Jeowade obʉde nekʼãrẽ biata mejãcha kʼawuasi

Mʉ̃ yibarirãra Segunda Guerra Mundial baeside Estonianeba wãsi Alemaniaena mʉ̃ waridama, maʉ̃ tẽã wãibasi Canadáeda. Dai jʉ̃ẽkata jʉ̃ẽsidera panesi Ottawa Canadáde. Daira eterre de orriya kʼãĩpanasi, nekʼãrẽ mejãcha neẽbasi daira, diapedara eterre ne ʉmʉtrʉ kopanasi.

Ewari aba Jeowa ʉ̃rʉ Kʼawuabipanʉrãta zeda kʼãrãpe mʉ̃ papa le ũrĩbisida Apocalipsis 21:3, 4​ta maʉ̃ testota mʉ̃ papa soidu jʉ̃ẽsi baera, iyira mejãcha jẽgasi. Maʉ̃ tẽã Daizeze ʉ̃rʉ audre kʼawua jʉ̃drʉsida baera mʉ̃ papata mʉ̃ zezeʉ̃me mesera buru kʼoesida.

Mʉ̃ yibarirabara wiña bedʼeabasi ingle bedʼeara, mamina Daizezedera ãyara wãrĩnu ojʉ̃drʉsida. Sabadoza jiorro obaride trajada tẽã Sudbury Ontariode, mʉ̃ zezeba mʉ̃ tẽãbʉta akʉza mʉ̃ta edebasi Daizeze Bedʼea jaradiade. Adewara semanaza mebẽrãbawara ãba estudiapanasi karta Jarakabʉta. Mʉ̃ yibarirabara jaradiasida audre kãgamarẽã Jeowata. Maʉ̃ba kʼarebasi mʉ̃ bebʉ Jeowa diaita poaga 1956de, maʉ̃nera mʉ̃ra 10 poagabasi. Mʉ̃ yibariraba Jeowa mejãcha kãga ũdubibʉba kʼarebasi mʉ̃a Jeowa mejãcha kãga bʼaita.

Maʉ̃ta mʉ̃ kolegiodeba ẽdrʉda tẽã wiña aña osi. Mʉ̃a krĩchasi baera mʉ̃ta yi nãã edebari 70 ora diabaribara plata mejãcha gana ẽ baita akʉza mʉ̃ abione drʉa jãpe wãita krĩchabadara obe ẽ baita. Aramaʉ̃ta mʉ̃ra traja jʉ̃drʉsi emisorade, maʉ̃ trajora mʉ̃a mejãcha kãgabasi. Mʉ̃ra diamasi trajabasi baera, badua wã ẽ basi ãba yi jʉrebarimara akʉza neũdukʼawuara Jeowa kãga ẽãta erbasi. Mʉ̃a kʼawuabʉ baera Daizeze Bedʼeaba kʼãrẽta jarabʉta awuara oita krĩchasi.

Mʉ̃ra wãsi Oshawa Ontarioma, mama ũdukʼawuasi Ray Normanta akʉza yi nawekau Leslita adewara wuabemara mebẽrã yi nãã edebari 70 ora diabarita. Ãyi jõmaʉ̃ba bia edasida mʉ̃ra, mʉ̃a ũduside ãyi kʼãrẽaba sobiabʉta naʉ̃ba kʼarebasi mʉ̃a oita krĩchabada aripe oita. Ãya mʉ̃a mawũã so zarea diasida baera, yi nãã edebariba jʉ̃drʉsi septiembre 1966de. Mʉ̃ra mejãcha sobiabasi jõma bia wã baera, mamina tẽã jõma awuara besi.

JEOWABA BɄAʼA KʼÃRẼ OMARẼÃ JARABɄRɄDERA, ZAREA ORA ARIPE OITA

Mʉ̃ kolegiode estudiabʉeda kartata dia bʉesi Betelʼeda Toronto Canadáde. Mʉ̃ wabida yi nãã edebari eda poaga kimarebayeda. Mamina mʉ̃a Leslita kãgabasi baera, krĩcha obasi traja wãña ara wua ũdu ẽ bai baera. Mʉ̃ Jeowa mejãcha yiwidʼida tẽã, krĩchasi Betelʼeda traja wãita, mawũã mʉ̃ mejãcha sopʉabʉmina iya wã asi.

Mʉ̃ra Beteldera trajasi wua sʉgʉ badamae, tẽã sekretariode trajasi, maʉ̃enara Leslira yi nãã edebari 130 ora diabaribasi Gatineau Quebecde. Edaʉde mʉ̃a krĩchabasi iya kʼãrẽta obasita akʉza nama kʼãwũã Betelʼeda traja zeira mʉ̃a bia jidasi kʼawuaita, maʉ̃ne mʉ̃a kʼawuasi Lesli nabʉta nama Betelʼeda trajamarẽã trʉ̃sidata, maʉ̃ba mʉ̃ra mejãcha sobiasi. Akʉza Beteldera daira iyabaʉ kuartode besi, naʉ̃ba kʼarebasi akʉza Lesliʉ̃me jẽda neũdukʼawua bʼaita. Mʉ̃ Betelde trajabʉta poaga kimare babʉrʉde iyiʉ̃me juwa jidasi 27 febrero poaga 1971ne.

Mʉ̃ta Lesliʉ̃me zokʼa bʉesida kongregasion pranse bedʼea bedʼeabʉma Quebecde. Mawũãnata poaga bio berabarida tẽã, mʉ̃ra kongregasionʼra akʉbari zõrãrã babisida 28 poagabʉta. Mʉ̃yikʉza krĩchabasi mʉ̃ra aukʼara warrarata akʉza obe ẽãta, mamina Daizeze Bedʼeade Jeremías 1:7, 8​de jarabʉba mʉ̃aʼa so zarea diasi. Maʉ̃nera Leslira karrode asidentama ũme asidentasi akʉza bia kʼãĩbe ẽ basi diamasira. Mawũẽra krĩchabasi daibara sãwũã akʉita kongregasionʼra. Mamina Lesliba jarasi: «Jeowaba trʉ̃bʉbʉrʉ iya kãgabʉta omarẽã, ¿maʉ̃ra oẽ baibaraka?». Daibara ĩjãsida, mawũã trajasida kongregasionʼra akʉbari zõrãrãne poaga 17 bayeda.

Mʉ̃a nekʼãrẽ mejãcha obʉ baera ewari neẽbasi audre ewari berabarita Lesliʉ̃me. Mawũẽra nekʼãrẽ awuara oibarabasi, maʉ̃ta luneside diapeda mʉ̃ deda timbreta biabisida. Mʉ̃a ãĩ akʉ jʉ̃ẽsidera miõ neẽbasi, awuarabʉrʉ basi ẽta, wuata, maʉ̃ ẽnera basi kesota, netarata, panta, binota akʉza tasarata, adewara basi kartata, maʉ̃ne jarabasi: «Bʉ kimara ewarade neko edera». Maʉ̃ ewadera ewarira biatakerasi, maʉ̃ne jara ũrĩbisi Lesliʼa diskurso oibarabʉta maʉ̃ba wãbe ẽ baita. Mʉ̃ kimaba jarasi bedʼea neẽãta, mamina iyira maʉ̃ kʼarea wiña sobia ẽãsi. Mʉ̃ mesade jewedabʉeda mʉ̃a maʉ̃ ʉ̃rʉ bia krĩchasi. Krĩchasi Efesios 5:25, 28​ba jarabʉta, nama jarabʉ Jeowabara dayi kimaba nesidabʉta diaibarata. Maʉ̃ tẽã Jeowa yiwidʼida tẽã jarasi Lesliʼa: «Wãna», iyira maʉ̃ba mejãcha sobiasi. Daira wãsida karrude do bia bʼai kiru kʼawa, mama dai arigʉ bia berabarisida. Mawũã berabarida tẽã, mʉ̃ara mʉ̃ diskursota osi.

Dai kongregasionʼra akʉbari zõrãrãne trajapanʉra bia berabarisida Columbia Británicadeba Terranova eda. Mʉ̃ra drʉa jãpe wãita krĩchabʉra idibʉrʉ aripe berabarisi. Krĩchabasi eskuela Galaad eda wãita, mamina misionerode bʼaita krĩcha ba ẽ basi. Krĩchabasi misionero bʼaira jipa audre yibiata akʉza mʉ̃a maʉ̃ra obe ẽãta. Akʉza mʉ̃ra perabasi Áfricaeda zokʼadai kʼarea, mamara mejãchabasi baera kayata akʉza yõta. Mʉ̃ra biabasi mʉ̃yibʉmae.

JARASIDA WÃMARẼÃ ESTONIA AKɄZA PAÍSES BÁLTICOSMA

Poaga 1992de Jeowa ʉ̃rʉ Kʼawuabipanʉrã idu jaradiabisida pʉwʉrʉra Unión Soviéticadebema badamae, daiʼa widisida wãkĩrãbʉ kʼawuaita misionerode Estoniaena. Daibara kʼawua ẽ basi maʉ̃ra, maʉ̃ kʼarea Jeowa mejãcha yiwidʼisida. Akʉza jẽda krĩchasida : «Jeowaba trʉ̃bʉbʉrʉ iya kãgabʉta omarẽã, ¿maʉ̃ra oẽ baibaraka?». Daibara ĩjãsida, maʉ̃ne mʉ̃a krĩchasi: «Daira wãna ẽ África edara».

Maʉ̃ kʼarea waña kʼawua jʉ̃drʉsida estonio bedʼeata. Maʉ̃ pʉwʉrʉde jedeko bio berabarida tẽã daiʼa jarasida kongregasionʼra akʉbari zõrãrãba obʉta odamarẽã. Daibara 46 kongregasionʼra akʉdaibara basi, adewara gruporata pʉwʉrʉ zromara ũbeade akʉza Kaliningrado Rusiade. Maʉ̃nera kʼawuaibarabasi leton, lituano akʉza ruso bedʼeata. Daitara maʉ̃ra zarebasi, mamina dai neũdukʼawuarãra bia sentisida daiba opanʉ kʼarea akʉza kʼarebakĩrãne kʼarebasida. Poaga 1999de Estoniara sukursal babisida akʉza mʉ̃ra trajabisida yi nãã edebari mebẽrã Betel akʉbaride. Mʉ̃ra trajasi naʉ̃ra mebẽrãbawara Toomas Edur, Lembit Reile akʉza Tommi Kauko.

Daibara mejãcha ũdukʼawuasida ãyi badamaeba Siberiaeda jʉretapeadata, ãyi karselde bia edada ẽ basimina akʉza ãyi mebẽrãneba jĩgara basimina, ãyi maʉ̃ kʼarea krĩcha zroma obʉta ũdubida ẽ basi. Ũdubibasi ãyira sobiapanʉta akʉza Daizeze Bedʼea jaradiabʉta idubʉda ẽ basi. Naʉ̃ba kʼarebasi kʼawuaita daiba bedʼea zroma erbʉdera awuantadaita adewara sobia baseabʉta.

Leslira wiña enaʉ̃basi baera iyira mejãcha aukʼara basi, daibara kʼawua ẽ basi Leslira mawũã kaya fibromialgiaba mawũã erbʉta. Maʉ̃ kʼarea krĩchasida jẽda wãnaita Canadá eda. Tẽã daiʼa jarasidade Patterson (Nueva York), wãmarẽã krĩchasida mama wãbeda ẽ baita, mamina Jeowa mejãcha yiwidʼisida maʉ̃ kʼarea Jeowabara bia akʉsi daiba jidadara. Maʉ̃ eskueladebʉrʉ Leslira bia akʉsida medikorabara. Mawũã daiba nãã obada kĩrãkʼa ojʉ̃drʉsida.

BEDʼEA DAIBA JɄ̃Ã Ẽ BADATA JARASIDA: AWURU PɄWɄRɄEDA WÃITA

Diamasi 2008de dai Estoniane panʉne sentral mundialdeba trʉ̃sida daiʼa wididaita Congoeda wãseabʉ kʼawuaita. Mʉ̃a kʼawua ẽ basi kʼãrẽ oita akʉza audre perabasi nrʉemane panʉibarabasi baera. Mʉ̃ara kʼãrẽ jara ẽ basi Lesliara, kʼawua basi baera iyira maʉ̃ kʼarea diamasi kʼãĩkaranʉmeita. Mamina mʉ̃trʉ kʼãĩkarabasi mejãcha yiwidʼibasi baera África sãwũãbʉ ʉ̃rʉ.

Maʉ̃ nrʉemane Lesliʼa jarada tẽã daiba krĩchasida: «Jeowaba jarara dayita wãnamarẽã Áfricaeda mamina, ¿sãwũã kʼawuadai mama bia bʼaita, mawũã ẽ bʉrʉ bia ba ẽãta dayita wãna ẽ bʉrʉ?». Mawũẽ dai Estoniane 16 poagabadata wãsida Kinshasa, Congoeda. Sukursaldera jõma biabasi akʉza aduʼabasi. Leslibara nããra kʉbʉsi dai kuartode Canadádeba jʉ̃drʉbʉrʉde tarjeta zake erbadata, maʉ̃ karta zakede eda jarabasi: «Bʉyi udapeadamae ponora». Mejãcha ẽbẽrata ũdukʼawuasida baera akʉza ãyibawara Daizeze Bedʼea jaradiapanasi baera adewara daira misionero baera mejãcha sobiapanasi. Mawũãbʉta ewari bio berabarida tẽã Áfricade pʉwʉrʉ 13 akʉ jʉ̃ẽsida, mama ẽbẽra kĩrãtana ũdukʼawuasida akʉza ãyi sãwũãbʉta. Mawũã taʉsi mʉ̃ perabadara akʉza Jeowa biga diasi África eda zokʼa bʉesi baera.

Congodera mʉ̃a kobisida nedʉwʉrʉ zaketa, daya ko ẽ baita krĩchabadata. Daiba ũduside mebẽrãba maʉ̃ kobarabʉde mejãcha sobiabʉta, daibida ko akʉsi kobʉrʉde daisida sobiasida.

Daibara kʼarebasida ãya nesidabʉde diasida yikota, wuata maʉ̃ awuara Daizeze ʉ̃rʉ jaradiasida, mawũã opanasi meabemaraba yuwẽrãta, wũãwũãrata zʉbʉria opanʉmae. Mebẽrã mejãchaʉta nekʼãrẽ mejãcha erba ẽ basi, ãyi mawũãpanʉinʉ ĩjãpanasi beidara jẽda piradrʉita, Jeowaʉ̃me kʼẽrẽpapanasi akʉza Jeowa organizasionʼʉ̃me. Ãya mawũã opanʉra dai soidu zesi, mawũã ũdubʉrʉba kʼarebasi daiba audre bia akʉita daiba ĩjãbʉra zarea erbʉ kʼawuaita. Ʉ̃kʉrʉ mebẽrãbara aduasida ãyi deta akʉza ãyi ne uta, naʉ̃ba mʉ̃a kʼawuabisi daya nekʼãrẽ bia erbʉra mesera aduaseabʉta. Naʉ̃ba kʼawuasi audre yibiata Daizezede obʼaira, mebẽrã ãya mawũã bedʼea zroma erpanʉne maʉ̃ kʼarea krĩcha zroma opana ẽ basi. Ãyi mawũãbʉba daita kʼarebasi daiba bedʼea zroma erbʉ awuantaita akʉza kayasida.

JARASIDA JEOWAITA TRAJA WÃMARẼÃ ASIAEDA

Daiba kʼawua ẽãne daiʼa jarasida wamarẽã sukursal Hong Kongma. Daibara jipa krĩchada ẽ basi mawũã pʉwʉrʉ Hong Kongʼne panaita, daiba akʉ zebʉrʉ Jeowaba sãwũã kʼareba zebʉrʉta iyita obʉra, maʉ̃ba kʼawuapanasi naʉ̃nebida kʼarebaita akʉza bia wãita. Mawũã poaga 2013de neũdukʼawua Áfricadebemata amaesida, kʼawua ẽ basi daiba kʼãrẽta ũdudaita maʉ̃ tẽã.

Hong Kongnera ẽbẽra kĩrãtanabʉ akʉza pʉwʉrʉ zroma. Cantones bedʼea kʼawuaira jipa zarebasi daitara, mamina mebẽrãbara daira bia edasida akʉza yiko kĩrãtanabʉta mejãcha kosida. Ẽbẽrarã Daizeze Bedʼea ĩjãbʉra audre eaba wãsi, maʉ̃ daucha nekʼãrẽbʉra mejãcha bale wãsi, maʉ̃ba Zõrãrã Buru biaraba biʼia krĩchada kʼãrãpe sukursalba ʉ̃kʉrʉ drʉa erbʉta nẽdo bʉesida. Maʉ̃ tẽã daira poaga 2015de zokʼa bʉesida Corea del Surma, idira daira mamapanʉ. Mawũẽra namabida kʼawuaibarabasi naʉ̃ bedʼeata, mamina sobiapanʉ wabidabʉ baera daiba nekʼãrẽ odaita. Dai neũdukʼawuarabara akʉpanʉ daiba wiña audre bedʼea wãta koreano bedʼeara nãã badaira.

MɄ̃A NEKʼÃRẼ KʼAWUADATA

Wuabemabawara neũdukʼawua bʼaira biode zareabʉ. Mamina kʼawuasida dayareba ibiade bedʼeapanʉbʉrʉ akʉza dayi deda zemarẽã trʉ̃bʉbʉrʉ mawũãra meserabai ũdukʼawuayi. Mebẽrãra dayirã kĩrãkʼabʉ sodera akʉza Jeowabara osi wuabemarabawara neũdukʼawua ba kĩrã bamarẽã, maʉ̃ba ãya aduʼa bedʼeaseapanʉ mawũã audre ũdukʼawuadaita (2 Cor. 6:11).

Daibara kʼawuasida wuabemara bia edaibarata Jeowaba bia edabʉ kĩrãkʼa akʉza Jeowa idu yi edebibarata. Dai krĩcha zroma obʉrʉza akʉza krĩchapanʉne wuabema ẽbẽrarã daibawara biabʉ kʼawuaita akʉpanʉ karta zake daiʼa bʉ diabʉedapeadata. Daiba mawũã ũdu zebʉrʉ Jeowaba panʉbʉta dai yiwidʼibʉra akʉza daira bia akʉbʉta, adewara zarea diabʉta.

Naʉ̃ kʼãwũã poaga bio berabaribʉrʉde Lesliba mʉ̃meba bia kʼawuabʉda ewari jʉrʉibarata dai ãba bʼaita akʉza kʼawuabʉda yibiata dayikʉza ipida bʼaita, audre awuru bedʼea kʼawuabʉde. Adewara diamasiza jʉrʉbʉ sãwũã Jeowaʼa biga diaibarata nekʼãrẽbʉ kʼarea.

Daibara jipa krĩchada ẽ basi awuru drʉade misionero bʼaita. Mamina mʉ̃a kʼawuasi Jeowa kʼarebadeba maʉ̃ jõma oseabʉta. Mʉ̃a kĩrãbebʉ propeta Jeremíasba jaradata: «Bʉa mʉ̃ra sewabʉrʉa Jeowa» (Jer. 20:7). Jeowaba daiʼa nebiata mejãcha dia zebʉrʉ akʉza mʉ̃a jʉ̃ã ẽ badasida ũdubi zebʉrʉ. Adewara mʉ̃ warraraena abione wãita krĩchabadasida aripe berabaribisi akʉza pʉwʉrʉ bio ũdukʼawuakʉabʉrʉ akʉza sukursalʼrata juesoma akʉ jʉ̃ẽsi. Mʉ̃ misionero bʉedara mʉ̃a mʉ̃ kima Lesliʼa mejãcha biga diabʉ, iya kʼarebasi baera mʉ̃ kʼãwũã misionerode trajabʉde aripe oita.

Ewari jõmaʉ̃nẽ kĩrãbepanʉ kʼaita trajapanʉta akʉza kʼãrẽa mawũã opanʉta. Daiba idi ewade nebia ũdubʉra, naʉ̃ba ũdubibʉ sãwũã ʉ̃ra zeide mejãcha bʼaita, maʉ̃ne Jeowaba ewayi iyi juwata akʉza zokʼaibʉra nekʼãrẽ jõma kãgabʉta diayi (Sal. 145:16).