Jeowaba bʉaʼa so zarea diabʉ

1. ¿Judiorãra Babilonianera sãwũã panasi?

KRĨCHADAYA judiora Babiloniaena jida edapeadara sãwũã sentipanasita. Ãya ũdusida sãwũã Babilonianebemaraba ãyi pʉwʉrʉ jõma ãrĩsita. Ãya nemitia oda kʼarea akʉza ãyi nããbemaraba nemitia oda kʼarea ãyira jida edesida awuru drʉaeda, maʉ̃ra zare basibaibara ãyitara (2 Crón. 36:​15, 16, 20, 21). Wãrĩnubaira ãyira Babilonianera zʉbʉria erpana ẽ basi jida erpana ẽ basi baera. Ãyara oseabasi nekʼãrẽ awuruta (Jer. 29:​4-7). Mamina ãyitara mama bʼaira zarea basi ãya jida ẽ basi baera maʉ̃ pʉwʉrʉeda wãita. Judioranebema abaʉba naʉ̃ta jarasi: «Babilonia do kʼawa jewedapanasi, mõbe Sión ʉ̃rʉ kĩrãbeda kʼãrãpe jẽgapanasi» (Sal. 137:1). Maʉ̃nera judiorabara nesidapanasi kʼaiba ãyaʼa so zarea diaita. Mamina, ¿kʼaiba diaseabasi so zareara ãyara?

2, 3. (1) ¿Kʼãrẽta osi Jeowaba judiora Babiloniaena ededapeada kʼarea? (2) ¿Kʼãrẽta akʉdai naʉ̃ artikulode?

² Jeowara «Zeze dayirã so zarea diabaria» (2 Cor. 1:3). Jeowabara kãga ẽbẽrarã iyi orrapanʉrãra, maʉ̃ kʼarea so zarea diakĩrãbʉ. Jeowabara kʼawuabasi ʉ̃kʉrʉ judioraba Babiloniaena jida ededapeadarabara ũdubidaibasita soiduba jẽda krĩchapanʉta akʉza jẽda iya kãgabʉ kĩrãkʼa yiwidʼidaibasita (Is. 59:20). Maʉ̃ kʼarea 100 poaga nãã judiora Babiloniaena jida ededai nãã, Jeowaba propeta Isaías bʉbisi libro Isaíasta ¿kʼãrẽa? Isaíasba jarabʉ: ««So zarea diaidua, so zarea diaidua mʉ̃ pʉwʉrʉa», maʉ̃ta jarabʉ mara Daizezeba» (Is. 40:1). Isaías librodeba Jeowaba so zarea diasi judiora.

³ Idi ewade dayirãbida judiorane kĩrãkʼa nesidapanʉ dayirãʼa so zarea diadamarẽã. Naʉ̃ artikulode akʉdayi bedʼea ũbea Jeowaba sãwũã so zarea diasita judiora. Nããra, jarasi soiduba jẽda krĩchadara kĩrãduaita ãyi nemitiara. Ũmeta, iyi pʉwʉrʉdebemara jarasi nebiata diaita. Yi ũbeata, kʼarebasi perada ẽ marẽã. Naʉ̃ra bedʼeara ũbeade ũdudayi sãwũã idi ewadebida Jeowaba abarika so zarea diabʉta dayirã.

JEOWABARA SO ZɄBɄRIA AKɄBɄ AKɄZA KĨRÃDUABɄ

4. ¿Jeowabara sãwũã ũdubisi so zʉbʉria akʉbʉta? (Isaías 55:7).

⁴ Jeowabara so zʉbʉria ũdubibʉ (2 Cor. 1:3). Maʉ̃ta ũdubisi judiora Babiloniaena jida ededapeadara jaraside ãyita soiduba jẽda krĩchadara iya kĩrãduaita ãyi nemitiara (akʉra Isaías 55:7). Jeowaba ãyaʼa jarasi ewari jõmaʉ̃nẽ so zʉbʉria ũdubita (Is. 54:8). ¿Sãwũã oibasi Jeowaba ãyaʼa maʉ̃ ũdubita? Judiora jõmaʉ̃ba ãya nemitia oda kʼarea zʉbʉria ũduibasimina Jeowaba jarasi ãyira ewari jõmaʉ̃nẽ Babiloniane baibasi ẽãta, zeibasita ewari ãyi mamaʉ̃ba ẽdrʉita (Is. 40:2). Jeowaba maʉ̃ jaradaba mejãcha so zarea diasibaibara judiora Babiloniaena jida ededapeadarãra.

5. ¿Dayirãbara kʼãrẽa judioraneira audre ĩjãseapanʉ Jeowabara so zʉbʉria akʉbʉta?

⁵ ¿Kʼãrẽta kʼawuapanʉ? Jeowabara dayirã nemitiara soiduba kĩrãduakĩrãbʉta. Judiorabara biʼia kʼawuapanasi Jeowaba mawũã kĩrãduabʉta ãyi nemitiara. Idi ewadera dayirãbara audre ĩjãseapanʉ maʉ̃ ʉ̃rʉ, ũdu zebʉda baera Jeowaba kʼãrẽta ozebʉrʉta dayirã nemitia kĩrãduaita. Isaíasba Jeowaba sãwũã kĩrãduabʉ ʉ̃rʉ jaradata poaga bio berabarida tẽã, Jeowaba zokʼasi yi Warrata nama egoroeda ẽbẽrarã soiduba jẽda krĩchabʉrʉra nemitia kĩrãduaita. Jesús dayirãbari mawũã beidadeba Jeowabara jipa kĩrãduaseabʉ dayirã nemitiara (Hech. 3:19; Is. 1:18; Efes. 1:7). Jeowabara wãrĩnu so zʉbʉria akʉbʉ iyi ode panʉrãra.

6. ¿Kʼãrẽa yibia Jeowaba dayirã so zʉbʉria akʉbʉ ʉ̃rʉ krĩchaita? (Akʉra potota).

⁶ Jeowaba Isaías 55:7de jaradaba mejãchade so zarea diabʉ dayirãʼa, audre dayirãba nemitia oda kʼarea waidide sopʉa panʉbʉrʉ maʉ̃ kʼarea jẽda krĩchasimina. Dayirãra audre sopʉa baseabʉ daya nemitia oda kʼarea bedʼea zromata ũdubʉbʉrʉ. Dayirãba nemitia odata jarasibʉrʉ akʉza maʉ̃ kʼarea soiduba jẽda krĩchabʉbʉrʉ, ĩjãseapanʉ Jeowabara dayirã nemitiara jipa kĩrãduasita. Akʉza kĩrãbedaibara Jeowaba nemitia kĩrãduabʉrʉdera iyara maʉ̃ra wua jẽda kĩrãbe ẽãta (naʉ̃ testoʉ̃me akʉra Jeremías 31:34). Jeowaba dayirã nemitiata kĩrãduasibʉrʉ dayirãbida kʼãrẽa maʉ̃ta jẽda kĩrãbenʉmaira neẽ akʉza Jeowabara akʉbʉ ẽ dayirãba nãã kʼãrẽ aña odata, awuarabʉrʉ iyara akʉbʉ idi ewade dayirãba kʼãrẽta opanʉta (Ezeq. 33:​14-16). Adewara kĩrãbedaibara idi ewade dayirãba nemitia oda kʼarea bedʼea zroma ũdubʉra Jeowaba jipa jõbita.

7. ¿Kʼãrẽba kʼarebai dayirãba nemitia oda zõrãrãʼa jaraide zare ba ẽ marẽã?

⁷ ¿Kʼãrẽta oseapanʉ dayirãba nemitia zromata osibʉrʉ mamina maʉ̃ta waidide jara ẽ bʉrʉ? Daizeze Bedʼeaba jarabʉ maʉ̃ta mawũã berabaribʉrʉdera dayirãbara kʼareba widiseabʉta zõrãrã (Sant. 5:​14, 15). Wãrĩnubaira zõrãrãʼa maʉ̃ jaraira zarea baseabʉ, mamina kĩrãbedaibara zõrãrãra Jeowaba jʉrʉsita dayirã kʼarebamarẽã. Maʉ̃ba dayirãta wãrĩnu soiduba jẽda krĩchapanʉbʉrʉ akʉza ĩjãpanʉbʉrʉ Jeowaba adewara zõrãrãba dayirã kãga ũdubita akʉza so zʉbʉria ũdubita, naʉ̃ba kʼarebayi ãyiʉ̃me bedʼeabʉrʉde zare ẽ bamarẽã. Akʉdaya Jeowaba sãwũã kʼarebasita mebẽã Arthurta.a Iyira mejãcha sopʉabasi iya nemitia oda kʼarea. Iya jarabʉ: «Mʉ̃a ẽbẽrarã ãkadabʉta akʉbʉta poaga aba basi, maʉ̃ne ewari aba ãba yi jʉrebarimae ũrĩsi krĩcha aduʼa bʼai ʉ̃rʉ bedʼeabʉta. Maʉ̃ne mʉ̃a mʉ̃ kimaʼa jara ũrĩbisi mʉ̃a kʼãrẽ aña obʉta akʉza zõrãrãʉ̃me bedʼeasi maʉ̃ ʉ̃rʉ. Mʉ̃a maʉ̃ obʉrʉdera dayima ne zʉgʉa zromata ãĩ bʉebʉrʉ kĩrãkʼa basi. Mawũãsidu mejãcha sopʉabasi mʉ̃a oda kʼarea. Zõrãrãba mʉ̃aʼa jarasida Jeowabara mʉ̃ra mitia akʉ ẽãta, ãya jarasida Jeowabara kʼẽãbʉta iya kãgara. Ãya maʉ̃ bedʼea jaradara mʉ̃ soidʉ zesi akʉza naʉ̃ba kʼarebasi krĩcha mitia zebʉrʉde maʉ̃ʼa yi edebi ẽ baita». Idi ewadera Arthurʼra yi nãã edebari akʉza zõrãrã kʼarebabari. Kʼãrẽ yibia dayirãba kʼãwũã soiduba jẽda krĩchabʉta ũdubibʉrʉde Jeowaba jipa kĩrãduabʉ baera dayirã nemitiata.

JEOWABA NEBIATA JɄ̃ÃBIBɄ

8. (1) ¿Kʼãrẽ nebiata diaya asi Jeowabara judiora? (2) Isaías 40:​29-31 bayeda jarabʉdebara, ¿nebia jʉ̃ãiba sãwũã kʼarebaseabasi judiorãra?

⁸ Jõmaʉ̃ba kʼawuapanasi pʉwʉrʉ Babilonianebemaba ẽbẽrarãta ãyi drʉaeda jida edebʉrʉdera maʉ̃ pʉwʉrʉdebara wua ẽdrʉ ẽ bai basita. Maʉ̃ kʼarea krĩchaseapanasi judiorãra pʉwʉrʉ Babilonianebara wua ẽdrʉ ẽ baita (Is. 14:17). Jeowaba ãyaʼa nebiata jʉ̃ãbisi, jarasi ãyira ẽdrʉbita maʉ̃ pʉwʉrʉdeba akʉza jẽda ãyi pʉwʉrʉeda edeibasita. Adewara mia kʼãrẽba iduaribi ẽ baibasita iya jarada aripe oita (Is. 44:26; 55:12). Jeowa dabʉ nããra Babiloniara nejarra kĩrãkʼa basi, kʼãrẽ ẽ basi, maʉ̃ra daya jãrãpʉatabʉrʉdera neẽãdogo baera (Is. 40:15). Naʉ̃ bedʼea biaba judiora Babiloniaena jida ededapeadara so zarea diaibasi. Mamina bari maʉ̃ awa ẽ basi. Isaíasba bʉside naʉ̃ta jarasi: «Yi Jeowa jʉ̃ãpanʉrãra zarea erbayi jẽda» (akʉra Isaías 40:​29-31). Ãyira nejõbʉ kĩrãkʼa wãbari wãibasi ãya nebia jʉ̃ãbʉba mejãchade zarea diaibasi baera.

9. ¿Judiorabara kʼãrẽa ĩjãseabasi ãyira Jeowabara wãrĩnu ẽdrʉbita?

⁹ Judiorabara erbasi kʼãrẽa ĩjãita Jeowaba jaradara wãrĩnu aripe berabarita. Ãyara ũdusidabaibara Jeowaba nãã nekʼãrẽ aripe oya adara wãrĩnu aripe ozebʉrʉta. Bari jaraita, ãyara bia kʼawuabasi Jeowaba jaradata Asiriadebemaba 10 triburata ãyi juwa edre baebibasita akʉza ẽbẽrarã mama badara ãyi nezokʼa babisidata (Is. 8:4). Adewara ãya ũdusida babilonioraba sãwũã pʉwʉrʉ Jerusalénʼra jõbisidata akʉza ãyi sãwũã jida edesidata Babiloniaena ãyi nezokʼa bʼaita (Is. 39:​5-7). Adewara ũdusida sãwũã nokʼo Babilonianebemabara Sedequíasʼra dauberrea oda kʼãrãpe edesidata Babiloniaena (Jer. 39:7; Ezeq. 12:​12, 13). Jeowaba jaradara jõma aripe berabarisi (Is. 42:9; 46:10). Maʉ̃ra propesiara aripe berabaribʉ ũdubʉrʉba kʼarebasi judiorabida ĩjãita Jeowabara ãyira wãrĩnu ẽdrʉbita.

10. ¿Kʼãrẽba kʼarebai dayirãba nebia jʉ̃ãbʉ kĩrãdua ẽ baita?

¹⁰ ¿Kʼãrẽta kʼawuapanʉ? Dayirãta sopʉa panʉbʉrʉ, Jeowaba nebia diaya abʉ ʉ̃rʉ krĩchaiba so zarea diayi akʉza zarea diayi dayirãʼa. Idi ewade dayirãbara mejãcha ũdubʉ bedʼea zromata akʉza erpanʉ nejʉrara mejãcha zarea barabʉta, mamina maʉ̃ kʼarea sopʉada ẽ baibara. Kĩrãbedaibara Jeowaba dayirãita nebiata weita, mamara ewari jõmaʉ̃nẽ aduʼa panañi. Bari jaraita, krĩchadaya naʉ̃ yiza ʉ̃rʉ. Dayirãba akʉpanʉta ẽjũã biʼia baikirʉta bentana katotroanʉmʉneba, bia ũduda ẽ bayi jaigʉanʉmʉ baera. Maʉ̃ bia ũduira jareibara yi bentanata. Maʉ̃ kĩrãkʼa dayirãba nebia jʉ̃ãpanʉta badua kĩrãbepanʉ ẽ bʉrʉ akʉza maʉ̃ta dayi sode erbʉ ẽ bʉrʉ wiña wiñane adua wãseabʉ. Mõbemata, ¿kʼãrẽta odaibara maʉ̃ nebia jʉ̃ãbʉ kĩrãdua ẽ baita? Zarea odaibara ewari jʉrʉita krĩchaita ẽjũã bia zebʉrʉde dayirã sãwũã bʼai ʉ̃rʉ. Maʉ̃itara dayirãbara leibara artikulora maʉ̃ ʉ̃rʉ bedʼeabʉta, akʉibara bideorata akʉza ũrĩbara trãbirata maʉ̃ ʉ̃rʉ bedʼeabʉta. Adewara Jeowaʼa jara ũrĩbidadrʉ ẽjũã bia zebʉrʉde dayirãba kʼãrẽta audre ũdukĩrãbʉta.

11. ¿Kʼãrẽba kʼarebabʉ mebẽã Joy kayabʉmina zarea bʼaita?

¹¹ Akʉdaya mebẽã Joy nebʉrata. Iyira mejãcha kayabʉ, iya jara ũrĩbibʉ sãwũã nebia jʉ̃ãbʉ ʉ̃rʉ krĩchaiba mejãcha kʼarebabʉta. Iya jarabʉ: «Mʉ̃ aukʼara sopʉanʉminanera mʉ̃a Jeowaʼa jõma jarabʉ mʉ̃ sãwũã sentibʉta. Mõbe ĩjãbʉ iya panʉita mʉ̃ bedʼeara. Wãrĩnu Jeowaba mʉ̃aʼa diabʉ iyi zareata» (2 Cor. 4:7). Adewara Joybara krĩchabʉ ẽjũã kĩrãwãreã zebʉrʉde iyi sãwũã bʼaita, mamara mia kʼai ẽbẽrata kaya ẽ bai baera (Is. 33:24). Dayirãbida Jeowaʼa jõma jarapanʉbʉrʉ dayirã sãwũã sentibʉta akʉza dayirãba nebia jʉ̃ãpanʉ ʉ̃rʉ badua krĩchapanʉbʉrʉ, naʉ̃ba kʼarebayi zarea panaita.

12. ¿Kʼãrẽa ĩjãseapanʉ Jeowaba nebia weya abʉ ʉ̃rʉ? (Akʉra potota).

¹² Judiora Babiloniaena jida edesidadera erpanasi kʼãrẽa ĩjãita Jeowa ʉ̃rʉ, abarika dayirãbida erpanʉ kʼãrẽa ĩjãnaita Jeowaba jarabʉ ʉ̃rʉ. Krĩchadadrʉ idi ewade kʼãrẽ propesiata aripe berabari wã ʉ̃rʉ. Bari jaraita, bʉ nokʼo aba naʉ̃ drʉa jõma zokʼabʉta. Iyira zareabʉ mamina maʉ̃ daucha borekeabʉ (Dan. 2:​42, 43). Adewara ũdupanʉ drʉa urera bʉta drʉaza akʉza Daizeze Bedʼeara jaradia wãna drʉa jõmaʉ̃nẽ (Mat. 24:​7, 14). Idi ewadera dayirãbara naʉ̃ra propesia aripe berabari wãra ũdu wãna, naʉ̃ba audre ĩjãbibʉ Jeowaba nekʼãrẽ bia weya abʉra wãrĩnu oita.

JEOWABA KʼAREBABɄ PERADA Ẽ BAITA

13. (1) ¿Kʼãrẽ bedʼea zromata ũdudaibasi judiorabara ãyi ẽdrʉita kʼawa babʉrʉde? (2) Isaías 41:​10-13 bayeda jarabʉdera, ¿Jeowabara sãwũã so zarea diasi judiorãra?

¹³ Jeowaba bedʼea biata diasi judiora jarasi ãyi ẽdrʉbita. Mamina kʼawuabasi maʉ̃ ewari zebʉrʉdera ãyitara mejãcha zarea baibasita. Jeowaba yi jaramabasi zeita nokʼota Babilonia audupʉnʉta ãyi juwa edre baebita akʉza Babiloniasida (Is. 41:​2-5). Mawũẽra, ¿judiorãra perabaibarabasika maʉ̃ kʼareara? Mawũã ẽ. Naʉ̃ berabari nãã Jeowaba yi jaramabasi baera. Naʉ̃ta jarasi: «Perarãra mʉ̃ra bʉmebʉ baera. Krĩcha orãra mʉ̃ra bʉ Daizeze baera» (akʉra Isaías 41:​10-13). ¿Kʼãrẽa Jeowabara jarasi iyira ãyi Daizezeta? Jeowabara bari kãga ẽ basi ãyira iyaʼabʉrʉ yiwidʼidamarẽã, awuarabʉrʉ kãgabasi kĩrãbedamarẽã iyira ewari jõmaʉ̃nẽ ãyi kʼawa bʼaita akʉza kʼarebaita (Sal. 118:6).

14. ¿Adewara Jeowabara kʼãrẽta osi kʼarebaita judiora perada ẽ marẽã?

¹⁴ Adewara Jeowabara kʼãrẽta osi judiora kʼarebaita perada ẽ marẽã. Ãyaʼa kĩrãbebisi iyira mejãcha zarea barabʉta akʉza nekʼãrẽ mejãcha kʼawuabʉta. Ʉ̃ta akʉ jarasi bajãta, ũdubita chĩdaurabʉra iya parãsita, adewara maʉ̃ra trʉ̃ra aba abaka kʼawuabʉta (Is. 40:​25-28). Naʉ̃ba jarakĩrãbʉ Daizeze Jeowabara kʼawuabʉta ẽbẽrarã iyi ode bʉ trʉ̃ aba abaka. Jeowaba zarea erbʉbʉrʉ chĩdaura parãita, naʉ̃ba ũdubibʉ dayirãʼa zarea erbʉta iyi pʉwʉrʉ kʼarebaita. Mawũẽra judiorãra neẽ basi kʼãrẽa pera bʼaira.

15. ¿Kʼãrẽta osi Jeowabara judiora kʼarebaita?

¹⁵ Jeowabara judiorãʼa jarasi kʼãrẽta odaibarata maʉ̃ ewari zebʉrʉde. Isaías librode naʉ̃ta jarasi: «Eda wãidua mayi deda aramaʉ̃ta puertara serraidua. Mama eda mĩrʉ totoidua, naʉ̃ jõma berabariyeda» (Is. 26:20). Nokʼo Ciroba Babilonia iyi juwa edre baebiside judiorabara naʉ̃ testoba jarabʉ kĩrãkʼa osidabaibara. Ẽbẽra griego nekʼãrẽ berabarida ʉ̃rʉ mejãcha kʼawuabʉba jarasi, Ciro Babiloniainʉ jʉ̃ẽsidera iyi gorogorora jarasita yi ẽbẽrarã ewarade ũdubʉrʉrãra beadamarẽã. Maʉ̃nera ẽbẽrarã Babilonianebemarãra mejãcha perapanasibaibara, mamina judiora mama pananara neida berabari ẽ basi Jeowaba jaradata ũrĩsida baera.

16. ¿Kʼãrẽa perada ẽ baibara zʉbʉria zroma zei kʼareara? (Akʉra potota).

¹⁶ ¿Kʼãrẽta kʼawuapanʉ? Aranʉbai ũdudayi zʉbʉria zromata. Maʉ̃nera ẽbẽrarãbara kʼawua ẽ bayi kʼãrẽsida oita akʉza mejãcha peradayi, mamina Jeowa pʉwʉrʉra mawũã ẽ bayi, kʼawuapanʉ baera Jeowata dayirã Daizezeta. Adewara dayirãra perada ẽ bayi kʼawuapanʉ baera dayirã ẽdrʉbira arakʼaitabata (Luc. 21:28). Adewara Jeowa ʉ̃rʉ ĩjãnañi nokʼora ãba zebʉraba dayirã pẽwãbʉdadebida, maʉ̃bara jarakĩrãbʉ nokʼora ãba yi jʉrebʉta Jeowa pʉwʉrʉ pẽwãita. Jeowabara dayirãra kʼarebayi iyi angeleraneba akʉza jarayi kʼãrẽta oibarata maʉ̃neba ẽdrʉita. ¿Jeowabara sãwũã kʼawuabi dayirãba kʼãrẽta oibarara? Kʼawuada ẽ. Iyara maʉ̃ra kongregasioneba jaraseabʉ, naʉ̃ra dayirã mirʉbari kĩrãkʼa bayi, mamina maʉ̃ra bia kʼawuada ẽ. Maʉ̃ba nekʼãrẽ oya awa bakĩrãpanʉbʉrʉ mebẽrã kʼawa panaibara, adewara wãrĩnu ĩjãnaibara Jeowaba zokʼabʉta iyi organizasioneba (Heb. 10:​24, 25; 13:17).

17. ¿Kʼãrẽta oibara Jeowaba bʉa so zarea diamarẽã?

¹⁷ Judiora Babiloniane jida erbadaraita ãyi bʼaira mejãcha zarea basimina Jeowaba ãyaʼa so zarea diasi. Idi ewade Jeowaba abarika kʼarebayi. Maʉ̃ba kʼãrẽ ẽ naʉ̃ drʉade neida berabaribʉrʉ bʉsida dayirãbara jʉrʉdaibara Jeowata iya so zarea diamarẽã. Kĩrãbera Jeowabara so zʉbʉria ũdubibʉta akʉza zarea ora Jeowaba nebia weya abʉ ʉ̃rʉ badua krĩcha bʼaita. Adewara kĩrãduarãra Jeowara bʉ Daizezeta, maʉ̃ba bʉra kʼãrẽa peraira neẽ.