope wã bʼasia bʉzha krĩñama, mawũãmina ya zõrãta bʼebʉrʉdʼera bʉra juwua jirabʼariya, aramaʉ̃ne bʉra awʉrʉba zhobiya, mobe edeya bʉa krĩña ẽãma.
19 Maʉ̃bara Jesúsbara jara krĩñasia Pedro sãwũã beuita, aramaʉ̃ne kʼawuabigaita Daizeze zhi zromata. Maʉ̃ jarape mawũãsia: Mʉrã pẽwã bʼadua.
Izha jʉrʉdʼata kʉãgʼadʼebema
20 Pedroba jẽrũya akʉbʉrʉdʼera ũdusia kʼaidʼu taita Jesúsba jʉrʉdʼa Jesúsba kʉãgʼata, nekʼo duanune maʉ̃ abʼaʉta Jesús kʼaita kʼobʼadʼa basia, mawũã kʼobʼasidʼera mawũãsia: Nokʼó, ¿bʉra kʼaiba chãbʼariipe? 21 Pedroba maʉ̃ta ũdui Jesúa mawũãsia: Nokʼó, ¿naʉ̃ sãwũã berabʼariipe?
22 Mawũãĩ Jesúsbara mawũãsia: Naʉ̃ mʉ zeyeedʼa bʼaita mʉã krĩñabʉrʉ, ¿bʉa sãwũãĩpe? Bʉra mʉta pẽwã bʼadua.
23 Maʉ̃neba mebẽrãbara ãzhirãĩnu jara duanesia maʉ̃ Jesúsba jʉrʉdʼara beu ẽãta. Mawũãmina Jesúsbara jara ẽbasia beu ẽãta, awuarabʉrʉ mawũãsia: Naʉ̃ mʉ zeyeedʼa bʼaita mʉã krĩñabʉrʉ, ¿bʉa sãwũãĩpe?
24 Maʉ̃ Jesúsba jʉrʉdʼaba naʉ̃ bedʼeata jarakʼa bʼʉbʉrʉa. Kʼawua panʉã izha jara bʼʉra wãrĩnuta.
25 Dewara ne bio bʼʉa Jesúsba odʼara. Maʉ̃ta abʼa abʼaʉdʼe bʼʉsidʼabʉrʉ mʉma ẽjũãnerã ara ẽbakʼausia libro bʼʉkuadʼara.
Amén.
1:23 (Isaías 40:3)
12:13 (Salmos 118:25-26)
12:15 (Zacarías 9:9)
12:38 (Isaías 53:1)
12:40 (Isaías 6:10)
19:24 (Salmos 22:18)