¿Chucoch mi la quilan wocol, mi lac ñoxʼan yicʼot mi lac chʌmel?
Dios miʼ qʼuelonla bajcheʼ i yalobil, jin chaʼan mach yomic cheʼ mi la quilan wocol. Cheʼ jiñi, ¿chucoch mi lac ñusan cabʌl wocol?
Tiʼ mul jiñi ñaxam bʌ tsaʼ mejliyob
«Tiʼ tojlel juntiquil wiñic, jiñi mulil tsaʼ ochi ti pañimil i tiʼ caj jiñi mulil tsaʼ ochi jiñi chʌmel, i cheʼʌch tsaʼ pam pujqui jiñi chʌmel tiʼ tojlel pejtelel wiñicob» (ROMANOS 5:12).
Cheʼ bʌ Dios tsiʼ mele (pʌtʌ) Adán yicʼot Eva, tojʌch tsaʼ mejliyob. I tsaʼ aqʼuentiyob wem bʌ i chumlib, i cʼabaʼ pʌcʼʌbʌl Edén. Cheʼ jiñi, tsaʼ subentiyob chaʼan miʼ mejlel i cʼuxbeñob i wut tiʼ pejtelel jiñi teʼ am bʌ yaʼ ti pʌcʼʌbʌl, pero cojach juntejc maʼañic. Pero tsiʼ cʼuxbeyob i wut jiñi teʼ mach bʌ yomic, i cheʼ bajcheʼ jiñi tsiʼ chaʼleyob mulil (Génesis 2:15-17; 3:1-19). Come maʼañic tsiʼ jacʼbeyob i tʼan Dios, tsaʼ chojquiyob loqʼuel ti jiñi tʼojol jax bʌ pʌcʼʌbʌl. Ti jimbʌ ora, wen wocol tsaʼ caji i ñusañob, tsaʼ tiliyob i yalobil i wocol tsiʼ ñusayob jaʼel. Ti wiʼil, tsaʼ laj ñoxʼayob i tsaʼ chʌmiyob (Génesis 3:23; 5:3-5). Jin chaʼan ili ora jaʼel mi laj cʼamʼan, mi lac ñoxʼan yicʼot mi lac chʌmel (sajtel) come i yalobilonla Adán yicʼot Eva.
Tiʼ mul jiñi xibajob
«Jiñi pañimil an tiʼ pʼʌtʌlel Satanás» (1 JUAN 5:19).
Satanás juntiquilʌch ángel tsaʼ bʌ i ñusʌbe i tʼan Dios (Juan 8:44; Apocalipsis 12:9). Ti wiʼil, yambʌ ángelob tsiʼ temeyob i bʌ yicʼot Satanás, i tsaʼ sujtiyob ti xiba. Ili jontol bʌ ángelob miʼ cʼʌñob i pʼʌtʌlel chaʼan miʼ lotiñonla yicʼot chaʼan miʼ ñajtʼesañonla tiʼ tojlel Dios, i cheʼ jaʼel miʼ ñop i ñijcan lac pusicʼal chaʼan mi lac mel mach bʌ weñic (Salmo 106:35-38; 1 Timoteo 4:1). Satanás yicʼot i xibajob wen tijicñayob cheʼ bʌ miʼ ticʼlañoñobla.
Tiʼ caj mach bʌ weñic mi lac yajcan lac mel
«Jiñʌch mi caj lac lotben i wut jiñi woli bʌ lac pʌcʼ» (GÁLATAS 6:7).
An qʼuiñil mi lac ñusan wocol tiʼ caj jiñi mulil yicʼot tiʼ caj chaʼan ili pañimil an tiʼ cʼʌb Satanás. Pero an qʼuiñil joñon jachla mi lac techben lac bʌ jiñi wocol. Jin chaʼan mi wen chuqui mi lac mel, wen chuqui mi lac taj, pero mi mach cheʼiqui mi lac mel, mi lac tajben i wocolel. Jumpʼejl ejemplo, cheʼ bʌ juntiquil tatʌl wem bʌ xʼeʼtel, miʼ mel chuqui utsʼat yicʼot miʼ cʼuxbin i familia, tijicña miʼ yajñelob. Pero mi mucʼ ti alas taqʼuin, miʼ wen jap lembal yicʼot mach yomic eʼtel, pʼumpʼum mi caj i yajñelob. Jin chaʼan, weñʌch cheʼ mi lac jacʼben i ticʼojel jiñi tsaʼ bʌ i meleyonla come yom chaʼan mi lac taj cabʌl chuqui wen yicʼot chaʼan cabʌl i ñʌchʼtilel lac pusicʼal (Salmo 119:165).
Tiʼ caj añoñixla ti «cojix tac bʌ qʼuin»
«Ti jiñi cojix tac bʌ qʼuin [...] jiñi lac piʼʌlob mi caj i bajñel cʼuxbiñob i bʌ, mi caj i cʼuxbiñob taqʼuin, [...] mi caj i ñusʌbeñob i tʼan i tat i ñaʼ, [...] maʼañic mi caj i ticʼob i bʌ, wen jontolob, maʼañic mi caj i cʼuxbiñob chuqui wen» (2 TIMOTEO 3:1-5).
Ili ora, cabʌlob cheʼ yilalob i melbal (chaʼlibal) cheʼ bajcheʼ miʼ yʌl ili profecía, ili miʼ pʌsbeñonla chaʼan chumuloñixla ti «cojix tac bʌ qʼuin» chaʼan ili pañimil (mulawil). Cheʼ jaʼel, jiñi Tsʼijbujel tsiʼ wʌn alʌ chaʼan miʼ cajel guerra tac, wiʼñal, tsʌtslel yujquel lum yicʼot cʼamʌjel tac (Mateo 24:3, 7, 8; Lucas 21:10, 11). Jin chaʼan tiʼ caj iliyi cabʌlob miʼ ñusañob wocol yicʼot miʼ chʌmelob.