Lepanʉraba widipanʉta

La Atalaya junio 2020de estudiasida naʉ̃ artikulo trʉ̃ra «Que tu nombre sea santificado», naʉ̃ artikuloba ¿sãwũã ẽza jara ũrĩbibʉ dayirãba ĩjãbʉra Jeowa trʉ̃ ʉ̃rʉ akʉza iya sãwũã zokʼabʉ ʉ̃rʉ?

Naʉ̃ artikulode kʼawuasida nekʼãrẽbʉta angeleraba akʉza ẽbẽrarãba ũdubibarata kʼaiarepanʉta: Daizeze trʉ̃ neneẽã erbaita. Jeowaba sãwũã zokʼabʉdeba (iya bia zokʼabʉta mawũã ẽ bʉrʉ bia zokʼabʉ ẽãta), abarikabʉ Daizeze trʉ̃ neneẽã erbaiʉ̃mera. Maʉ̃ kĩrãkʼa ẽbẽra abaʉta kʼẽrẽpabʉta mawũã ẽ bʉrʉ kʼẽrẽpabʉ ẽãta, abarikabʉ Daizeze trʉ̃ neneẽã erbaiʉ̃mera.

¿Kʼãrẽa dayirãbara audre jarapanʉ Jeowa trʉ̃ ʉ̃rʉ akʉza maʉ̃ trʉ̃ sãwũã neneẽã erbai ʉ̃rʉ? Nekʼãrẽ ũbea kʼawuadayi kʼãrẽa mawũã opanʉta.

Nããra, Jardin Edénʼne Diarura imitia bedʼeasi Jeowa trʉ̃ ʉ̃rʉ akʉza Jeowa sãwũãbʉ ʉ̃rʉ, Diaruba Eva bedʼea jaraside jardin Edénʼne ũdubikĩrãbasi, Jeowabara ẽbẽrarãra nebia dia ẽãta akʉza iya zokʼabʉra aripe oẽãta. Maʉ̃are Diarubara jarasi Jeowaba jarada awuara, jarasi Jeowara sewa nebʉrʉ omiata. Iya maʉ̃ jarasidera iyira «Diaru» ba zesi, maʉ̃ bedʼeaba jarakĩrãkʉ «wuabemara ʉ̃rʉ sewida jarabʉta» (Juan 8:44). Evabara ũrĩ ẽ basi Jeowaba jaradara, mama ũdubisi Jeowaba zokʼamarẽã kãga ẽ basita (Gén. 3:1-6). Idibasidu Diaruta Jeowa trʉ̃ ʉ̃rʉ imitia bedʼeabʉ akʉza sewidata jarabʉ Jeowa sãwũãbʉ ʉ̃rʉ. Yi maʉ̃ ĩjãpanʉraitara zare Jeowaba jarabʉ ũrĩta. Maʉ̃ba Jeowa pʉwʉrʉitara Jeowa trʉ̃ ʉ̃rʉ mawũã imitia jaradara jipade zeri ẽ. Maʉ̃ kʼarea naʉ̃ drʉara kʼãwũã mejãcha zʉbʉria wã.

Yi ũmeta, iya parãna bia bamarẽã Jeowabara nekʼãrẽ oyi iyi trʉ̃ neneẽã erbaita. Naʉ̃ra jipade yibia Jeowaitara. Iya jarabʉ: «Wãrĩnu mʉ̃ara neneẽã oyi mʉ̃ trʉ̃ra» (Ezeq. 36:23). Akʉza Jesuba jara amaesi kʼãrẽta audre yibiabaibarata Jeowa odepanʉraitara ãyi yiwidʼibʉrʉde: «Bʉ trʉ̃ra neneẽã baide bʉa» (Mat. 6:9). Daizeze Bedʼeaba jarada ʉ̃rʉ jarabʉ kʼãrẽaba yibiata Daizeze trʉ̃ ʉ̃rʉ ibia bedʼeaita. Akʉdaya ʉ̃kʉrʉ yizarata: «Ũdubidua Jeowa iyi trʉ̃ra yi zromabʉta, maʉ̃ta ũdubibara baera» (1 Crón. 16:29; Sal. 96:8). «Ibia trãidua Jeowa trʉ̃ ʉ̃rʉ» (Sal. 66:2). «Bʉ trʉ̃ ʉ̃rʉ ibia bedʼeabayi ewari jõmaʉ̃nẽ» (Sal. 86:12). Ewari aba Jeowa ʉ̃tʉba bedʼeasi Jerusalén templode, maʉ̃ berabariside Jesuba jarasi: «Zeze bʉ trʉ̃ra yi zroma babira», Jeowaba iyaʼa panʉsi: «Yi zroma babisi akʉza jẽda yi zroma babiya» (Juan 12:28).a

Yi ũbeata, Jeowaba nekʼãrẽ oi krĩchabʉra oyi iyi trʉ̃ kʼarea akʉza iyi ʉ̃rʉ ibia bedʼeamarẽã. Krĩchara naʉ̃ta: Jesuba mil poagabayeda zokʼabʉta berabarida tẽãra, ¿kʼãrẽba sãwũãi? ¿Angeleraba akʉza ẽbẽrarãba kʼãrẽta krĩchai Jeowa trʉ̃ ʉ̃rʉ maʉ̃ ewaridera? Maʉ̃ panʉnaita jẽda kĩrãbedaya bedʼea ũme nãã jaradata: Jeowaba sãwũã zokʼabʉta akʉza ẽbẽrarã iyiare kʼẽrẽpa baseapanʉ kʼawuaita. ¿Ẽbẽrarãba ewari jõmaʉ̃nẽ ũdubibaraka Jeoware kʼẽrẽpabʉta? Ũdubibara ẽ, maʉ̃ ewaridera neẽbayi ẽbẽrarãba kʼãrẽa ũdubita kʼẽrẽpapanʉta. Ẽbẽrarãra ewari jõmaʉ̃nẽpanañi. Akʉza maʉ̃nera, ¿Jeowaba ũdubibaraka iyara bia zokʼaseabʉta? Mawũã ẽ. Maʉ̃ ewaridera angelerata akʉza ẽbẽrarãta abarika krĩchadayi akʉza iduaribidayi Jeowaba ãyita zokʼamarẽã. Maʉ̃ ewaridera, ¿Jeowa pʉwʉrʉitara Jeowa trʉ̃ra audre yibia bʼaika?

Maʉ̃ ewaridera jõmaʉ̃ba wãrĩnuta kʼawuapanañi Jeowa ʉ̃rʉ akʉza iyi trʉ̃sida neneẽã bayi. Mawũãsidu Jeowa trʉ̃ra audre yibiabayi iyi pʉwʉrʉita, ¿kʼãrẽa? Ũdudai baera sãwũã Jeowaba nekʼãrẽ bia mejãcha oũdubibʉta. Krĩchara naʉ̃ta: Jesuba iya zokʼabʉta Jeowa diabʉrʉde, «Daizezeta nekʼãrẽ jõma ʉ̃rʉ ba[yi], jõmaraita» (1 Cor. 15:28). Maʉ̃ tẽã ẽbẽrarãra «Daizeze warrara kĩrãkʼa neneẽã panañi» (Rom. 8:21). Jeowabara iya oita krĩchabadara aripe berabaribiyi, nekʼãrẽ ʉ̃tʉbʉta akʉza nekʼãrẽ nama egorodebʉta ãba zebiyi mebẽrã kĩrãkʼa (Efes. 1:10).

Naʉ̃ jõma berabarida tẽã, ¿sãwũã sentidai Jeowa mebẽrã ʉ̃tʉpanʉta akʉza nama egorode? Jõmaʉ̃ta ibia bedʼeakĩrãpanañi Jeowa trʉ̃ ʉ̃rʉ. Davidba naʉ̃ta bʉsi: «Ibia bedʼeaidua Daizeze Jeowa ʉ̃rʉ [. . .]. Ibia bedʼeaidua iyi trʉ̃ ʉ̃rʉ ewari jõmaʉ̃nẽ» (Sal. 72:18, 19). Ewari jõmaʉ̃nẽ ũdudayi kʼãrẽa Jeowa trʉ̃ ʉ̃rʉ ibia bedʼeaita.

Dayirãba Jeowa trʉ̃ ʉ̃rʉ krĩchabʉrʉdera krĩchapanʉ iya kãga ũdubi zebʉrʉ ʉ̃rʉbida (1 Juan 4:8). Ewari jõmaʉ̃nẽ kĩrãbedayi Jeowaba dayirãra parãsita kãga baera akʉza dayirãta kãga baera diasi yi warrata, adewara ewari jõmaʉ̃nẽ kĩrãbedayi Jeowabara bia zokʼabʉta akʉza kãgata ũdubibʉta. Mamina ũdudayi sãwũã Jeowaba kãga ũdubi bʼaita iya nekʼãrẽ parãna. Ewari jõmaʉ̃nẽ iyi kʼawa bakĩrãpanañi, wũãwũã yi zeze kʼawa bakĩrãbʉ kĩrãkʼa akʉza iyi trʉ̃ ʉ̃rʉ ibia bedʼeakĩrãpanañi (Sal. 73:28).