¿Jʉra kʼawuabamarẽã jarapanʉta kĩrãkita ũrĩbʉka?

1. ¿Aranʉ kʼãrẽta oi Jesúsbara?

IDIBEMA ewarira jipade yibia. Jesúsba aranʉbai jõma ẽbẽrarãta kʼawua oi baera. Dayirãbara kʼawuapanʉ Jesúsba ẽbẽrarã kʼawua oi ewari zeira arakʼaitabata. Iya iyi kʼaidubemara jarasi baera kʼãrẽta ũdudaibasita iyi ewaride, adewara naʉ̃ ewarinʉmʉ jõi ewaride (Mat. 24:3). Naʉ̃ propesiara ũdudayi Mateo yi zroma 24 de akʉza 25de. Adewara Marcos yi zroma 13 akʉza Lucas yi zroma 21ne.

2. ¿Kʼãrẽta kʼawuadai naʉ̃ artikulodera akʉza maʉ̃ba sãwũã kʼarebai?

² Jesúsba nebʉra ũbea zokʼasi kʼarebaita dayirã jʉra kʼawuapanamarẽã. Yi nããrabema nebʉrara bedʼeabʉ, obeja akʉza kabra ʉ̃rʉ. Yi ũmenebema nebʉrara bedʼeabʉ, wẽrãra yi zake 10panʉra ʉ̃rʉ. Ãyidebema ʉ̃kʉrʉra krĩcha barabasi akʉza ʉ̃kʉrʉta krĩcha neẽã basi. Yi ũbeadebema nebʉrara bedʼeabʉ, nebʉra monedadebema ʉ̃rʉ. Naʉ̃ra nebʉra aba abakaʉba kʼarebayi dayirãba audre biʼia ẽza ũrĩmarẽã sãwũã dayirã aba abakaʉba kʼãrẽ obʉdeba Jesúsba kʼawua oita. Naʉ̃ra nebʉrara ʉ̃rʉ kʼawuadayi naʉ̃ artikulode akʉza akʉdayi kʼãrẽta kʼawuasepanʉta maʉ̃raneba. Nãã kʼawua jʉ̃drʉdaya nebʉra obeja akʉza kabra ʉ̃rʉ bedʼeabʉta.

OBEJARATA AKɄZA KABRARATA

3. ¿Jesúsbara sõbede kʼawua oi ẽbẽrarã?

³ Jesúsba ẽbẽrarã kʼawua obʉrʉdera akʉyi Daizeze Bedʼea ʉ̃rʉ ĩjãsida kʼawuaita akʉza yi ʉ̃ta wãira arepanʉ kʼawuaita (Mat. 25:​31-46). ¿Jesubara sõbede kʼawua oi ẽbẽrarã? Zʉbʉria zroma berabarinʉmʉne, Armagedón jʉ̃drʉbodoare, maʉ̃ne Jesúsbara kʼawua oyi ẽbẽrarã (Mat. 24:21). Obeja akʉbariba, obejarata kabraraneba jãpe bʉebari kĩrãkʼa, Jesúsbara ẽbẽrarã yi ʉ̃ta wãira arepanʉta jãpe bʉeyi yi maʉ̃rare panʉ ẽãneba.

4. Isaías 11:​3, 4ba jarabʉdebara, ¿kʼãrẽa ĩjãseapanʉ Jesúsbara ẽbẽrarãra daucha kʼawua oita? (Akʉra yi nããrabemata).

⁴ Daizeze Bedʼeaba jarabʉ Jesúsba Jeowabari ẽbẽrarã kʼawua obʉrʉdera daucha kʼawua oita (akʉra Isaías 11:​3, 4). Jesúsbara kĩrãkita akʉyi ẽbẽrarãba kʼãrẽ obʉta, kʼãrẽ krĩchabʉta akʉza kʼãrẽ jarabʉta (Mat. 12:​36, 37; 25:40). Jesúsbara kʼawuabayi kʼairaba kʼarebabʉta ʉ̃ta wãirãra.a Maʉ̃ra ẽbẽrarã kʼarebaira Daizeze Bedʼeata jaradia wãibara. Yi ẽbẽrarã ʉ̃ta wãira kʼarebapanʉrãra Jesúsbara jarayi iyi nããra neneẽã panʉta akʉza naʉ̃ra ẽbẽrarã nama egorode ewari jõmaʉ̃nẽ panañi (Mat. 25:46; Apoc. 7:​16, 17). Yi kʼẽrẽpa panʉrabara wãrĩnu nebiata ũdudayi. Yi ẽbẽrarã zʉbʉria zroma zebʉrʉde akʉza maʉ̃ berabarida tẽã kʼẽrẽpa panʉrãra trʉ̃ra bʉchʉayi bebʉ librode (Apoc. 20:15).

5. ¿Kʼãrẽta kʼawuapanʉ obeja akʉza kabra nebʉradeba akʉza kʼaira ʉ̃rʉ bedʼeabʉ maʉ̃nera?

⁵ Ũdubira bʉra kʼẽrẽpabʉta akʉza kãga jõka erbʉta. Jesúsba nebʉra obeja ʉ̃rʉ akʉza kabra ʉ̃rʉ jarasidera, naʉ̃bara audrera jarakĩrãbasi yi ẽbẽrarã nama egorode panairata. Naʉ̃ra ẽbẽrarãbara ãyi kʼẽrẽpa panʉra ũdubipanʉ Daizeze Bedʼea jaradia wãpanʉne akʉza zõrãrã burubiaraba nekʼãrẽ omarẽã jarabʉta kʼẽrẽpa opanʉne (Mat. 24:45). Mamina ẽbẽrarã ʉ̃ta wãirabida kĩrãkita ũrĩnaibara Jesúsba naʉ̃ nebʉrade jaradara. ¿Kʼãrẽa? Jesúsbara akʉnʉmʉ baera naʉ̃ra ẽbẽrarãba kʼãrẽ onʉmʉta, kʼãrẽ krĩchabʉta akʉza kʼãrẽ jarabʉta. Adewara ũdubidaibara ãyira kʼẽrẽpa panʉta. Jesúsba nebʉra ũmene jara ũrĩbisi naʉ̃rãra jʉra kʼawuapanaibarata, maʉ̃ra nebʉrarãra dayirãbara ũduseapanʉ Mateo yi zroma 25de. Atia kʼawuadayi nebʉra wẽrãra yi zake 10 panʉra ʉ̃rʉ.

WẼRÃRA YI ZAKERA KRĨCHA BARABɄRATA AKɄZA KRĨCHA NEẼÃRATA

6. ¿Wẽrãra yi zakera juesoma panʉrabara sãwũã ũdubisida bia krĩchapanʉta? (Mateo 25:​6-10).

⁶ Jesúsba jarasi wẽrãra yi zake 10 panʉraba jʉ̃ãpanasita yumakẽrã ʉ̃rabʉrʉ juwa jidaita (Mat. 25:​1-4). Naʉ̃ra wẽrãrabara jʉ̃ãpanasi yumakẽrã juwa jidade uruta mawũã iyi kʼaidu wãita. Jesúsba jara ũrĩbisi naʉ̃ra wẽrãranebema juesomara krĩcha barabasita akʉza yi wuabema juesomarãra krĩcha neẽãta. Wẽrãra yi zakera krĩcha barabʉrãra dauba panasi, ãyara nekʼãrẽ jõma osi ãyi ĩbira kibi ẽ baita. Ãyara maʉ̃ra mawũã osi yumakẽrã juwa jidade uruta ãza zeseabasi baera (akʉra Mateo 25:​6-10). Mʉ̃ba yumakẽrã juwa jidaitabʉta zebʉrʉdera naʉ̃ra wẽrãrãra maʉ̃ kʼaidu wãsida. Abarika kristianora ʉ̃ta wãirata kʼẽrẽpa panʉbʉrʉ akʉza dauba panʉbʉrʉ ũdudayi ãya nebia jʉ̃ãpanʉta Jesús zebʉrʉdeb (Apoc. 7:​1-3). ¿Kʼãrẽba sãwũãsi wuabema wẽrãra yizakera krĩcha neẽãrãra?

7. ¿Kʼãrẽba sãwũãsi wẽrãra yi zakera krĩcha neẽãrãra akʉza kʼãrẽa?

⁷ Kõbe wẽrãra yi zakera juesoma panʉ krĩcha neẽãrãra jʉra kʼawuapana ẽ basi yumakẽrã juwa jidade uru jʉ̃ãita. Ãyi ĩbirara kibodobasi aseiteta waibʉa ededa ẽ basi baera. Ãya kʼawuasidade yumakẽrã juwa jidade urura arakʼaitabata aramaʉ̃ta wãsida aseite jʉrʉde, mamina ãyi jẽda zebʉrʉmara naʉ̃ yumakẽrãra berabarisibasi. Yumakẽrã juwa jidaita zebʉrʉdera wẽrãra yi zakera krĩcha barabʉrãra iyi kʼaidu eda wãsida juwa jidaimae. Maʉ̃ tẽã puertara serrasida (Mat. 25:10). Tẽã naʉ̃ra wẽrãra yi zakera krĩcha neẽã panʉra jẽda zebʉrʉdera ãyira eda wãkĩrãsi juwa jidanʉmʉmae, mamina yumakẽrã juwa jidaita bʉbara jarasi ãyira ũdukata (Mat. 25:​11, 12). Naʉ̃ yumakẽrã juwa jidaitabʉta ãza zeseabasimina, naʉ̃ra wẽrãrãra jʉra kʼawuapana ẽ basi, ¿kʼãrẽta kʼawuapanʉ ʉ̃ta wãiraba naʉ̃neba?

8, 9. ¿Kʼãrẽta kʼawuaseapanʉ yi ʉ̃ta wãirabara nebʉra wẽrãra yi zakera 10 panʉraneba? (Akʉra potota).

⁸ Jʉra kʼawuapanaidʉa akʉza dauba panaidʉa. Jesúsbara jarakĩrãkʉa ẽ basi naʉ̃ ewari jõita jʉ̃ãpanʉenara yi ʉ̃ta wãirara ʉ̃kʉrʉta jʉra kʼawua bʼaita akʉza ʉ̃kʉrʉta jʉra kʼawua pana ẽ baita. Awuarabʉrʉ Jesúsbara jarakĩrãbasi ãya maʉ̃ ewari jʉ̃ãpanʉena ãyita kʼẽrẽpa bʉ ẽ bʉrʉ akʉza jʉra kʼawuapanʉ ẽ bʉrʉ, ãya nebia jʉ̃ãpanʉra ũduda ẽ baita (Juan 14:​3, 4). Jipade yibia naʉ̃ ʉ̃rʉ kʼawuaita. Krĩcha ẽã dayirã ʉ̃ta wãita, mawũã ẽ bʉrʉ nama egorode bʼaita jõmaʉ̃ba kĩrãkita ũrĩnaibara naʉ̃ nebʉra wẽrãra yi zakera 10 panʉranebemara. Dayirã aba abakaʉba ũdubidaibara kʼẽrẽpa panʉta, dauba panʉta naʉ̃ ewari jõñiena (Mat. 24:13).

⁹ Jesúsba nebʉrasi wẽrãra yi zakera 10 panʉra ʉ̃rʉ, mawũã ũdubita kʼãrẽãba yibiata dayirã jʉra kʼawua bʼaita akʉza dauba bʼaita. Mamina iya maʉ̃ nebʉrada tẽã nebʉrasi, moneda nebʉra ʉ̃rʉ. Naʉ̃nera iyara ũdubikĩrãbasi kʼãrẽãba yibiata dayirãba badu trajo okĩrã bʼaita.

MONEDARATA

10. ¿Nezokʼara ũmeba sãwũã ũdubisida ãyi kʼẽrẽpa panʉta? (Mateo 25:​19-23).

¹⁰ Nebʉra moneda ʉ̃rʉ bedʼeabʉde Jesúsba jara ũrĩbisi basita nezokʼara ũme ãyi nokʼoare kʼẽrẽpabʉta, mamina aba basita nezokʼa iyi nokʼoare kʼẽrẽpabʉta ũdubi ẽãta (Mat. 25:​14-18). Nezokʼara ãyi nokʼoare kʼẽrẽpabʉ ũdubidarãra zarea trajasida ãyi nokʼoita plata audre ganaita. Naʉ̃ nokʼobara iyi wawara wãi nãã, monedata arabia dia amaesi naʉ̃ra nezokʼara. Mawũẽra nezokʼara ũmera mejãcha trajasida akʉza ãyara ãyi nokʼoba plata dia amaenara biʼia zokʼasida. Ãyita mawũã zarea trajasida baera ãyi nokʼo jẽda zebʉrʉmara ãya plata erbada audu wũẽta ganasida. Maʉ̃ kʼarea ãyi nokʼora ibia bedʼeasi ãyi ʉ̃rʉ, ãyisida maʉ̃ kʼarea sobiasida (akʉra Mateo 25:​19-23). ¿Mamina kʼãrẽba sãwũãsi jari nezokʼa kʼẽrẽpabʉ ũdubi ẽ badara? ¿Iyara iyi platara sãwũã osi?

11. ¿Kʼãrẽba sãwũãsi nezokʼa kʼẽrẽpabʉ ẽãra akʉza kʼãrẽa?

¹¹ Mamina naʉ̃ nezokʼa kʼẽrẽpabʉta ũdubi ẽ badabida nokʼobara moneda diasi, mamina iyara ũdubisi iyira trajakĩrã ẽãta. Iyi nokʼoba plata diada audre waribi kaude egorode joʉnʉmʉsi. Maʉ̃ba iyi nokʼo zebʉrʉdera bari jẽda diasi iya plata nãã dia amaenata. Maʉ̃neba ũdubisi iyira trajakĩrã ẽ basita. Adewara iyi nokʼoita plata audu gana ẽ basi baera, maʉ̃ta kĩrãduamarẽã jarai kaude, iyara jarasi iyi nokʼobara mejãcha zokʼabʉta nekʼãrẽ omarẽã. Maʉ̃ kʼarea iyi nokʼobara bia akʉ ẽ basi, adewara iyaʼa plata diadara jãrĩsi akʉza nokʼobara iyi dedaʉba jʉretasi (Mat. 25:​24, 26-30).

12. ¿Nezokʼara ũmebʉbara kʼairata jarakĩrãbʉ idi ewadera?

¹² Nezokʼa kʼẽrẽpapanʉrabara jarakĩrãbʉ kristianora ʉ̃ta wãirata, ãyi nokʼora Jesús. Iya trʉ̃bʉ naʉ̃rata iyiʉ̃me sobiabamarẽã. Naʉ̃ra kristianorabara ãya nebia jʉ̃ãpanʉra ũduyi, ¿saʉ̃ maʉ̃ra? Ãyita nããra jẽda piradrʉbidayi (Mat. 25:​21, 23; Apoc. 20:5b). Mamina nezokʼa kʼẽrẽpa bʉ ẽ bara nekʼãrẽta jaradiabʉ yi kristianora ʉ̃ta wãira. ¿Kʼãrẽta?

13, 14. ¿Kʼãrẽta kʼawuapanʉ kristianora ʉ̃ta wãirabara moneda nebʉradebara? (Akʉra potota).

¹³ Ũdubira bʉra trajakĩrãbʉta. Nããbema nebʉrade kĩrãkʼa, naʉ̃ nebʉra monedadebida, Jesúsbara jarakĩrãkʉa ẽ basi kristianora ʉ̃ta wãirãra kʼãrẽ oama panaibasita, awuarabʉrʉ jarakĩrãkʉasi kʼãrẽta berabarita ãya nekʼãrẽ Jeowaita okĩrãbʉta oama panʉbʉrʉ (2 Ped. 1:10).

¹⁴ Wẽrãra yi zakera 10 panʉra nebʉraba akʉza moneda nebʉraba, ũdubibʉ kristianora ʉ̃ta wãirãra jʉra kʼawua bʼaibarata akʉza dauba bʼaibarata. Maʉ̃ daucha ũdubibarata nekʼãrẽ okĩrãbʉta. Mamina Jesúsbara naʉ̃ra kristianora ʉ̃ta wãira jarasi kʼãrẽne jʉra kʼawuapanaibarata. Maʉ̃ra dayirãbara ũduseabʉ Mateo 24:​40, 41ne. Naʉ̃ne jarabʉ sãwũã kʼawua odaita kristianora ʉ̃ta wãirãra.

KʼAITA EDEDAI

15, 16. Mateo 24:​40, 41bara, ¿sãwũã kʼarebabʉ kristianora ʉ̃ta wãira dauba bʼaita?

¹⁵ Jesúsba naʉ̃ra nebʉra ũbea jara berabarida tẽã, jara ũrĩbisi iya kʼawua oi ewari zebʉrʉdera sãwũã kʼawua oibasita kristianora ʉ̃ta wãirãra. Maʉ̃ ewaride kʼawuadayi saʉ̃rata kʼẽrẽpabʉta akʉza saʉ̃rata kʼẽrẽpabʉ ẽãta. Jesúsba bia jara ũrĩbita naʉ̃ra kristianora ʉ̃ta wãira sãwũã berabarita, nebʉrasi yumakẽrã ũme mea trajapanʉ ʉ̃rʉ akʉza yuwẽrã ũme deda yuba nebapanʉ ʉ̃rʉ. Naʉ̃ nebʉra aba abakaʉde ũdubibʉ ẽbẽrarã ũmebʉbara iyabaʉ trajota opanasita, mamina Jesúsbara jarasi naʉ̃ra ẽbẽrarãnebemara aba ededaita ababemara amaenaita (akʉra Mateo 24:​40, 41). Maʉ̃ kʼarea Jesúsbara iyi kʼaidubemara jarasi: «Dauba bʼeaudua, marãbara kʼawuadʼa ẽbaera kʼãrẽ ʉ̃madaudʼe zeita mʉta marã Nokʼora» (Mat. 24:42). Jesúsba wẽrãra yi zakera 10 panʉra ʉ̃rʉ nebʉraside maʉ̃ kĩrãkʼa bʉta jarasi (Mat. 25:13). ¿Jesúsba jaradara naʉ̃ra nebʉra ũmenera iyabaʉ ʉ̃rʉ bedʼeabʉka? Jaraseapanʉ iyabaʉ ʉ̃rʉ bedʼeabʉta. Yi wãrĩnu kristianora ʉ̃ta wãira kʼẽrẽpabʉratrʉ Jesúsbara ʉ̃tʉ bia edayi iyi Nokʼode (Juan 14:3).

¹⁶ Ũdubira bʉra urumabʉta. Kristianora ʉ̃ta wãira urumapanʉ ẽãra ededa ẽ bayi ʉ̃ta kristianora yi jidakʉadapeadaʉ̃me (Mat. 24:31). Mawũẽra ẽbẽrarã jõma nama egorode baibida ũrĩnaibara Jesúsba jaradara, kʼẽrẽpa bʼaibara akʉza urumapanaibara.

17. ¿Kʼãrẽa kĩrʉna ẽ baibara Jeowaba idibasidu ʉ̃kʉrʉ kristianora ʉ̃ta wãita jidabʉ kʼarea?

¹⁷ Dayirãbara bia kʼawuabʉda Jeowaba kʼãrẽta oita krĩchabʉra, maʉ̃ba iya kʼawua obʉrʉ ewaridera ĩjãpanʉ aripe oita. Maʉ̃ba idi ewade Jeowaba kristiano aba kʼẽrẽpabʉta jidara ʉ̃ta edeita, maʉ̃ kʼareara krĩcha opanʉ ẽ.c Kĩrãbedaya Jesúsba nebʉradata, yumakẽrã abaʉba jʉrʉsita ẽbẽrarãta iyi drʉade ubade trajadamarẽã, trajo jõbodoare (Mat. 20:​1-16). Naʉ̃ra nezokʼaranebemara ʉ̃kʉrʉta diapedaʉba trajakisi, ʉ̃kʉrʉta ũmatipa jʉ̃ẽsi kʼewara bayeda trajaita, ʉ̃kʉrʉra kʼewara trajo jõbodoare jʉ̃ẽsi, mamina drʉa yibaribara jõmaʉ̃ta daucha pagasi. Abarika kʼãrẽ ẽ Jeowaba sõbede jidasita kristianora ʉ̃ta wãita, ãyita kʼẽrẽpa panʉbʉrʉ jõmaʉ̃ba nebiata ũdudayi.

JɄRA KʼAWUA BAMARẼÃ JARAPANɄTA ŨRĨRA

18, 19. ¿Kʼãrẽta kʼawuasida naʉ̃ra nebʉrãraneba?

¹⁸ Nebʉra kabra akʉza obeja ʉ̃rʉ bedʼeabʉba, ũdudibʉ ẽbẽrarã nama egorode ewari jõmaʉ̃nẽ bʼaita jʉ̃ãpanʉrabara ũdubibarata, ãyira kʼẽrẽpabʉta akʉza kãga jõka ũdubibʉta Jeowaʼa idi ewade, adewara zʉbʉria zroma zebʉrʉ ewaridebida. Aranʉbai Jesúsba naʉ̃ra kristianora kʼẽrẽpabʉta kʼawua obʉrʉ ewaride ũdubiyi kʼairatrʉ wãrĩnu ewari jõmaʉ̃nẽ baseabʉta (Mat. 25:46).

¹⁹ Adewara nebʉra ũme ũdusida, kristianora ʉ̃ta wãira jarabʉta jʉra kʼawuapanamarẽã. Jesúsba nebʉrasi wẽrãra yi zakera 10 panʉra ʉ̃rʉ. Maʉ̃nebemara yi juesoma bʉra krĩcha barabasi, mamina yi awuru juesomapanʉrãra krĩcha neẽbasi. Yi krĩcha barabʉrãra jʉra kʼawuapanasi akʉza dauba panasi yi juwa jidaita bʉta zeyeda. Mamina yi krĩcha neẽãrãra jʉra kʼawuapana ẽ basi. Maʉ̃ kʼarea yumakẽrã yi juwa jidaitabʉbara eda wãbi ẽ basi iyi juwa jidaitabʉmae. Mawũẽra dayirãsida jʉra kʼawua panaibara adewara jʉ̃ãpanaibara Jesúsba naʉ̃ ewari jõbiyeda. Adewara kʼawuasida moneda nebʉra ʉ̃rʉ. Naʉ̃ne basi yumakẽrã ũme kʼẽrẽpapanʉta, ãyara ũdubisida trajakĩrãpanʉta. Ãyara nekʼãrẽ jõma osida ãyi nokʼo kʼarebaita. Adewara ãyi nokʼoba ãyita bia akʉmarẽã. Mamina yi nezokʼa trajakĩrã ẽãra jʉretasida. ¿Kʼãrẽta kʼawuapanʉ naʉ̃nebara? Zarea odaibarata Jeowaba zokʼabʉta opanaita iya naʉ̃ ewari jõbiyeda akʉza kʼawuasida kristianora ʉ̃ta wãirãra urumapanaibarata mawũã Jesúsba ãya nebia jʉ̃ãbʉta diamarẽã. Naʉ̃ra kristianorabara sobiade jʉ̃ãpanʉ ãyi ãba jʉreda kʼãrãpe ʉ̃ta wãita. Armagedón berabarida tẽãra naʉ̃ra kristianora ʉ̃ta wãbʉrʉra Jesús nobia bayi (2 Tes. 2:1; Apoc. 19:9).

20. ¿Kʼãrẽta oi Jeowabara iyi bedʼea ũrĩbʉrãra?

²⁰ Jesúsba kʼawua oi ewari arakʼaitabamina, dayirãra kʼãrẽ kʼarea peraira neẽ, awuarabʉrʉ kʼẽrẽpabʉta ũdubidara Daizeze Jeowabara iyi zareata diayi. Mawũã yumakẽrã warra kĩrãbita panamarẽã (2 Cor. 4:7; Luc 21:36). Dayirã ʉ̃tʉ bʼaita, mawũã ẽ bʉrʉ nama egorode bʼaita dayirãta zarea opanʉbʉrʉ Jesúsba jara amaenata ũrĩnaita mawũãra Jeowata sobiabidayi. Jeowaba iyareba dayirãta so zʉbʉria akʉbʉ baera, dayirã trʉ̃ra bebʉ librode eda bʉyi (Dan. 12:1; Apoc. 3:5).