Mebẽrã wẽrãra: marabara krĩchaseapanʉ sãwũã audre kristiana bia bʼaita

1. ¿Kʼãrẽta oibara kristiana bia bʼaita?

DAYIRÃBA wũãwũã zakera sãwũã mesera waribʉ ũdubʉdera kĩrãmigapanʉ. Ãyara zarea mejãcha oibara ẽ baera mainʉ jʉ̃ẽira. Mamina dayi kristiano bia bʼaira zarea oibara, nesidabʉ nei oita maʉ̃itarab (1 Cor. 13:11; Heb. 6:1). Dayirã kristiano bia bʼaira nesidapanʉ Jeowa neũdukʼawua bia bʼaita. Adewara iyi jaure zareata nesidapanʉ kʼarebamarẽã nebia iya kãgabʉ kĩrãkʼabʉta erbaita. Adewara nekʼãrẽ okʼawuaita akʉza dayirã nei omarẽã jarabʉdade kʼawua bʼaita kʼãrẽta oita (Prov. 1:5).

2. ¿Kʼãrẽta kʼawuapanʉ Génesis 1:27​deba akʉza kʼãrẽ ʉ̃rʉ bedʼeadai naʉ̃ artikulode?

² Jeowaba parãsi yumakẽrãta akʉza yuwẽrãta (akʉra Génesis 1:27). Yumakẽrãra yuwẽrãʉ̃mera ʉ̃rʉra jipa awuarapanʉ. Mamina nekʼãrẽ awurudebida awuarapanʉ. Bari jaraita Jeowaba yumakẽrãta yuwẽrãʉ̃me parãsidera osi ãyi aba abakaʉba nekʼãrẽ oita erbamarẽã. Maʉ̃ oira nesidapanʉ nebiata ũdubita akʉza nekʼãrẽ okʼawua bʼaita (Gén. 2:18). Naʉ̃ artikulode kʼawuadayi mebẽã wẽrãra warrarapanʉraba kʼãrẽta oibarata kristiana bia bʼaita, yi wuarebemane kʼawuadayi yumakẽrãraba kʼãrẽta oibarata kristiano bia bʼaita.

NEBIA JEOWABA KÃGABɄTA ŨDUBIRA

3, 4. ¿Mebẽrã wẽrãra warrarabara sama ũduseapanʉ yiza biata ãya maʉ̃rane kĩrãkʼa oita? (Akʉra potota).

³ Daizeze Bedʼeade mejãcha ũdubibʉ yiza wẽrãra biaraba Jeowa kãgabʉ ũdubidarata akʉza Jeowaba kãgabʉde badarata (jw.org de akʉra artikulo «¿Qué aprendemos de las mujeres de la Biblia?»). Ãyira nããbema testoba jarabʉ kĩrãkʼabʉ, ãyi kakua bia zokʼa kʼawuapanʉ akʉza kʼãrẽ jõma daucha opanʉ. Adewara naʉ̃ra mebẽrã wẽrãra warrarapanʉrabara yiza biata ũduseapanʉ ãyi kongregasione, namara bʉ baera mebẽrã wẽrãra kristiana biarata.

⁴ Krĩchara bʉ kongregasione saʉ̃ mebẽãba yiza biata ũdubibʉta, mawũã maʉ̃ne kĩrãkʼa oita. Yi wuabemara parrapode kʼawuadayi kʼãrẽ nebia ũbeata ũdubibarata mebẽrã wẽrãraba kristiana bia bʼaita.

5. ¿Kristiana bia bʼaita kʼãrẽa yibia edabʉta ũdubita?

⁵ Edabʉta ũdubibara. Maʉ̃ ũdubira jipade yibia. Yuwẽrãba edabʉta ũdubibʉbʉrʉ, Jeowaʉ̃me biabayi akʉza wuabemaraʉ̃me (Sant. 4:6). Bari jaraita, yuwẽrã abaʉba Jeowa kãgabʉbara edabʉta ũdubi kʼãrãpe, ũrĩñi 1 Corintios 11:3​ba jarabʉta, namara jara ũrĩbibʉ Jeowaba kʼaita kongregasion buru babisita akʉza mebẽrã buru babisita.c

6. ¿Mebẽrã wẽrãra warrarapanʉrabara sãwũã eda krĩchabʉta ũdubiseapanʉ Rebecade kĩrãkʼa?

⁶ Akʉdaya Rebeca yizata. Iyira buru biabasi akʉza ewari jõmaʉ̃nẽ zowaĩnĩgʉabʉta ũdubibasi iya nekʼãrẽ jidabʉdeba. Akʉza kʼawuabasi kʼãrẽta oita akʉza sõbede oita (Gén. 24:58; 27:​5-17). Ewari jõmaʉ̃nẽ ũdubisi ũrĩbʉta iyaʼa omarẽã jarapanʉta (Gén. 24:​17, 18, 65). Bʉa Rebecade kĩrãkʼa edabʉta ũdubibʉbʉrʉ akʉza wawiata ũdubibʉbʉrʉ, Jeowaba dayirã nãã bʉebʉra bedʼeata ũrĩñi, mawũãra bʉra yiza biabayi bʉ mebẽrãita akʉza mebẽrã kongregasionebemaraita.

7. ¿Mebẽrã wẽrãra warrarapanʉrabara sãwũã ũdubiseapanʉ sainʉ oita kʼawuabʉta Esterba oda kĩrãkʼa?

⁷ Sainʉ oita kʼawuabʉta ũdubibara. Daizeze Bedʼeaba jarabʉ buru biara, bʉta yi ẽbẽrarã sainʉ oita kʼawuabʉraʉ̃me (Prov. 11:2). Esterbara ũdubisi sainʉ oita kʼawuabʉta. Naʉ̃ba kʼarebasi ʉ̃tabʉta krĩcha ẽ baita. Iyara ũrĩsi yi primo Mardoqueo bedʼeata, mõbe iya jaradade osi (Est. 2:​10, 20, 22). Abarika bʉabida sainʉ oita kʼawuabʉta ũdubiseabʉ ũrãgʼa bia jʉrʉbʉdeba akʉza maʉ̃ daucha obʉdeba (Tito 2:​3-5).

8. 1 Timoteo 2:​9, 10 jarabʉdebara, ¿sainʉ oi kʼawuabʉbara sãwũã kʼarebabʉ mebẽã wẽrã warrarabʉba bia kʼawuamarẽã sãwũã wua jʉ̃ita akʉza sãwũã yoita?

⁸ Esterbara sainʉ oita kʼawuabʉta ũdubisi nekʼãrẽ awurudeba, iyira biʼiakirasi, mawũãsidu jʉrʉ ẽ basi jõmaʉ̃ba iyitrʉ akʉdamarẽã (Est. 2:​7, 15). ¿Kʼãrẽ nebiata ũduseapanʉ kristianara biabara Ester yizadeba? Maʉ̃ nebiara ũduseapanʉ 1 Timoteo 2:​9, 10​de (akʉra). Apostol Pabloba nama jarabʉ wẽrãrabara ãyi wua jʉ̃bʉdeba ũdubibarata Daizeze wawiabʉta. Iya nama zokʼasi griego bedʼeata, mawũã ũdubita wẽrãra ewari jõmaʉ̃nẽ bia wua jʉ̃ibarata akʉza sainʉ oita kʼawuabʉta ũdubibarata ãyi sãwũã wua jʉ̃bʉdeba, adewara krĩchaibara wuabemara sãwũã sentibʉta ãyi sãwũã wua jʉ̃bʉ kʼarea. Jipade sobiapanʉ mebẽrã kongregasionebemarãra biʼia wua jʉ̃panʉ baera akʉza maʉ̃neba ũdubipanʉ baera ãya sainʉ oita kʼawuapanʉta.

9. ¿Kʼãrẽta kʼawuapanʉ Abigaíl yizadeba?

⁹ Discernimiento erbʉta ũdubibara. ¿Kʼãrẽ maʉ̃ discernimientora? Naʉ̃bara kʼarebabʉ kʼawuaita saʉ̃ta biata akʉza saʉ̃ta biga ẽãta, mawũã jidaita nebiata. Krĩchadaya Abigaíl yizata, iyi kimaba bia krĩcha ẽ basi baera iyi deda zʉbʉria zromata ũdudaibasi, aramaʉ̃ta Abigaílba jʉrʉsi maʉ̃ sãwũã ara oita, iya kʼawuabasi baera saʉ̃ta bigata akʉza saʉ̃ta biga ẽãta naʉ̃ba kʼarebasi iyi dedabemarata bei ẽ marẽã (1 Sam. 25:​14-23, 32-35). Kʼawuaita saʉ̃ta bigata akʉza saʉ̃ta biga ẽãta naʉ̃ba kʼarebayi kʼawuaita sõbede chupea bʼaita akʉza sõbede bedʼeaita, adewara kʼarebabʉ mebẽrã ʉ̃rʉ krĩchaita, akʉza mebẽrã sãwũãbʉ widibʉrʉde kʼarebayi kʼawuaita kʼãrẽta widi ẽ baibarata, mawũã ãyi bia ẽ sentibi ẽ baita (1 Tes. 4:11).

NEKʼÃRẼ OKʼAWUARA TẼÃ BɄ KʼAREBASEABɄTA

10, 11. Bʉa le kʼawuabʉbʉrʉ akʉza bʉ kʼawuabʉbʉrʉ, ¿naʉ̃ba sãwũã kʼarebaseabʉ bʉta akʉza wuabemarata? (akʉra potota).

¹⁰ Kristiana biabara nesida nekʼãrẽ okʼawua bʼaita, bʉ warraraenaʉ̃ba nekʼãrẽ okʼawuabʉba, kʼarebabʉ bʉ yi zroma bʼai bia bʼaita. Akʉdaya ʉ̃kʉrʉ yizata.

¹¹ Le kʼawuara akʉza bʉ kʼawuara. Ʉ̃kʉrʉ kulturaba krĩchabʉ nesida ẽãta yuwẽrãrabara le kʼawuamarẽã akʉza bʉ kʼawuamarẽã, mamina maʉ̃ kʼawuaira jipade yibia kristianora jõmaʉ̃itad (1 Tim. 4:13). Maʉ̃ba bʉita zaremina zarea ora kʼawuaita. ¿Kʼãrẽ nebiata ũduseapanʉ? Kʼarebaseabʉ trajo bia ũduita, Daizeze Bedʼea ʉ̃rʉ audre kʼawuaita, audre biʼia jaradiaita akʉza audre Jeowa kʼawabayi iyi Bedʼeata akʉbʉ baera akʉza maʉ̃ ʉ̃rʉ krĩchabʉ baera (Jos. 1:8; 1 Tim. 4:15).

12. ¿Kʼãrẽta kʼawuapanʉ Proverbios 31:26​ba jarabʉdeba?

¹² Kĩrãkita ũrĩ kʼawuara akʉza ibiade bedʼea kʼawuara. Kristianoraitara jipade yibia maʉ̃ oira, Santiagoba naʉ̃ ũrãgʼata diasi: «Kĩrãkita ũrĩbara, kʼawua ẽã bedʼeabe ẽ» (Sant. 1:19). Bʉa kĩrãkita ũrĩbʉbʉrʉ wuabemaraba jarabʉta ũdubiyi wuabemara ʉ̃rʉ krĩchabʉta akʉza so zʉbʉria akʉbʉta (1 Ped. 3:8). Bʉa bia ũrĩ ẽ bʉrʉ wuabema sãwũã sentibʉta, biʼia krĩchara iyaʼa kʼãrẽta widita akʉza biʼia krĩchara bʉa kʼãrẽ jarai nãã (Prov. 15:28). Bʉyikʉza widira: «¿Wãrĩnuka mʉ̃a iyaʼa jaraira akʉza naʉ̃ba kʼarebaika iyira? ¿Mʉ̃a jarabʉbara wawiata ũdubibʉka akʉza ibiade jarabʉka?». Kʼawuara mebẽrã wẽrãra kĩrãkita ũrĩbʉdeba akʉza i biʼia bedʼeabʉraneba (akʉra Proverbios 31:26). Biʼia krĩchara bʉa kʼãrẽ jarabʉta akʉza sãwũã jarabʉta, naʉ̃ba kʼarebayi wuabemaraʉ̃me neũdukʼawua bia bʼaita akʉza aduʼa bʼaita.

13. ¿Sãwũã bia akʉseapanʉ dayirã deda? (Akʉra potota).

¹³ Kʼawuara bʉ de sãwũã bia erbaita. Ʉ̃kʉrʉ drʉadera wẽrãraba obʉ nekʼãrẽ dedabemara. Maʉ̃ oira bʉ papaba jaradiaseabʉ mawũã ẽ bʉrʉ bʉ neũdukʼawuaba. Mebẽã wẽrã aba yi trʉ̃ Cindyba jarabʉ: «Mʉ̃ papabara mʉ̃aʼa jaradiasi sãwũã zarea trajaita, maʉ̃ra mʉ̃itara jipade nebia kĩrãkʼabasi, iya kʼarebasi mʉ̃ neo kʼawuamarẽã, de bia sʉgʉmarẽã, wua kasu kʼawuamarẽã akʉza ne eda kʼawuamarẽã. Maʉ̃ba mejãcha kʼarebasi mʉ̃ra, mawũã Daizezeita audre oita akʉza mʉ̃ papaba mʉ̃aʼa jaradiasi mebẽrã bia edamarẽã, maʉ̃ba mʉ̃a mejãcha ũdukʼawuasi mebẽrãta akʉza ãyira mʉ̃itara yiza biabasi» (Prov. 31:​15, 21, 22). Mebẽã wẽrãta trajamiabʉrʉ akʉza wuabemarata bia edabʉbʉrʉ, adewara iyi dedabida nekʼãrẽ okʼawuabʉbʉrʉ, naʉ̃ mebẽãra jipade yiza bia, iyi mebẽrãita akʉza mebẽrã kongregasionebemaraita (Prov. 31:​13, 17, 27; Hech. 16:15).

14. ¿Kʼãrẽta kʼawuabʉ Crystal yizadeba akʉza naʉ̃ba sãwũã kʼarebabʉ kʼawuaita kʼãrẽta oita?

¹⁴ Nekʼãrẽ okʼawuara bʉyikʉzaita. Dayikʉzaita nekʼãrẽ okʼawua bʼaira jipade yibia kristianora biaraitara (Filip. 4:11). Mebẽã wẽrã Crystalba jarabʉ: «Mʉ̃ kolegiode baside mʉ̃ yibarirabara kʼarebasida mʉ̃a kʼawuaita kʼãrẽ kurso oita mawũã trajo ũduita, mʉ̃ zezeba kʼarebasi mʉ̃a kontabilidata estudiamarẽã, naʉ̃bara mʉ̃ra mejãcha kʼarebasi». Dayara bari kʼawua ẽ baibara plata sãwũã ũduita, awuarabʉrʉ kʼawuaibara plata sãwũã bia zokʼa kʼawuaita, mawũã ewarade jõbi ẽ baita (Prov. 31:​16, 18). Bʉta sobiabʉbʉrʉ bʉya nekʼãrẽ erbʉba jʉrʉ ẽ bayi edaita nekʼãrẽ bʉa edabe ẽãta akʉza maʉ̃ma plata mejãcha gasta ẽ baita, mawũã audre ewari erbayi Jeowaita trajaita (1 Tim. 6:8).

BIA KʼAWUARA KʼÃRẼTA OITA Ʉ̃RA ZEIDE

15, 16. ¿Mebẽrã wẽrãra dobapanʉrabara sãwũã kʼarebaseapanʉ wuabemarãra? (Marcos 10:​29, 30).

¹⁵ Nebia Jeowaba kãgabʉta erbʉbʉrʉ akʉza nekʼãrẽ okʼawuabʉbʉrʉ, naʉ̃ba kʼarebayi ʉ̃ra zeide nekʼãrẽ bia jida kʼawuaita. Krĩchara bʉa kʼãrẽta oseabʉta.

¹⁶ Krĩchara doba bʼaita. Jesuba zokʼada ũrĩta, ʉ̃kʉrʉ mebẽrãba krĩchabʉ mesera juwa jida ẽ baita, ãyi kulturade mawũã bʼaira bia akʉbʉ ẽ mina (Mat. 19:​10-12). Ʉ̃kʉrʉra doba bʼaita krĩchabʉ nekʼãrẽ awuru kʼarea. Kʼawuabara Jeowabara Jesuʉ̃mebara jʉra ẽãta mebẽrã dobabʉrãra. Naʉ̃ drʉa jõmaʉ̃mae mebẽrã dobapanʉrãra yiza bia mebẽrã kongregasionebemaraita, ãya wuabemarata biʼia akʉpanʉ baera akʉza kãga ũdubipanʉ baera, wuabemarabara ãyira akʉpanʉ ãyi papa kĩrãkʼa akʉza ãyi mebẽã kĩrãkʼa (akʉra Marcos 10:​29, 30; 1 Tim. 5:2).

17. ¿Idi ewade kʼãrẽta oseabʉ mebẽã wẽrã warrarabʉba Jeowaita audre trajaita?

¹⁷ Bʉra Jeowaita ewari jõmaʉ̃nẽ trajaseabʉ. Mebẽrã wẽrãrabara mejãcha kʼarebapanʉ Daizeze Bedʼea jaradiaita naʉ̃ drʉa jõmaʉ̃mae (Sal. 68:11). ¿Bʉara krĩchaseabʉka ewari jõmaʉ̃nẽ trajaita Daizezeita? Bʉra yi nãã edebari baseabʉ, Daizeze de parãbʉde kʼarebaseabʉ, mawũã ẽ bʉrʉ Betelde trajaseabʉ. Yiwidʼira Jeowa maʉ̃ oita akʉza bedʼeara mebẽã mama trajabʉme kʼawuaita bʉa kʼãrẽta oseabʉta mama trajaita. Krĩchara kʼãrẽta oita ũduita bʉa okĩrãbʉta, kĩrãbera bʉta Jeowaita trajabʉbʉrʉ, naʉ̃ba kʼarebaita bʉa nekʼãrẽ mejãcha oita iyi bari.

18. ¿Kʼãrẽa mebẽã wẽrãbara biʼia jida kʼawuaibara iyi kima bʼaira? (Akʉra potota).

¹⁸ Bʉa jidaseabʉ juwa jidaita. Nebia dayirãba atia jaradaba kʼarebayi bʉ kima bia bʼaita. Bʉta juwa jidaita krĩchabʉbʉrʉ jʉra kʼawuabara kʼaiʉ̃me juwa jidaita. Juwa jidai nããra biʼia krĩchaibara akʉza kĩrãbera bʉara wawia ũdubibarata bʉ kima bʼaiara (Rom. 7:2; Efes. 5:​23, 33). Bʉyikʉza krĩchara: «¿Naʉ̃ mebẽãbara zarea obʉka Jesude kĩrãkʼa krĩchaita akʉza oita? ¿Iyara nããra obʉka Jeowaba kãgabʉta? ¿Nekʼãrẽ bia jida kʼawuabʉka? ¿Iya kayirua obʉrʉdera ĩjãbʉka maʉ̃ra iya osita? ¿Wawia ũdubibʉka yuwẽrãra? ¿Iyara mʉ̃ra kʼarebaika Jeowa neũdukʼawua bʼaita akʉza diaika mʉ̃a nekʼãrẽ nesidabʉra? ¿Adewara iyira mʉ̃ neũdukʼawua bia bʼaika? ¿Iyaʼa nekʼãrẽ omarẽã jarapanʉra jõma obʉka?» (Luc. 16:10; 1 Tim. 5:8). Mamina kĩrãbera bʉa kima biata ũdukĩrãbʉbʉrʉ bʉsida kima bia bʼaibarata.

19. ¿Yuwẽrãra kʼãrẽa sobia baseabʉ jarabʉdade iyira yi kima kʼarebabarita?

¹⁹ Daizeze Bedʼeaba jarabʉ yuwẽrãra yi kima kʼarebata (Gén. 2:18). ¿Maʉ̃ba jarakĩrãbʉka yuwẽrãra zeri ẽãta? Mawũã ẽ. Yibia yuwẽrãta yi kima kʼarebabaribʉrʉ, Daizeze Bedʼeaba jarabʉ baera Jeowasida yãrã kʼarebabarita (Sal. 54:4; Heb. 13:6). Bari jaraita yuwẽrãbara kʼarebaseabʉ yi kimaba yi mebẽrãita nei oita jidabʉrʉde bia omarẽã, iya Jeowata kãgabʉ baera zarea obʉ wuabemaraba ũdudamarẽã yi kimaba kʼãrẽ nebia erbʉta (Prov. 31:​11, 12; 1 Tim. 3:11). Bʉra audre kima bia baseabʉ zarea obʉbʉrʉ Jeowa kʼaita bʼaita akʉza kʼarebabʉbʉrʉ bʉ mebẽrãta, adewara mebẽrã kongregasionebemata.

20. ¿Kʼãrẽta oseabʉ papabara yi mebẽrã kʼarea?

²⁰ Bʉra papa baseabʉ. Bʉ mia kʼãĩna tẽãra wũãwũã baraseabʉ (Sal. 127:3). Maʉ̃ kʼarea krĩchaibara ʉ̃ra zeide kʼãrẽta oita, naʉ̃ artikulode nebia kʼawuadaba kʼarebayi kima bia bʼaita akʉza papa bia bʼaita. Bʉa kãgata ũdubibʉbʉrʉ akʉza wuabemarata bia edabʉbʉrʉ, adewara mesera kĩrʉ ẽ bʉrʉ, kʼarebayi bʉ mebẽrã sobia babita akʉza bʉ wũãwũãrasida aduʼapanañi (Prov. 24:3).

21. ¿Kʼãrẽta sentipanʉ dayirã mebẽrã wẽrãra kʼarea akʉza kʼãrẽa? (Akʉra poto yi nããrabemata).

²¹ Mebẽrã wẽrãra daibara marara mejãcha kãga, maraba Jeowa kʼarea nekʼãrẽ obʉ kʼarea akʉza iyi pʉwʉrʉ kʼarea (Heb. 6:10). Marabara zarea opanʉ nebia ũdubita akʉza nekʼãrẽ okʼawuaita mawũã wuabemara kʼarebaita akʉza kʼawuaita kʼãrẽta oita ʉ̃ra zeide nekʼãrẽ berabaribʉrʉde. Bʉra Jeowa organizasionʼitara jipade nebia zroma.