¿Kʼãrẽta odaibara audre ĩjãita Jeowaba drʉa bia weya abʉ ʉ̃rʉ?

1, 2. ¿Kʼãrẽta odaibara ẽjũã kĩrãwãreã zeita jʉ̃ãpanʉena?

DAYIRÃBARA kãga Jeowaba jarabʉra naʉ̃ drʉa kʼãwũãbʉra jõbita akʉza ẽjũã kĩrãwãreã weya abʉra (2 Ped. 3:13). Dayirãba kʼawua ẽ mina maʉ̃ ẽjũã kĩrãwãreã sõbede zeita, kʼawuapanʉ naʉ̃ drʉade neida berabarinʉmʉba arakʼaitabata maʉ̃ zeira (Mat. 24:32-34, 36; Hech. 1:7).

² Maʉ̃ ze ẽ nãã dayirãra Jeowa odebʉta dããrabata mawũã ẽ bʉrʉ dããraba ẽãta, jõmaʉ̃ba nesidapanʉ audre ĩjãita maʉ̃ ẽjũã kĩrãwãreã ʉ̃rʉra, ¿kʼãrẽa? Dayirãba ĩjãbʉra aduaseabʉ baera. Pabloba jarasi dayirãba zarea ĩjãna ẽ bʉrʉ nekayirua yi edebibʉ kĩrãkʼabʉta (Heb. 12:1). Dayirãba ĩjãbʉta adua ẽ baira dayirãbara biode krĩchaibara nekʼãrẽ kʼarebabʉta ĩjãita ẽjũã kĩrãwãreã zeira arakʼaitabata (Heb. 11:1).

3. ¿Kʼãrẽta kʼawuadai naʉ̃ artikulodera?

³ Naʉ̃ artikulode kʼawuadayi nekʼãrẽ ũbea kʼarebabʉta dayirãba ẽjũã kĩrãwãreã zei ʉ̃rʉ audre zarea ĩjãita. Nããra, krĩchaibara Jesu beida ʉ̃rʉ. Ũme, krĩchaibara Jeowara kʼãrẽaba zarea barabʉta. Yi ũbeata, ewari jʉrʉibara Daizezedebema audre oita. Adewara kʼawuadayi sãwũã Jeowaba Habacucʼa bedʼea jaradaba, idi ewade sãwũã kʼarebabʉta audre ĩjãita. Mamina nããra kʼawuadayi idi dayirãba bedʼea zroma ũdubʉra ẽjũã kĩrãwãreã ʉ̃rʉ ĩjãbʉba sãwũã kʼarebaita maʉ̃ awuantaita.

KʼÃRẼA NESIDAPANɄ DAYIRÃBA ĨJÃBɄ ZAREA ERBAITA

4. ¿Kʼãrẽ jidaita krĩchabʉrʉde nesidabʉ zarea ĩjã bʼaita?

⁴ Ewariza dayirãbara krĩcha jidapanʉ, mawũã oira nesidapanʉ audre zarea ĩjã bʼaita. Bari jaraita, bia krĩchaibara kʼairabawara ãba bʼaita, kʼãrẽ pelikula akʉita, kʼãrẽne jemeneita, kʼaiʉ̃me juwa jidaita, krĩchaibara wũãwũã erbaita mawũã ẽ bʉrʉ erba ẽãta akʉza kʼãrẽne traja bʼaita. Maʉ̃ kʼarea yibiabayi dayirãkʉza widita: «¿Ũdubibʉka mʉ̃a krĩcha jidabʉba ewari jõbodoarebʉta akʉza ẽjũã kĩrãwãreã zeira arakʼaitabata? Mawũã ẽ bʉrʉ, ¿abarika krĩcha jidabʉka jari ẽbẽrarã ẽjũã kĩrãwãreã zei ʉ̃rʉ ĩjã ẽ kĩrãkʼa?» (Mat. 6:19, 20; Luc. 12:16-21). Dayirãba ĩjãpanʉbʉrʉ ẽjũã kĩrãwãreã zeita arakʼaitabata, naʉ̃ba kʼarebayi krĩcha bia jidaita.

5, 6. ¿Kʼãrẽa nesidapanʉ audre ĩjãita bedʼea zroma zebʉrʉdera? Yizata jara ũrĩbira.

⁵ Adewara dayirãbara bedʼea zromata ũdupanʉ, maʉ̃ne zarea ĩjãbʉta ũdubita nesidapanʉ. Bari jaraita, dayirãra pẽwãseapanʉ zʉbʉria odaita, mejãcha kayaseabʉ, mawũã ẽ bʉrʉ bedʼea zroma ũduseabʉ dayi maʉ̃ba sopʉabibʉta. Maʉ̃ bedʼea zroma zebʉrʉdera dayirãbara krĩchaseabʉ awuantaita, mamina maʉ̃ta mesera taʉ ẽãnera zarea odaibara audre ĩjãita Jeowa ʉ̃rʉ, mawũã sobia awuantaita maʉ̃ bedʼea zromara (Rom. 12:12; 1 Ped. 1:6, 7).

⁶ Dayirãba bedʼea zroma erpanʉnera krĩchaseapanʉ ẽjũã kĩrãwãreãra mesera ze ẽãta, mamina maʉ̃ba jarakĩrãbʉ ẽ dayirãbara ĩjãna ẽãta. Krĩchara naʉ̃ yiza ʉ̃rʉ, semana bio babʉrʉ kue zebʉta, krĩchaseabʉ ũmadaʉra ʉ̃tʉ ze ẽãta, mamina mawũã ẽ, ʉ̃tʉ zeyi ũmadaʉra. Abarika dayirãta bedʼea zroma kʼarea mejãcha sopʉabʉbʉrʉ krĩchaseabʉ ẽjũã kĩrãwãreãra ze ẽãta, mamina soiduba ĩjãpanʉbʉrʉ ĩjãnañi Jeowabara aripe oita iya jaradara (Sal. 94:3, 14, 15; Heb. 6:17-19). Dayirãba wãrĩnu ĩjãpanʉbʉrʉ Jeowaba jaradata, mawũãra nããra odayi iyideta.

7. ¿Dayirã sãwũã krĩchabʉta ãĩ bʉedaibara?

⁷ Adewara Daizeze bedʼea jaradiaide nesidapanʉ audre ĩjãita. Ẽbẽra mejãchaʉba ẽjũã kĩrãwãreã zei ʉ̃rʉ jarapanʉra ĩjãna ẽ (Mat. 24:14; Ezeq. 33:32). Maʉ̃ba jʉra kʼawuapanaibara naʉ̃ra ẽbẽraba krĩchabʉ kĩrãkʼa krĩchada ẽ baita. Mawũã berabari ẽ baita dayirãra zarea odaibara audre ĩjãnaita, maʉ̃ kʼarea bedʼea ũbea akʉdaya sãwũã oseabʉta.

KRĨCHAIBARA JESU BEIDA Ʉ̃RɄ

8, 9. ¿Sãwũã audre ĩjãbiseabʉ Jesu beida ʉ̃rʉ krĩchabʉbara?

⁸ Adewara dayirãbara audre zarea ĩjãseabʉ krĩchabʉde Jesu beida ʉ̃rʉ. Jesu beidaba ũdubibʉ Jeowaba jarabʉra wãrĩnu aripe oita. Dayirãbara bia krĩchadaibara kʼãrẽa beisita Jesura akʉza Jeowa kʼãrẽaba sopʉadata yi warra beiside. Naʉ̃ba ũdubibʉ baera Jeowaba ẽjũã kĩrãwãreã weya abʉra wãrĩnu weita, ¿kʼãrẽa mawũã jarapanʉ?

⁹ Jeowata Jesuʉ̃mera, ¿kʼãrẽta sãwũã berabarisi dayirã kʼarea? Jeowabara nama egoro eda zokʼa bʉesi yi warra nããbemara ẽbẽra nemitia oka kĩrãkʼa zemarẽã. Jesu nama egorode basidera mejãcha zʉbʉriasi akʉza iyi beisidebida, maʉ̃ kʼarea Jeowara mejãcha zʉbʉriasi. Jeowaba krĩcha ẽ basibʉrʉ dayirãta ewari jõmaʉ̃nẽ babita iduaribi ẽ bakasi kʼãwũã yi warra zʉbʉria beimarẽã (Juan 3:16; 1 Ped. 1:18, 19). Mamina iya iduaribisi baera beimarẽã, naʉ̃ba ũdubibʉ Jeowabara dayirãra ewari jõmaʉ̃nẽ ẽjũã kĩrãwãreãnẽ babita.

KRĨCHAIBARA JEOWARA KʼÃRẼABA ZAREA BARABɄTA

10. Efesios 3:20de jarabʉdera, ¿kʼãrẽta oseabʉ Jeowabara?

¹⁰ Ũmeta, dayirãba audre zarea ĩjãseapanʉ krĩchabʉde Jeowa kʼãrẽaba zarea barabʉta. Jeowara zarea barabʉ iya jarada jõma aripe berabaribita. Jeowaba ẽbẽra ewari jõmaʉ̃nẽ ẽjũã kĩrãwãreãnẽ babita jarabʉra, ẽbẽraba oira zare akʉza kĩrãbedaibara Jeowabara nekʼãrẽ oya abʉta ẽbẽraba obeda ẽãta, iyabʉrʉ nekʼãrẽ jõma oseabʉ (Job 42:2; Mar. 10:27). Maʉ̃ kʼarea dayirãbara soiduba ĩjãpanʉ Jeowaba weya abʉra wãrĩnu weita (akʉra Efesios 3:20).

11. Yizata jara ũrĩbira Jeowaba oya ada aripe berabaridata (akʉra rekuadro «Jeowaba nekʼãrẽ nebia oya ada aripe berabarida»).

¹¹ Krĩchadadrʉ Jeowaba iyi pʉwʉrʉ nããbemara kʼãrẽ ara oya adara aripe berabaribida ʉ̃rʉ. Jeowaba jarasi Abrahánʼa akʉza yi kima Saraʼa ãyi zõna babʉrʉde wũãwũã erpanaita (Gén. 17:15-17). Akʉza jarasi Abrahánʼa iyideba zebʉrʉ wũãwũãra, diaita Canaán drʉata. Israelitara Abrahánʼneba zedara Egiptode wuabemara nezokʼabadaraba, krĩchaseapanasi Jeowaba Abrahánʼa jaradara aripe berabari ẽãta, mamina maʉ̃ra tẽã jõma aripe berabarisi. Tẽã juneane nabema siglode Jeowaba Elisabetʼa jarasi iyi yõdrarabasimina wũãwũã erbaita. Adewara Jeowaba jarasi Maríaʼa wũãwũã baraita iyira mia kʼai yumakẽrãʉ̃me ãba kʼãĩkabasimina, maʉ̃ wũãwũãra Jesubasi. Jesudeba Jeowabara aripe berabaribisi iya jardin Edénʼne jaradata (Gén. 3:15).

12. ¿Sãwũã audre ĩjãbibʉ Jeowa zarea ʉ̃rʉ Josué 23:14 akʉza Isaías 55:10, 11bara?

¹² Dayirãba akʉpanʉne sãwũã Jeowaba jaradara aripe berabari wãta, naʉ̃ba audre ĩjãbibʉ Jeowa zarea ʉ̃rʉ, adewara wãrĩnu weita ẽjũã kĩrãwãreã iya weya abʉra (akʉra Josué 23:14; Isaías 55:10, 11). Mawũã obʉba kʼarebayi dayirãba wuabemara jaradiaita ãyabida ĩjãnamarẽã Jeowabara wãrĩnu ẽjũã kĩrãwãreãra weita, mawũã krĩchada ẽ marẽã sewidata. Jeowaba jaraside bajã yiwidi weita akʉza egoro yiwidi weita, iya jarasi: «Naʉ̃ bedʼearata, kʼẽrẽpabʉ [...] akʉza wãrĩnu [...]» (Apoc. 21:1, 5).

EWARI JɄRɄIBARA DAIZEZEDEBEMA AUDRE OITA

13. ¿Sãwũã audre zarea ĩjãbiseabʉ ãba yi jʉrebʉbara? Jara ũrĩbira.

¹³ Yi nekʼãrẽ ũbeaba dayirã kʼarebaseabʉ audre ĩjãita, ewari jʉrʉbʉde Daizezedebema audre oita. Krĩchadaya kʼãrẽne kʼarebabʉta ãba yi jʉrebʉbara. Annara poaga bioba ewari jõmaʉ̃nẽ trajabʉta Daizezeita, iya jarabʉ: «Ãba yi jʉrebʉbara kʼarebabʉ mʉ̃aʼa audre ĩjãita. Yi nejaradiabʉba biʼia jaradiabʉ ẽ mina akʉza eda kʼãrẽ bedʼea yiwidita jarabʉ ẽ mina. Mawũã wãbʉba kʼarebabʉ audre bia ũrĩta Daizeze Bedʼeade jarabʉta, naʉ̃ba audre ĩjãbibʉ».b Dayirãbida audre zarea erbaseabʉ dayirãba ĩjãbʉra ũrĩpanʉne mebẽrãba komentario diapanʉta (Rom. 1:11, 12; 10:17).

14. ¿Sãwũã audre ĩjãbibʉ Daizeze bedʼea jaradiabʉbara?

¹⁴ Adewara dayirãba ĩjãpanʉra audre zarea erpanʉ Daizeze Bedʼea jaradiapanʉne (Heb. 10:23). Mebẽã Barbara Daizeze odebʉta 70 poaga baba jarabʉ: «Kʼawuabʉ Daizeze Bedʼea jaradiabʉbara audre ĩjãbibʉta, wuabema ẽbẽrarã jaradiabʉrʉde Daizezeba kʼãrẽ nebia weya abʉ ʉ̃rʉ, naʉ̃ba kʼarebabʉ mʉ̃a audre ĩjãita».

15. Daizeze Bedʼea dobaʉba estudiabʉbara, ¿sãwũã kʼarebabʉ audre ĩjãita? (Akʉra potorata).

¹⁵ Adewara kʼarebabʉ dayirãba audre ĩjãita dayidoba Daizeze Bedʼea estudiabʉde. Mebẽã Susanʼra kʼarebasi ewari jʉrʉiba Daizeze Bedʼea sõbede estudiaita. Iya jarabʉ: «Domingodera estudiabʉ karta Jarakabʉ wuarebema semanane estudiadaita, adewara lunes akʉza martesidera estudiabʉ Karta Nekʼawuabarira akʉza wuabema ewaridera mʉ̃ya audre kʼawuakĩrãbʉta estudiabʉ». Mawũẽra Susanʼra Daizeze Bedʼea sõbede estudiaita ewari jʉrʉbʉba, kʼarebabʉ iya audre ĩjãita. Irenera sentral mundialde trajabʉta dããraba, iya jarabʉ Daizeze Bedʼeade propesiarabʉ ʉ̃rʉ estudiabʉba kʼarebabʉta audre ĩjãita. Iya jarabʉ: «Yibia kʼawuaita sãwũã Daizeze Bedʼeade propesiara jarabʉra aripe berabari wãta».c 

«JÕMA ARIPE BERABARIYI»

16. ¿Kʼãrẽa Jeowaba Habacucʼa bedʼea jaradara idibasidu yibia dayirãita? (Hebreos 10:36, 37).

¹⁶ Ʉ̃kʉrʉ mebẽrãbara dããraba Daizeze ewari zeita jʉ̃ãbʉta. Ʉ̃kʉrʉ ẽbẽraba jarapanʉ Daizeze ewarira yateda zeibarabasita, mamina Jeowabara kʼawuabʉ iyi odepanʉrãra sãwũã sentibʉta. Iya Habacucʼa jarasi: «Wabida waebʉ ʉrʉmabʉde ũduda zeira akʉza naʉ̃ra mesera wã aripe berabarita, sewidata jara ẽ. Ãza zei kĩrãkʼabʉmina, maʉ̃ta jʉ̃ãkĩrã jʉ̃ãbara. Jõma aripe berabariyi. Ãza ze ẽ bayi» (Hab. 2:3). ¿Jeowabara naʉ̃ bedʼeara Habacucʼa jarasika iyitrʉ kʼarebaita? Mawũã ẽ bʉrʉ, ¿naʉ̃ bedʼeabara idi ewade dayirãsida kʼarebabʉka? Daizeze jaure zareadeba Pablobara naʉ̃ bedʼeata jarasi kristianora, ãyara jʉ̃ãpanasi Daizeze ewarita (akʉra Hebreos 10:36, 37). Dayirãba krĩchapanʉbʉrʉ Jeowaba ẽjũã kĩrãwãreã weya adata mesera ze ẽãta, wãrĩnu ĩjãnaibara maʉ̃ra «jõma aripe berabariyi, ãza ze ẽ bayi».

17. ¿Sãwũã mebẽã abaʉba Jeowaba Habacucʼa ũrãgʼa diadara ũrĩsi?

¹⁷ Mebẽrã mejãchaʉta Jeowa odepanʉrata ãya naʉ̃ ũrãgʼata oũdubibʉ «jʉ̃ãkĩrã jʉ̃ãbara». Bari jaradaita mebẽã Louiseta iyira Daizeze ode jʉ̃drʉsi 1939de. Iya jarabʉ: «Maʉ̃ ewaridera mʉ̃a krĩchabasi Daizeze ewarira zeita mʉ̃ kolegio jõi nãã, maʉ̃ra berabari ẽ basi. Mʉ̃ara lesi Daizeze Bedʼeade sãwũã eda jarabasita ʉ̃kʉrʉ iyi odepananaraba jʉ̃ãbasita Jeowaba jaradata aripe berabarimarẽã. Maʉ̃ba mʉ̃ra kʼarebasi, mʉ̃abida abarika jʉ̃ãita Jeowaba jarabʉta. Lesi Noé ʉ̃rʉ, Abrahán ʉ̃rʉ, José ʉ̃rʉ akʉza wuabemara iyi odepananaraba sãwũã jʉ̃ãpanasita ewari biobayeda akʉza sãwũã Jeowaba ãya jʉ̃ãbada kʼarea diasita nebiata. Jʉ̃ãkĩrã jʉ̃ãbaiba kʼarebasi mʉ̃ta akʉza wuabemarata, ĩjãita ẽjũã kĩrãwãreã zeira arakʼaitabata». Mebẽrã Daizeze odepanʉra dããrabadarabida maʉ̃rane kĩrãkʼa abarika krĩchapanʉ.

18. Nekʼãrẽ parãna akʉiba, ¿sãwũã audre ĩjãbibʉ ẽjũã kĩrãwãreã zei ʉ̃rʉ?

¹⁸ Wãrĩnu ẽjũã kĩrãwãreã wabida ze ẽ, mamina krĩchadaibara nama nekʼãrẽ biabʉta: Bakururata, nedʉwʉrʉrata akʉza ẽbẽrarãta. Maʉ̃ra naena neẽbasimina, mia abaʉba jarabe ẽ maʉ̃ra neẽãta, maʉ̃ra nama ũdupanʉ Jeowaba parãsi baera (Gén. 1:1, 26, 27). Jeowaba jarasi weita ẽjũã kĩrãwãreãta akʉza iya jaradara aripe oyi. Ẽjũã kĩrãwãreãnẽra ẽbẽrarãra ewari jõmaʉ̃nẽpanañi akʉza kayakabayi. Ẽjũã kĩrãwãreãra Jeowaba jidada ewaride zeyi (Is. 65:17; Apoc. 21:3, 4).

19. ¿Bʉara sãwũã audre obiseabʉ bʉa ĩjãbʉ wari wãita?

¹⁹ Ẽjũã kĩrãwãreã zeyeda, zarea ora bʉa ĩjãbʉ audre waribita. Jesu beida kʼarea biga diara, akʉra Jeowa zareata akʉza ewariza ora audre iyi kʼawa babibʉta. Bʉa mawũã obʉbʉrʉ oyi «ĩjãbʉba akʉza jʉ̃ãbʉba nebia ũdudaide kĩrãkʼa» (Heb. 6:11, 12; Rom. 5:5).