Jacobta Esaúʼʉ̃mera bedʼea ara osida

Jeowabara kʼarebasi Abrahánta akʉza Isaacta, maʉ̃ba Jacobʼabida jarasi kʼarebaita. Jacobʼra Harán drʉaeda wãsi, mama besi. Mama juwa jida kʼãrãpe wũãwũãrata mejãcha barasi akʉza platata mejãcha erbesi.

Ewari berabari wãne Jeowaba jarasi Jacobʼa: «Wãra bʉ zeze drʉaeda». Mõbe Jacobʼra yi mebẽrãbawara mama wãita jʉ̃drʉsida. Iyi ode wãne iyi nezokʼoraba iyaʼa jarasida: «Bʉ mebẽã Esaúra nama uru, mamina abapai uru ẽ, iyi kʼaidu uru 400 yumakẽrãra». Jacobʼra mejãcha perabasi yi kimarata akʉza yi wũãwũãrata Esaúba neida oideba, maʉ̃ kʼarea Jeowaʼa yiwidʼisi iyira, mõbe jarasi: «Jeowa mʉ̃ bia okʼãrãpe kʼarebara mʉ̃ra, neida berabaribirãra mʉ̃ mebẽãdeba». Nrʉema Jacobʼbara yi mebẽã nebiata mejãcha dia bʉesi, dia bʉesi kameyorata, burrurata, pakarata, obejarata akʉza kabrarata.

Maʉ̃ diamasi Jacob abapai chubidade angelta ũdusi. Jacobʼra mejãcha zarea osi maʉ̃ idu wãbi ẽ baita, mawũã ũnadrʉsi ãyira. Jacob mejãcha posimina iyira zarea osi mawũãsidu, maʉ̃ angel iduaribi ẽ baita. Angelba jarasi: «Mʉ̃ra idu wãbira». Mamina Jacobʼba jarasi: «Mʉ̃a bʉra idu wãbi ẽ bayi, bʉa mʉ̃aʼa jarayeda mʉ̃ ʉ̃rʉ nebiata berabarita».

Angelba iyi wãi nãã Jacobʼa jarasi iyira nebiade berabarita. Mawũẽra Jacobʼbara kʼawua besi Jeowabara iyira neida berabaribi ẽãta yi mebẽã Esaúdebara.

Maʉ̃ diapeda Jacobʼba ũdusi Esaúta akʉza iyi kʼaidupanʉra ẽbẽrarã 400 uruta. Mõbebʉrʉ yi mebẽrãba orrai nãã iyi abapaiba orraeda kʼãrãpe, Esaú nãã 7 bayeda sãkokode kʉbesi. Esaúra wẽbasi Jacobma mõbe bʉrasi, mõbebʉrʉ ãyiʉ̃mena jẽgasida, tẽã bedʼeada kʼãrãpe ibiade panesida. Bʉmara, ¿Jeowaitara bigabasika Jacobʼba odara?

Maʉ̃ tẽã Esaúra wãsi iyi deda, wãya Jacobʼra iyi ode jʉ̃drʉsi iyi wãma. Jacobʼbara erbasi wũãwũãrata 12: Rubén, Simeón, Leví, Judá, Dan, Neftalí, Gad, Aser, Isacar, Zabulón, José akʉza Benjamín. Maʉ̃ tẽã Jeowaba kʼarebaibasi iyi pʉwʉrʉra Josédeba, iyira Jacob warrabasi. ¿Kʼawuakĩrãbʉka sãwũã osita? Akʉdaya.