YI 24

¿Kʼãrẽta jarabʉ Daizeze Bedʼeabara angelera ʉ̃rʉra?

Kartarata

Jeowabara kãgabʉ iyi mebẽrã ʉ̃tʉbemata ũdukʼawuadamarẽã. Maʉ̃ra mebẽrãne bʉ angelerata, maʉ̃rãra «Daizeze wũãwũãra» (Génesis 6:2; Job 38:7). ¿Kʼãrẽta jaradiabʉ Daizeze Bedʼeabara angelera ʉ̃rʉ? ¿Ẽbẽrarãra neida obʉka? akʉza ¿Angelera jõmaʉ̃ta Daizeze mebẽrãka?

1. ¿Kʼaira angelerãra?

Jeowaba naʉ̃ Drʉa parãi nãã, parãsi angelerata. Iyi kĩrãkʼa jauredebʉ, miõba ũduda ẽ akʉza ãyira ʉ̃tʉbʉ (Hebreos 1:14). Angelerãra mejãchabʉ, mamina ãyi aba abaka awuarabʉ (Apocalipsis 5:11). Ãyara obʉ «Iya [Jeowa] jarabʉta» «iyi nemi ũrĩpanʉneba» (Salmo 103:20). Naweda Jeowabara zokʼabasi angeleraʼa bedʼeata jaramarẽã, kʼarebamarẽã akʉza ẽdrʉbimarẽã iyi pʉwʉrʉrata. Idi ewadebida angelerabara kʼarebapanʉ kristianoraba ũdumarẽã ẽbẽrarã Daizeze ʉ̃rʉ kʼawuakĩrãbʉrata.

2. ¿Kʼai Diarura (Ãtomia) akʉza angelera kayiruarãra?

Ʉ̃kʉrʉ angelerabara ũrĩamasida Jeowaba jarabʉra. Yi nãã nemitia odara «Diaru iyabaʉta jarapanʉ Satana, iya naʉ̃ drʉa jõmaʉ̃nẽbemata sewa erbʉ» (Apocalipsis 12:9). Diarubara zokʼakĩrãbasi wuabema ẽbẽrarãta, maʉ̃ kʼãrẽa osi nããbema ẽbẽrarãba ũrĩna ẽ bamarẽã Daizeze Bedʼeata. Maʉ̃are ʉ̃kʉrʉ angelerasida abarika obisi iyide kĩrãkʼa. Maʉ̃ra trʉ̃ra angelera kayiruara. Jeowabara jʉretasi ʉ̃tʉba naʉ̃ Drʉa eda, aranʉ jõma makenanañi ãyira (akʉra Apocalipsis 12:9, 12).

3. ¿Sãwũã sewabʉ dayirãra Diarubara akʉza angelera kayiruarabara?

Diarubara akʉza iyi angelera kayiruabawaraʉba sewabʉ ẽbẽrarãra naʉ̃neba, jai ĩjãbʉdeba akʉza jõma angelera kayiruaraba obʉdeba. Bari jaradaita, ʉ̃kʉrʉbara jʉrʉpanʉ chĩdau ʉ̃rʉ ĩjãpanʉrãta, jaita, ẽbẽra nekʼãrẽ oda aripe jaradiabarita akʉza jaibanata, adewara jʉrʉpanʉ jaibanaba chiruadeba bebita. Maʉ̃ra jõma angelera kayiruaraneba zebʉ akʉza ʉ̃kʉrʉ ẽbẽraba krĩchabibʉ dayirã bedʼeaseabʉta beidabawara. Mamina Jeowaba dayirã jarabʉ kʼãrẽ: «Wãrãra jaibana beidaʉ̃me bedʼeabibʉma akʉza wãrãra ẽbẽra nekʼãrẽ oda aripe jaradiabarima» (Levítico 19:31). Jeowabara maʉ̃ta jarabʉ Diaruba akʉza angelera kayiruaraba neida oda ẽ marẽã, maʉ̃rãra Jeowa nejʉra, maʉ̃ba dayirãra sewakĩrãbʉ.

AUDRE BIʼIA KʼAWUADADRɄ

Nãã akʉdrʉ angeleraba kʼãrẽ nebia obʉta akʉza jʉra kʼawuabadrʉ jõma angelera kayiruaraba obʉdeba. Adewara akʉdaya sãwũã idu yi edebi ẽ baita Diarua akʉza angelera kayiruara.

Angel abaʉba Jeowa ʉ̃rʉ Kʼawuabipanʉrã ũme deza deza jaradiapanʉta edebʉ ẽbẽrarãinʉ.

4. Angelerabara kʼarebabʉ ẽbẽrarãba Jeowata ũdukʼawuamarẽã

Daizeze angelerabara ẽbẽrarã jaradia ẽ, awuarabʉrʉ kʼarebabʉ ẽbẽrarã Daizeze ode bʉba, jʉrʉdamarẽã Jeowa ũdukʼawuakĩrãbʉta. Akʉra Apocalipsis 14:6, 7, mõbe naʉ̃ta panʉidua:

¿Kʼãrẽa nesidapanʉ angelera kʼarebata jaradia wãbʉrʉde?
¿Bʉra sobiabʉka angeleraba kʼarebabʉ baera ẽbẽrarã Daizeze Bedʼea ũrĩkĩrãbʉʼa jaradiaita? ¿Kʼãrẽa sobiabʉ?

Nekʼãrẽ jaidebema biobʉrata: tabla jemenebarideba ẽbẽrarãba jʉrʉpanʉ angele kayiruarabawara bedʼeaita, bola kristalta, libro bampiro ʉ̃rʉ bedʼeabʉta, karta tarota, muñeko buduta, insiensota, nekʼãrẽ nʉ̃gʉda ẽ bamarẽã jʉ̃bʉta, nekʼãrẽ oma yiwidʼibʉta akʉza nekʼãrẽ kĩrãtanabʉta.

5. Jʉrada jai ĩjãbʉdeba zebʉra akʉza jõma angelera kayiruaraba obʉdeba zebʉra

Diarura akʉza angelera kayiruarãra Jeowa nejʉra, abarika dayirã nejʉra. Akʉra Lucas 9:38-42, mõbe naʉ̃ta panʉidua:

¿Sãwũã edabʉ angelera kayiruarabara ẽbẽrarãra?

Diaruba obʉta ĩjãnʉma be ẽ, mawũã iya zokʼa ẽ bamarẽã dayirã bebʉta. Akʉra Deuteronomio 18:10-12, mõbe naʉ̃ta panʉidua:

¿Angelera kayiruarabara sãwũã zokʼakĩrãbʉ dayirã bebʉra akʉza sãwũã bedʼeakĩrãbʉ dayirãbawara? ¿Jõma angelera kayiruaraba obʉdebara bʉ bʉmaera, saʉ̃ta audre ũdupanʉ?
Bʉmara, ¿yibiaka Daizezeba jarabʉra jõma angelera kayiruaraba obʉra zeri ẽãta? ¿Kʼãrẽa mawũã krĩchabʉ?

Akʉra BIDEOTA, mõbe naʉ̃ta panʉidua:

BIDEO: «Jʉraidua Diarura» (5:02)

¿Bʉmara, Palesa wũãwũãba juwade jʉ̃badata nʉ̃gʉda ẽ bamarẽã, maʉ̃ra nekayiruabasika?
¿Kʼãrẽta oibarabasi Palesara angelera kayiruaraba neida oda ẽ bamarẽã?

Kristianora wãrĩnuarabara oda ẽ angelera kayiruaraba obʉta. Akʉra Hechos 19:19 akʉza 1 Corintios 10:21, mõbe naʉ̃ta panʉidua:

¿Kʼãrẽa jõma angelera kayiruraneba zebʉra babʉedaibara?

Yuwẽrã abaʉba babʉenʉmʉ iya nekʼãrẽ jaidebema erbadata.

6. Bʉa baebiseabʉ Diaruta akʉza iyi angelera kayiruarabawara

Diaruba zokʼabʉ angelera kayiruarãra. Mamina angel biarãra zokʼabʉ Arkangel Miguelba, maʉ̃ra iyabaʉta Jesu. ¿Kʼãrẽaba zareabarabʉ Miguelʼra? Akʉra Apocalipsis 12:7-9, mõbe naʉ̃ta panʉidua:

Saʉ̃ta audre zareabarabʉ: ¿Miguelta iyi angelerabawara mawũã ẽ bʉrʉ Diaruta iyi angelera kayiruarabawara?
Jesu kʼaidu panʉrãra, ¿peraibaraka Diaru kʼarea akʉza iyi angelera kayiruara kʼarea?

Bʉa baebiseabʉ Diaruta akʉza iyi angelera kayiruarabawara. Akʉra Santiago 4:7, mõbe naʉ̃ta panʉidua:

¿Bʉra sãwũã jĩga baseabʉ Diarudeba akʉza angelera kayiruaraba neida oda ẽ bamarẽã?

Ʉ̃KɄRɄBA KRĨCHAPANɄTA: «Jemeneita, pelikula jaibarabʉ akʉita, beidara jaurede wãbarita akʉza angelera kayiruarata, maʉ̃rabara dayirãra neida oẽ. Bari jemene maʉ̃ra».