TEMA AM BɅ TIʼ TEJCHIBAL
¿Baqui tilem jiñi Halloween?
¿Muʼ ba i mejlel jiñi Halloween yaʼ baqui chumulet? Ili qʼuiñijel yaʼʌch miʼ ñumen mejlel yaʼ ti Estados Unidos yicʼot Canadá, miʼ mejlel cheʼ ti 31 de octubre. Anquese ili qʼuiñijel maʼañic miʼ mejlel tiʼ pejtelel pañimil, mucʼʌch i mejlel qʼuiñijel tac lʌcʼʌ lajal bʌ bajcheʼ jiñi Halloween. I miʼ tajob ti tʼan chaʼan miʼ loqʼuel ti julaʼ i chʼujlel jiñi chʌmeñoʼ bʌ, jiñi muʼ bʌ i melob brujería, jiñi xibajob yicʼot jiñi Diablo. (Qʼuele jiñi recuadro «Qʼuiñijel tac lʌcʼʌ lajal bʌ bajcheʼ jiñi Halloween».)
Tajol jatet maʼ mel ili qʼuiñijel chaʼan jach maʼ ñusan qʼuin a wicʼot a walobilob i mach chaʼañic maʼ ñop chaʼan miʼ tilel i julaʼtañet i chʼujlel jiñi chʌmeñoʼ bʌ. Pero an muʼ bʌ i yʌlob chaʼan mach weñic cheʼ mi lac mel ili qʼuiñijel. ¿Chucoch?
Jumpʼejl libro muʼ bʌ i taj ti tʼan jiñi qʼuiñijel tac muʼ bʌ i mejlel ti Estados Unidos miʼ yʌl: «Ti jiñi qʼuiñijel chaʼan Halloween miʼ pʌjyel i chʼujlel jiñi chʌmeñoʼ bʌ yicʼot jiñi xibajob, lʌcʼʌl tiʼ pejtelel ora miʼ bʌcʼtesañob lac piʼʌlob». (Qʼuele jiñi recuadro «Bajcheʼ tsaʼ tejchi jiñi Halloween».) I cheʼʌch jaʼel jiñi yambʌ qʼuiñijel tac: Mach loqʼuemic ti Biblia i muc jach i melob chaʼan miʼ chʼujutesañob jiñi i ñojteʼelob. Ili ora cabʌl lac piʼʌlob miʼ melob ili qʼuiñijel chaʼan miʼ ñop i pejcañob jiñi chʌmeñoʼ bʌ.
Anquese jiñi Halloween yaʼ jach miʼ mejlel ti Estados Unidos, wolix i tech i melob ti yambʌ país. Pero tiʼ sujm jiñi lac piʼʌlob mach yujilobic baqui tilem jiñi qʼuiñijel yicʼot jujunchajp muʼ bʌ i cʌjñel ti jimbʌ qʼuin. (Qʼuele jiñi recuadro «¿Baqui tsaʼ loqʼui?».)
Jiñi ochemoʼ bʌ ti jiñi ñopbal wicca, muʼ bʌ i melob brujería yicʼot muʼ bʌ i melob jiñi i costumbre jiñi celtajob, miʼ bej subeñob jiñi Halloween bajcheʼ cʌmbil wajali, Samhain, i chʼujul miʼ qʼuelob ili qʼuin. Jumpʼejl periódico ti Estados Unidos tsiʼ taja ti tʼan tsaʼ bʌ i yʌlʌ juntiquil xʼixic muʼ bʌ i mel brujería: «[Jiñi añoʼ bʌ i ñopbal] mach yujilobic chaʼan cheʼ bʌ miʼ melob ili qʼuiñijel woliʼ chaʼleñob qʼuiñijel yicʼoton lon i mi lon c wen mulan».
Jiñi qʼuiñijel chaʼan Halloween mach loqʼuemic ti Biblia. Jiñi Biblia miʼ jamʌ subeñonla: «Mach yomic miʼ yajñel ti laʼ tojlel [...] mi xticʼlaya mi xwujt mi jini muʼ bʌ i wʌn ñaʼtan chuqui mi caj i yujtel, [...] mi jini muʼ bʌ i yʌcʼ i bʌ tiʼ wenta xiba chaʼan miʼ sub i tʼan yicʼot chaʼan miʼ mel ñuc tac bʌ i yeʼtel, mi jini yujil bʌ i pejcʌntel chʼujlelʌl» (Deuteronomio 18:10, 11, qʼuele jaʼel Levítico 19:31; Gálatas 5:19-21).
Jiñi familiajob tijicña miʼ mejlel i ñusañob anquese maʼañic miʼ melob qʼuiñijel tac cheʼ tac bʌ bajcheʼ jiñi Halloween
Jin chaʼan, ¿mach ba yomic mi lac wen qʼuel baqui tilem jiñi Halloween yicʼot yambʌ qʼuiñijel tac lʌcʼʌ lajal bʌ? Mi tsaʼ mele, tajol mi caj i cʼotel a ñaʼtan chaʼan maʼañix mi caj a mel jiñi qʼuiñijel.
«[Jiñi añoʼ bʌ i ñopbal] mach yujilobic chaʼan cheʼ bʌ miʼ melob ili qʼuiñijel woliʼ chaʼleñob qʼuiñijel yicʼoton lon i mi lon c wen mulan» (Tsaʼ bʌ i yʌlʌ juntiquil xʼixic muʼ bʌ i mel brujería).