Trʉ̃ra zõrãrãta

1. ¿Jeowabara sãwũã ũdubisi iyi ode panʉrãra mejãcha kãgata?

JEOWABARA iyi ode panʉrãra mejãcha kãga, pastorba iyi obeja zake akʉbʉ kĩrãkʼa akʉbʉ Jeowabara. Jeowabara iyi Warrata diasi dayirã bari akʉza kongregasione zõrãrãta diasi dayirã kʼarebadamarẽã (Hech. 20:28). Jeowabara kãgabʉ naʉ̃ra zõrãrãbara iyi ode panʉra kãga ũdubidamarẽã akʉza bia edadamarẽã, naʉ̃ra zõrãrãbara Jesúsba jaradade opanʉ, Jesúsʼra kongregasion buru baera, maʉ̃ kʼarea zõrãrãbara so zarea diapanʉ mebẽrã akʉza kʼarebapanʉ mebẽrãba nemitia oda ẽ marẽã (Is. 32:​1, 2).

2. ¿Kʼairata audre kʼarebakĩrãbʉ Jeowabara? (Ezequiel 34:​15, 16).

² Jeowabara wãrĩnu kʼarebakĩrãbʉ iyi ode panʉrãra mamina audre kʼarebakĩrãbʉ yi zʉbʉria panʉrata, maʉ̃itara iyara zokʼabʉ zõrãrã kongregasionebemarata naʉ̃raba yi Jeowa ode kʉrãza panʉrata kʼarebadamarẽã (akʉra Ezequiel 34:​15, 16). Mawũẽra dayirãba kʼarebata nesida panʉbʉrʉ, ¿kʼãrẽta odaibara? Jeowabara kãgabʉ iyaʼa yiwidʼidamarẽã adewara zõrãrã kongregasionebema kʼarebata jʉrʉdamarẽã (Efes. 4:​11, 12).

3. ¿Naʉ̃ artikulobara dayirã jõma sãwũã kʼarebaseabʉ?

³ Naʉ̃ artikulode audre kʼawuadayi Jeowaba sãwũã zokʼabʉta zõrãrãta kʼarebaita mebẽrã iyi odeba wiña wiñane jĩga wãta adewara bedʼea ũbea panʉnañi: Nããra, ¿sõbede zõrãrã kʼarebata jʉrʉibara? Yi ũmeta, ¿kʼãrẽa jʉrʉibara zõrãrã kʼarebara? Yi ũbeata, ¿sãwũã kʼarebapanʉ ãyara? Dayirãta Jeowaʉ̃me bia panʉbʉrʉ akʉza iyi kʼawa panʉbʉrʉ atiaedara nesida ẽ zõrãrã kʼarebara, mawũãsidu naʉ̃ artikuloba kʼarebayi dayirãba Jeowaʼa audre biga diadamarẽã zõrãrãta diasi baera dayirã kʼarebaita akʉza kʼarebayi kʼawuaita dayirãba kʼãrẽta oita zõrãrã kʼarebata nesidapanʉbʉrʉ.

¿SÕBEDE JɄRɄSEABɄ ZÕRÃRÃ KʼAREBATA?

4. ¿Sãwũã kʼawuapanʉ Santiago 5:​14-16, 19, 20de jarabʉdera bedʼeabʉta ẽbẽra Jeowadeba wiña wiñane jĩga wãna ʉ̃rʉ? (Akʉra potota).

⁴ Santiagoba jara ũrĩbisi Jeowaba sãwũã kʼarebabʉta zõrãrãneba iyi ode panʉrata, iya jarasi: «¿Maranebʉka kayabʉra? Trʉ̃ra zõrãrã kongregasionebemata» (akʉra Santiago 5:​14-16, 19, 20). Naʉ̃ testodera Santiagora bedʼea basi ẽbẽra aba Jeowadeba wiña wiñane jĩga wã ʉ̃rʉ. Maʉ̃ta kʼawuapanʉ iyara jara ẽ basi baera mediko eda wãmarẽã, awuarabʉrʉ jarasi kayabʉbʉrʉ zõrãrã kongregasionebemainʉ wãmarẽã. Adewara iya jarasi ẽbẽra kayabʉra beita iya nemitia oda kĩrãdua bʉdadebʉrʉ. Krĩchadaya naʉ̃ta, ẽbẽra aba kayabʉta bekĩrãbʉbʉrʉ wãibara mediko eda, mõbe medikoa jara ũrĩbibara iyi sãwũã sentibʉ ʉ̃rʉ akʉza medikoba iya kʼãrẽ omarẽã jarabʉta jõma oibara. Abarika mebẽã abaʉta jẽda Jeowa neũdukʼawua bakĩrãbʉbʉrʉ jʉrʉibara zõrãrã kʼarebata ãyaʼa jara ũrĩbibara iyi sãwũã berabarinʉmʉ ʉ̃rʉ akʉza zõrãrãba Daizeze Bedʼeadeba ũrãgʼa diabʉta ũrĩbara.

5. ¿Dayirãbara sãwũã kʼawuadai wãrĩnu Jeowaʉ̃me biabʉ kʼawuaita?

⁵ Santiago yi zroma 5de Santiagoba jarasi dayirãba sentipanʉbʉrʉ Jeowadeba wiña wiñane jĩga wãta zõrãrã kʼarebata jʉrʉdamarẽã mamina jipade yibia zõrãrã kʼarebata jʉrʉita Jeowadeba jipa jĩga wãi nãã. Daizeze Bedʼeaba jarabʉ dayirãta jʉra kʼawua panʉ ẽ bʉrʉ krĩchaseapanʉta Jeowaʉ̃me bia panʉta maʉ̃ta mawũã chu ẽ mina (Sant. 1:22). Mawũã berabarisi ʉ̃kʉrʉ kristianora Sardisdebemarata, ãyara krĩchapanasi ãyira Jeowaʉ̃me bia panʉta, mamina Jesúsba jarasi Jeowabara ãyira bia akʉbʉ ẽãta (Apoc. 3:​1, 2). Dayirãbara, ¿sãwũã kʼawuadai wãrĩnu Jeowaʉ̃me biabʉ kʼawuaita? Maʉ̃itara krĩchaseabʉ dayi buru kʼoeside Jeowa sãwũã akʉbadata akʉza idi ewade sãwũã akʉbʉme (Apoc. 2:​4, 5). Bari jaraita, naʉ̃ra bedʼeata widiseabʉ bʉyikʉza: «¿Mʉ̃ara atiara Daizeze Bedʼeara lekĩrãne lebʉka akʉza maʉ ʉ̃rʉ krĩchabʉka nãã obada kĩrãkʼa? ¿Mʉ̃ra badua wãbʉka ãba yi jʉrebarieda akʉza mama wãi nãã estudiabʉka? ¿Mʉ̃itara jaradia wãita audre yibiaka? ¿Atiara mʉ̃itara audre yiabiaka nekʼãrẽ naʉ̃ drʉadebemata oita akʉza nebiata jʉrʉita?». Nama widibʉta bʉa sãwũã panʉbʉrʉdeba kʼawuayi kʼãrẽne jʉra kawua baibarata akʉza bʉa maʉ̃ta ara oẽ bʉrʉ maʉ̃bara Jeowadeba jĩga wãbiseabʉ. Adewara audre Jeowa kʼawa bʼaita bʉyidobaʉba obe ẽ bʉrʉ akʉza mawũã ẽ bʉrʉ nekʼãrẽ Jeowaba kãga ẽãta osibʉrʉ jʉrʉda zõrãrã kʼarebata.

6. ¿Kʼãrẽta oibara ẽbẽra abaʉba nemitia zromata osibʉrʉ?

⁶ Bʉ nemitia zroma kongregasioneba ãĩ wãbiseabʉta yi ẽbẽraba iya oda kʼarea jẽda krĩcha ẽ bʉrʉ, bʉa maʉ̃ nemitiata osibʉrʉ bedʼeara zõrãrãʉ̃me (1 Cor. 5:​11-13). Ẽbẽra abaʉba nemitia zromata osibʉrʉ iyi dobaʉba jẽda Jeowa neũdukʼawua babe ẽ maʉ̃bara nesidabʉ kʼaiba kʼarebaita. Dayirãba nemitia zroma oda kʼarea kãgabʉbʉrʉ Jeowaba maʉ̃ta kĩrãduamarẽã, nekʼãrẽ odaibara ũdubita wãrĩnu jẽda krĩchabʉta dayirãba nemitia oda kʼarea (Hech. 26:20). Maʉ̃ ũdubira jaraibara dayirãba kʼãrẽ nemitia zroma odata zõrãrã.

7. ¿Adewara kʼaiba nesida zõrãrã kʼarebara?

⁷ Zõrãrãbara bari kʼarebabʉ ẽ yi nemitia zroma odatrʉ maʉ̃ awuara kʼarebabʉ ẽbẽrarã Jeowadeba wiña wiñane jĩga wãsida (Hech. 20:35). Bari jaraita, bʉra zarea obʉbaibara krĩcha mitia yi edebi ẽ baita, mamina bʉita audre zarea bʉbaibara bʉa Jeowa ũdukʼawuai nãã chirua kayirua bʉratʉmata dobasi bʉrʉ, ẽbẽra ãkadabʉta akʉbasibʉrʉ, mawũã ẽ bʉrʉ Jeowaba kãga ẽãta obasibʉrʉ. Maʉ̃ba atiara bʉara krĩcha bʉbaibara bʉra zarea neẽãta maʉ̃ krĩcha mitia yi edebi ẽ baira. Mamina bʉara kʼarebata erbʉ, bʉ sãwũã sentibʉta zõrãrã jaraseabʉ, ãyara kĩrãkita ũrĩñi bʉ bedʼeara akʉza bʉaʼa ũrãgʼa biata diadayi, adewara jaradayi Jeowabara bʉra bia akʉbʉta bʉta krĩcha mitia yi edebi ẽ baera (Ecl. 4:12). Mamina mawũãsidu krĩcha mitia zebʉ kʼarea sopʉa bʉbʉrʉ zõrãrãba bʉa jaradayi bʉyikʉza ĩjã ẽãta akʉza bʉra wãrĩnu Jeowa neũdukʼawua bakĩrãbʉta (1 Cor. 10:12).

8. ¿Kʼãrẽ bedʼea zromata zõrãrã jaraita nesida ẽ?

⁸ Mamina dayirãba badu bedʼea zroma ũdubʉbʉrʉde jʉrʉibara ẽ zõrãrãta. Bari jaraita, daya mebẽã abaʉʼa iyi sopʉabibʉta jarasibʉrʉ akʉza iyiʉ̃me kĩrʉsibʉrʉ, zõrãrãʉ̃me maʉ̃ ʉ̃rʉ bedʼeai kaude Jesúsba ũrãgʼa diadata oseabʉ, jʉrʉseabʉ sãwũã ara oita yi bedʼea zroma mebẽãʉ̃me (Mat. 5:​23, 24). Adewara dayirã kartarane jʉrʉseabʉ, dayi sãwũã kĩrʉmia ẽ baibara ʉ̃rʉ, jʉ̃ã kʼawuabaibara ʉ̃rʉ akʉza dayi kakua bia zokʼa kʼawuaibara ʉ̃rʉ bedʼea bʉta. Mamina mawũãsidu daya bedʼea zroma maʉ̃ mebẽãʉ̃me erbʉta waidide ara oẽ bʉrʉ, maʉ̃ne bʉrʉ jʉrʉseabʉ zõrãrã kʼarebata. Pabloba pilipensera karta bʉ diabʉedade, Pabloba mebẽã abaʉʼa jarasi kongregasione kʼarebamarẽã Evodiata akʉza Síntiqueta ãyirai bedʼea zroma erbʉ baera. Abarika zõrãrã bʉ kongregasionebemaba kʼarebaseabʉ bʉta mebẽãʉ̃me bedʼea zroma erbʉ ara oita (Filip. 4:​2, 3).

¿KʼÃRẼA JɄRɄIBARA ZÕRÃRÃ KʼAREBATA?

9. ¿Kʼãrẽa bedʼeaibara zõrãrãʉ̃me bedʼeaita perabʉmina? (Proverbios 28:13).

⁹ Dayirãba nemitia zromata osibʉrʉ mawũã ẽ bʉrʉ zarea neẽ sentipanʉbʉrʉ krĩcha mitia oita zebʉa yi edebi ẽ baita zõrãrã kʼarebata jʉrʉdaibara, maʉ̃itara zowaĩnĩgʉabʉta ũdubibara akʉza wãrĩnu ĩjãbʉta. Mamina perada ẽ baibara maʉ̃ta zõrãrã jaraita. ¿Kʼãrẽa? Dayirãba zõrãrã jarabʉrʉdeba ũdubipanʉ maʉ̃ra zõrãrãra Jeowaba diasita dayirã kʼarebaita iyiʉ̃me neũdukʼawua bia bamarẽã. Maʉ̃ba dayirãba zõrãrã kʼarebata jʉrʉdara ũdubidayi Jeowa ʉ̃rʉ ĩjãpanʉta akʉza iya omarẽã jarabʉta okĩrãpanʉta, adewara ũdubidayi kʼawua panʉta dayirã dobaʉbara oauẽãta jõma Jeowaba kãgabʉra, Jeowa kʼarebata nesidapanʉta (Sal. 94:18). Mawũẽra dayirãba nemitia odata zõrãrã jaradara akʉza maʉ̃ nemitia obadata idubʉdara kʼawua panañi Jeowabara dayirã nemitiara kĩrãduaita (akʉra Proverbios 28:13).

10. ¿Kʼãrẽta berabariseabʉ dayirãba nemitia odata jara ẽ bʉrʉ?

¹⁰ Nainʉbayeda dayirãba kʼawuasida kʼãrẽ nebiata ũdupanʉta zõrãrã kʼarebata jʉrʉra. Mamina akʉdaya kʼãrẽta berabariseabʉta nemitia zroma odata jarada ẽ bʉrʉ. Krĩchadaya nokʼo David ʉ̃rʉ, nokʼo Davidbara iya nemitia zroma odara jara ẽ basi, maʉ̃ba iyira sopʉasi akʉza kayasi kʼawuabasi baera iyira Jeowadeba jĩgabʉta (Sal. 32:​3-5). Mawũẽra dayirã Jeowaʉ̃me biabʉ ẽãnera kayabʉ kĩrãkʼapanʉ. Dayi kayabʉta kʼareba jʉrʉ ẽ bʉrʉ wuabʉrʉ izdraseabʉ. Maʉ̃ba Jeowaba jarabʉ dayirãʼa zõrãrã kʼarebata jʉrʉdamarẽã akʉza jẽda iyi neũdukʼawua badamarẽã (Is. 1:​5, 6, 18).

11. ¿Adewara kʼãrẽta berabariseabʉ nemitia zroma odata jara ẽ bʉrʉ?

¹¹ Dayirãba nemitia zroma odata jarada ẽ bʉrʉ, wuabemarata zʉbʉriabiseabʉ. Adewara Jeowaba kongregasionʼa iyi jaure zarea diabʉta dia ẽ bayi, maʉ̃ba kongregasione aduʼabʉta aduaseabʉ (Efes. 4:30). Adewara kongregasione ẽbẽra abaʉba nemitia zroma odata dayirãba kʼawuadara, maʉ̃ ẽbẽra jaraseapanʉ zõrãrãʉ̃me bedʼeamarẽã.a Dayirãba naʉ̃ ẽbẽraba nemitia odata jarada ẽ bʉrʉ abarika iyabaʉ nemitiata obʉ kĩrãkʼa bayi (Lev. 5:1). Mamina dayirãba Jeowata mejãcha kãgapanʉ baera naʉ̃ba kʼarebayi zõrãrã jaraita mebẽrãba nemitia odara. Dayirãba mawũã odara kʼarebadayi kongregasion aduʼa bamarẽã akʉza mebẽã nemitia odasida jẽda Jeowa neũdukʼawuabamarẽã.

¿SÃWŨÃ KʼAREBAPANɄ ZÕRÃRÃBARA?

12. ¿Zõrãrãbara sãwũã kʼarebapanʉ Jeowadeba wiña wiñane jĩga wãra?

¹² Daizeze Bedʼeaba zõrãrã jarabʉ kʼarebadamarẽã mebẽrã wiña wiñane Jeowadeba jĩga wãta (1 Tes. 5:14). Bʉa nemitiata osibʉrʉ zõrãrãbara bʉaʼa bedʼeata wididayi mawũã kʼawuaita bʉa kʼãrẽ krĩchabʉta akʉza bʉ sãwũã sentibʉta (Prov. 20:5). Maʉ̃ba bʉita zarebʉmina pera ẽã jara ũrĩbira ãyaʼa kʼãrẽ berabaridata akʉza bʉa kʼãrẽ krĩchabʉta akʉza bʉ sãwũã sentibʉta, mawũã ora kʼarebayi zõrãrãba kʼawuadamarẽã bʉ sãwũã kʼarebaita. Adewara bʉa kʼãrẽ jaranʉmʉne nei aña jarai kʼarea krĩcha orãrãra (Job 6:3). Naʉ̃ra zõrãrãbara bʉa nei waña aña jara bʉdeba waña aña krĩchada ẽ bayi bʉ ʉ̃rʉ awuarabʉrʉ ãyira zarea odayi kĩrãkita ũrĩta bʉa kʼãrẽ jarabʉta, mawũã bia kʼawuaita wãrĩnu kʼãrẽta berabarisita akʉza kʼawuaita kʼãrẽ ũrãgʼa Daizeze Bedʼeadebemata jara ũrĩbita (Prov. 18:13). Adewara naʉ̃ra zõrãrãbara kʼawuapanʉ ãya ewari aba bʉ akʉ jʉ̃ẽbʉrʉdeba kʼareba ẽãta, edaʉde nesidapanʉta akʉda ʉ̃rʉ akʉ wãita mawũã kʼarebadaita bʉ jẽda Jeowa neũdukʼawua bʼaita.

13. ¿Adewara kʼãrẽta odai zõrãrãbara dayirã kʼarebaita? (Akʉra potota).

¹³ Zõrãrãra zarea odayi ãya jarabʉdeba bʉta wuabʉrʉ sopʉabi ẽ baita awuarabʉrʉ ãyira bʉbari yiwidʼidayi kʼãwũã yiwidʼibʉba bʉaʼa so zareata diayi, yiwidʼira mejãcha zarea erbʉ baera (Sant. 5:​14-16). Adewara bʉta zõrãrãʉ̃me bedʼeara ãyara kʼarebadayi aseiteba soapanʉne Jeowa trʉ̃neba (Is. 57:18). Naʉ̃ aseitebara jarakĩrãbʉ Daizeze Bedʼeata, mawũẽra zõrãrãbara testo Daizeze Bedʼea debemata zokʼadayi bʉaʼa so zarea diaita akʉza kʼarebadaita bʉ jẽda Jeowa neũdukʼawua bamarẽã ãya ũrãgʼa Daizeze Bedʼeadebema diabʉba kʼarebayi bʉ akʉza jẽda zarea erbaita mawũã Jeowaba omarẽã zokʼabʉta oita. Jeowaba naʉ̃ra zõrãrãneba bʉaʼa naʉ̃ bedʼeata jarabʉ kĩrãkʼabʉ: «Naʉ̃ta yi oara. Naʉ̃ne wãra» (Is. 30:21).

14. Gálatas 6:1ba jarabʉdera, ¿zõrãrãbara sãwũã kʼarebapanʉ kristiano abaʉta aña nebʉdera? (Akʉra potota).

¹⁴ (Akʉra Gálatas 6:1). Kristiano abaʉba aña nebʉbara jarakĩrãbʉ naʉ̃ ẽbẽrãbara Jeowaba kãga ẽãta obʉta iya nekʼãrẽ jidaibarade aña jidasi baibara, mawũã ẽ bʉrʉ nemitia zromata osi baibara. Zõrãrãbara kãgata ũdubipanʉ baera zarea opanʉ ibiade jaraita yumakẽrã kʼẽrẽpa bʼaita, maʉ̃ bia ũrĩta krĩchadaya naʉ̃ ʉ̃rʉ. Mediko abaʉba ẽbẽra nañanata jʉra kʼawua ara obʉ iyi pʉabi ẽ baide, abarika zõrãrãbida ẽbẽra aba nemitia oda ũrãgʼabʉrʉdera ibiade opanʉ maʉ̃ ẽbẽra aukʼara zʉbʉriabi ẽ baide. Adewara Daizeze Bedʼeaba jarabʉ naʉ̃ra zõrãrãra aba abaka ãyikʉza bia akʉibarata, ãyisida nemitia omia baera edaʉde nemitia oseabʉ baera, maʉ̃ba naʉ̃ra zõrãrãbara ẽbẽra aba nemitia obʉrʉdera kĩrʉ akʉ ẽ iyi ʉ̃rʉ mitia bedʼeada ẽ, awuarabʉrʉ zarea opanʉ maʉ̃ ẽbẽra so zʉbʉria akʉita akʉza maʉ̃ra ʉ̃tabʉta krĩcha ẽ baita (1 Ped. 3:8).

15. ¿Dayirãba bedʼea zromata erpanʉbʉrʉ kʼãrẽta odaibara?

¹⁵ Dayirãbara aduʼa jaraseabʉ zõrãrã kongregasionebemara dayirã sãwũã berarinʉmʉra. Jeowaba ãyaʼa jaradiasi baera dayirã ʉ̃rʉ, ãyaʼa nebʉrabʉrʉdera yara jara ẽ baita akʉza ũrãgʼa diabʉrʉdera Daizeze Bedʼeadeba jara ũrĩbidamarẽã mawũã ãya krĩchabʉta jarada ẽ marẽã, adewara Jeowaba jaradiabʉ ãya bedʼea zroma erbʉdera kʼarebadaibarata (Prov. 11:13; Gál. 6:2). Warĩnubaira zõrãrã aba abaka awuarabʉ, adewara ʉ̃kʉrʉra wabemaraira zõrãranebʉta audre dããraba baera audre bia kʼawuabʉ sãwũã oita. Mamina maʉ̃ krĩcha ẽã dayirãba bedʼea zromata erpanʉbʉrʉ badu zõrãrãta jʉrʉseabʉ kʼareba widita. Mamina jipade yibia dayirãba kĩrãbedaita ũrãgʼa widibʉrʉdera zõrãrã aba abakaʉa widi wa ẽ baibarata, mawũã abaʉba dayirãba ũrĩkĩrãbʉta jarayeda. Dayirãba maʉ̃ta opanʉbʉrʉ ũdubidayi audrera kãgabʉta daya okĩrãbʉta jaradamarẽã Jeowaba omarẽã jarabʉta oikaude (2 Tim. 4:3). Dayirãba zõrãrã abaʉʼa dayirã bedʼea zroma ʉ̃rʉ jara ũrĩbibʉrʉdera naʉ̃ zõrãrãbara dayirã nãã widiyi dayirãra awuru zõrãrãʉ̃me bedʼeasi kʼawuaita akʉza kʼãrẽ ũrãgʼata diasita maʉ̃ zõrãrãba, adewara iyara sainʉ oseabʉta kʼawuabʉ baera nãã widiseabʉ awuru zõrãrã kʼãrẽta krĩchabʉta maʉ̃ ʉ̃rʉ (Prov. 13:10).

¿DAYIRÃ ABA ABAKAɄBA KʼÃRẼTA ODAIBARA?

16. ¿Kãrẽta odaibara dayirã aba abakaʉba?

¹⁶ Zõrãrãbara dayirãra bia akʉpanʉ akʉza ãya dayirãʼa ũrãgʼata diapanʉ, mamina ãyara dayirãra jara ẽ kʼãrẽta oibarata. Dayirã aba abakaʉba ũdubidaibara ewariza dayirãba kʼãrẽ jarabʉdeba akʉza obʉdeba Jeowa kʼãrẽãba kãgabʉta akʉza wãrĩnu okĩrãpanʉta Jeowaba kãgabʉta. Wãrĩnubaira Jeowabʉrʉ kʼarebaseabʉ dayirãba nekʼãrẽ jidabʉrʉde bia jidaita akʉza Jeoware kʼẽrẽpa bʼaita (Rom. 14:12). Maʉ̃ba zõrãrãbara dayirãba Jeowaba sãwũã krĩchabʉta kʼawuamarẽã bʉdera Daizeze Bedʼeadeba jara ũrĩbipanʉ mõbe tẽã ãya iduaribipanʉ dayirã aba abakaʉba jidamarẽã dayima biabʉta, naʉ̃ obʉba kʼarebabʉ dayirãba kʼawuamarẽã «kʼãrẽta biata akʉza kʼãrẽta bia ẽãta» (Heb. 5:14).

17. ¿Kʼãrẽta oya awa panaibara dayirãbara?

¹⁷ Jipade yibia dayirãra Jeowa ode panʉ baera. Jeowaba zokʼasi Jesústa iyi obeja akʉbari biata. Jeowabara zokʼasi dayirãta ẽdrʉbita akʉza ewari jõmaʉ̃nẽ babimarẽã (Juan 10:11). Adewara Jeowaba diasi zõrãrã kongregasionebemarata mawũã aripe berabarisi iya oya adata. Iya jarasi: «Mʉ̃a mara diayi obeja akʉbarira mʉ̃a kãgabʉde panʉta, ãya mara jaradiayi krĩcha biata akʉza kʼawuadamarẽã saʉ̃ta bigata akʉza saʉ̃ta zere ẽãta» (Jer. 3:15). Mawũẽra dayirãba sentipanʉbʉrʉ Jeowadeba wiña wiñane jĩga wata kʼãrẽ krĩcha ẽã kʼareba wididaibara zõrãrã kongregasionebemara, naʉ̃ra zõrãrãra Jeowaba dayirãʼa regalo kĩrãkʼa diada, maʉ̃ba nekʼãrẽ jõma oibara ãyi bia zokʼa kʼawuaita.