Mayirai yi zarea diaidua ãba yi jʉrebarimae

1. ¿Kʼãrẽa komentario diapanʉ ãba yi jʉrebarimaera?

¿KʼÃRẼA wãpanʉ ãba yi jʉrebari edara? Wãpanʉ Daizezeʼabʉrʉ yiwidʼidaita (Sal. 26:12; 111:1). Adewara wãpanʉ yiya so zarea diadaita kʼãwũã bedʼea zroma ũdupanʉ kʼarea (1 Tes. 5:11). Juwa ʉ̃ta wuabʉrʉdera komentario diaita naʉ̃ ũmeta opanʉ.

2. ¿Sõbede dayirãra komentario diaseabʉ?

² Semanaza dayirãbara komentario diaseabʉ ãba yi jʉrebarimae. Bari jaradaita, kongregasione Jarakabʉ estudiabʉde juwa ʉ̃ta wuaseabʉ komentario diaita, adewara Karta Nekʼawuabari estudiabʉde «Jʉrʉda nekʼãrẽ biʼiabʉta Daizezedebemata», mama juwa ʉ̃ta wuaseabʉ komentario diaita akʉza «Ãba yi jʉrebarimae Daizeze Bedʼeadebema libro akʉita», maʉ̃ne edabida komentario diaseabʉ akʉza mebẽrãba bedʼea jaramarẽã widipanʉne mama juwa ʉ̃ta wuaseapanʉ komentario diaita.

3. ¿Kʼãrẽ bedʼea zromata ũduseabʉ akʉza Hebreos 10:24, 25bara sãwũã kʼarebaseabʉ?

³ Jõmaʉ̃ba Jeowa ʉ̃rʉ ibia bedʼeabikĩrãpanʉ akʉza mebẽrãsida so zarea diakĩrãpanʉ. Mamina bedʼea ũmechu dayirãita zarea babibʉta komentario diaita: perabʉ komentario diaita, edaʉde dayirã mejãcha komentakĩrãbʉ, mamina mebẽãba edaʉde dayaʼa dia ẽ. Maʉ̃nera, ¿kʼãrẽba kʼarebaseabʉ? Maʉ̃ra panʉñi apostol Pabloba ebreora karta bʉdade. Apostol Pabloba jaraside ãba yi jʉre bʼai ʉ̃rʉ, jarasi mebẽrãi yiya so zarea diaibarata (akʉra Hebreos 10:24, 25). Dayirãra mejãcha perada ẽ bayi komentario diabʉrʉdera dayirãba naʉ̃ta kĩrãbepanʉbʉrʉ. Dayirãba kʼawuada jara ũrĩbibʉrʉde, mawũã dayirã komentario badua diada ẽ bʉsida sobia baseabʉ wuabemasida komentario diai baera (1 Ped. 3:8).

4. ¿Naʉ̃ artikulodera kʼãrẽ bedʼea ũbeabʉta kʼawuadai?

⁴ Naʉ̃ artikulodera nãã kʼawuadayi kʼãrẽta oibarata dayirã kongregasion wikakirumina yiya so zarea diadaita, komentario mejãcha diada ẽ mina. Maʉ̃are akʉdayi kʼãrẽta oseabʉta kongregasion zromane yiya so zarea diaita, mama mejãchaʉta juwa ʉ̃ta wuapanʉ komentario diaita, adewara kʼawuadayi daya komentario diabʉdeba sãwũã so zarea diaseabʉta wuabemara.

KONGREGASION WIKABɄDE YIYA SO ZAREA DIAIDUA

5. ¿Sãwũã yiya so zarea diaseabʉ kongregasione wikapanʉbʉrʉ?

⁵ Kongregasion wikabʉdera yi jaradiabʉbara biobʉ ẽ baera neẽ kʼaita jidaita. Edaʉde iyara jʉ̃ãibara mebẽã abaʉba juwa ʉ̃ta wuamarẽã. Maʉ̃ba ãba yi jʉrebarimaera dayi masebiseabʉ, ¿bʉara kʼãrẽta oseabʉ? Bʉara badua juwa wuasebʉ, bʉa maʉ̃ta obʉbʉrʉ wuabemarasi kʼarebayi komentario dia bamarẽã.

6, 7. ¿Kʼãrẽta oseabʉ komentario diabʉrʉde perada ẽ baita?

⁶ ¿Kʼãrẽta oseabʉ perakʉbʉrʉ komentario diaita? Mejãchaʉta mawũã perapanʉ, mamina dayirã mebẽrã so zarea diaita nekʼãrẽ baduta oseabʉ dayi perabia yi edebi ẽ baita komentario diabʉrʉde, ¿sãwũã oseabʉ bʉa maʉ̃ra?

⁷ Adewara marara kʼarebaseabʉ akʉza jẽda akʉbʉrʉde awuru karta Jarakabʉ ʉ̃tʉ zebidade.b Bari jaradaita, nãã biʼia estudiara (Prov. 21:5). Bʉta bia estudiabʉbʉrʉ kʼawuabayi komentario diabʉrʉde kʼãrẽ jaraita, adewara komentario diabʉrʉde mejãcha bedʼearãra (Prov. 15:23; 17:27). Bʉ bedʼeabʉrʉdera wiña bedʼeaseabʉ, maʉ̃ba jaraseabʉ bedʼea ũme mawũã ẽ bʉrʉ aba, maʉ̃ba kʼarebayi bʉra. Dayita mejãcha bedʼeabʉbʉrʉ mebẽrãbara ũrĩna ẽ bayi mejãcha, mamina wika bedʼeabʉbʉrʉ audre ũrĩnañi. Bʉ mawũã wika bedʼeabʉba akʉza bʉ bedʼeadebʉ jarabʉba, ũdubibʉ bʉra wãrĩnu estudiasita akʉza ũrĩsita.

8. ¿Jeowabara sãwũã akʉbʉ dayirãba zarea obʉra komentario diaita?

⁸ Bʉa atia kʼawuada kĩrãkʼa osibʉrʉ, mawũãsidu wabida perabʉbʉrʉ bedʼeaita, wãrĩnu ĩjãbara Jeowabara bʉ kʼãwũã zarea obʉra akʉbʉta (Luc. 21:1-4). Jeowabara daya obe ẽãne wuetara widi ẽ (Filip. 4:5). Akʉra bʉa kʼãrẽta oseabʉta, mõbe ojʉ̃drʉra akʉza Jeowa yiwidʼira so aduʼa bʼaita. Bʉara komentario wiña dia jʉ̃drʉseabʉ.

YIYA SO ZAREA DIAIDUA KONGREGASION ZROMANE

9. ¿Kʼãrẽa zarea baseabʉ komentario diaita kongregasion zromanera?

⁹ Bʉ kongregasione mebẽrãta mejãchabʉbʉrʉ bʉitara zarea baseabʉ. Bari jaradaita, bʉ kongregasione mejãcha mebẽrã juwa ʉ̃ta wuapanʉbʉrʉ maʉ̃ba bʉara komentario diada ẽ bayi. Bari jaradaita, Daniellebara komentario jipa diakĩrãbasi.c Iyitara komentario diaira yibiabasi Jeowa trʉ̃ ʉ̃rʉ ibia bedʼeabibasi baera, maʉ̃ba ũdubibasi wuabemara sãwũã so zarea diabʉta akʉza iyisida sãwũã kʼarebabasita, mawũã Daizeze Bedʼeaba jarabʉ audre ĩjã wãita. Iyi awuru kongregasionʼena wãsidera iya mejãcha juwa ʉ̃ta wuabasimina jidada ẽ basi, edaʉde komentario ababi dia ẽ berabaribasi, iya jarabʉ mejãcha krĩcha zroma obasita: «Mʉ̃ara sentisi kongregasione nekʼãrẽ bio obadata jãrĩbʉda kĩrãkʼa, badua mawũã berabaribʉrʉdera krĩchabʉ krĩña mawũã opanʉta».

10. ¿Sãwũã audre komentario diaseabʉ?

¹⁰ ¿Bʉra Danielle kĩrãkʼa sentibarika? Mawũãbʉrʉ bʉara krĩchaseabʉ ãba yi jʉrebari eda wãbʉrʉdera komentario dia ẽ baita, mawũãsidu krĩcharãra komentario diabʉ idubʉita. ¿Kʼãrẽta oseabʉ? Bʉ estudiabʉrʉde bʉa mejãcha jʉrʉseabʉ komentario jaraita, bʉ nãã juwa wuabʉrʉde bʉaʼa komentario diada ẽ bʉrʉ, ãba jʉre barabʉ jõñiena bʉa komentario bio diaseabʉ. Bʉa karta Jarakabʉ estudiabʉrʉdera akʉra sãwũã parrapo aba abaka sãwũã bedʼea abarikabʉta, bʉa mawũã obʉbʉrʉ audre jaraseabʉ maʉ̃ artikulodebemata. Adewara mawũã estudiabʉbʉrʉ audre jara ũrĩbiseabʉ maʉ̃ artikulode yi bedʼea audre zareabʉta (1 Cor. 2:10). ¿Kʼãrẽa? Mawũã zareabʉ baera mejãchaʉta komentario diada ẽ bayi, mamina, ¿kʼãrẽta berabariseabʉ mawũãsidu bʉaʼa komentario diada ẽ bʉrʉ? Bʉra bedʼeaseabʉ yi Jarakabʉ jaradiabʉa ãba yi jʉrebʉ jʉ̃drʉi nãã, bʉaʼa diamarẽã bʉa komentario diakĩrãbʉta.

11. ¿Kʼãrẽta omarẽã zokʼabʉ Filipenses 2:4bara?

¹¹ (Akʉra Filipenses 2:4). Apostol Pablora Daizeze jaure zareaba kʼarebasi wuabemara kristianora jaramarẽã wubemara ʉ̃rʉ krĩchamarẽã. ¿Sãwũã dayirãbara oseapanʉ maʉ̃ ũrãgʼara ãba yi jʉrepanʉne? Kĩrãbedaibara dayirã kĩrãkʼa komentario diakĩrãpanʉta.

12. ¿Sãwũã so zarea diaseabʉ mebẽrãra ãba yi jʉrebarimaera? (Akʉra potota).

¹² Krĩchaidua naʉ̃ta. Bʉ neũdukʼawuarabawara bedʼeabʉdera bʉ ãyi bedʼeabi ẽã ¿bʉra ewari jõmaʉ̃nẽ bedʼeabʉka? Mawũã ẽ, bʉabida kãgabʉ ãyisida bedʼeamarẽã, ãya krĩchaseabʉ bʉara ũrĩamabʉta ãyi bedʼeabʉra. Maʉ̃ kĩrãkʼa ãba yi jʉrebʉrʉdera kãgapanʉ mebẽrã mejãchaʉta komentario diadamarẽã, maʉ̃ne dayirãba so zarea diaseabʉ wuabemara mebẽrãra iduaribibʉde komentario diadamarẽã (1 Cor. 10:24). Kʼawuadaya maʉ̃ sãwũã oseabʉta.

13. ¿Sãwũã iduaribiseabʉ wuabemarasi komentario diamarẽã?

¹³ Nããra mejãcha bedʼea ẽ baibara, maʉ̃ba iduaribiseabʉ baera wuabemara mebẽrãsida komentario diamarẽã, maʉ̃ba zõrãrãba mebẽrã yi audre kʼawuabʉraba maʉ̃ yizata diaseabʉ. Komentario wika diaimina maʉ̃ne awuara awuaraka jara wã ẽ baibara, bʉa maʉ̃ta jõma jarara wuabemarata komentario neẽã amaeseabʉ. Naʉ̃ parrapodera bedʼea ũme jarabʉ: mejãcha bedʼea ẽ baita akʉza komentario diabʉde wua eda jara ẽ baita. Bʉta nããra bedʼeaibʉrʉ yi jaradiabʉba bedʼea widibʉta panʉra.

14. ¿Kʼãrẽba kʼarebaseabʉ kʼawuaita sõbede juwa ʉ̃ta wuaita? (Akʉra potota).

¹⁴ Ũmeta, nãã bia krĩchara kʼawuaita sõbede juwa ʉ̃ta wuaita. Bʉta badua juwa ʉ̃ta wuabʉbʉrʉ, yi jaradiabʉa krĩchabiseabʉ bʉaʼa komentario diaibarata wuabemara juwa ʉ̃ta wuabʉbʉsida komentario diaita (Ecl. 3:7).

15. (1) ¿Sãwũã bʼaibara dayaʼa komentariota diada ẽ bʉrʉ? (2) ¿Yi jaradiabʉbara kʼãrẽta oibara wuabemara ʉ̃rʉ krĩchabʉta? (Akʉra rekuadrota «¿Kʼãrẽta oibarata bʉa jaradiabʉbʉrʉ?»).

¹⁵ Kongregasione mebẽrãta mejãcha juwa ʉ̃ta wuabʉbʉrʉ maʉ̃ba dayaʼa diada ẽ baseabʉ komentariora, maʉ̃ba dayirã sopʉaseabʉ. Maʉ̃ta berabarira zarea oibara kĩrʉnʉma ẽ baita (Ecl. 7:9).

16. ¿Sãwũã so zarea diabʉ awuru mebẽã komentario diabʉde?

¹⁶ Bʉa komentariota dia ẽ bʉrʉ bʉa kãgabʉ kĩrãkʼa, chupea ũrĩseabʉ mebẽrãba komentario diabʉta, mawũã ãba yi jʉrebari berabarida tẽã ãyaʼa biga diaita mawũã bia jaradabari, maʉ̃ta ora ãyaʼa so zarea diayi bʉa komentario diada kĩrãkʼa (Prov. 10:21). Ãya komentario diadabari biga diabʉde yiya so zarea diabʉ.

AKɄZA KʼÃRẼTA OIBARATA YIYA SO ZAREA DIAITA

17. (1) ¿Sãwũã yibarirabara komentario biata jarabiseabʉ yi wũãwũãra? (2) Bideoba ũdubisi nekʼãrẽ kimare oibarata komentario diaita, ¿saʉ̃ maʉ̃ra? (Akʉra notata).

¹⁷ Dayirã ãba yi jʉrebʉrʉdera sãwũãbʉde yiya so zarea diaseabʉ. Marata wũãwũãra barabʉbʉrʉ kʼarebaseabʉ mara wũãwũãrãra komentario jaramarẽã (Mat. 21:16). Edaʉde estudiaseapanʉ juwa jidai ʉ̃rʉ akʉza dayi sãwũã bia bʼai ʉ̃rʉ, yibarirabara yi wũãwũãrãra kʼarebaseabʉ maʉ̃ne sãwũã komentario bia diaita. Adewara kʼarebara mara wũãwũãrãra ãya komentariota diada ẽ bʉrʉ kʼawuamarẽã nekayirua ẽãta, bʉa maʉ̃ta jara ũrĩbira ãyira sopʉa ẽ bayi awurura komentario diabʉrʉ kʼarea (1 Tim. 6:18).d

18. ¿Dayara kʼãrẽta oibara mebẽrãba dayita aukʼara akʉ ẽ bamarẽã komentario diabʉrʉde? (Proverbios 27:2).

¹⁸ Jõmaʉ̃ba komentario biata jaraseabʉ, mawũã Jeowa trʉ̃ ʉ̃rʉ ibia bedʼeabita akʉza dayirã mebẽrã so zarea diaita (Prov. 25:11). Daya komentario diabʉrʉde dayi sãwũã berabarida ʉ̃rʉ jaraseabʉ mamina aukʼara jaranʉmabe ẽ dayi ʉ̃rʉ (akʉra Proverbios 27:2; 2 Cor. 10:18). Awuarabʉrʉ jaraibara Jeowa ʉ̃rʉ, iyi bedʼea ʉ̃rʉ akʉza iyi pʉwʉrʉ ʉ̃rʉ (Apoc. 4:11). Mamina parrapoba widibʉbʉrʉ kʼãrẽ dayi berabarida ʉ̃rʉ jaramarẽã jaraseabʉ. Ababema parrapode akʉdayi maʉ̃ ʉ̃rʉ.

19. (1) ¿Kʼãrẽta berabari ãba yi jʉrebarima wãbʉrʉdera wuabemara ʉ̃rʉ krĩchabʉbʉrʉ? (Romanos 1:11, 12). (2) ¿Bʉara komentario diabʉrʉdera kʼãrẽta audre kãga?

¹⁹ Dayirãba komentario diabʉrʉdera neẽ ley dayirãba sãwũã diai jarabʉra, mamina jõmaʉ̃ta zarea oseabʉ komentario diaita mawũã wuabemara so zarea diaita. Maʉ̃ oita zarea oibara komentario diaita, sobia bʼaibara dayaʼa komentario diabʉ kʼarea akʉza wuabemarabida. Ãba yi jʉrebarima wãbʉrʉde yiya krĩchapanʉbʉrʉ mawũãra jõmaʉ̃ta so zarea diadayi (akʉra Romanos 1:11, 12).