BEDʼEA YI NÃÃRABEMATA
Daizeze Bedʼea ãrĩkĩrãbasimina idibasidu bʉ
JÕBIKĨRÃPANɄ: Politikoraba akʉza saserdoteraba nekʼãrẽ mejãcha osida Daizeze Bedʼea neẽã oita. Maʉ̃ kʼarea iduaribi ẽ basi wuabemara ẽbẽrarã Daizeze Bedʼea erbaita akʉza tradusita. Akʉdaya yiza ũme:
Poaga 167de Kristo nãã, nokʼo Antíoco Epífanes zokʼasi jõma Daizeze Bedʼea neẽã odamarẽã, kãgabasi baera Judioraba griego religioraba obʉta odamarẽã. Heinrich Graetzba bʉsi: «Daizeze Bedʼea bʉratʉmabʉra ãyara jõma ãrĩkua kʼãrãpe babʉekuasida ãya ũdubʉrʉra akʉza Daizeze Bedʼea akʉnʉmʉta ũdupanasibʉrʉ akʉza maʉ̃ kʼarebata jʉrʉbasibʉrʉ beapanasi».
Edad Mediade, saserdoterabara mejãcha kĩrʉbasi ãyibawara bʉ ẽãba Daizeze Bedʼea ʉ̃rʉ jaradiabaside, kãgabasi baera katolikoba jaradiabʉtrʉ jaradiaita. Jarapanasi erbaibarabasita Salmos latín bedʼeadebʉta, maʉ̃ awuara Daizeze Bedʼeadebemata erbasibʉrʉ jarapanasi maʉ̃bara jipa ũrĩkĩrã ẽ basita ãya jarabʉra. Saserdoterata ãba zeda kʼãrãpe jarasida yumakẽrãraʼa: «Mesera jʉrʉdamarẽã ẽbẽrarã ũrikĩrã ẽãra ãyi deda, ãyi sama bʉmae akʉza maʉ̃ta ũdudara babʉedamarẽã ãyi deta».
Ẽbẽraba Daizeze Bedʼeata neẽã oita osidabʉrʉ idi ewadera akʉda ẽ bakasi.
William Tyndaleba Daizeze Bedʼea Inglesdes tradusidara neẽã oita oda ẽ basi, yi kopia ʉ̃tʉzebida ãrĩna kʼãrãpe babʉesidamina akʉza iyi beasidamina 1536de.
SÃWŨÃ IDIBASIDU BɄ DAIZEZE BEDʼEARA. Nokʼo Antíocobara jõbikĩrãbasi Daizeze Bedʼeara, maʉ̃ba pewãbasi kristianora Judiorara, mamina ʉ̃kʉrʉ Judiorara awuru pʉwʉrʉdebasi adewara ãyara erpanasi Daizeze Bedʼeadebema kopiata, maʉ̃ra akʉsida maʉ̃raneba zebʉrʉdeba idibasidu (Hechos 15:21).
Edad Mediade jari wãrĩnu Daizeze Bedʼea kãgapanʉrabara ãyi pewãsimina Daizeze Bedʼeara tradusipanasi akʉza kopiata opanasi. Karta ʉ̃tʉzebibari oi naweda poaga 1450 kʼawa, Daizeze Bedʼeadebemara ʉ̃kʉrʉta tradusisida 33 bedʼea awuara awuaraka, maʉ̃neba yẽta mejãcha tradusipanʉ akʉza ʉ̃tʉzebipanʉ.
IDI EWADE ŨDUPANɄTA. Nokʼoraba akʉza Saserdoteraba neida okĩrãpanʉmina akʉza aña jaradiapanʉmina Daizeze Bedʼeara naʉ̃ drʉa jõmaʉ̃nẽ tradusibʉda akʉza jõmaʉ̃ba akʉbʉ, mawũã Daizeze Bedʼea bedʼea awuara awuaraka tradusibʉdaba ẽbẽrarã mejãchaʉta kʼarebabʉrʉ.