ARTIKULO KʼAWUAITA 20
TRÃBI 67 «Daizeze Bedʼea jaradiaibara»
Kãgaba jaradiabara
«Nããra jaradiadaibara bedʼea biata naʉ̃ drʉa jõmaʉ̃nẽ» (MAR 13:10).
KʼÃRẼTA ŨDUDAITA
Akʉdayi sãwũã kãgaba jaradia wãbʉrʉde jaradia kĩrã jaradia bʼaita.
1. Yi reunion anual 2023de, ¿kʼãrẽ ʉ̃rʉ kʼawuasida?
POAGA 2023de dayirãba ĩjãbʉ ʉ̃rʉ sãwũã ũrĩbʉta audre biʼia jara ũrĩbisida yi reunion anualdea adewara bedʼea yiwidita jarasida dayirãba Daizeze bedʼea jaradiabʉ ʉ̃rʉ. Kʼawuasida ʉ̃kʉrʉ ẽbẽrarã Babilonia zroma jõna tẽã Daizezeare baseabʉta, adewara jarasida noviembre poaga 2023deba ʉ̃tara nejaradiabarirabara wua jarada ẽ baibasita kartara sõbe amaesita, bideo sõbe ũdubisita akʉza ãyi nekʼawuabari sõbe jẽda akʉ jʉ̃ẽsita, ¿naʉ̃ kʼawua kĩrã awuara obʉrʉba ũdubikĩrãbʉka Daizeze bedʼea jaradiaira nawedara audre yibia basita akʉza idi ewadera biga ẽãta? Mawũã ẽ.
2. ¿Kʼãrẽa yibia Daizeze bedʼea ewariza audre jaradia wãira? (Marcos 13:10).
2 Ewari berabari wãbʉrʉza audre jaradiaibara, ¿kʼãrẽa? Ewari jõita kʼaita ba baera, akʉdayi Jesuba kʼãrẽta jarasita Daizeze bedʼea jaradia wãi ʉ̃rʉ ewari jõbodoare (akʉra Marcos 13:10). Mateoba bʉdadera Jesuba jarasi Daizeze Bedʼeata naʉ̃ drʉa jõmaʉ̃nẽ jaradiadaita ewari jõi nãã (Mat. 24:14). Bedʼea ewari jõi abʉba jarakĩrãbʉ naʉ̃ drʉade jõma Diaruba zokʼabʉ jõi ewarita, Jeowaba jidasi kʼãrẽ ewaride akʉza kʼãrẽ ũmadaʉde mawũã oira (Mat. 24:36; 25:13; Hech. 1:7). Ewari berabari wãbʉrʉza maʉ̃ ewari kʼawapanʉ (Rom. 13:11). Maʉ̃ ewari zeyeda jaradia takeraibara.
3. ¿Kʼãrẽa jaradiapanʉ Daizeze Bedʼeara?
3 Dayikʉzaʉba naʉ̃ta krĩchaibara, ¿Kʼãrẽa jaradiapanʉ bedʼea bia Daizeze Nokʼodebemara? Daizeze bedʼeara jaradiapanʉ kãgaba, naʉ̃ artikulode naʉ̃ ʉ̃rʉ kʼawuadayi, dayirãbara Daizeze Bedʼeara jaradia wãpanʉ bedʼea biata kãga baera, jaradia wãpanʉ wuabemarata kãga baera, jaradia wãpanʉ Jeowata akʉza iyi trʉ̃ta kãgapanʉ baera.
JARADIA WÃPANɄ BEDʼEA BIATA KÃGA BAERA
4. ¿Dayirãba bedʼea bia ũrĩbʉrʉdera sãwũã sentipanʉ?
4 Krĩchara bʉa bedʼea bia ũrĩside bʉ sãwũã sentisita. Bari jaraita, bʉra mejãcha sobiasibaibara bʉ mebẽrãnebema aba wũãwũã baraside, mawũã ẽ bʉrʉ trajo bʉa nesidabʉde bʉaʼa trajo diasidade, maʉ̃ba sobiasibaibara. Maʉ̃ kʼarea maʉ̃ bedʼea biara wuabemara jarakĩrãbasi baibara. Abarika sentisi baibara bʉa bedʼea yi audre yibiata ũrĩside, bedʼea bia Daizeze Nokʼo ʉ̃rʉbemata.
5. ¿Sãwũã sentisi bʉa Daizeze Bedʼea kʼawuakata kʼawuasidera? (Akʉra potota).
5 Krĩchara bʉ sãwũã sentisita naʉ̃ra bedʼea biara ũrĩside, kʼawuaside Jeowabara bʉra kãgata, iyara kãgabʉta bʉra iyi mebẽrãnebema bamarẽã akʉza zʉbʉria naʉ̃ drʉade bʉsida jõbiyi adata, adewara bʉ mebẽrã beidasida jẽda piradrʉbita kʼawuaside (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Maʉ̃ bedʼea bia ʉ̃rʉ kʼawuaiba sobiabisi bʉra (Luc. 24:32). Bʉa kʼawua wãba sobiabasi, maʉ̃ba jaradiakĩrãbasi wuabema bʉa kʼawua wãta (naʉ̃ testoʉ̃me akʉra Jeremías 20:9).
Dayirãba bedʼea bia Daizeze Bedʼea ʉ̃rʉ ũrĩkata ũrĩsidera maʉ̃ kʼarea mejãcha sobiasida, maʉ̃ba yi wuabemara jaradiakĩrãsida maʉ̃ ʉ̃rʉ. (Akʉra parrapo 5).
6. ¿Kʼãrẽta kʼawuapanʉ Ernest akʉza Rose nebʉradebara?
6 Akʉdaya mebẽã Ernestb berabaridata, iyi 10 poagabʉde yi zezera beisi, iya nebʉrabʉ: «¿Ʉ̃ta wãsika mawũã ẽ bʉrʉ jipa neẽka? Mawũã widibasi mʉ̃yikʉza, wuabema warrara yibarirabawara ãba bʉdera maʉ̃ba sopʉabasi mʉ̃ra». Ernestʼra badua wãbasi yi zeze joudapeadama, mama jʉ̃ẽpe Daizezeʼa kʼãwũã yiwidʼibasi: «Daizeze ʉ̃tʉbema mʉ̃a kʼawuabira mʉ̃ zeze sama bʉta». Yi zeze beida 17 poaga babʉrʉde Daizeze ʉ̃rʉ jaradiasida iyaʼa, aramaʉ̃ta iya sobia ĩjãsi. Kʼawuasi baera beidarabara kʼãrẽ kʼawua ẽãta akʉza kʼãrẽ senti ẽãta, kʼãĩbʉ kĩrãkʼabʉta akʉza jẽda piradrʉita beidarãra (Ecl. 9:5, 10; Hech. 24:15). Ernestba kʼawuakĩrã badara jõma kʼawuasi maʉ̃ne, maʉ̃ba iyira mejãchade sobiasi akʉza yi kima Rosebida kʼawuakĩrãsi maʉ̃ ʉ̃rʉ, iyara mejãcha kãga zesi bedʼea bia Daizeze Bedʼeadebemara. Ãyira poaga 1978de buru kʼoesida, ãya kʼawuadata akʉza ãya ĩjãbʉta jaradiasida ãyi mebẽrãʼa, ãyi neũdukʼawuara akʉza yi maʉ̃ ʉ̃rʉ kʼawuakĩrãbʉ ẽbẽrarã. Maʉ̃ba kʼarebasi Ernestba Roseʼʉ̃meba ẽbẽrarã 70 berabari buru kʼoedamarẽã.
7. ¿Kʼãrẽta berabaribari Daizeze Bedʼeadebema dayi soidu zebʉrʉdera? (Lucas 6:45).
7 Abarika Daizeze Bedʼea dayi soidu zebʉrʉdera wuabemara jaradiakĩrãbʉ maʉ̃ ʉ̃rʉ (akʉra Lucas 6:45). Abarika sentipanʉ Jesu kʼaidubemara nããra pananaba jarada kĩrãkʼa, ãya jarasi: «Daiba ũdudapeadata akʉza ũrĩnapeadata jara ẽãranʉma ẽ bayi» (Hech. 4:20). Mejãcha kãgapanʉ wãrĩnuta, maʉ̃ kʼarea ẽbẽra bioʉa jaradiakĩrãpanʉ.
JARADIAPANɄ ẼBẼRARÃTA KÃGAPANɄ BAERA
8. ¿Kʼãrẽa jaradiapanʉ Daizeze bedʼeara wuabemara? (Akʉra rekuadro «kãgara ẽbẽrarã Jesu kʼaidu babira» akʉza akʉra potota).
8 Jeowaba Jesuʉ̃meba ẽbẽrarã kãgapanʉ, abarika dayirãbida kãgapanʉ maʉ̃rane kĩrãkʼa (Prov. 8:31; Juan 3:16). So borekeata ũdubipanʉ ẽbẽrarã Daizeze neẽãbʉ kĩrãkʼa bʉra akʉza kʼãrẽ bia jʉ̃ãbʉ ẽãra (Efes. 2:12). Ẽbẽrarãba mejãchade erbʉ bedʼea zromata, mamina dayirãba erpanʉ ãyi kʼarebaira, maʉ̃ra bedʼea bia Daizeze Nokʼodebema. Dayirãba naʉ̃ra ẽbẽrarãta kãga baera akʉza so borekea akʉpanʉ baera naʉ̃ra ẽbẽrarã jaradiakĩrãpanʉ bedʼea bia Daizeze Bedʼeadebemata. Maʉ̃ bedʼea bia ãyi soidu zebʉrʉde kʼarebabʉ nebia jʉ̃ã bʼaita ʉ̃ra zeide akʉza idi ewade audre sobia bamarẽã, adewara kʼarebabʉ ʉ̃ra zeidebida jʉ̃ãpanamarẽã ewari jõmaʉ̃nẽ bʼaita (1 Tim. 6:19).
Dayirãba ẽbẽrarãta kãga baera akʉza ãyaʼa so borekeata ũdubikĩrãpanʉ baera, zarea opanʉ jõmaʉ̃a jaradiaita bedʼea bia Daizeze Bedʼea ʉ̃rʉ. (Akʉra parrapo 8).
9. ¿Ʉ̃ra zeide kʼãrẽ berabarita jaradiapanʉ ẽbẽrarã akʉza kʼãrẽa mawũã jaradiapanʉ? (Ezequiel 33:7, 8).
9 Ẽbẽrarãta kãga baera ãyaʼa jaradiapanʉ naʉ̃ drʉa jõira ara kʼaitabata (akʉra Ezequiel 33:7, 8). Dayirãbara so borekea ũdubipanʉ dayi de kʼawa bʉa akʉza dayirã mebẽrã Daizeze ode be ẽãra, ãyara kʼawua ẽ baera kʼãrẽ bedʼea zromata zei arakʼaitabara. Aranʉbai ũdudayi zʉbʉria zromata maʉ̃ bedʼea zroma kĩrãkʼara naʉ̃ drʉa parãnapeadadeba ʉ̃tara ũdudaka mia maʉ̃ kĩrãkʼa wua ũdudakabayi (Mat. 24:21). Kãgapanʉ ẽbẽrarãba kʼawuadamarẽã Daizezeba kʼawua oi ewaride kʼãrẽ berabarita, nããra religion zeri ẽãrara jõma jõbiyi, maʉ̃are Diaruba zokʼabʉrata jõma jõbiyi Armagedónʼne (Apoc. 16:14, 16; 17:16, 17; 19:11, 19, 20). Yiwidʼipanʉ Jeowaba kʼarebamarẽã ẽbẽrarãba dayirãba jaradiabʉta ũrĩkĩrãnamarẽã mawũã Jeowaba jarabʉta odamarẽã ãyabida mamina, ¿kʼãrẽta sãwũã berabari ẽbẽrarã Daizeze Bedʼea ũrĩkĩrã ẽãra akʉza dayirã mebẽrãʼarasida?
10. ¿Kʼãrẽa yibia jarakaita ẽbẽrarã aranʉbai kʼãrẽ berabari ʉ̃rʉ?
10 Nããbema artikulode jarada kĩrãkʼa Jeowabara kãgabʉbaibara Babilonia zroma jõna tẽãra, ẽbẽrarã iyi ʉ̃rʉ ĩjãbʉrʉra ẽdrʉdamarẽã, mawũẽra kʼãwũã weda ewariza jaradiaibara Jeowa ʉ̃rʉ ẽbẽrarã, ãya kʼawuadamarẽã Jeowa ʉ̃rʉ akʉza dayirãbawaraʉba Jeowata kãgamarẽã. Kĩrãbedadrʉ naʉ̃ ʉ̃rʉ, dayirãba kʼãwũã weda Daizeze ʉ̃rʉ jaradiapanʉbʉrʉ ẽbẽrarã, bedʼea zroma zebʉrʉde maʉ̃ ʉ̃rʉ kĩrãbeyi ãyara (naʉ̃ testoʉ̃me akʉra Ezequiel 33:33). Maʉ̃ba kʼarebaseabʉ zʉbʉria zroma zebʉrʉde kĩrãbeita dayirãba jaradata, mawũã Jeowama zedamarẽã akʉza dayirãbawaraʉba Jeowaba jarabʉta oita. Bari jaraita, yumakẽrã karsel akʉbari Filipodebemata drʉa ure zebʉrʉdebʉrʉ Daizeze odebakĩrãsi, maʉ̃ kĩrãkʼa Babilonia zroma jõbʉrʉ tẽã ẽbẽrarãba krĩchaseabʉ dayirãba jaradiada ʉ̃rʉ mawũã Daizezema zekĩrãseabʉ (Hech. 16:25-34).
JARADIAPANɄ KÃGAPANɄ BAERA JEOWATA AKɄZA IYI TRɄ̃TA
11. ¿Kʼãrẽneba ũdubipanʉ Jeowa wawia ũdubipanʉta, zarea diapanʉta akʉza iyi ʉ̃rʉ i bia bedʼea bipanʉta? (Apocalipsis 4:11 akʉza akʉra potota).
11 Dayirãba kʼãwũã jaradiapanʉba ũdubibʉ Jeowa kãgabʉta (akʉra Apocalipsis 4:11). Dayirãra bedʼea abarikapanʉ naʉ̃ testoba jarabʉme: «Daizeze Jeowa, bʉ abapaiʼabʉrʉ ibia bedʼeaibara, wawiata ũdubibara akʉza zareata». Dayirãba wuabema ẽbẽrarã jaradiabʉrʉde naʉ̃ drʉadebʉra jõma Jeowaba parãsita akʉza dayirãsida Jeowaba parãnata bʉta maʉ̃neba Jeowa ʉ̃rʉ ibia bedʼeapanʉ akʉza wawia ũdubipanʉ, dayi ewarita bia zokʼara akʉza daya nekʼãrẽ bia erbʉta bia zokʼara Daizeze bedʼea jaradia wãita, mawũãra dayi zarea jõma diayi Jeowaʼa (Mat. 6:33; Luc. 13:24; Col. 3:23). Dayirãra Daizeze ʉ̃rʉ bedʼeakĩrã akʉza iyi trʉ̃ ʉ̃rʉ jaradiakĩrã wuabemara akʉza kʼãrẽta jaradiakĩrãbʉta maʉ̃ trʉ̃ba, ¿kʼãrẽa?
Dayirãba dayirã ewarita bia zokʼabʉbʉrʉ akʉza dayirãba nekʼãrẽ erbʉdeba zarea opanʉbʉrʉ Daizeze Bedʼea jaradiaita, mawũãra ũdubipanʉ dayirã zareata diapanʉta Jeowaʼa. (Akʉra parrapo 11).
12. ¿Sãwũã Jeowa trʉ̃ ʉ̃rʉ ibia bedʼeabipanʉ dayirãbara?
12 Dayirãbara Jeowata mejãcha kãgabʉ baera, kãgapanʉ ẽbẽrarãba iyi trʉ̃ ʉ̃rʉ ibia bedʼeamarẽã, maʉ̃ba jaradiapanʉ (Mat. 6:9). Adewara Diarubida Daizeze trʉ̃ ʉ̃rʉ imitia bedʼeabʉ baera, dayirãbara Daizeze Bedʼeata ẽbẽrarã jaradiapanʉ kʼawuadamarẽã wãrĩnuta Jeowa ʉ̃rʉ (Gén. 3:1-5; Job 2:4; Juan 8:44). Akʉza ẽbẽrarã Daizeze Bedʼea ũrĩkĩrãpanʉa jaradiakĩrãpanʉ Daizeze ʉ̃rʉ akʉza kãgapanʉ ẽbẽrarãba kʼawuadamarẽã Daizeze Jeowara kãgabarabʉta akʉza jõma aripe zokʼabʉta adewara Daizeze Nokʼobʉrʉ jõbita zʉbʉriara akʉza jõmaʉ̃ta aduʼa sobiababita (Sal. 37:10, 11, 29; 1 Juan 4:8). Daizeze Bedʼea jaradia wãbʉrʉdera dayirãbara Daizeze trʉ̃ ʉ̃rʉ ibia bedʼeabipanʉ, dayirãra arigʉ sobiapanʉ Jeowa ʉ̃rʉ Kʼawuabipanʉrãba oibarata opanʉ baera.
13. ¿Kʼãrẽa mejãcha yibia Jeowa ʉ̃rʉ Kʼawuabipanʉrã bʼaira? (Isaías 43:10-12).
13 Jeowabara dayirãta jidasi iyi bari bedʼeamarẽã (akʉra Isaías 43:10-12). Dããrabade Zõrãrã Burubiaraba karta bʉ diabʉedade naʉ̃ta jarabasi: «Jipa arigʉ yibia Jeowa ʉ̃rʉ Kʼawuabipanʉrã bʼaira».c ¿Kʼãrẽa mawũã jarasida? Bari jaraita, krĩchara awuru ẽbẽraba jarapanʉta bʉa nemitia osita, maʉ̃ kʼarea bʉa nesidabʉ ẽbẽra aba bʉare bedʼeamarẽã akʉza bʉ ʉ̃rʉ wãrĩnuta jaramarẽã, ¿maʉ̃nera bʉara kʼai ẽbẽrata jidai? Bʉara jʉrʉyi iyide ĩjãseabʉta akʉza wãrĩnuta jarabʉta mawũã bʉare bedʼeabʉrʉde ĩjãnamarẽã iyi bedʼeara. Jeowaba dayirãta jidasi iyiare bedʼeamarẽã, naʉ̃ba ũdubibʉ Jeowabara dayirãra biʼia ũdukʼawuabʉta akʉza ĩjãbʉ iyi ʉ̃rʉ wãrĩnuta jaraita. Dayirãra maʉ̃ kʼarea mejãcha sobiapanʉ baera nekʼãrẽ jõma opanʉ, mawũã iyi trʉ̃ ʉ̃rʉ ibia bedʼeabita adewara iyi ʉ̃rʉ sewidata jarabʉdadera dayirãra zarea opanʉ iyi ʉ̃rʉ wãrĩnu jaraita, mawũã ũdubipanʉ mejãcha sobiapanʉta Jeowa ʉ̃rʉ Kʼawuabibari baera (Sal. 83:18; Rom. 10:13-15).
DAIZEZE BEDʼEA JARADIAPANAÑI NAɄ̃ EWARI JÕÑIENA
14. ¿Ʉ̃ra zeidera kʼãrẽta berabariseabʉ?
14 Meserabai kʼawuakĩrãpanʉ ʉ̃ra zeide kʼãrẽta berabarita, maʉ̃ kʼarea Jeowa kʼarebadeba kãgapanʉ ẽbẽrarãba ĩjãnamarẽã Daizeze ʉ̃rʉ, zʉbʉria zroma zei naweda adewara mejãcha sobiapanʉ kʼawuasida baera naʉ̃ta berabariseabʉta: Zʉbʉria zroma jʉ̃drʉbʉrʉdera ẽbẽrarã mejãchaʉba oda ẽ bayi Diaruba zokʼabʉta awuarabʉrʉ Jeoware panañi akʉza Jeowa ʉ̃rʉ ibia bedʼeadayi (Hech. 13:48).
15, 16. ¿Kʼãrẽ opanʉta idubʉ ẽ bai akʉza kʼai sõbe eda?
15 Maʉ̃enara dayirãbara mejãcha erbʉ trajora, Daizeze Nokʼo ʉ̃rʉ naʉ̃ drʉa jõmaʉ̃nẽ jaradiaibara maʉ̃ta wuara jaradi ẽ bai baera akʉza Daizeze ewari zeita arakʼaitaba baera dayirãbara jaradiaibara ẽbẽrarã aranʉ kʼãrẽta sãwũã berabarita. Mawũã Daizezeba kʼawua oi ewari zebʉrʉdera, ẽbẽrarãba kʼawuadayi dayirãba jaradiapanʉra Daizezedeba zesita (Ezeq. 38:23).
16 ¿Kʼãrẽta okĩrãpanʉ dayirãbara? Bedʼea biata, ẽbẽrarãta Jeowata akʉza iyi trʉ̃ta audre kãgapanʉ baera, naʉ̃ba kʼarebabʉ jaradiakĩrãne jaradiapanaita Daizeze Jeowaba jarayeda wua jaradiada ẽ marẽã.
TRÃBI 54 «Naʉ̃ta yi oara»
a Reunion anualʼra osida 7 octubre 2023de, pʉwʉrʉ Newburgh Jeowa ʉ̃rʉ Kʼawuabipanʉrãba asamblea obadamae Nueva Yorkde (Estados Unidos). Maʉ̃ta jõma ũdubisida JW Broadcasting® yi nããrãbemara noviembre 2023de, yi ũmeta enero 2024de.
b Akʉra artikulo «La Biblia les cambió la vida» yi trʉ̃ra «Me impresionaron las respuestas claras y lógicas de la Biblia», naʉ̃ra ʉ̃tʉ zesi La Atalaya 1 febrero 2015de.