Angelera kʼẽrẽpabʉde kĩrãkʼa ora

1, 2. (1) ¿Kʼãrẽne awuarabʉ dayirãra angelerãnebara? (2) ¿Kʼãrẽne abarikabʉ dayirãra angeleraʉ̃mera?

DAYIRÃRA Jeowa pʉwʉrʉde bʉ baera dayirãi yi kãgapanʉ akʉza ãbaʉba Daizeze Jeowaʼa yiwidʼipanʉ. Maʉ̃rane edabʉ yuwẽrãrata, yumakẽrãrata pʉwʉrʉ awuara awuarakadebemata akʉza angelera mejãchabʉ (Dan. 7:​9, 10). Angelera ʉ̃rʉ krĩchabʉdadera krĩchaseapanʉ dayirã ʉ̃tabʉta ãyira dããraba baera Jeowaʉ̃me panʉta (Job 38:​4, 7). Ãyira mejãcha zarea barabʉ akʉza neneẽãbʉ, dayirãra maʉ̃ra kĩrãkʼa ba be ẽ nemitia omiara baera (Luc. 9:26).

² Angelerãra dayirãira awuarabʉmina, bʉ nekʼãrẽne abarika bʉta dayirã kĩrãkʼa. Bari jaraita, Jeowaba iyi sode kʼãrẽ nebia erbʉta ũdubipanʉ, dayirã kĩrãkʼa trʉ̃ barabʉ akʉza ãyi sãwũã bʉra aba abaka awuarabʉ. Adewara ãyikʉza krĩcha jidabʉ. Akʉza dayirãne kĩrãkʼa nekʼãrẽra Jeowaita awuara awuaraka opanʉ. Maʉ̃ awuara nesidapanʉ dayirã kĩrãkʼa Jeowaʼa yiwidʼidaita (1 Ped. 1:12).

3. ¿Kʼãrẽta kʼawuaseapanʉ angelera kʼẽrẽpa panʉranebara?

³ Nekʼãrẽ biode angeleraʉ̃me abarikabʉ baera naʉ̃raneba dayirãbara nekʼãrẽ biata kʼawuaseapanʉ akʉza so zarea diaseapanʉ. Naʉ̃ artikulode kʼawuadayi sãwũã angelerane kĩrãkʼa edabʉta ũdubidaita, sãwũã wuabemara kãga ũdubidaita, sãwũã awuantadaita akʉza sãwũã zarea odaibarata angelerane kĩrãkʼa kongregasion neneẽã erbaita.

ANGELERABARA EDABɄTA ŨDUBIPANɄ

4. (1) ¿Sãwũã ũdubibʉ angelerabara edabʉta krĩchabʉta? (2) ¿Kʼãrẽa edabʉta ũdubipanʉ angelerabara? (Salmo 89:7).

⁴ Angelerabara eda krĩchabʉta ũdubipanʉ. Ãya nekʼãrẽ mejãcha kʼawuabʉmina, adewara zarea barabʉmina, Jeowaba zokʼabʉta ũrĩpanʉ (Sal. 103:20). Jeowaba zokʼabʉra ãyara jõma aripe obʉ akʉza ãya kʼãrẽ obʉra wuabemara jarakanʉmʉ ẽ. Adewara ũdubibʉ ẽ wuabemara ãyi kʼãrẽãba zarea barabʉta akʉza ãyi trʉ̃ mia kʼaiba kʼawua ẽ mina ãyara sobiade opanʉ Jeowaba zokʼabʉra (Gén. 32:​24, 29; 2 Rey. 19:35).a Ãyara iduaribida ẽ ãyi ʉ̃rʉ ibia bedʼeadamarẽãra, maʉ̃ra Jeowade baera. ¿Angelerabara kʼãrẽa edabʉta ũdubipanʉ? Jeowata mejãcha kãgabʉ baera akʉza wawia ũdubipanʉ baera soiduba (akʉra Salmo 89:7).

5. ¿Sãwũã ũdubisi angelbara eda krĩchabʉta Juan kʼẽãside? (Akʉra potota).

⁵ Nebʉra aba akʉdaya sãwũã angel abaʉba ũdubisita eda krĩchabʉta. Poaga 96de, angel abaʉba yi trʉ̃ miõba kʼawuada ẽãba apostol Juanʼa urumabʉde nekʼãrẽta ũdubisi (Apoc. 1:1). ¿Kʼãrẽta osi apostol Juanbara? Iya maʉ̃ ũduside angel nãã sãkokode kʉba wãsi. Aramaʉ̃ta angelbara jarasi maʉ̃ta oẽ marẽã, iyira Juan kĩrãkʼa Daizeze nezokʼa baera akʉza jarasi Daizeze Jeowaʼabʉrʉ yiwidʼibarata (Apoc. 19:10). Angelba mawũã jaradaba ũdubisi eda krĩchabʉta, mesera jarasi baera Jeowaʼa abapaiʼabʉrʉ yiwidʼibarata. Naʉ̃ angel dããrabasimina Jeowaba zokʼabʉ obʉta akʉza mejãcha zarea barabasimina, ʉ̃tabʉta krĩcha ẽ basi Juanʼira awuarabʉrʉ jarasi Juan kĩrãkʼa iyira Daizeze nezokʼata. Naʉ̃ angelba Juanʼra kʼẽãibarabasimina iyara kĩrʉ kʼẽã ẽ basi, awuarabʉrʉ ibiade kʼẽãsi. Naʉ̃ angelbara kʼawuasibaibara Juanʼra sãkokode kʉbesita iyi nãã, iya ũdukata ũdusi baera.

6. ¿Sãwũã angelerane kĩrãkʼa eda krĩchabʉta ũdubiseapanʉ?

⁶ ¿Sãwũã angelerane kĩrãkʼa eda krĩchabʉta ũdubiseapanʉ? Dayirãba nekʼãrẽ Jeowaita obʉrʉdera, jara ẽ baibara daya biʼia ochuta akʉza wuabemara jaranʉma ẽ baibara bʉa kʼãrẽta osita (1 Cor. 4:7). Adewara krĩchada ẽ baibara wuabemara ʉ̃tabʉta dããraba baera Daizeze odebʉta, maʉ̃ta neẽbʉrʉ bʉa pribilegio biata erbʉ baera, awuarabʉrʉ dayirãba pribilegiota erbʉbʉrʉ audre edabʉta ũdubibara wuabemaraira (Luc. 9:48). Angelera kĩrãkʼa dayirãra wuabema nezokʼa bakĩrãpanʉ akʉza daya obʉdeba ũdubikĩrãpanʉ dayirãra wuabemaraira ʉ̃tabʉ ẽãta.

7. ¿Sãwũã eda krĩchapanʉta ũdubiseabʉ kʼẽãbʉdade akʉza ũrãgʼa diabʉdade?

⁷ Dayirãbara eda krĩchabʉta ũdubiseapanʉ mebẽrã kongregasionebema akʉza dayirã wũãwũãra kʼẽãbʉdade, mawũã ẽ bʉrʉ ũrãgʼa diabʉdade. Mawũã dayirãba kʼẽãbʉrʉde mawũã ẽ bʉrʉ ũrãgʼa diabʉrʉdera angelba oda kĩrãkʼa ibiade kĩrʉ ẽã jaraibara, mawũã maʉ̃ ẽbẽrata sopʉa ẽ marẽã. Dayirãba edabʉta ũdubipanʉbʉrʉ ũrãgʼa bia diadayi Daizeze Bedʼeadeba akʉza ãyaʼa wawia ũdubidayi adewara ibiade jaradiadayi (Col. 4:6).

ANGELERABARA KÃGA ẼBẼRARÃRA

8. (1) Lucas 15:10de jarabʉdebara, ¿sãwũã ũdubipanʉ angelerabara ẽbẽrarã kãgata? (2) ¿Sãwũã kʼarebapanʉ angelerabara jaradia wãbʉrʉdera? (Akʉra poto yi nããrabemata).

⁸ Angelerabara ẽbẽra zʉbʉriabʉra kʼãrẽ ẽ kĩrãkʼa akʉ ẽ, awuarabʉrʉ ãyisida sopʉabʉ maʉ̃ kʼarea. Ẽbẽra abaʉta Daizeze odeba ãĩ wãnata jẽda zebʉrʉdera ãyira mejãcha sobiabʉ. Mawũã ẽ bʉrʉ ẽbẽra aba Daizeze ode bʼaita nekʼãrẽ obʉbʉrʉ maʉ̃ kʼareabida mejãcha sobiabʉ (akʉra Lucas 15:10). Adewara angelerabara mejãcha kʼarebabʉ Daizeze bedʼea jaradiaide (Apoc. 14:6). Ãya Daizeze bedʼea jaradia ẽ mina kʼarebaseabʉ dayirãta ẽbẽrarã Jeowa ʉ̃rʉ kʼawuakĩrãbʉidu jʉ̃ẽnamarẽã. Dayirãbara aripe kʼawuada ẽ ewari jõmaʉ̃nẽ angeleraba kʼarebabʉ kʼawuaita, Daizeze Jeowabara zokʼaseabʉ baera iyi jaure zareata ẽbẽrarã iyi ʉ̃rʉ kʼawuakĩrãbʉidu jʉ̃enamarẽã akʉza kʼarebadamarẽã iyi ode bʉrata (Hech. 16:​6, 7). Jeowabara mejãcha zokʼabʉ iyi angelerata dayirã kʼarebaita, maʉ̃ba dayirãbara ĩjãseapanʉ Daizeze Bedʼea jaradia wãbʉrʉdera ãya kʼarebaita (akʉra rekuadro «ãyi yiwidʼira panʉsida»).b

9. ¿Sãwũã dayirãbara wuabemara kãga ũdubiseapanʉ angelerane kĩrãkʼa?

⁹ ¿Sãwũã dayirãbara wuabemara kãga ũdubiseapanʉ angelerane kĩrãkʼa? Kongregasione jarabʉdade mebẽã abaʉta jẽda zesita Daizeze Jeowama mejãcha sobiadaibara abarika angelera kĩrãkʼa. Bia edadaibara akʉza ũdubidaibara ãyira mejãcha kãgabʉta (Luc. 15:​4-7; 2 Cor. 2:​6-8). Adewara dayirãbara angelerane kĩrãkʼa oseapanʉ, zarea opanʉne Daizeze Bedʼea jaradiaita (Ecl. 11:6). Angelerabara kʼarebapanʉ dayirãta Daizeze Bedʼea jaradia wãita, dayirãsida zarea odaibara kʼarebadaita mebẽrã Daizeze Bedʼea jaradia wãita. ¿Sãwũã kʼarebaseapanʉ dayirãbara? Bari jaraita, Daizeze Bedʼea jaradia wãseabʉ, ʉ̃ra bʉrʉ Daizeze Bedʼea jaradia jʉ̃drʉbʉrʉme, mawũã ẽ bʉrʉ Daizeze Bedʼea jaradia wãseapanʉ mebẽrã zõrãrãbʉme akʉza kayabʉme.

10. ¿Kʼãrẽta kʼawuapanʉ Sara berabaridadeba?

¹⁰ ¿Kʼãrẽta oseapanʉ nãã jaradia bada kĩrãkʼa jaradiabeda ẽ bʉrʉ? Dayirãbara jʉrʉdaibara sãwũã kʼarebadaita angelerata Daizeze Bedʼea jaradia wãbʉrʉde. Akʉdaya Sara nebʉrata, iyira Indiadebema.c Sarara 20 poaga basi yi nãã edebaride bʉta. Mamina tẽã mejãcha kaya kʼãrãpe wãbe ẽ basi akʉza kamaneba piradrʉbe ẽ basi. Mawũã bʉba iyira mejãcha sopʉabasi mamina mebẽrã kʼarebadeba akʉza Daizeze Bedʼea lebʉdeba iyira jẽda so zarea besi. Maʉ̃ba jʉrʉsi sãwũã Daizeze Bedʼea jaradiaita. Iyira jewedabe ẽ baera kartasida bʉbe ẽ basi, maʉ̃ kʼarea jʉrʉsi selulardeba jaradiaita. Mawũẽra iya trʉ̃si ẽbẽrarã iya nãã akʉ wã badarata, maʉ̃raba iyaʼa jarasida kʼaira ẽbẽrarãba Daizeze ʉ̃rʉ kʼawuakĩrãbʉta. Iya mawũã odadeba ũdusi Daizeze Bedʼea kʼawuakĩrãbʉta 70. Mawũẽra maʉ̃ra ẽbẽrarã jõmaʉ̃a Daizeze Bedʼea jaradiabe ẽ basi, mejãcha bʉ baera. Maʉ̃ba iya kʼareba widisi mebẽrã kongregasionebema akʉza ʉ̃kʉrʉta diasi maʉ̃raba jaradiadamarẽã. Maʉ̃ra ʉ̃kʉrʉdebemara ãba yi jʉrebarieda wãpanʉ. Angelerãra mejãcha sobiabʉbaibara ũdubʉ baera mebẽrã Sara kĩrãkʼabʉta, ãya oseabʉta obʉ baera Daizeze Bedʼea jaradia wãita.

ANGELERABARA ŨDUBIPANɄ AWUANTAPANɄTA

11. ¿Sãwũã ũdubipanʉ angelerabara awuantabʉta?

¹¹ Dããraba angeleraba ũdu zebʉrʉta naʉ̃ drʉade sãwũã aripe oda ẽãta akʉza mejãcha kayirua opanʉta, mawũãsidu ãyara awuantapanʉ. Naʉ̃ra jipa dayirãita yiza bia. Ãya ũdusida sãwũã Diarura Jeowa ʉ̃rʉ wãsita akʉza ʉ̃kʉrʉ angelera Jeowaʉ̃me kʼẽrẽpa badara Diaruare wãsita (Gén. 3:1; 6:​1, 2; Judas 6). Daizeze Bedʼeabara jarabʉ angel aba ewari biobayeda yõsita angel kayirua mejãcha zarea barabʉme (Dan. 10:13). Adewara angelerabara ũdu zebʉda wiñabʉta ẽbẽrarã Jeoware wãpanʉra. Mawũãsidu Jeoware kʼẽrẽpapanʉ akʉza Jeowaba zokʼabʉra sobiade opanʉ. Ãyara kʼawuapanʉ Jeowabara naʉ̃ drʉade kʼãwũã zʉbʉriabʉra aranʉ jõbita.

12. ¿Kʼãrẽba kʼarebai awuantaita?

¹² ¿Sãwũã dayirãbara angelerane kĩrãkʼa awuantaseapanʉ? Dayirãbida ũdupanʉbaibara naʉ̃ drʉadera mejãcha zʉbʉriabʉta mawũã ẽ bʉrʉ pẽwãpanʉta. Mamina angelerane kĩrãkʼa dayirãbida ĩjãnaibara Jeowabara maʉ̃ra aranʉ jõbita. Maʉ̃ba angelera kĩrãkʼa aukʼarada ẽ baibara nebia opanaita (Gál. 6:9). Jeowaba jarabʉ kʼarebaita dayirãba awuantadamarẽã (1 Cor. 10:13). Maʉ̃ba dayirãbara Jeowaʼa wididaibara iyi jaure zareaba kʼarebamarẽã aduʼa bʼaita akʉza sobia panaita (Gál. 5:22; Col. 1:11). Ĩjãra Jeowa ʉ̃rʉ, perarãra, Jeowaba zarea diayi maʉ̃ awuantaita (Heb. 13:6).

ANGELERABA KʼAREBAPANɄ KONGREGASIONE NENEẼÃ BAMARẼÃ

13. ¿Naʉ̃ ewari jõbodoarera kʼãrẽta opanʉ angelerabara? (Mateo 13:​47-49).

¹³ Naʉ̃ ewari jõbodoare Jeowabara angelera trajo biata diasi (akʉra Mateo 13:​47-49). Naʉ̃ drʉa jõmaʉ̃nẽ ẽbẽrarã mejãchaʉba jʉrʉpanʉ Daizeze ʉ̃rʉ kʼawuaita. Maʉ̃ra ẽbẽrarãnebemara ʉ̃kʉrʉra nekʼãrẽ jõma obʉ Jeowa ode bʼaita, ʉ̃kʉrʉba mawũã oẽ. Angelerabara ẽbẽra nebia opanʉrata jãpe bʉebʉ yi nekayirua opanʉneba, mawũã kʼarebabʉ kongregasionta neneẽã bamarẽã. Mamina naʉ̃bara jarakĩrãbʉ ẽ ẽbẽrarã Jeowa odeba ãĩ wãnara jẽda zebe ẽãta akʉza jara ẽ kongregasionera wuara bedʼea zromara ũdu ẽ baita. Mawũẽra angelerãra mejãcha trajapanʉ kʼarebaita kongregasion neneẽã erbaita.

14, 15. ¿Sãwũã angelerane kĩrãkʼa ũdubiseapanʉ kãgabʉta kongregasion neneẽã erbaita? (Akʉra potota).

¹⁴ ¿Kʼãrẽta odaibara angelerane kĩrãkʼa kʼarebaita kongregasion neneẽã erbaita? Zarea odaibara Jeowaba kãgabʉde bʼaita akʉza ũdubita dayi sãwũã bʉdeba neneẽãbʉta. Dayirã aba abakaʉba jʉrʉdaibara neũdukʼawua biata akʉza oda ẽ baibara nekʼãrẽ Jeowadeba jĩga babibʉta. Mawũã odara dayirã sota bia akʉdayi (Sal. 101:3). Adewara dayirãbara kʼarebaseabʉ mebẽrãsida Jeowaʉ̃me kʼẽrẽpa bamarẽã. Bari jaraita, kʼawuadara mebẽã abaʉba nemitia obʉta, dayirãba naʉ̃ mebẽãta kãga baera jaraseabʉ bedʼeamarẽã zõrãrã kongregasionebemaʉ̃me, iya maʉ̃ta oẽ bʉrʉ dayirãta bedʼeaibara zõrãrãʉ̃me. Mawũã odayi kãgapanʉ baera maʉ̃ mebẽãra mesera kʼarebadamarẽã akʉza Jeowadeba jĩga wã ẽ marẽã kãgabʉ baera (Sant. 5:​14, 15).

¹⁵ Mebẽã abaʉba iya kayirua obʉta idubʉ ẽ bʉrʉ ãĩ wãseabʉ kongregasioneba. Mawũã berabaribʉrʉdera dayirãra ãyiʉ̃mera bedʼea ẽ (1 Cor. 5:​9-13).d Mawũã obʉba kʼarebabʉ kongregasion neneẽã bamarẽã. Dayirãta ãyiʉ̃me bedʼea ẽ bʉrʉ, naʉ̃ba ũdubibʉ ãyira kãgata. ¿Kʼãrẽa? Ãya ũdudara dayirãta Jeowaʉ̃me kʼẽrẽpabʉta, naʉ̃ba kʼarebaseabʉ ãyabida krĩchadamarẽã jẽda zeita Jeowama. Maʉ̃ba mebẽrã jẽda zebʉrʉdera mejãcha sobiadayi Jeowata akʉza angelerata, adewara dayirãsida (Luc. 15:7).

16. ¿Sãwũã angelerane kĩrãkʼa oseapanʉ dayirãbara?

¹⁶ Kʼãrẽ yibia Jeowaba iduaribibʉ baera dayirãba ũdukʼawuadamarẽã angelerata akʉza iduaribibʉ baera ãyibawara trajadamarẽã. Zarea odadrʉ dayirãbida angelerane kĩrãkʼa eda krĩchabʉta ũdubita, wuabemara kãgabʉ ũdubita, awuanta bʼaita akʉza jʉrʉita sãwũã kongregasion neneẽã erbaita. Dayirãba angelerane kĩrãkʼa opanʉbʉrʉ Jeowa mebẽrãne eda bayi ewari jõmaʉ̃nẽ.